សម្តេចតេជោតេជោ ហ៊ុន សែន អញ្ជើញជួបក្រុមភ្នាក់ងារអង្គការសហប្រជាជាតិ

108

នៅវិមាន​សន្តិភាព នៅព្រឹក​ថ្ងៃអង្គារ ៦កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃ​ទី២០ ខែកុម្ភៈ ឆ្នាំ២០១៨នេះ សម្តេច​អគ្គមហា​សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជា​ណា​ចក្រ​កម្ពុជា បានទទួល​ជួបពិភាក្សា​ជាមួយ​ក្រុមទី​ភ្នាក់​ងារ​អង្គការសហ​ប្រជាជាតិ​ដឹក​នាំដោយ លោកស្រី Claire Van der Vaeren

លោកស្រី Claire Van der Vaeren បានថ្លែងអំណរ​គុណ​ចំពោះ​រាជរដ្ឋាភិបាល​កម្ពុជា ដែល​បានបន្ត​ចូលរួម​ក្នុងបេសកម្ម​ក្រោមឆ័ត្រ​អង្គការ​សហប្រជាជាតិ។ លោកស្រី បានវាយ​តម្លៃ​ខ្ពស់​ចំពោះ​កម្ពុជា ដែលទទួល​បាន​ជោគជ័យ​ជាវិជ្ជមាន​ក្នុង​ការ​អភិវឌ្ឍ​តាមគោល​ដៅ​សហស្រវ​ត្សន៍ នោះគឺមា​នន័យថា​កម្ពុជា​ បានបញ្ចប់នូវការ​អនុវត្តតាម​គោលដៅអភិវឌ្ឍសហ​ស្សវត្សន៍​មុនពេល​វេលា។ ជាងនេះទៅ​ទៀត លោកស្រី ក៍បាន​វាយតម្លៃ​ខ្ពស់ចំពោះកំណែ​ទម្រង់ស៊ីជម្រៅ​របស់រដ្ឋាភិបាល បានធ្វើ​កន្លង​មក ដែលជាមូលដ្ឋានគ្រឹះដ៍សំខាន់​សម្រាប់ការ​អភិវឌ្ឍ​កម្ពុជាប្រកប​ដោយចីរភាព។

លោកស្រីក៏បាន​សំដែងនូវការ​គាំទ្រចំពោះ​កម្ពុជា​ក្នុងការជ​ម្រុញការ​អភិវឌ្ឍ​នៅកម្ពុជា ក្នុងន័យ​នេះ​លោកស្រី​ក៍បាន​ជំរាបជូន សម្តេចតេជោ នាយករដ្ឋមន្ត្រីថា អង្គការ​សហប្រជាជាតិ នឹងបន្ត​គាំទ្រ​កម្ពុជា និងពង្រឹងភាព​ជាដៃគូជាមួយ​កម្ពុជា​បន្តទៀត។ លោកស្រី​ក៍បានរាយ​ការណ៍​ពីវឌ្ឍនភាព​របស់អង្គ​សហប្រជាជាតិ​ក្នុងឆ្នាំ២០១៧ កន្លងមក​ក្នុងការ​ចូលរួមចំណែក​ក្នុងការ​អភិវឌ្ឍ​ធនធាន​មនុស្ស លើវិស័យ​បរិស្ថាន កសិកម្ម ក៍ដូចជា​ក្នុងវិស័យដោះមីន​ផងដែរ។ ពាក់ព័ន្ធនឹងកិច្ចគាំ​ពារ​សង្គមវិញ អង្គការស​ហប្រជាជាតិបាន​ចូលរួមក្នុងវិស័យអប់រំ សុខាភិបាល ពិសេសបញ្ហាជម្ងឺគ្រុនចាញ់ និងការជម្ងឺអេដស៍។ លើសពីនេះទៅ ទៀតអង្គការ​សហប្រជាជាតិ​ក៍បានចូលរួម​ក្នុងដំណើរការ​អភិបាលកិច្ចល្អ ដូចជាការពង្រឹង​លទ្ធិប្រជាធិបតេយ្យ និងការចូលរួម​កំណែ​ទម្រង់ទាំងឡាយ​ក្នុងរាជ​រដ្ឋាភិបាលកម្ពុជា និងការចូល​រួមចំណែក​ជួយដល់ជន​ជាតិភាគ​តិចនៅតាមរយៈ​ការផ្តល់​កម្ម​សិទ្ធិដីធ្លីដល់ពួកគាត់។

លើស​ពីនេះ​ទៅទៀតកិ​ច្ចប្រជុំក៍បាន​ផ្តោតលើ​ការ​យ​កចិត្ត និងពិភាក្សា​យ៉ាង​ផុស​ផុល​លើប្រធាន​បទសំខាន់មួយ​ចំនួន​ដូចជា ការរៀបចំ​គោលដៅ​អភិវឌ្ឍដោយ​ចីរភាព ដែល​ក្នុងនោះ ឯកឧត្តម ឆាយ ថន រដ្ឋមន្ត្រីផែនការ​បានជ​ម្រាប​ជូនអ​ង្គប្រជុំទាំង​មូល​ថា ឯកសារនេះ​បានឆ្លង​កាត់ កិច្ចប្រជុំបួន​ដងរួច​មកហើយ ហើយឯកសារ​នោះនឹងដាក់​ឆ្លង​ទៅរាជ​រដ្ឋាភិបាលកម្ពុជា ដើម្បីធ្វើការ​អនុម័ត​នៅត្រីមាសទី​១ ឆ្នាំ​២០១៨នេះ។ អង្គប្រជុំ​ក៍បានពិភាក្សា​ទៅលើ​បញ្ហាយុវជន ដូចជាការ​បណ្តុះ​បណ្តាល និងការងារ និងការគាំពា​រសង្គមផងដែរ។

សម្តេចតេជោ ហ៊ុន សែន នាយករដ្ឋមន្ត្រីបាន​វាយតម្លៃខ្ពស់​ចំពោះកិច្ចខិត​ខំប្រឹងប្រែងរបស់​អង្គការ​សហ​ប្រជាជាតិ​ស្រប​តាម​របាយ​ការណ៍​វឌ្ឍភាព​របស់លោ​កស្រី ដែលបាន រាយ​ការ​ណ៍ជូន សម្តេចតេជោ ពាក់ព័ន្ធទៅ​នឹង​លទ្ធផល​ការងារ ដែលបាន​អនុវត្តន៍ នឹងសម្រេច​បាន​ក្នុងឆ្នាំ ២០១៧​កន្លងទៅ។ សម្តេច​តេជោ បានអរគុណ លោកស្រី Claire Van der Vaeren ដែលបានសហការ​ល្អជាមួយ​រាជរដ្ឋាភិបាល​កម្ពុជា ដែលលោក​ស្រីនឹងបញ្ចប់​បេសក​កម្មការ​ងារ​នៅកម្ពុជា​នៅរយៈ​ពេល​មួយខែ​ទៀតនេះ។ ទន្ទឹម​នឹងនេះ សម្តេចតេជោ ហ៊ុន សែន បានផ្តាំផ្ញើតាម​រយៈលោកស្រី Claire Van der Vaeren សួរ​សុខទុក្ខ និង​ជូនពរ​ចំពោះ​លោក​អគ្គលេខធិការ UN António Guterres នៅក្នុងឱកាស​ចូលឆ្នាំថ្មី ២០១៨ នេះផងដែរ៕