សម្តេចធិបតី ហ៊ុន ម៉ាណែត បានថ្លែងថា កម្ពុជាគ្មានគោលការណ៍យកប្រទេសរបស់ខ្លួនបម្រីជាមូលដ្ឋានឱ្យប្រទេសណាមួយប្រឆំាងនឹងប្រទេសណាមួយទេ។ សម្ដេចថា យើងចង់បានតែសុខទេ។
សម្តេចធិបតី ហ៊ុន ម៉ាណែត បានថ្លែងបន្តថា កុំយករឿងជម្លោះភូមិសាស្រ្តតំបន់មកដាក់បន្ទុកលើកម្ពុជា ព្រោះកម្ពុជាមិនមានជម្រើសចាប់យកអ្នកណាប្រឆាំងអ្នកណានោះទេ កម្ពុជាត្រូវតែសាមគ្គីទាំងអស់គ្នា។ សម្ដេចធិបតីសង្ឃឹមថា នយោបាយភូមិសាស្រ្តការប្រកួតប្រជែងមិនឈានទៅដល់ការប៉ះទង្គិចគ្នា ឬធ្វើឱ្យបាត់ស្ថិរភាពនៅក្នុងតំបន់ ឬក៏ពិភពលោក ដូចកាលពីទស្សវត្សរ៍ទី៧០ និង៨០នោះទេ។
សម្តេចធិបតី ហ៊ុន ម៉ាណែត បានថ្លែងដូចនេះនៅក្នុងពិធីសំណេះសំណាលជាមួយមន្ត្រីរាជការ បុគ្គលិក កម្មករ និយោជិត កំពង់ផែស្វយ័តក្រុងព្រះសីហនុ នាឱកាស អបអរសាទរខួបអនុស្សាវរីយ៍ លើកទី១៣៨ នៃទិវាពលកម្មអន្តរជាតិ ០១ ឧសភា ២០២៤ នៅព្រឹកថ្ងៃពុធទី១ ខែឧសភា ឆ្នាំ២០២៤៕
