សុន្ទរកថា ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ដើម្បីកាត់បន្ថយភាពក្រីក្រនៅកម្ពុជា ថ្លែងក្នុងពិធីបើកសន្និសីទអន្តរជាតិថ្នាក់តំបន់ ស្តីពី “ការប្រយុទ្ធប្រឆាំងឱសថក្លែងក្លាយ និងអន់គុណភាព”
ថ្ងៃទី០៥ ខែវិច្ឆិកា ឆ្នាំ២០១៨ នៅសណ្ឋាគារសូហ្វីតែលភ្នំពេញភូគីត្រា
*********
- ខ្ញុំបាទ សូមគោរព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ជាទីគោរពដ៏ខ្ពង់ខ្ពស់បំផុត
- សូមគោរព សម្តេច ឯកឧត្តម លោកជំទាវ សមាជិក សមាជិការាជរដ្ឋាភិបាល
- សូមគោរព លោកជំទាវ Eva Nguyen Binh ឯកអគ្គរដ្ឋទូតវិសាម្ញ និងពេញសមត្ថភាពនៃសាធារណៈរដ្ឋបារាំងប្រចាំព្រះរាជាណាចក្រកម្ពុជា
- សូមគោរព ឯកឧត្តម លោកជំទាវ ឯកអគ្គរដ្ឋទូត ឯកអគ្គរាជទូតនៃបណ្តាប្រទេសជាមិត្ត ប្រចាំនៅកម្ពុជា
- សូមគោរព ឯកឧត្តម លោកជំទាវ លោក លោកស្រី នាងកញ្ញា ភ្ញៀវកិត្តិយសជាតិ-អន្តរជាតិ!
ថ្ងៃនេះ ជាថ្ងៃប្រកបដោយមោទនភាពវិសេសវិសាល ដែលព្រះរាជាណាចក្រកម្ពុជាធ្វើជាម្ចាស់ផ្ទះ និងជាអ្នករៀបចំអង្គសន្និសីទអន្តរជាតិថ្នាក់តំបន់ស្តីពី “ការប្រយុទ្ធប្រឆាំងឱសថក្លែងក្លាយ និងអន់គុណភាព” ដោយមានកិច្ចសហការជាមួយសាធារណៈរដ្ឋបារាំង និងមានការគាំទ្របច្ចេកទេសពីអង្គការសុខភាពពិភពលោក។ តាងនាមថ្នាក់ដឹកនាំ មន្ត្រីរាជការ បុគ្គលិកក្រសួងសុខាភិបាលនៃព្រះរាជាណាចក្រកម្ពុជា និង គណៈកម្មការអន្តរក្រសួង ខ្ញុំបាទសូមធ្វើគាវរកិច្ចគោរពស្វាគមន៍ប្រកបដោយកតញ្ញូតាធម៌ដ៏ជ្រាលជ្រៅបំផុតជូនចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែល សម្តេច បានឆ្លៀតឱកាសដ៏មានតម្លៃជាទីបំផុតអញ្ជើញជាអធិបតីដ៏ឧត្តុង្គឧត្តមក្នុងពិធីបើកសន្និសីទអន្តរជាតិថ្នាក់តំបន់ស្តីពី “ការប្រយុទ្ធប្រឆាំងឱសថក្លែងក្លាយ និងអន់គុណភាព” នាពេលនេះ។
-សម្តេចអគ្គមហាសេនាបតីតេជោ ជាទីគោរពដ៏ខ្ពង់ខ្ពស់បំផុត
-សម្តេច ឯកឧត្តម លោកជំទាវ លោក លោកស្រី អ្នកនាងកញ្ញា!
ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ព្រះរាជាណាចក្រកម្ពុជាបានកសាងឡើងវិញចាប់ពីចំនុចសូន្យ ដែលខ្ទិចខ្ទាំដោយសង្គ្រាម និងរបបប្រល័យពូជសាសន៍ប៉ុលពត រហូតក្លាយជាប្រទេសមានសុខសន្តិភាពពេញលេញ មានស្ថេរភាពនយោបាយ និងអភិវឌ្ឈន៍រីកចម្រើនគ្រប់វិស័យ។ សម្តេចតេជោ ជានិច្ចកាលតែងតែផ្តល់អាទិភាពដល់វិស័យសុខាភិបាលធ្វើឲ្យវិស័យសុខាភិបាលកម្ពុជាមានការរីកចម្រើន និងមានវឌ្ឈនៈភាពគួរជាទីមោទនៈ ដូចជាការសម្រេចបានគោលដៅអភិវឌ្ឈន៍សហស្សវត្សលើវិស័យសុខាភិបាលមុនកាលកំណត់ មានជាអាទិ៍ ការកាត់បន្ថយអត្រាមរណៈភាពមាតា ទារក កុមារ និងជំងឺឆ្លងនានាដូចជា ជំងឺគ្រុនចាញ់ អេដស៍ របេង និងជំងឺឆ្លងផ្សេងៗទៀតដែលអាចការពារបានតាម រយៈការចាក់ថ្នាំបង្ការ និងទប់ស្កាត់ការចម្លងជាលក្ខណៈអន្តរជាតិ។
វឌ្ឈនៈភាពទាំងនេះ បានជំរុញឲ្យអាយុរស់នៅជាមធ្យមរបស់ប្រជាជនកម្ពុជាមានការកើនឡើងរហូតដល់ ៧០ឆ្នាំ នៅឆ្នាំ២០១៦។ ក្រសួងសុខាភិបាល បាននិងកំពុងបន្តអនុវត្តយ៉ាងយកចិត្តទុកដាក់បំផុតនូវយុទ្ធសាស្ត្រចតុកោណរបស់រាជរដ្ឋាភិបាល និងអនុវត្តនូវផែនការយុទ្ធសាស្ត្រសុខាភិបាលឆ្នាំ២០១៦-២០២០ រួមទាំង ផែនការអនុវត្តរួមគ្នា រវាងក្រសួងមហាផ្ទៃ និងក្រសួងសុខាភិបាល ក្នុងកិច្ចខិតខំប្រឹងប្រែងលុបបំបាត់ឱសថក្លែងក្លាយ និងអន់គុណភាពនៅក្នុងព្រះរាជាណាចក្រកម្ពុជា។
-សម្តេចអគ្គមហាសេនាបតីតេជោ ជាទីគោរពដ៏ខ្ពង់ខ្ពស់បំផុត
-សម្តេច ឯកឧត្តម លោកជំទាវ លោក លោកស្រី អ្នកនាងកញ្ញា!
ឱសថក្លែងក្លាយ និងអន់គុណភាព បានបង្កើតជាបញ្ហាសុខភាពសាធារណៈសម្រាប់បណ្តាប្រទេសនានាលើសកលលោក និងនៅក្នុងតំបន់ ដែលទាមទារនូវការដោះស្រាយរួមគ្នា ដើម្បីទប់ស្កាត់នូវហានិភ័យសុខភាពដល់ប្រជាពលរដ្ឋ។ សម្រាប់ព្រះរាជាណាចក្រកម្ពុជា រាជរដ្ឋាភិបាលបានដាក់ចេញនូវយន្តការគ្រប់គ្រង ត្រួតពិនិត្យ ប្រយុទ្ធប្រឆាំងឱសថក្លែងក្លាយ និងអន់គុណភាពនៅក្នុងប្រទេស ដែលមានដូចតទៅ៖
1- បង្កើតច្បាប់ស្តីពីការគ្រប់គ្រងឱសថ នៅថ្ងៃទី១៧ ខែមិថុនា ឆ្នាំ១៩៩៦ និងវិសោធនកម្មច្បាប់នេះនៅថ្ងៃទី២៨ ខែធ្នូ ឆ្នាំ២០០៧។
2- ការត្រួតពិនិត្យលើការផលិតក្នុងស្រុក ការនាំចូល និងចែកចាយឱសថ ដោយតម្រូវឲ្យមានការចុះបញ្ជិកាឱសថគ្រប់ប្រភេទទាំងឱសថសម័យនិងបុរាណរួមទាំងឱសថបំប៉នសុខភាពផង ទៅតាមច្បាប់គ្រប់គ្រងឱសថ និងគោលការណ៍អនុវត្តរបស់អាស៊ាន។
