នៅព្រឹកថ្ងៃសុក្រ ១៥កើត ខែបឋមាសាឍ ឆ្នាំច ព.ស. ២៥៦១ ត្រូវនឹងថ្ងៃទី២៧ ខែមិថុនា ឆ្នាំ២០១៨នេះ ក្នុងឱកាសចូលជួបសម្តែងការគួរសម និងពិភាក្សាការងារជាមួយ ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្រ្តីស្តីទីទទួលបន្ទុកទីស្តីការគណៈរដ្ឋមន្រ្តី នៅវិមានមិត្តភាព រាជធានីភ្នំពេញ ។
ឯកឧត្តម ប៉ាន់យ៉ារ៉ាក់ ភូនសាប់ (Panyarak POOLTHUP) ឯកអគ្គរាជទូតថៃថ្មីប្រចាំកម្ពុជា បានថ្លែងថា នៅក្នុងការបោះឆ្នោតជ្រើសតាំងតំណាងរាស្រ្តនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ឯកឧត្តម នឹងបញ្ជូនអ្នកសង្កេតការណ៍បោះឆ្នោតមកជួយកម្ពុជា ហើយលោកជឿជាក់ថា ការបោះឆ្នោតនាពេលខាងមុខ នឹងប្រព្រឹត្តទៅដោយសេរី ត្រឹមត្រូវ និងយុត្តិធម៌។ ឯកឧត្តម ក៏បានបន្ថែមថា ភាគីថៃនឹងស្ម័គ្រចិត្តជួយគាំទ្រ ទៅលើដំណើរការបោះឆ្នោតនៅកម្ពុជានាពេលខាងមុខ ប្រសិនបើភាគីកម្ពុជាត្រូវការ។
ឯកឧត្តមកិត្តិនីតិកោសលបណ្ឌិត ប៊ិន ឈិន បានថ្លែងអំណរគុណដល់ឯកអគ្គរាជទូតថៃថ្មីប្រចាំកម្ពុជា និងជូនពរឱ្យឯកឧត្តមទទួលបាននូវជោគជ័យនៅក្នុងបេសកកម្មការទូតនៅកម្ពុជា។ ឯកឧត្តមក៏បានបន្ថែមថា កម្ពុជា-ថៃ មានទំនាក់ទំនងល្អក្នុងនាមជាប្រទេសជិតខាងនឹងគ្នា ហើយកិច្ចសហប្រតិបត្តិការផ្នែកសេដ្ឋកិច្ច និងពាណិជ្ជកម្មរវាងប្រទេសទាំងពីរក៏មានភាពល្អប្រសើរផងដែរ ដែលមានទំហំទឹកប្រាក់ជាង៦ពាន់លានដុល្លារសហរដ្ឋអាមេរិក នៅឆ្នាំ២០១៧កន្លងមកនេះ។ ដោយឡែក សម្រាប់ភ្ញៀវទេសចរណ៍ថៃ ក៏បានធ្វើដំណើរមកកម្ពុជាប្រមាណជិត ៥០ម៉ឺននាក់ផងដែរ ដែលបញ្ជាក់ថា ពីមួយឆ្នាំទៅមួយឆ្នាំ វិស័យសេដ្ឋកិច្ច និងទេសចរណ៍រវាងប្រទេសទាំងពីរមានការកើនឡើងជាលំដាប់។
ឯកឧត្តមកិត្តិនីតិកោសលបណ្ឌិត ប៊ិន ឈិន ក៏បានគូសបញ្ជាក់ថា ប្រមុខរាជរដ្ឋាភិបាលនៃប្រទេសទាំងពីរ ក៏បានខិតខំធ្វើកិច្ចការងារព្រំដែនបានទទួលលទ្ធផលល្អប្រសើរផងដែរ តាមរយៈគណៈកម្មាធិការព្រំដែននៃប្រទេសទាំងពីរ ហើយឯកឧត្តមក៏បានលើកទឹកចិត្តឱ្យបន្តធ្វើការងារជាមួយគ្នា ឱ្យទទួលបានលទ្ធផលល្អជាបន្ថែមទៀត៕
