សម្តេចតេជោ ហ៊ុន សែន អញ្ជើញប្រគល់សញ្ញាបត្រដល់និស្សិតសាកលវិទ្យាល័យចេនឡា នៅមជ្ឈមណ្ឌលពិព័រណ៍ និងសន្និបាតកោះពេជ្រ

នៅថ្ងៃទី២៨ ខែកញ្ញា ឆ្នាំ២០១៧នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃប្រទេសកម្ពុជា បានអញ្ជើញប្រគល់សញ្ញាបត្រដល់និស្សិត នៃសាកលវិទ្យាល័យចេនឡាចំនួន ២,៨៣៨ នាក់ ក្នុងនោះក៏មាននិស្សិតទទួលបានអាហារូបករណ៍របស់ សម្តេចតេជោ និងសមេ្តចកិតិ្តព្រឹទ្ធបណ្ឌិត ចំនួន១២២ នាក់ ដែលមាននារី ៤៩នាក់ផងដែរ។ ពិធីប្រគល់សញ្ញាបត្រនេះគឺធ្វើឡើងនៅមជ្ឈមណ្ឌលពិព័រណ៍ និងសន្និបាតកោះពេជ្រ។ និស្សិតដែលទទួលសញ្ញាបត្រនាព្រឹកនេះមាន បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់នៅក្នុងឆ្នាំសិក្សា ២០១២ – ២០១៦។

សម្តេចតេជោ នាយករដ្ឋមន្ត្រី បានបញ្ជាក់ថា សម្តេចសប្បាយរីករាយខ្លាំងណាស់ ដែលបានអញ្ជើញជាកិត្តិយសមកប្រគល់សញ្ញាបត្រដល់និស្សិតនៅថ្ងៃនេះ ហើយសម្តេចតេជោក៏បានអបអរសាទរ និងកោតសរសើរដល់ជ័យលាភីទាំងអស់ផងដែរ។ សម្តេចតេជោ បានបញ្ជាក់ថាការរីកចម្រើននៃសាកលវិទ្យាល័យ គឺចូលរួមចំណែកយ៉ាងសំខាន់ក្នុងការកសាង និងអភិវឌ្ឍន៍ធនធានមនុស្ស។ សម្តេចតេជោ បានអរគុណដល់សាស្រ្តាចារ្យ និងគណគ្រប់គ្រងសាកលវិទ្យាល័យដែលបានខិតខំបង្កើតគ្រឹះស្ថាននេះឡើងព្រោះលំបាកខ្លាំងណាស់ទៅហើយ ទន្ទឹមនឹងនេះគឺត្រូវថែរក្សាអ្វីដែលយើងយើងបានបង្កើតមកនេះអោយមាននិរន្តភាព ហើយត្រូវធ្វើទំនើបកម្មទៅមុខថែមទៀត។

សម្តេចតេជោ ហ៊ុន សែន ក៏បានអបអរសាទរចំពោះការបញ្ជូននិស្សិតទៅធ្វើកម្មសិក្សានៅជប៉ុន គឺល្អខ្លាំងណាស់ដែលស្របតាមសំណើសុំរបស់សម្តេច ក្នុងពេលដែលបានជួបជាមួយនាយករដ្ឋមន្រ្តីជប៉ុន កាលពីពេលកន្លងទៅនេះ។ គឺពេលនោះជប៉ុនកំពុងខ្វះពលកម្មថែទាំមនុស្សចាស់នៅតាមន្ទីរពេទ្យ។ កម្មវិធីនេះគឺបានផ្តល់ទាំងចំណេះដឹង បទពិសោធន៍ និងប្រាក់ចំណូលល្អដល់និស្សិតកម្មសិក្សា។

