កាលពីវេលាថ្ងៃត្រង់ថ្ងៃទី១៤វិច្ឆិកា ប្រមុខរដ្ឋ / ប្រមុខរដ្ឋាភិបាល នៃប្រទេសអាស៊ាន បានយាងនិងអញ្ជើញចូលរួមក្នុង ពិធីពិសារអាហារការងារថ្ងៃត្រង់ ក្រោមប្រធានបទ ពាណិជ្ជកម្មសេរី និងសេដ្ឋកិច្ចសកលលោក។
ប្រមុខរដ្ឋ / ប្រមុខរដ្ឋាភិបាល នៃប្រទេសអាស៊ានទាំងអស់ បានសំដែងនូវការតស្វាគមន៍យ៉ាងកក់ក្តៅចំពោះវត្តមានឯកឧត្តម ចាសស្ទីន ទ្រូដូ (Justin Tru deanu) នាយករដ្ឋមន្រ្តីកាណាដា ឯកឧត្តម សេបាសស្ទៀន ពីណេរ៉ា(Seba-Stian Pinera) ប្រធានាធិបតី នៃសាធារណរដ្ឋឈីលី និងលោក ជំទាវ គ្រីស្ទីន ឡាហាដ (Christine Lagarde) នាយកគ្រប់គ្រងមូលនិធិហិរញ្ញវត្ថុអន្តរជាតិ (IMF) ដែលបានឆ្លើយតបអញ្ជើញចូលរួមក្នុងកិច្ចប្រជុំកំពូលដ៏មានសារសំខាន់នេះ។
មេដឹកនាំអាស៊ានក៏បានចាត់ទុកថា នេះគឺជាវេទិកាដ៏កម្រមិនធ្លាប់មានពីមុនមក ហើយស្ថិតក្រោមប្រធានបទមួយប្រកបដោយសារសំខាន់ណាស់សម្រាប់តំបន់ និងសកល នៅក្នុងបរិការណ៍សេដ្ឋកិច្ច និងពាណិជ្ជកម្មបច្ចុប្បន្ន។ ជាក់ស្តែងការកើនឡើង នៃនិន្នាការគាំពារនិយម សកម្មភាពពាណិជ្ជកម្មឯកតោភាគី និងសង្រ្គាមពាណិជ្ជកម្ម បាននិងកំពុងតែដាក់ សម្ពាធ និងគំរាមកំហែងដល់ស្ថិរភាពកំណើនសេដ្ឋកិច្ច និងវិបុលភាពនៃតំបន់ ជាពិសេសប្រទេស កំពុងអភិវឌ្ឍន៍។
ក្នុងបរិកាណ៍នេះ អាស៊ានកំពុងតែប្រឹងប្រែងជំរុញការធ្វើសមាហរណកម្មសេដ្ឋកិច្ចក្នុងតំបន់ ឲ្យកាន់តែស៊ីជម្រៅ តាមរយៈការពន្លឿនការធ្វើពាណិជ្ជកម្មសេរី។ តួយ៉ាអាស៊ានបាន ខិតខំប្រឹងប្រែងយ៉ាងសស្រាក់សស្រាំ ក្នុងការជំរុញសម្រេចឲ្យបាននូវ ភាពជាដៃគូសេដ្ឋកិច្ចគ្រប់ជ្រុងជ្រោយ ក្នុងតំបន់ ដែលនោះគឺជាសក្ខីកម្ម នៃការប្តេជ្ញាចិត្តមួយរបស់អាស៊ាន ចំពោះសេរីភាវូបនីយកម្មពាណិជ្ជកម្ម និងសមាហរណកម្មសេដ្ឋកិច្ច។ ក្នុងកិច្ចប្រជុំនោះដែរ មេដឹកនាំទាំងអស់ បានឯកភាពគ្នា ក្នុងការចេញសេចក្តីប្រកាសរបស់ប្រធានកិច្ចប្រជុំអាហារថ្ងៃត្រង់ ដែលរៀបចំ ដោយឯកឧត្តម លី ស៊ានឡុង នាយករដ្ឋមន្រ្តីសិង្ហបុរី។