3- ការចុះត្រួតពិនិត្យជាប្រចាំនៅតាមឃ្លាំងឱសថ រោងចក្រផលិតឱសថ ឱសថស្ថាន ឬទីតាំងលក់ផលិតផលឱសថនានា ព្រមទាំងចាត់វិធានការតាមច្បាប់ជាធរមាន។
4- ការចុះធ្វើការស្រាវជ្រាវ និងវិភាគគុណភាពផលិតផលឱសថលើទីផ្សារជាប្រចាំ ដោយមានកិច្ចសហការជិតស្និទ្ធជាមួយអង្គការអន្តរជាតិដៃគូ។
5- ការបង្កើតមណ្ឌលព័ត៌មានឱសថកម្ពុជា ដែលជាសមាជិកពេញសិទ្ធិរបស់មជ្ឈមណ្ឌលសហប្រតិបត្តិការអង្គការសុខភាពពិភពលោក ក្នុងការតាមដានសុវត្ថិភាពឱសថ (ADR Monitoring) ដែលមានទីតាំងនៅទីក្រុង UPPSALA នៃប្រទេសស៊ុយអែត ដើម្បីទទួល និងបញ្ជូនព័ត៌មានឱសថដែលត្រូវបានរកឃើញថា មានផលប៉ះពាល់សុខភាព ឬបង្កគ្រោះថ្នាក់ដល់អាយុជីវិតមនុស្ស។
6- ការបង្រ្កាបកន្លែងផលិត និងស្តុកទុកគ្រឿងសម្អាងគ្មានច្បាប់អនុញ្ញាតពីក្រសួងសុខាភិបាល។
7- ទន្ទឹមនឹងការរីកចម្រើនយ៉ាងឆាប់រហ័ស ផ្នែកបច្ចេកវិទ្យាព័ត៌មាននៅកម្ពុជា យើងបានជួបប្រទះនូវការលក់ផលិតផលតាម online ដែលមួយចំនួនជាផលិតផលគ្មានប្រភពច្បាស់លាស់ និងគ្មានការទទួលស្គាល់ពីក្រសួងសុខាភិបាល ដែលអាចបង្កគ្រោះថ្នាក់ដល់សុខភាពប្រជាពលរដ្ឋ ដែលក្រសួងកំពុងតែខិតខំលុបបំបាត់។
8- ការលើកកម្ពស់ការយល់ដឹងរបស់ប្រជាពលរដ្ឋ ជាកិច្ចការចាំបាច់ដែលបានអនុវត្ត និងត្រូវធ្វើបន្ថែមទៀត ដើម្បីកាត់បន្ថយ និងឈានទៅលុបបំបាត់នូវការប្រើប្រាស់ផលិតផលឱសថក្លែងក្លាយ និងអន់គុណភាព។
9- ពង្រឹង និងពង្រីកកិច្ចសហប្រតិបត្តិការក្នុងតំបន់ និងអន្តរជាតិ ដើម្បីលុបបំបាត់ឱសថក្លែងក្លាយ និងអន់គុណភាព។
ថ្ងៃនេះ ក្រសួងសុខាភិបាលបានសហការជាមួយគណៈកម្មការប្រយុទ្ធប្រឆាំងផលិតផលក្លែងក្លាយ រៀបចំសន្និសីទអន្តរជាតិថ្នាក់តំបន់ស្តីពី “ការប្រយុទ្ធប្រឆាំងឱសថក្លែងក្លាយ និងអន់គុណភាព” នេះឡើង ដែលជាការបង្ហាញនូវការយកចិត្តទុកដាក់ខ្ពស់បន្ថែមទៀតរបស់រាជរដ្ឋាភិបាលកម្ពុជាលើកិច្ចខិតខំប្រឹងប្រែងប្រយុទ្ធប្រឆាំងឱសថក្លែងក្លាយ និងឱសថអន់គុណភាពនៅក្នុងតំបន់ និងនៅក្នុងប្រទេស សំដៅរក្សាសុវត្ថិភាពនៃការប្រើប្រាស់ផលិតផលឱសថ ជូនប្រជាជន។
-សម្តេចអគ្គមហាសេនាបតីតេជោ ជាទីគោរពដ៏ខ្ពង់ខ្ពស់បំផុត
-សម្តេច ឯកឧត្តម លោកជំទាវ លោក លោកស្រី អ្នកនាងកញ្ញា!
