សៀមរាប ថ្ងៃទី០៩ ខែសីហា ឆ្នាំ២០១៩ — នៅក្នុងដំណើរទស្សនកិច្ចផ្លូវរដ្ឋនៅប្រទេសកម្ពុជា ឯកឧត្តម ម៉ៃទ្រីប៉ាឡា ស្រ៊ីសេនា (Maithripala Sirisena) ប្រធានាធិបតីនៃសាធារណរដ្ឋប្រជាធិបតេយ្យសង្គមនិយមស្រីលង្កា និងលោកជំទាវ នៅព្រឹកថ្ងៃទី០៩ខែសីហាឆ្នាំ២០១៩នេះ បានទៅទស្សនាប្រាសាទអង្គរ និងប្រាសាទបាយ័ន ក្នុងខេត្តសៀមរាប ដោយមានការអមដំណើរពីសំណាក់សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ឯកឧត្តម គុយ សុផល ឧត្តមទីប្រឹក្សាផ្ទាល់ព្រះមហាក្សត្រ និងជាទេសរដ្ឋមន្រ្តីទទួលបន្ទុកកិច្ចការទូទៅ អមក្រសួងព្រះបរមរាជវាំង និងឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន។
បើតាមការបញ្ជាក់ពីលោក ឡុង កុសល ប្រធាននាយកដ្ឋានផ្សព្វផ្សាយ នៃអាជ្ញាធរជាតិអប្សរា បានឱ្យដឹងថា ប្រធានាធិបតីស្រីលង្កា ឯកឧត្តម ម៉ៃទ្រីប៉ាឡា ស្រ៊ីសេនា (Maithripala Sirisena) បានមកទស្សនកិច្ចនៅតំបន់រមណីយដ្ឋានអង្គរនៅពេលនេះ នឹងធ្វើឱ្យមានកិច្ចសហប្រតិបត្តិការយ៉ាងសំខាន់មួយ ផ្នែកវប្បធម៌ អភិរក្សប្រាសាទជាពិសេសផ្នែកសាសនា ព្រោះស្រីលង្កាក៏បានគោរពជំជឿសាសនាដូចកម្ពុជាដែរ។ លោកសង្ឃឹមថា បន្ទាប់ពីប្រធានាធិបតីស្រីលង្កា បានមកទស្សនកិច្ចនៅតំបន់រមណីយដ្ឋានអង្គរនេះ នឹងជួយផ្សព្វផ្សាយពីសម្បត្តិវប្បធម៌ និងទំបន់ទេសចរណ៍កម្ពុជាឱ្យកាន់ប្រជាជននៅប្រទេសរបស់ឯកឧត្តម និងពិភពលោកឱ្យបានកាន់តែទូលំទូលាយ និងមានភ្ញៀវជនជាតិស្រីលង្កា មកទស្សនាកម្ពុជាកាន់តែច្រើន ជាពិសេសទេសចរណ៍សាសនា។
ឯកឧត្តម ម៉ៃទ្រីប៉ាឡា ស្រ៊ីសេនា (Maithripala Sirisena)ប្រធានាធិបតីនៃសាធារណរដ្ឋប្រជាធិបតេយ្យសង្គមនិយមស្រីលង្កាបានកោតស្ងប់ស្ញែងពីភាពអស្ចារ្យ នៃស្នាដៃរបស់បុព្វបុរសខ្មែរដែលបានកសាងប្រាង្គប្រាសាទជាច្រើន បង្កប់នូវរចនាបថ ស្ថាបត្យកម្ម និងគំនូរសិល្បៈដ៏ល្អឯក។
សូមបញ្ជាក់ថា ឯកឧត្តម ម៉ៃទ្រីប៉ាឡា ស្រ៊ីសេនា (Maithripala Sirisena) ប្រធានាធិបតី នៃសាធារណរដ្ឋប្រជាធិបតេយ្យសង្គមនិយមស្រីលង្កា និងលោកជំទាវបានអញ្ជើញមកបំពេញ ទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា ចាប់ពីថ្ងៃទី០៧ ដល់ថ្ងៃទី១០ ខែសីហា ឆ្នាំ២០១៩។ ក្នុងដំណើរទស្សនកិច្ចនេះ ឯកឧត្តមប្រធានាធិបតីក៏បាននឹងចូលគាល់ព្រះករុណា ព្រះមហាក្សត្រ នៃព្រះរាជាណាចក្រកម្ពុជា នៅព្រះបរមរាជវាំង បានជួបប្រជុំទ្វេភាគីជាមួយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានធ្វើកិច្ចសហប្រតិបត្តិការទ្វេភាគីនៅក្នុងវិស័យជាច្រើន ដែលត្រូវលើកយកមកពិភាក្សា សំដៅពង្រឹងថែមទៀតនូវចំណងទាក់ទងមិត្តភាពរវាងប្រទេសទាំងពីរ ដែលបានចងភ្ជាប់គ្នាយ៉ាងជ្រាលជ្រៅតាមរយៈព្រះពុទ្ធសាសនា។ ថ្នាក់ដឹកនាំទាំងពីរ ក៏នឹងធ្វើការផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ដែលជាការព្រួយបារម្ភ និងផលប្រយោជន៍រួម ផងដែរ៕
ដោយ ឃុត សៅ
