'/%3E%3C/svg%3E){kind=small}
'/%3E%3C/svg%3E){kind=small}
AKP ភ្នំពេញ ថ្ងៃទី០៩ ខែវិច្ឆិកា ឆ្នាំ២០១៨ -ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានគូសបញ្ជាក់ថា រាជរដ្ឋាភិបាលនីតិកាលទី៦ នៃរដ្ឋសភា បានដាក់ចេញអនុវត្តន៍នូវកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ ដើម្បីកំណើនការងារ សមធម៌ និងប្រសិទ្ធភាព កសាងមូលដ្ឋានឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ដើម្បីបន្តបេសកកម្មជាប្រវត្តិសាស្ត្រ ដោយប្ដេជ្ញាចិត្តសម្រេចឱ្យបាននូវគោលដៅចម្បងៗជាយុទ្ធសាស្ត្រ សម្រាប់ការអភិវឌ្ឍប្រទេសជាតិ។
ក្នុងមីទ្ទិញអបអរសាទរខួបអនុស្សាវរីយ៍លើកទី៦៥ នៃទិវាបុណ្យឯករាជ្យជាតិ ៩ វិច្ឆិកា និងទិវាកំណើតកងយោធពលខេមរភូមិន្ទ ដែលប្រារព្ធធ្វើនាព្រឹកថ្ងៃសុក្រ ២កើត ខែកត្ដិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៩ ខែវិច្ឆិកា ឆ្នាំ២០១៨ នៅខាងមុខព្រះបរមរាជវាំង ក្រោមព្រះរាជាអធិបតីភាពដ៏ខ្ពង់ខ្ពស់ របស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងមានការអញ្ជើញចូលរួមរបស់ សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា សមាជិកសមាជិកា ព្រឹទ្ធសភា រដ្ឋសភា រាជរដ្ឋាភិបាល អង្គទូតនៃបណ្ដាប្រទេស ជាមិត្ត ព្រមទាំងមន្ត្រីរាជការ កងកម្លាំងប្រដាប់អាវុធ សិស្សានុសិស្ស និងប្រជាពលរដ្ឋប្រមាណជាង២ម៉ឺននាក់នោះ សម្ដេចតេជោនាយករដ្ឋមន្ត្រីបានថ្លែងថា គោលដៅចម្បងៗ ជាយុទ្ធសាស្ត្រ រួមមាន ទី១. បន្តកសាងប្រទេសជាតិឱ្យមានវឌ្ឍនភាពលើគ្រប់វិស័យ មានសាមគ្គីជាតិរឹងមាំ សីធម៌សង្គម សមធម៌ សេរីភាព និងយុត្តិធម៌ លទ្ធិប្រជាធិបតេយ្យ និងសិទ្ធិមនុស្ស ដើម្បីជីវភាពសម្បូរសប្បាយរបស់ប្រជាជន និងភាពសុខដុមរមនា ទាំងក្នុងគ្រួសារ សហគមន៍ និងសង្គមជាតិទាំងមូល។ ទី២. ការពារឯករាជ្យជាតិ សន្តិភាព អធិបតេយ្យ និងបូរណភាពទឹកដី ការពារសមិទ្ធផលសង្គមជាតិ លើកកម្ពស់កិត្យានុភាព ទប់ស្កាត់ការជ្រៀតជ្រែកកិច្ចការផ្ទៃក្នុងកម្ពុជា និងប្រឆាំងជាដាច់ខាតរាល់សកម្មភាព ដែលពាក់ព័ន្ធនឹងបដិវត្តពណ៌ ឬការញុះញុងណាមួយ ដែលបង្កឱ្យមានអស្ថិរភាពនយោបាយ ឬចលាចល ក្នុងសង្គមជាតិកម្ពុជា។ ទី៣. បន្តដោះស្រាយបញ្ហាព្រំដែនគោក និងទឹកជាមួយប្រទេសជិតខាង ដោយផ្អែកលើមូលដ្ឋានច្បាប់អន្តរជាតិ និងជំរុញអនុវត្តន៍យុទ្ធសាស្ត្រអភិវឌ្ឍន៍តំបន់ព្រំដែន ឱ្យទៅជាព្រំដែនសន្តិភាព មិត្តភាព និងសហប្រតិបត្តិការ និងមិនអនុញ្ញាតឱ្យបរទេសប្រើប្រាស់ទឹកដីកម្ពុជា ដើម្បីប្រឆាំង និងប្រទេសជិតខាង។ ទី៤. ទប់ស្កាត់ និងបង្ក្រាបបទល្មើសគ្រប់ប្រភេទ រួមមាន ហិរញ្ញប្បទានភេរវកម្ម ការសម្អាតប្រាក់ ការជួញដូរមនុស្ស អាជីវកម្មផ្លូវភេទ ឧក្រិដ្ឋកម្មឆ្លងដែនគ្រប់ប្រភេទ និងបន្តជំរុញអនុវត្តន៍ គោលនយោបាយភូមិ ឃុំមានសុវត្ថិភាព ឱ្យមានប្រសិទ្ធភាពខ្ពស់។
សម្ដេចតេជោនាយករដ្ឋមន្ត្រីក៏បានថ្លែងនូវគារវកិច្ចយ៉ាងស្មោះត្រង់បំផុត ថ្វាយព្រះករុណាព្រះអង្គម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជាជាទីគោរពសក្ការៈដ៏ខ្ពង់ខ្ពស់បំផុត ព្រះអង្គតែងតែបន្តព្រះរាជកិច្ចព្រះមហាវីរក្សត្រ ព្រះវររាជបិតាជាតិខ្មែរ ជា ពិសេសព្រះអង្គតែងប្រោសព្រះរាជទាននូវការគាំទ្រចំពោះព្រឹទ្ធសភា រដ្ឋសភា និងរាជរដ្ឋាភិ បាលនៃព្រះរាជាណាចក្រកម្ពុជា ដើម្បីបុព្វហេតុសេចក្ដីសុខ សន្តិភាព ស្ថិរភាពជាតិ ឯកភាពជាតិ ការអភិវឌ្ឍជាតិ ការលើកស្ទួយជីវភាព សុខុមាលភាព និងភាពសុខដុមរមនា របស់ប្រជាជន។ សម្ដេចតេជោបានគូសបញ្ជាក់ថា ពេលនេះយើងទាំអស់គ្នាកំពុងនៅ មុខវេទិកាព្រះបរមរាជវាំង ដើម្បីចូលរួមអបអរសាទរខួបអនុស្សាវរីយ៍លើកទី៦៥ នៃទិវាបុណ្យ ឯករាជ្យជាតិ និងខួបលើកទី៦៥ នៃកំណើតកងយោធពលខេមរភូមិន្ទដែលព្រះវររាជបិតាជាតិ ព្រះបរមរតនកោដ្ឋជាទីគោរពសក្ការៈដ៏ខ្ពង់ខ្ពស់ ព្រះអង្គបានបង្កើតឡើង ហើយដែលកន្លងមក និងបច្ចុប្បន្ននេះយើងកំពុងបំពេញបេសកកម្មថែរក្សាការពារសុខសន្តិភាព បូរណភាពទឹកដី និងភាពសុខសាន្តរបស់ប្រជាជន និងរួមចំណែកការពារថែរក្សា បេតិកភណ្ឌជាតិ ដែលជា មរតកមិនអាចកាត់ថ្លៃបានពីបុព្វបុរសខ្មែរឱ្យបានស្ថិតស្ថេរគង់វង្ស។ សម្ដេចតេជោបានបន្ថែមថា “ទូលព្រះបង្គំជាខ្ញុំ សូមគោរពដឹងគុណ និងចងចាំជានិច្ចនូវពលកម្មដ៏ឧត្ដុង្គឧត្ដមរបស់យុទ្ធជន យុទ្ធនារីដ៏អង់អាចក្លាហានរបស់ជាតិ ដែលបានពលីជីវិត ដើម្បីជាតិ សាសនា និងព្រះមហាក្សត្រ៕
ដោយ ជឹម ណារី
