ពិធីប្រណាំងទូកងគឺបានចាប់ផ្តើមតាំងពីម៉ោង ១១:០០ ព្រឹកមកម៉្លេះនៅមុខព្រះបរមរាជវាំង។ នៅពេលនេះធាតុអាកាសនៅមាត់ទន្លេអំណោយផល មេឃស្រឡះល្អ ហើយនៅពេលនេះដែរគឺបងប្អូនប្រជាពលរដ្ឋកំពុងធ្វើដំណើរមកចូលរួមទស្សនាការប្រណាំងទូកកាន់តែច្រើនឡើងៗ ក្នុងនោះរួមទាំងភ្ញៀវទេសចរបរទេសផងដែរ។
នៅពេលនេះដែរ គឺមានវត្តមានមន្ត្រីជាន់ខ្ពស់ ដែលជាសមាជិកព្រឹទ្ធសភា រដ្ឋសភា រាជរដ្ឋភិបាល ភ្ញៀវជាតិ និងភ្ញៀវអន្តរជាតិ យ៉ាងច្រើនកុះករ កំពុងរង់ចាំព្រះរាជវត្តមានដ៏ខ្ពង់ខ្ពស់បំផុតរបស់ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលនឹងយាងទតការប្រណាំងទូកងថ្ងៃដំបូង នៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នៅរសៀលនេះផងដែរ។
