សម្តេចធិបតី ហ៊ុន ម៉ាណែត បានថ្លែងថា ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ដែលមានគោលបំណងកសាងសេដ្ឋកិច្ចឌីជីថល ឱ្យក្លាយជាជន្ទល់កំណើនសេដ្ឋកិច្ចថ្មី និងជាប្រព័ន្ធអេកូឡូស៊ី សំដៅរួមចំណែកបង្កើនផលិតភាព និងប្រសិទ្ធិភាពសេដ្ឋកិច្ច និងលើកកម្ពស់សុខុមាលភាពប្រជាពលរដ្ឋនៃសង្គមឌីជីថលកម្ពុជា។
សម្តេចធិបតី ហ៊ុន ម៉ាណែត បានថ្លែងបន្តថា ទន្ទឹមនេះដែរ រាជរដ្ឋាភិបាលនឹងបន្តលើកកម្ពស់កម្រិតជីវភាព និងសុខុមាលភាពរបស់ប្រជាជនកម្ពុជាតាមរយៈការកែលម្អការប្រកួតប្រជែងនៅក្នុងវិស័យអាទិភាពអោយមានលក្ខណៈថ្លៃថ្នូរ ស្មើភាព យុត្តិធម៌ សំដៅលើកកម្ពស់ភាពប្រកួតប្រជែង ប្រសិទ្ធិភាព បរិយាប័ន្ន និងនិរន្តរភាពជាមួយនឹងការតាមដាន ត្រួតពិនិត្យ និងវាយតម្លៃជាប្រចាំនូវសមិទ្ធកម្មនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥។
សម្តេចធិបតី ហ៊ុន ម៉ាណែត បានថ្លែងដូចនេះនៅក្នុងឱកាសដែលសម្តេចអញ្ជើញជាអធិបតី «សម្ពោធដាក់ឱ្យប្រើប្រាស់ជាផ្លូវការអគារតេជោសែន និងបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅឆ្នាំ២០២៤ របស់ក្រសួងឧស្សាហកម្មវិទ្យាសាស្រ្ត បច្ចេកវិទ្យា និងនវានុវត្តន៍» នៅរសៀលថ្ងៃទី២១ ខែកុម្ភៈ ឆ្នាំ២០២៤៕
