ភ្នំពេញ៖អ្នកនាំពាក្យរាជរដ្ឋាភិបាលកម្ពុជាបានបញ្ជាក់ថា នៅក្នុងប្រទេសកម្ពុជាមិនមានវិបត្តិសិទ្ធិមនុស្ស និងមិនមានវិបត្តិសិទ្ធិពលរដ្ឋ ដូចជាការលើកឡើងរបស់ក្រុមអង្គការសិទ្ធិមនុស្សអន្តរជាតិមួយចំនួនដែលបានស្នើទៅកាន់ក្រុមប្រឹក្សាសិទ្ធិមនុស្សនៃអង្គការ សហប្រជាជាតិអនុម័តដំណោះស្រាយសំខាន់ៗ ដើម្បីឱ្យរដ្ឋាភិបាលកម្ពុជាដោះស្រាយវិបត្តិសិទ្ធិមនុស្សនោះទេ។
ឆ្លើយតបទៅនឹងការលើកឡើងរបស់អង្គការសិទ្ធិមនុស្សអន្តរជាតិមួយចំនួន ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានថ្លែងប្រាប់ AMS នៅថ្ងៃទី១៤ ខែកញ្ញា ឆ្នាំ២០២៣នេះថា នៅក្នុងប្រទេសកម្ពុជាអត់មានវិបត្តិសិទ្ធិមនុស្ស អត់មានវិបត្តិសិទ្ធិពលរដ្ឋទេ។ ប្រជាពលរដ្ឋខ្មែរមានសិទ្ធិសេរីភាពពេញទីដែលធានាដោយរដ្ឋធម្មនុញ្ញមាត្រា ទី៤១ , មាត្រា៤១ចែងច្បាស់ថា ប្រជាពលរដ្ឋខ្មែរមានសិទ្ធិសេរីភាពក្នុងការបញ្ចេញមតិ មានសិទ្ធិសេរីភាពសារព័ត៌មាន មានសិទ្ធិសេរីភាពនៅក្នុងការបោះពុម្ពផ្សាយ និងសិទ្ធិសេរីភាពក្នុង ការជួបជុំ។ ប៉ុន្តែមាត្រាដដែលបានបញ្ជាក់ច្បាស់ថា ជនណាក៏ដោយមិនអាចឆ្លៀតប្រើសិទ្ធិនេះដោយរំលោភដែលធ្វើឱ្យប៉ះពាល់កិត្តិយសរបស់អ្នកដទៃ ប៉ះពាល់ទៅដល់ទំនៀមទម្លាប់ល្អប្រពៃណីវប្បធម៌ជាតិ ហើយនឹងប៉ះពាល់ដល់សន្តិសុខសង្គម និងសណ្តាប់ធ្នាប់សាធារណៈ។ នេះគឺជាខ្លឹមសាររដ្ឋធម្មនុញ្ញមាត្រា ៤១ ។ ដូច្នេះបើសិនជាគ្រប់គ្នាអនុវត្តឱ្យបានការបញ្ចេញមតិ និងការប្រើប្រាស់សិទ្ធិដោយគោរពច្បាប់ គោរពអ្នកដទៃ មិនធ្វើឱ្យប៉ះពាល់ដល់អ្នកដទៃ។ គឺអត់មានអ្នកណាធ្វើទុក្ខបុកម្នេញអីទាំងអស់។
អ្នកនាំពាក្យដដែលបានបញ្ជាក់ថា “សព្វថ្ងៃនេះនៅក្នុងប្រទេសកម្ពុជាយើងរឿងធំមិនមែនខ្វះសិទ្ធិទេ ។រឿងធំ គឺមានសិទ្ធិពេញដៃ។ ប៉ុន្តែយើងប្រើប្រាស់សិទ្ធិខុស។យើងចេះតែប្រើប្រាស់សិទ្ធិរបស់ខ្លួនបំពានទៅលើអ្នកដទៃ។បំពានច្បាប់ ។ ត្រង់នឹងដែលជាចំណោទបញ្ហា។ ដូច្នេះភាគីពាក់ព័ន្ធទាំងអស់រួមទាំងអង្គការសិទ្ធិមនុស្សជាតិ និងអន្តរជាតិនឹងផងជួយបង្រៀនប្រជាពលរដ្ឋ ឬក៏ដូចជាសកម្មនយោបាយទាំងឡាយឱ្យយល់ច្បាស់ការប្រើប្រាស់សិទ្ធិសេរីភាពរបស់ខ្លួនតាមមាត្រា៤១ នៃរដ្ឋធម្មនុញ្ញ ។គឺប្រទេសជាតិយើងមានសុខសន្តិភាព មានសិទ្ធិសេរីភាព យ៉ាងពេញបរិបូរណ៍ដោយអត់មានអ្នកណារំខានទេ”៕ ដោយ៖ពលជ័យ
