អង្គភាព​ព័ត៌មាន និង​ប្រតិកម្មរហ័ស នៃទីស្តីការ​គណៈរដ្ឋមន្ត្រី​ បើកវគ្គ​បណ្តុះ​បណ្តាល​ចំ​ណេះ​ដឹង​ជាមូលដ្ឋាន វិជ្ជាជីវៈមន្ត្រី​អ្នក​នាំ​ពាក្យ​ស្ថាប័ន​រដ្ឋ​

137

ព្រឹក​​ថ្ងៃ​ទី​២ ខែ​ឧសភា ឆ្នាំ​២០១៨នេះ នៅ​ទី​ស្តីការ​គណៈរដ្ឋមន្ត្រី​ អង្គភាព​ព័ត៌មាន​ និង​ប្រតិកម្មរហ័ស នៃ​ទី​ស្តី​ការ​គណៈរដ្ឋមន្ត្រី​ បាន​រៀប​ចំ​បើក​វគ្គ​បណ្តុះបណ្តាល​ចំ​ណេះ​ដឹង​ជា​មូលដ្ឋាន​វិជ្ជា​ជី​វៈមន្ត្រី​អ្នក​នាំ​ពាក្យ​​ស្ថាប័ន​រដ្ឋដល់​ថ្នាក់ដឹកនាំ​ និង​​មន្ត្រីចំ​នួន​​៧០រូប តំ​ណាង​ឱ្យ​៣៣ក្រសួង និង​ស្ថាប័ន​ថ្នាក់ជាតិ​ ក្រោម​អធិបតី​ភាព​ ឯកឧត្តម ស្វាយ ​ស៊ីថា រដ្ឋលេខាធិការ និង​ជាប្រធាន​អង្គភាព​ព័ត៌មាន និង​ប្រតិកម្ម​រហ័ស​ នៃ​ទី​ស្តីការគណៈរដ្ឋមន្ត្រី​។

នេះ​ជា​វគ្គ​បណ្តុះ​បណ្តាល​ជំ​ហាន​ទី១ ហើយ​ដែល​ជំ​ហាន​បន្ទាប់​នឹង​រៀប​ចំ​នៅ​ថ្ងៃ​ទី​៧ ដល់​ថ្ងៃ​ទី​១១ ខែ​ឧសភា ឆ្នាំ​២០១៨ខាងមុខ​ ដោយ​គ្រូជំ​នាញ​ៗ ​ដែល​មាន​បទ​ពិសោធន៍​ជាច្រើន​ឆ្នាំ​លើ​កិច្ច​ការងារ​ព័ត៌មាន និង​នាំ​ពាក្យ​ ដែល​នឹង​ចែករម្លែក​ចំ​ណេះ​ដឹង​ដល់​មន្ត្រី​អ្នក​នាំ​ពាក្យតំ​ណាង​ក្រសួង​ស្ថាប័នរដ្ឋ​របស់កម្ពុជា ដើម្បីបំ​ពេញ​ការងាររបស់​ខ្លួន​ប្រកប​ដោយ​វិជ្ជា​ជីវៈខ្ពស់។

បទ​បង្ហាញ​ដែល​បាន​ធ្វើ​ឡើង​ក្រោម​​ប្រធាន​បទ​សំ​ខាន់ៗចំ​​នួន​៤ គឺ​ ១‑ ​វិធី​សាស្ត្រ​របស់​អ្នកនាំ​ពាក្យ​ ទី២‑ ចិត្តសាស្ត្រ​មនុស្ស​ និង​ព័ត៌មាន ទី៣‑ តួនាទី និង​ការទទួល​ខុសត្រូវ​របស់ប្រភព​ព័ត៌មាន និង​ទី៤‑ ប្រសិទ្ធភាព​នៃការ​ឆ្លើយ​តប​របស់មន្ត្រី​អ្នក​នាំ​ពាក្យ​ទៅ​កាន់​អ្នក​សារព័ត៌មាន​ ដែល​ចែក​រម្លែកបទ​ពិសោធន៍ដោយ ឯកឧត្តម ហ៊ុយ វណ្ណៈ, លោក ប៉ែន បូណា​, លោក​ សោម​ សត្តនា និងឯកឧត្តម នេត្រ​ ភក្ត្រា ដែល​សុទ្ធ​សឹង​តែ​ជា​អ្នក​សារព័ត៌មាន​ និង​អ្នក​នាំ​ពាក្យដែល​មាន​បទ​ពិសោធន៍នៅក្នុង​វិស័យ​ព័ត៌មាន និង​ទំ​​នាក់ទំ​នងជា​មួយ​បណ្តាញ​ផ្សព្វផ្សាយ​ព័ត៌មាន​។

