ភ្នំពេញ ថ្ងៃទី២៩ ខែតុលា ឆ្នាំ២០១៩ — សម្តេចវិបុលសេនាភក្តី សាយ ឈុំ ប្រធានព្រឹទ្ធសភា បានវាយតម្លៃខ្ពស់ចំពោះដំណើរទស្សនកិច្ចរបស់ឯកឧត្តមប្រធានាធិបតីនៅកម្ពុជា ពិតជាមានសារៈសំខាន់ជាប្រវត្តិសាស្ត្រក្នុងការពង្រឹងពង្រីកចំណងសាមគ្គីភាព មិត្តភាព និងកិច្ចសហប្រតិបត្តិការឱ្យកាន់តែល្អប្រសើរឡើង និងរឹងមាំថែមទៀត ដើម្បីជាគុណប្រយោជន៍ទៅវិញទៅមកសម្រាប់ប្រទេស និងប្រជាជនទាំងពីរ ទាំងក្នុងពេលបច្ចុប្បន្ន និងក្នុងពេលអនាគត។ ការលើកឡើងរបស់សម្តេចប្រធានព្រឹទ្ធសភា នៃព្រះរាជាណាចក្រកម្ពុជានេះ ធ្វើឡើងក្នុងឱកាសទទួលជួបសវនាការជាមួយ ឯកឧត្តម János ADER ប្រធានាធិបតីហុងគ្រី ដែលឯកឧត្តមអញ្ជើញមកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជាកាលពីថ្ងៃទី២៨ ខែតុលា ឆ្នាំ២០១៩ នៅវិមានព្រឹទ្ធសភា។
ឯកឧត្តមប្រធានាធិបតីហុងគ្រី បានថ្លែងអំណរគុណយ៉ាងជ្រាលជ្រៅចំពោះសម្តេចប្រធានព្រឹទ្ធសភា ដែលទទួលស្វាគមន៍យ៉ាងកក់ក្តៅចំពោះគណៈប្រតិភូនាឱកាសនេះ។ ឯកឧត្តម ប្រធានាធិបតីហុងគ្រីបានជម្រាបសម្តេចប្រធានព្រឹទ្ធសភាថា នេះជាលើកទីមួយ ជាប្រវត្តិសាស្ត្រដែលឯកឧត្តមបានមកបំពេញទស្សនកិច្ចជាផ្លូវរដ្ឋនៅព្រះរាជាណាចក្រកម្ពុជា ជាពិសេសរយៈពេល៣០ឆ្នាំក្រោយ ដំណើរទស្សនកិច្ចរបស់ប្រមុខរដ្ឋ នៃប្រទេសហុងគ្រីបានមកទស្សនកិច្ចនៅកម្ពុជាបើគិតចាប់តាំងពីឆ្នាំ១៩៩៩មក។ ឯកឧត្តមបានជម្រាបសម្តចប្រធាន ថា ក្នុងរយៈពេល៦សប្តាហ៍កន្លងមកនេះ ឯកឧត្តមមានឱកាសបានជួបជាមួយនឹងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានចំនួនពីរលើក។ ក្នុងនោះឯកឧត្តម បានមានកិត្តិយសអញ្ជើញចូលគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលក្នុងឱកាសនោះ ឯកឧត្តមបានថ្វាយនូវលិខិតយាង ព្រះករុណាជាម្ចាស់ជីវិតលើត្បូង ទៅបំពេញទស្សកិច្ចផ្លូវរដ្ឋនៅប្រទេសហុងគ្រី នាពេលវេលាសមស្របណាមួយ។ ជាការឆ្លើយតបព្រះករុណាជាអង្គម្ចាស់ជីវិតលើត្បូង បានសព្វព្រះរាជាហប្ញទ័យទទួលនូវការយាងនេះផងដែរ។
ឯកឧត្តមបានលើកឡើងដែរថា ក្នុងប្រវត្តិសាស្ត្ររយៈពេល៣០ នៃប្រទេសហុងគ្រី និងរយៈ៣០ប្រទេសកម្ពុជា វឌ្ឍនភាព នៃប្រទេសទាំងពីរមានលក្ខណៈស្រដៀងគ្នា។ ការអភិវឌ្ឍ និងវឌ្ឍនភាពរបស់ប្រទេសកម្ពុជា មានការវិវត្តខ្លាំង ក្នុងការកំណែទម្រង់រដ្ឋបាលសាធារណៈ ជាពិសេស ស្ថាប័ននីតិប្បញ្ញត្តិបានដើរតួនាទីយ៉ាងសំខាន់ក្នុងអនុម័តច្បាប់។
