សម្តេចតេជោ ហ៊ុន សែន អញ្ជើញជួបពិភាក្សាការងារជាមួយ នាយកគ្រប់គ្រងនៃក្រុមហ៊ុន Credit Suisse នៃប្រទេសស្វីស

163

នៅវិមានសន្តិភាព ព្រឹកថ្ងៃទី២៣ ខែវិច្ឆិកា ឆ្នាំ២០១៧នេះ សម្ដេចអគ្គមហា​សេនាបតី​តេជោ ហ៊ុន សែន នាយក​រដ្ឋមន្ត្រី នៃព្រះរា​ជា​ណា​ចក្រ​កម្ពុជា បានអ​ញ្ជើញ ជួប​ពិភាក្សា​ការងារ​ជាមួយ លោក អាន់ទ្រៀ ហ្គឺប៊ឺ (Adreas Gerber) នាយកគ្រប់គ្រង នៃក្រុមហ៊ុន Credit Suisse ដែលបានដឹកនាំប្រតិភូក្រុមហ៊ុនជាច្រើនរូបទៀត របស់ប្រទេសស្វីស។

តាម​ការ​​បញ្ជាក់​របស់ ​​ឯកឧត្តម​បណ្ឌិត កៅ គឹមហួន រដ្ឋមន្ត្រីប្រតិភូ​អម​នាយក​រដ្ឋមន្ត្រី នៅក្រោយជំនួប​ពិភាក្សាកា​​រងារ​ថា សម្តេចតេជោ នាយករដ្ឋមន្ត្រី បាន​ស្វាគមន៍ដល់​​លោក Adreas Gerber ក៏​ដូចជា​ប្រធាន​ក្រុមហ៊ុន​ផ្សេងទៀត លើវិស័យ​ចម្រុះ ខាងផ្នែក​ធនាគារ និងហិរញ្ញវត្ថុ​, អចលនទ្រព្យ, ការសាង​សង់​ជាដើម។

លោក Adreas Gerber បានជម្រាបជូន​សម្តេច​តេជោថា វត្តមាន​របស់​ប្រតិភូ​វិនិយោគិន​នេះ គឺដើម្បី​ស្វែង​រក​ការពិត អំពីស្ថានភាព​សេដ្ឋកិច្ច វិនិយោគ នៅក្នុង​ប្រទេស​កម្ពុជា។

សម្តេចតេជោ នាយករដ្ឋមន្ត្រី បានជម្រាប​ជូនគណៈប្រតិភូ​ទាំងអស់ អំពីស្ថានភាព​នយោបាយ សេដ្ឋកិច្ច ការអភិវឌ្ឍ​នៅប្រទេស​កម្ពុជា ហើយ​សម្តេច​ក៏បាន​ជម្រាប​ជូនប្រតិភូ​ថា ស្ថានភាពនៅក្នុង​ប្រទេស​កម្ពុជាមា​ន២ គឺកម្ពុជាពិត និងកម្ពុជាលើទំព័រសារព័ត៌មាន។ ជាង​នេះដែរ សម្តេចបានជម្រាប​ជូនអំពីការ​អភិវឌ្ឍរ​បស់ប្រទេសកម្ពុជា ក្នុងរយៈពេលប៉ុន្មានឆ្នាំចុងក្រោយនេះ គឺមានការរីកចម្រើនយ៉ាងច្រើន ដូចប្រតិភូបា​នមើលឃើញជាក់ស្តែង។

លោក Adreas Gerber ក៏ដូចជា​ប្រធានក្រុមហ៊ុនផ្សេងៗទៀត បានផ្លាស់ប្តូរមតិជា​មួយសម្តេចតេជោ ដើម្បីស្វែងយល់​បន្ថែមពីស្ថានភាពពិត នៅប្រទេសកម្ពុជា ហើយក៏មាន​ការត្រេកអ​រ​ពីអ្វី ដែល​ពួកគាត់បានមើលឃើញ ពីការរីកចម្រើន របស់ប្រទេសកម្ពុជា។

សម្តេចតេជោ ក៏បានបញ្ជាក់​ជូនទៅកាន់​ប្រតិភូថា អ្វីដែលកម្ពុជានៅតែ​ផ្តល់អា​ទិភាព គឺវិស័យ៤៖ វិស័យ​អភិវឌ្ឍន៍ធនធានមនុស្ស, ទឹក, ផ្លូវ និងវិស័យ​អគ្គីសនី។ គណៈប្រតិភូក៏បានសួរ សម្តេចតេជោ ផងដែរថា តើបច្ចុប្បន្ន​នេះ កម្ពុជាមាន​វិស័យអ្វីខ្លះ ដែលសម្តេចតេជោ​យល់ឃើ​ញថា ក្រុមហ៊ុន​ស្វីស គួរតែ​វិនិយោគ​បាន​នៅ​កម្ពុជា។ សម្តេចបាន​មាន​ប្រសាសន៍ថា ក្រុមហ៊ុន​ស្វីស គួរតែ​វិនិយោគលើវិស័យ​ធនាគារ និងហិរញ្ញវត្ថុ ដោយសារតែ​ក្រុម​ហ៊ុន Credit Suisse ជាធនាគារ​មួយលំដាប់​អន្តរជាតិ។ ជាងនេះទៀត សម្តេចតេជោ ក៏បានលើកទឹកចិត្ត ឲ្យមានការវិនិយោគ លើវិស័យធន​ធានមនុស្ស និង​ទេសចរណ៍ ដោយសារ​បច្ចុប្បន្ននេះ កម្ពុជាមាន​ថភ្ញៀវទេសចរណ៍ ប្រមាណ៥,៥លាននាក់ ហើយតាមកា​រប៉ាន់ស្មា​ន់ នៅឆ្នាំ​២០១៧នេះ កម្ពុជានឹងទទួល​បានភ្ញៀវទេសចរណ៍ ប្រមាណ៥,៨លាននាក់ ដែលមក​ពីក្រៅប្រទេស។ សម្តេចបានលើកឡើងដែរថា ពីដើមឡើយ ក្រុមហ៊ុនមួយចំ​នួន​នៅកម្ពុជា បានផ្តោត​ទៅលើ​បរិមាណ ប៉ុន្តែការវិវឌ្ឍន៍​ចុងក្រោយនេះ គឺមិនត្រឹម​តែបរិមាណទេ គឺបានគិតគូរ​ទាំងបរិមាណ និងគុណភាព។ ទន្ទឹមនឹ​ងនេះ​ដែរ សម្តេចតេជោ បានចាប់​អារម្មណ៍ និងលើកទឹក​ចិត្តដល់ក្រុ​មហ៊ុនវេចខ្ចប់​ដែលជាតម្រូវ​ការសំខាន់​បំផុត​នៅកម្ពុជា។ សម្តេច​តេជោ ហ៊ុន សែន បានលើក​ទឹកចិត្ត និងជូ​នពរគណប្រតិភូទាំងអស់ជោ​គជ័យ​ក្នុង​ដំណើរ​ទស្សន​កិច្ច​សិក្សា​ស្វែង​យល់​អំពីសក្តានុពល​ពាណិជ្ជកម្ម និងវិនិយោគ​នៅក្នុង​ប្រទេសកម្ពុជា៕