ក្នុងនាមក្រសួងសុខាភិបាល និងក្នុងនាមប្រធានគណៈកម្មការអន្តរក្រសួង ខ្ញុំបាទសូមសំដែងនូវការដឹងគុណយ៉ាងជ្រាលជ្រៅបំផុតចំពោះ សម្តេចអគ្គមហាសេនាបតីតេជោ ហ៊ុន សែន ដែលតែងតែគាំទ្រ ផ្តល់អនុសាសន៍ដ៏មានតម្លៃបំផុត ចង្អុលបង្ហាញមាគ៌ាតម្រង់ទិសដ៏ឈ្លាសវៃ ដល់ក្រសួងសុខាភិបាលនិងគណៈកម្មការអន្តរក្រសួង។ ខ្ញុំសូមថ្លែងអំណរគុណជូនដល់ភាគីបារាំង ដែលបានសហការរៀបចំ និងការគាំទ្របច្ចេកទេសរបស់អង្គការសុខភាពពិភពលោកសម្រាប់អង្គសន្និសីទថ្នាក់តំបន់នេះឡើង។ ខ្ញុំសូមថ្លែងអំណរគុណចំពោះសហការី និងមន្ត្រីក្រោមឱវាទក្រសួងសុខាភិបាល និងអាជ្ញាធរពាក់ព័ន្ធទាំងអស់ ដែលបានយកចិត្តទុកដាក់បំពេញភារកិច្ច អស់ពីកំលាំងកាយ-ចិត្ត មិនថាយប់ ឬថ្ងៃ ដើម្បីអនុវត្តច្បាប់ ប្រកបដោយការទទួលខុសត្រូវខ្ពស់។ ខ្ញុំសូមថ្លែងអំណរគុណដល់សមេ្តច ឯកឧត្តម លោកជំទាវ លោក លោកស្រី ភ្ញៀវកិត្តិយសជាតិ-អន្តរជាតិទាំងអស់ ដែលបានចូលរួមអង្គសន្និសីទនាពេលនេះ។
ជាទីបញ្ចប់ ខ្ញុំបាទសូមគោរពថ្លែងអំណរគុណយ៉ាងជ្រាលជ្រៅសារជាថ្មីម្តងទៀត ជូនចំពោះ សម្តេចតេជានាយករដ្ឋមន្ត្រី ដែលបានផ្តល់កិត្តិយសដ៏ខ្ពង់ខ្ពស់ជាអធិបតីក្នុងពិធីបើកអង្គសន្និសីទអន្តរជាតិថ្នាក់តំបន់ នាពេលនេះ និងសូមបួងសួងដល់វត្ថុស័ក្តិសិទ្ធ ទេវតាថែរក្សាព្រះរាជាណាចក្រកម្ពុជា តាមបីបាច់ថែរក្សា សម្តេចតេជោនាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារ សូមប្រកបដោយសុខភាពល្អ កំលាំងខ្លាំងក្លា ប្រាជ្ញាឈ្លាសវៃ ដើម្បី សម្តេច បន្តដឹកនាំជាអគ្គមគ្គុទេសក៍ដ៏ឆ្នើមនៃព្រះរាជាណាចក្រកម្ពុជា ក្នុងការស្ថាបនាប្រទេសកម្ពុជាឆ្ពោះទៅរកភាពរុងរឿង និងសុខដុមរម្យនាជានិរន្តរ៍។
ខ្ញុំបាទសូមជូនពរចំពោះ សម្តេច ឯកឧត្តម លោកជំទាវ លោក លោកស្រី នាងកញ្ញា និងភ្ញៀវកិត្តិយសជាតិ-អន្តរជាតិទាំងអស់ សូមបានប្រកបដោយសេចក្តីសុខ កុំបីឃ្លៀងឃ្លាតឡើយ។
ខ្ញុំបាទសូមគោរពអញ្ជើញ សម្តេចតេជោនាយករដ្ឋមន្រី្ត មេត្តាផ្តល់អនុសាសន៍ដ៏ខ្ពង់ខ្ពស់បំផុត និងប្រកាសបើកអង្គសនិ្នសីទ។
