សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជាបានណែនាំដល់ក្រសួងការពារជាតិ ក្រសួងមហាផ្ទៃ អគ្គបញ្ជាការ អគ្គស្នងការនគរបាលជាតិ កងទ័ពជើងគោក ក្នុងការជ្រើសរើសកងទ័ពថ្មីបំពេញទៅថ្ងៃក្រោយ ត្រូវផ្ដល់អាទិភាពដល់កូនចៅអតីតយុទ្ធជន អតីតប៉ូលីស អតីតអាវុធហត្ថ ដើម្បីឱ្យគាត់មានឱកាសនៅក្នុងការបំពេញភារកិច្ចបន្តវេនពីឪពុកម្ដាយ។
នៅក្នុងឱកាសអញ្ជើញជាអធិបតីភាព ប្រារព្ធពិធីអបអរសាទរខួបលើកទី១៧ ទិវាអតីតយុទ្ធជនកម្ពុជា ២១មិថុនា ឆ្នាំ២០២៤ នៅសាកលវិទ្យាល័យការពារជាតិ ស្ថិតក្នុងខណ្ឌឫស្សីកែវ រាជធានីភ្នំពេញនៅព្រឹកថ្ងៃទី២៦ ខែមិថុនា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានគូសបញ្ជាក់ថា ការជ្រើសរើសនេះត្រូវផ្តោតជាពិសេសលើអ្នកមូលដ្ឋាន ដើម្បីផ្តល់ឱកាសជាការលើកទឹកចិត្តដល់អតីតយុទ្ធជន៕