សម្តេចតេជោនាយករដ្ឋមន្រ្តី បានរំលឹកផងដែរថា យើងបានរួមគ្នាពីស្ថានភាពលំបាកលំបិន រហូតមកដល់ពេលនេះ គឺចាប់ពីប្រទេសយើងមានប្រជាជនប្រមាណ ៥លាននាក់រហូតដល់១៥ លាននាក់ ដែលយើងមានឱកាសបានកសាងប្រទេសជាតិពេញដៃពេញជើង។ គឺមិនងាយស្រួលទេ គ្មានជោគជ័យណាមួយដែលកើតឡើងដោយគ្មានការចូលរួមនោះទេ ជាពិសេសកាចូលរួមពីវិស័យឯកជន។ ចំពោះការពឹងផ្អែកលើគ្រឹះស្ថានសិក្សារបស់រដ្ឋទាំងស្រុងគឺមិនគ្រប់គ្រាន់ទេ។ ជាមួយគ្នានេះដែរ គឺក្រសួងអប់រំក៏បានផ្តល់ឱកាសអោយសិស្សដែលប្រឡងមិនជាប់បាក់ឌុប ក៏អាចមានលទ្ធភាពទទួលបានការបណ្តុះបណ្តាលជំនាញ រួមទាំងកម្រិតបរិញ្ញាបត្ររងផងដែរ។

សម្តេចតេជោ បានកោតសរសើរដល់ក្រសួងអប់រំ និងក្របខណ្ឌអប់រំទូទាំងប្រទេស ដែលបានចូលរួមរៀបចំការប្រឡងទុតិយភូមិទូទាំងប្រទេសប្រកបដោយជោគជ័យ។ សម្តេចតេជោ បានបញ្ជាក់អំពីអត្រាកូនសិស្សជាង ៦៣%បានប្រឡងជាប់។ នេះជាជោគជ័យនៃកំណែទម្រង់អប់រំ ដែលមានការចូលរួមពីគ្រប់ភាគីទាំងអស់។

សូមបញ្ជាក់ថា នៅថ្ងៃទី១៤តុលា ខាងមុខនេះ សម្តេចតេជោនឹងជួបក្មួយៗសិស្សានុសិស្ស ដែលប្រឡងជាប់បាក់ឌុប និទ្ទេស (A) ដែលសម្តេចនឹងផ្តល់រង្វាន់លើកទឹកចិត្តគឺមាន iPad មួយគ្រឿង និងកាដូរមួយចំនួន។ នេះជាការខិតខំរបស់ក្រសួង និងសាស្រ្តាចារ្យដែលបានធ្វើអត្រាប្រឡងជាប់បានខ្ពស់ ដែលបានធ្វើអោយខឿនអប់រំប្រកបដោយគុណភាព។ ច្បាស់ណាស់ គឺនិស្សិតត្រូវតែមានទាំងចំណេះដឹងនិងចំណេះធ្វើ។ បើគ្រាន់តែមានសញ្ញាបត្រខ្ពស់ តែគ្មានចំណេះដឹងពិតប្រាកដគឺមិនត្រូវតាមតម្រូវការទីផ្សារកាងារទេ។ ព្រោះថាសេដ្ឋកិច្ចទីផ្សារគឺមិនអាចលើកលែងបានទេ។