សម្តេចវិបុលសេនាភក្តី សាយ ឈុំ បានថ្លែងអំណរគុណចំពោះ ឯកឧត្តមប្រធានាធិបតីហុងគ្រីដែលបានថ្លែងសរសើរអំពី ទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការដ៏ល្អប្រពៃរវាងប្រជាជន នៃប្រទេសទាំងពីរ ក៏ដូចជាការរីកចម្រើនរបស់ប្រទេសកម្ពុជានាពេលបច្ចុប្បន្ន។ ជាមួយគ្នានេះ ប្រទេសយើងទាំងពីរមានប្រវត្តិទំនាក់ទំនងការទូតយូរលង់មកហើយ គិតមកដល់ពេលនេះមានរយៈពេល៦៣ឆ្នាំ ដែលទំនាក់ទំនងការទូតនេះបង្កើតឡើងក្រោមស្នាព្រះហស្ត ព្រះករុណាព្រះបាទ សម្តេចព្រះ នរោត្តម សីហនុ “ព្រះបរមរតនកោដ្ឋ” និងថ្នាក់ដឹកនាំហុងគ្រីជំនាន់មុន។ សម្តេចវិបុលសេនាភក្តីបានសម្តែងនូវសេចក្តីរីករាយ ដែលបានមើលឃើញនូវទំនាក់ទំនងមិត្តភាព និងកិច្ចសហប្រតិបត្តិការរវាងប្រជាជន និងប្រទេសទំាងពីរមានការីកចម្រើនជាបន្តបន្ទាប់។ សម្តេចវិបុលសេនាភក្តី បានបន្ថែមថា ការរីកចម្រើននេះស្តែងឡើងតាមរយៈការផ្លាស់ប្តូរទស្សនកិច្ចរវាងថ្នាក់ដឹកនាំកំពូល ថា្នក់ដឹកនាំជាន់ខ្ពស់ ថ្នាក់ដឹកនាំជំនាញតាមបណ្តាក្រសួង ស្ថាប័ន នៃប្រទេសទាំងពីរ ទៅវិញទៅមក ព្រមទាំងបានឆ្លុះបញ្ចាំងនៃការជួយឧបត្ថម្ភគាំទ្រគ្នាក្នុងក្របខ័ណ្ឌកិច្ចសហប្រតិបត្តិការអន្តរជាតិផងដែរ។
សម្តេចវិបុលសេនាភក្តីក៏បានថ្លែងអំណរគុណចំពោះការឧបត្ថម្ភគាំទ្រពីប្រទេសហុងគ្រី ដល់ប្រទេសកម្ពុជាកាលពីអតីតកាល ក្នុងកាលៈទេសៈដែលប្រទេសកម្ពុជាជួបការលំបាកដោយទទួលការហ៊ុំព័ន្ធខាងសេដ្ឋកិច្ច និងនយោបាយ។ ជាមួយគ្នានេះ សម្តេចប្រធានព្រឹទ្ធសភា ក៏បានថ្លែងអំណរគុណចំពោះរដ្ឋាភិបាលហុងគ្រី ដែលផ្តល់ជំនួយផ្នែកអប់រំជាបន្តបន្ទាប់ ចាប់តាំងពីឆ្នាំ១៩៨០ រហូតមកដល់បច្ចុប្បន្ន និងបន្តជួយបន្ថែមទៀតនៅពេលអនាគត។ ជំនួយក្នុងវិស័យអប់រំ បានជួយអភិវឌ្ឍន៍ធនធានមនុស្សនៅកម្ពុជាផង និងបានចូលរួមសម្រេចនូវយុទ្ធសាស្រ្តចតុកោណ ដំណាក់កាលទី៤ របស់រាជរដ្ឋាភិបាលកម្ពុជា ដែលចាត់ទុកការអភិវឌ្ឍធនធានមនុស្សជាវិស័យអាទិភាពទីមួយ។ លើសពីនេះទៀត កម្ពុជាមានមោទនភាពចំពោះនិស្សិតកម្ពុជាដែលធ្លាប់បានសិក្សានៅប្រទេសហុងគ្រី បានក្លាយជាថ្នាក់ដឹកនាំសំខាន់ៗ នៅតាមក្រសួងមួយចំនួន។
ឆ្លៀតក្នុងឱកាសនោះ សម្តេចវិបុលសេនាភក្តី សាយ ឈុំ បានផ្តាំផ្ញើសួរសុខទុក្ខ ជូនឯកឧត្តមប្រធានរដ្ឋសភាហុងគ្រី និងសូមគោរពអញ្ជើញឯកឧត្តមប្រធានរដ្ឋសភាហុងគ្រី ដឹកនាំគណៈប្រតិភូចូលរួមកិច្ចប្រជុំភាពជាដៃគូសភា អាស៊ី-អឺរ៉ុប (ASEP) នៅឆ្នាំ២០២០ នៅកម្ពុជា៕
ដោយ ប៊ុនរិទ្ធ