ឯកឧត្តម ស្វាយ​ ស៊ីថា ក្នុង​​នាមឯកឧត្តមឧបនាយករដ្ឋមន្ត្រីប្រចាំ​ការ ប៊ិន ឈិន រដ្ឋមន្ត្រី​ស្តី​ទី​ទទួល​បន្ទុក​ទី​ស្តីការ​គណៈរដ្ឋមន្ត្រី​ បាន​មាន​ប្រសាសន៍ថា តួនាទី​​របស់​មន្ត្រី​​អ្នក​នាំ​ពាក្យ​ស្ថាប័ន​រដ្ឋ មាន​សារៈសំ​ខាន់​ខ្លាំង​ណាស់​ គឺមិន​ត្រឹម​តែ​ជា​និមិត្តរូប​ ឬជា​ស្ពាន​ចម្លង​ព័ត៌មាន​ពិត​ ផ្លូវ​ការ​របស់​ស្ថាប័ន​នី​មួយៗទៅ​កាន់​អ្នក​សារព័ត៌មាន និង​សាធារណ​មតិប៉ុណ្ណោះ​ទេ ថែម​ទាំង​ជា​អ្នកការពារ​រាជ​រដ្ឋាភិបាល និង​ចូលរួម​​​​ថែរក្សាការ​ពា​រសុខសន្តិភាព ស្ថិរភាព​នយោបាយ អធិបតេយ្យភាព បូរណ​ភាព​​ទឹក​ដី​ ​ឯករាជ្យ និង​ការ​ឯកភាព​ភាព​ជាតិ​ផង​ដែរ។​

ឯកឧត្តម ស្វាយ ស៊ីថា បាន​បញ្ជាក់បន្ថែម​ថា គោលបំ​ណង​សំ​ខាន់​ នៃការរៀប​ចំ​បើក​​វគ្គ​បណ្តុះ​បណ្តាល​​វិជ្ជា​ជីវៈមន្ត្រី​អ្នក​នាំពាក្យ​នេះ​ឡើង គឺដើម្បីឱ្យ​មន្ត្រី​អ្នក​នាំ​ពាក្យ​ស្ថាប័នរដ្ឋបាន​ទទួល​នូវ​បទ​ពិសោធន៍​បន្ថែម​ពី​គ្រូជំ​នាញ ដែល​មាន​វិជ្ជា​ជីវៈសារព័ត៌មាន និង​អ្នក​នាំ​ពាក្យ ក្នុង​ការ​ផ្តល់​ព័ត៌មាន​ឱ្យ​បាន​លឿន និង​មាន​ប្រសិទ្ធភាព​ខ្ពស់​ដល់អ្នក​សារព័ត៌មានទទួល​យក​ទៅ​​ផ្សព្វ​ផ្សាយនូវ​សមិទ្ធផលជា​ច្រើន ​ដែល​បណ្តាក្រសួង‑​ស្ថាប័ននីមួយៗ​សម្រេច​បានជូន​ប្រជា​ពលរដ្ឋ​បាន​ដឹង​នូវ​ការ​ពិត​ និង​ក៏ដើម្បី​កុំប្រជាពល​រដ្ឋ​យល់​ច្រឡំ​ តាម​ការ​ផ្សព្វ​ផ្សាយ​បោកប្រាស់​ និង​បំ​ពុលព័ត៌មាន​ដោយ​ក្រុម​ប្រឆាំង​ ជា​ពិសេស​ ការ​កើន​ឡើង​នៃ​ព័ត៌មាន​ក្លែង​ក្លាយ  FAKE NEWS ផង​ដែរ។

ដើម្បី​ប្រសិទ្ធភាព​ខ្ពស់​លើកិច្ច​ការងារនាំ​ពាក្យ​ ឯកឧត្តម ស្វាយ ​ស៊ីថា បាន​​ជំ​រុញ​ និង​លើក​ទឹក​ចិត្ត​ឱ្យ​មន្ត្រី​អ្នក​នាំ​ពាក្យស្ថាប័ន​រដ្ឋ​​ទាំង​អស់​ ត្រូវ​បង្កើន​ទំ​នាក់ទំ​នង​ និង​កិច្ច​សហការឱ្យ​បាន​ល្អជាទី​បំ​ផុត​​ជា​មួយអ្នក​សារព័ត៌មាន និង​ត្រូវ​ស្វែង​យល់ពី​តម្រូវ​ការ ថា តើ​អ្នកសារព័ត៌មាន ត្រូវ​ការ​អ្វី​ខ្លះ​ពី​អ្នក​នាំ​ពាក្យ​ ហើយ​​មន្ត្រី​អ្នក​នាំ​ពាក្យ​ត្រូវ​មាន​ចំ​ណេះ​ដឹង និង​ផ្តល់ជូន​ដល់អ្នក​កាសែត​វិញ​នូវ​អ្វីខ្លះ​ ដើម្បី​ជា​ស្ពាន​ចម្លង​ផ្តល់នូវ​ព័ត៌មាន​ពិត ត្រឹមត្រូវ​ជូន​សាធារណ​មតិ ទាំង​ក្នុង​ និង​ក្រៅ​ប្រទេស​។

អត្ថបទ៖ អង្គភាព​ព័ត៌មាន និង​ប្រតិកម្ម​រហ័ស​