នៅថ្ងៃនេះដែរ សម្តេចតេជោ ហ៊ុន សែន ក៏បានរំលឹកអំពីជំនួបជាមួយកូនក្មួយកម្មករកម្មការនីកន្លងទៅ ដែលសម្តេចបានស្នើសុំអោយម្ចាស់រោងចក្រទូទាំងប្រទេស យោគយល់ដល់ស្រ្តីមានផ្ទៃពោះអោយបានចេញមុនម៉ោង ១៥នាទី។ គឺសម្រាប់ទាំងកម្មករក្នុងប្រព័ន្ឋនិងក្រៅប្រព័ន្ឋ។ ទន្ទឹមនឹងនោះដែរ ចំពោះកម្មការនីដែលត្រូវសម្រាលកូន គឺនឹងទទួលបានប្រាក់ឧបត្ថម្ភពីរាជរដ្ឋាភិបាល។ នេះជាគោលនយោបាយអាទិភាពកាត់បន្ថយអត្រាការសា្លប់ របស់ទារកនិងមាតា ហើយដែលផ្សារភ្ជាប់ទៅនឹងកម្មវិធីអាហារូបត្ថម្ភផងដែរ។ សម្តេចបន្តថា នៅទីណាក៏អាចរៀនបានទាំងអស់ មិនត្រឹមតែនៅក្នុងដំបូលសាលាតែប៉ុណ្ណោះទេ។ កុំមើលស្រាលអ្នកនៅជុំវិញយើង មិនថាជាកម្មករ កសិករ គឺអាចផ្តល់ការពិគ្រោះយោបល់ពិភាក្សាបានដែរ។ មិនត្រូវពើងទ្រូងជាមួយអ្នកដទៃ គឺបានត្រឹមតែឯកោតែប៉ុណ្ណោះ។ ព្រោះគេអាចផ្តល់យោបល់សម្រាប់កែតម្រូវដែលយើងមិនអាចគិតដល់។ អរគុណដែលសាកលវិទ្យាល័យមួយចំនួនបានផ្តល់អាហារូបករណ៍មកសម្តេច ដើម្បីចែករំលែកបន្តទៅអោយនិស្សិតក្រីក្រមានឱកាសបានសិក្សា។

សម្តេចតេជោបន្ថែមទៀតថា កំណើនសេដ្ឋកិច្ចកម្ពុជា ៧% គឺជាផែនទីចង្អុលផ្លូវរួចមកហើយ ដូច្នេះយើងត្រូវតែធានាអោយបាននូវសន្តិភាព ទន្ទឹមនឹងភាពស្មុគស្មាញ និងភាពមិនច្បាស់លាស់របស់ពិភពលោកដូចជាសង្រ្គាមនៅមជ្ឈិមបូពារណ៍ និងការគម្រាមកំហែងសង្រ្គាម និងអាវុធប្រល័យលោករបស់កូរ៉េខាងជើង។ សម្តេចតេជោ សង្ឃឹមថា ដំណោះស្រាយដោយសន្តិភាពនឹងកើតមានឡើង។ ចំពោះកម្ពុជា ក៏កំពុងរិះរកវិធីយកគ្រាប់គីមីរបស់អាមេរិកចេញ ដែលអាចជម្លៀសប្រជាពលរដ្ឋរាប់ពាន់គ្រួសារ។ នេះជាលទ្ឋផលសង្រ្គាមពីអតីតកាល។ សូមបងប្អូនកូនក្មួយដែលកំពុងធ្វើការនៅប្រទេសកូរ៉េ និងក្រុមគ្រួសារកុំព្រួយបារម្ភវាមិនអាចកើតមានទេ។

ទន្ទឹមនឹងនេះដែរ សម្តេចនាយករដ្ឋមន្ត្រី បានអំពាវនាវសូមឱ្យប្រជាពលរដ្ឋប្រុងប្រយ័ត្នចំពោះជំនន់ទឹកភ្លៀងដែលលអាចនឹងមកដល់នៅប៉ុន្មានថ្ងៃខាងមុខនេះ។ សូមប្រុងប្រយ័ត្នដូចជា ខេត្តកណ្តាល ភ្នំពេញ និងកំពងស់ស្ពឺ ត្រូវប្រុប្រយ័ត្នជាប់ជានិច្ច។

ចុងបញ្ចប់ សម្តេចតេជោ ហ៊ុន សែន បានកោតសរសើដល់ប្អូនៗ ក្មួយៗជ័យលាភីទាំងអស់ គណៈគ្រប់គ្រងសាលា សាស្រ្តាចារ្យ និងអាណាព្យបាល ដែលបានខិតខំរហូតដល់យើងទទួលបានជោគជ័យនៅថ្ងៃនេះ។ បន្ទាប់មកសម្តេចតេជោ បានប្រគល់សញ្ញាបត្រដល់ជ័យលាភីទាំងអស់ ដោយបរិយាកាសរីករាយនិងស្និទ្ឋស្នាលក្រៃលែង៕

ពត៌មានទាក់ទង

ពត៌មានផ្សេងៗ