នៅក្នុងពីធីទទួលទានអាហារថ្ងៃដែលរៀបចំដោយ លោក សាសាហ្កាវ៉ា ប្រធានមូលនិធិជប៉ុន សម្តេចតេជោ នាយករដ្ឋមន្រ្តី មានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះថ្នាក់ដឹកនាំទាំងអស់ នៃមូលនិធិ ជប៉ុន ដែលបានខិតខំប្រឹងប្រែងជួយយ៉ាងអស់ពីចិត្តពីថ្លើម ក្នុងការជួយដល់ការអភិវឌ្ឍរបស់ប្រទេសកម្ពុជា ក្នុងនោះរួមទាំងការជួយដល់ការបណ្តុះបណ្តាលកុមារ និងយុវជនកម្ពុជាជាច្រើន ឲ្យមានជំនាញវិជ្ជាជីវះ និងចំណេះដឹងក្នុងការ បំពេញភារកិច្ចការងារក្នុងសង្គម។
ជាមួយនិងការថ្លែងនោះដែរ សម្តេចតេជោ នាយករដ្ឋមន្រ្តី និងលោក សាសាហ្កាវ៉ា បានរំលឹកពីអនុស្សាវរីយ៍ជាច្រើន ដែលរូបសម្តេច និងលោក សាសាហ្កាវ៉ា ធ្លាប់បានជួបគ្នានិងប្រាស្រ័យការងារជាមួយ គ្នា ទាំងនៅក្នុងប្រទេសកម្ពុជា និងក្នុងប្រទេសជប៉ុន នៅពេលដែលរូបសម្តេចអញ្ជើញទៅបំពេញទស្សនកិច្ចផ្លូវការ ការងារ ក្នុងប្រទេសជប៉ុន។
សូមបញ្ជាក់ដែរថា មូលនិធិជប៉ុន បានរួមចំណែកជួយដល់វិស័យអប់រំក្នុងប្រទេសកម្ពុជា ចាប់តាំងពីឆ្នាំ១៩៨០ រហូតមកដល់បច្ចុប្បន្ន ក្នុងនោះមូលនិធិបានរួមចំណែកជួយកសាងអគារសិក្សាបានចំនួន ១០០កន្លែង នៅតាមតំបន់ជនបទនានាក្នុងប្រទេសកម្ពុជា។
ក្រៅពីការចូលរួមចំណែកដល់ការបណ្តុះបណ្តាលធនធានមនុស្សលើភាសាអង់គ្លេស មូលនិធិជប៉ុន នៅបានជួយដល់ការបណ្តុះបណ្តាលជំនាញដល់កុមារ និងយុវជនកម្ពុជា ដែលពួកគេអាចមានមុខរបរទទួលទានបានជាច្រើននាក់ផងដែរ។
