សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានណែនាំដល់ក្រសួងអប់រំ យុវជន និងកីឡា ពិនិត្យមើលចំពោះការលក់ចំណីអាហារដល់កុមារតូចៗ នៅតាមសាលារៀន ជាពិសេសប្រភេទភេសជ្ជៈផ្អែមដែលអាចផ្តល់ផលវិបាកចំពោះសុខភាពសិស្សនៅពេលអនាគត។
នៅក្នុងពិធីបើកការដ្ឋានសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល ក្នុងខណ្ឌសែនសុខ រាជធានីភ្នំពេញ នៅព្រឹកថ្ងៃអង្គារ ទី១០ ខែធ្នូ ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា ក្រសួងសុខាភិបាល និងក្រសួងអប់រំ ត្រូវរួមសហការគ្នាក្នុងការណែនាំ និងសម្របសម្រួលដល់អ្នកលក់ដូរចំណីអាហារនៅតាមសាលារៀនដើម្បីធ្វើយ៉ាងណាធានាដល់សុខភាពរបស់សិស្សានុសិស្ស។
សម្តេចធិបតី ហ៊ុន ម៉ាណែត ក៏បានគូសបញ្ជាក់ថា ការវិនិយោគនៅលើមូលធនមនុស្សរបស់យើង ក៏ចាំបាច់ត្រូវធ្វើការអប់រំ ផ្សព្វផ្សាយ និងបង្កាផងដែរ ដោយមិនមែនពឹងតែទៅលើការព្យាបាលប៉ុណ្ណោះទេ៕
