ថ្ងៃទី១៥ ខែតុលា ឆ្នាំ២០១៩ — បន្ទាប់ពីបានស្នាក់អាស្រ័យបំពេញទស្សនកិច្ចផ្លូវការនៅទីក្រុងប្រាក សាធារណរដ្ឋឆែក ប្រកបដោយលទ្ធផលដ៏ត្រចះត្រចង់រួចមក នារសៀលថ្ងៃទី១៤ ខែតុលា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណ:ប្រតិភូជាន់ខ្ពស់រាជរដ្ឋាភិបាល កម្ពុជា បានអញ្ជើញធ្វើដំណើរចាកចេញពីទីក្រុងប្រាកសាធារណរដ្ឋឆែក ក្នុងដំណើរបន្តទៅចូលរួមកិច្ចប្រជុំកំពូលស្តីពីទឹកលើកទី៣ ឆ្នាំ២០១៩ នៅទីក្រុងប៊ុយដាប៉ែស ប្រទេសហុងគ្រី។
អ្នកយកព័តមានទូរទស្សន៍ជាតិកម្ពុជាបានឱ្យដឹងថា បន្ទាប់ពីបានចំណាយពេលនៃការធ្វើដំណើរប្រមាណ៤៥នាទីរួចមក យន្តហោះពិសេសបាន ធ្វើការចុះចតនៅអាកាសយានដ្ឋានអន្តរជាតិ Liszt Ferenc ទីក្រុងប៊ុយដាប៉ែស ប្រទេសហុងគ្រី ប្រកបដោយសុវត្ថិភាព ក្រោមវត្តមាននៃការអញ្ជើញទទួលបដិសណ្ឋារកិច្ចស្វាគមន៍យ៉ាងកក់ក្តៅបំផុតពី ឯកឧត្តមអគ្គនាយក នៃការិយាល័យប្រធានាធិបតី ឯកឧត្តមអគ្គនាយក នៃនាយកដ្ឋានអាស៊ី និង ឯកឧត្តមអគ្គនាយក នៃនាយកដ្ឋានពិធីការក្រសួងការបរទេសហុងគ្រី រួមទាំងឯកឧត្តម លោកជំទាវ ជាថ្នាក់ដឹកនាំហុងគ្រីជាច្រើនរូប។ ដំណើរទៅកាន់ប្រទេសហុងគ្រី របស់សម្ដេចតេជោ ហ៊ុន សែន គឺជាការឆ្លើយតបតាមការអញ្ជើញរបស់ ឯកឧត្តម យ៉ាណូស អាឌ័រ (János Áder) ប្រធានាធិបតីហុងគ្រី ដើម្បីចូលរួមកិច្ចប្រជុំកំពូលស្តីពីទឹក លើកទី៣ (3rd BWS) ដែលរៀបចំឡើងក្រោមប្រធានបទ «ការទប់ស្កាត់វិបត្តិទឹក» ។ កិច្ចប្រជុំ 3rd BWS នឹងផ្តល់ឱកាសដល់ថ្នាក់ដឹកនាំ នឹងអ្នកចូលរួមទាំងអស់ចែករំលែកបទពិសោធន៍ និងផ្លាស់ប្តូរទស្សនៈ ដើម្បីជំនះនូវបញ្ហាប្រឈមនានា ទាំងនៅក្នុងតំបន់ និងសកលលោកនាពេលបច្ចុប្បន្ន សំដៅធ្វើយ៉ាងណាសម្រេចឲ្យបាន នូវការរីកលូតលាស់ប្រកបដោយចីរភាព និងបរិយាប័ន្នជាពិសេសទប់ស្កាត់វិបត្តិទឹកឲ្យបាន។ សម្តេចតេជោនាយករដ្ឋមន្ត្រី នឹងអញ្ជើញថ្លែងសុន្ទរកថានៅក្នុងពិធីបើកកិច្ចប្រជុំកំពូលនេះ ដោយផ្តោតទៅលើអាទិភាព យុទ្ធសាស្ត្រ និងកម្មវិធីការងារច្បាស់លាស់របស់កម្ពុជា ដើម្បីសម្រេចបាននូវការគ្រប់គ្រង និងការអភិវឌ្ឍធនធានទឹកប្រកបដោយប្រសិទ្ធភាព និងនិរន្តរភាព។សម្តេចតេជោ ក៏នឹងលើកឡើងពីភាពចាំបាច់ក្នុងកិច្ចប្រឹងប្រែងរួមគ្នាសម្រាប់សន្តិសុខទឹកនិងនិរន្តរភាពបរិស្ថាន និងបញ្ហាប្រឈមដទៃទៀត ដូចជានិន្នាការនៃការឡើងកំដៅភពផែនដី កំណើនប្រជាជនក្នុងសកលលោក និងជម្លោះក្នុងការប្រើប្រាស់ទឹកឆ្លងដែន។ ក្នុងអំឡុងពេលស្នាក់នៅទីក្រុងប៊ុយដាប៉ែស សម្តេចតេជោនាយករដ្ឋមន្ត្រី នឹងអញ្ជើញចូលជួប សម្តែងការគួរសមជាមួយឯកឧត្តម យ៉ាណូស អាឌ័រ ប្រធានាធិបតីហុងគ្រី ព្រមទាំងទទួលការចូលជួប សម្តែងការគួរសមដាច់ដោយឡែកដោយ ឯកឧត្តម លី យ៉ុង (Li Yong) អគ្គនាយកអង្គការអភិវឌ្ឍឧស្សាហកម្មសហប្រជាជាតិ (UNIDO)ផងដែរ៕
ដោយ ជឹម ណារី
