នៅថ្ងៃទី០១ ខែកញ្ញា ឆ្នាំ២០១៧ ព្រឹកមិញនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញជួបប្រជុំពិភាក្សាអំពីដំណោះស្រាយបញ្ហាព្រុំដែន ជាមួយ ឯកឧត្តមបណ្ឌិត ថង លូនស៊ីសូលីត នាយករដ្ឋមន្រ្តីឡាវនៅវិមានសន្តិភាព។
កម្ពុជា-ឡាវបានព្រមព្រៀង គ្នាដោះស្រាយបញ្ហាព្រុំដែនជាកញ្ចប់ដើម្បីឈានទៅរកការបញ្ចប់ទាំងស្រុងនូវបញ្ហាព្រំដែនរវាងប្រទេស ទាំងពីរក្នុងពេលដ៏ឆាប់ខាងមុខនេះ។ ចំណុចឯកភាពសំខាន់ៗរវាងកម្ពុជា-ឡាវគឺមានដូចជាៈ ១) កម្ពុជា-ឡាវ រួមគ្នាដោះស្រាយបញ្ហាព្រុំដែនដោយគ្មានអ្នកឈ្នះ គ្មានអ្នកចាញ់ ដែលធានាបាននូវ ព្រុំដែនសន្តិភាព មិត្តភាព សាមគ្គីភាព និងសហប្រតិបត្តិការល្អរវាងប្រជាជាតិនៃប្រទេសទាំងពីរ។ ២) កម្ពុជា-ឡាវ ឯកភាពគ្នាក្នុងការផ្ញើលិខិតផ្លូវការទៅកាន់ប្រទេសបារាំង ដើម្បីស្នើសុំអោយផ្ទេរផែនទី ពី ខ្នាត (1/100,000) ទៅជាផែនទីខ្នាត (1/50,000) និងស្នើសុំអោយបារាំងផ្តល់នូវឯកសារពាក់ព័ន្ឋនានា រួមជាមួយអ្នកឯកទេសផ្នែកផែនទីមកជួយដោះស្រាយបញ្ហាព្រំដែនផងដែរ។ ព្រោះកាលពីអតីតកាល គឺ កម្ពុជា ឡាវ និងវៀតណាម ធ្លាប់ស្ថិតនៅក្រោមអាណានិគមបារាំង។ ៣) មិត្តឡាវបានយល់ព្រមតាមសំណើរបស់កម្ពុជា ក្នុងការដោះស្រាយបញ្ហា៤ចំណុចដែលនៅសេស សល់តាមរយៈលិខិតដែល សម្តេចតេជោ ហ៊ុន សែន បានផ្ញើជូនទៅ ឯកឧត្តមបណ្ឌិត ថង លន់ ស៊ីលីត កាលពី ពេលថ្មីៗកន្លងមកនេះ។ កម្ពុជា-ឡាវ បានឯកភាពគ្នាឱ្យគណៈកម្មាធិការព្រំដែនចុះទៅដោះស្រាយ ដោយផ្ទាល់នៅនឹងកន្លែងនៅតំបន់អូរតាង៉ាវ។ ៤) កម្ពុជា-ឡាវខិតខំដោះស្រាយបញ្ហាព្រំដែននេះអោយបានចប់ជាស្ថាពរ ដើម្បីទុកជាកេរ្តិ៍ មរតកសម្រាប់ មនុស្សជំនាន់ក្រោយនៃប្រទេសទាំងពីរ។
សម្តេចតេជោ ហ៊ុន សែន នាយករដ្ឋមន្រ្តី និងឯកឧត្តម ថងលូន ស៊ីសូលីត មានសេចក្តីសោមនស្សរីករាយ បំផុត ដែលប្រទេសជាបងប្អូនទាំងពីរបានខិតខំដោះស្រាយបញ្ហាព្រំដែនរួមគ្នា ទន្ទឹមនឹងការខិតខំជំរុញ ទំហំពាណិជ្ជកម្មនៃប្រទេសទាំងពីរអោយបានកើនឡើងថែមទៀត។ ទន្ទឹមនឹងនេះដែរ សម្តេចតេជោនាយករដ្ឋមន្រ្តី បានអរគុណលោកនាយករដ្ឋមន្រ្តីឡាវ ដែលបាន អញ្ជើញធ្វើដំណើរតាមយន្តហោះពិសេសមកកាន់កម្ពុជានៅព្រឹកមិញនេះដើម្បីពិភាក្សាដោះស្រាយបញ្ហាព្រំដែនដែលនៅសល់ប្រមាណជា ១៤% ទៀតអោយបានចប់ជាស្ថាពរនៅក្នុងពេលឆាប់ៗខាង មុខនេះ៕
