ជម្រុញអោយស្រ្តីចាប់យកការសិក្សាអោយកាន់តែច្រើន
ថ្ងៃនេះ ខ្ញុំពិតជាមានការរីករាយ ដែលបានមកចូលរួមជាមួយនឹង ឯកឧត្តម លោកជំទាវ អស់លោក លោកស្រី អ្នកនាងកញ្ញា ដើម្បីចែកសញ្ញាបត្រ សម្រាប់ជ័យលាភី ចំនួន ២.៨៣៨ នាក់ នៃសាកលវិទ្យាល័យចេនឡា។ ជាការកត់សម្គាល់ នៅក្នុងចំនួន(និស្សិត) ២.៨៣៨ នាក់នេះ មាននារីរហូតទៅដល់ ១.៥៨៧ នាក់ មានន័យថា ស្រ្តីច្រើនជាងបុរស។ នេះក៏ជាផ្នែកមួយនៃការកត់សម្គាល់របស់យើង ប៉ុន្តែ យើងក៏បានកត់សម្គាល់ពីបញ្ហានៅពេលដែលបញ្ចប់ថ្នាក់មធ្យមសិក្សាទុតិយភូមិ ស្រ្តី និងបុរស មានប្រហាក់ប្រហែលគ្នា។ នៅក្នុងកម្រិតបរិញ្ញាបត្ររង ស្រ្តី និងបុរស គឺប្រហាក់ប្រហែលគ្នា ប៉ុន្តែ នៅពេលឈានឡើងទៅខ្ពស់ គឺស្រ្តីទៅជាទាបជាង។ ខ្ញុំសង្ឃឹមថា អ្វីដែលបានកើតឡើងនៅក្នុងសាកលវិទ្យាល័យចេនឡា ដែលទាក់ទងជាមួយនឹងសមាសភាពយ៉េនឌ័រ ចំនួនអត្រាស្រ្តី គឺការបណ្ដុះបណ្ដាលធនធានមនុស្សនៅទីនេះក៏កាន់តែច្រើន។
ការបង្កើតអោយមាន គឺជារឿងលំបាក តែអ្វីដែលលំបាកជាង គឺការធ្វើអោយមាននិរន្តរភាព
តាមរយៈរបាយការណ៍របស់សាកលវិទ្យាធិការ នៃសាកលវិទ្យាល័យចេនឡា ដែលអម្បាញ់មិញនេះ នៃការបណ្ដុះបណ្ដាលធនធានមនុស្ស ចំណុចនេះ វាក៏បានក្លាយទៅសមិទ្ធផលថ្មីមួយទៀតរបស់សង្គមជាតិរបស់យើង។ ខ្ញុំសុំយកឱកាសនេះ ក្នុងនាមរាជរដ្ឋាភិបាល សុំសម្តែងនូវការកោតសរសើរ ចំពោះក្រុមប្រឹក្សាភិបាល គណៈគ្រប់គ្រង សាស្រ្តាចារ្យ ដែលបានខិតខំធ្វើអោយមានវឌ្ឍនភាព សម្រាប់ការបណ្ដុះបណ្ដាលនៅក្នុងសាកលវិទ្យាល័យនេះ។
ដូចដែលខ្ញុំធ្លាប់បានលើកមុនៗរួចមកហើយ អ្វីដែលធ្វើអោយវាបានកើតនោះ វាលំបាកណាស់ទៅហើយ ក៏ប៉ុន្តែ ការដែលធ្វើអោយមាននិរន្តរភាព គឺមិនមែនជាបញ្ហាងាយស្រួលទេ។ សាកលវិទ្យាល័យមួយចំនួនត្រូវបានបិទទ្វា សាកលវិទ្យាល័យមួយចំនួនរបៀបដើរទៅមុខក៏មិនទៅ ថយក្រោយក៏មិនរួច។ អញ្ចឹង ចំណុចនេះ គឺជាចំណុចដែលមិនមែនគ្រាន់តែសាកលវិទ្យាល័យមួយនេះទេ សាកលវិទ្យាល័យដទៃទៀត និងផ្នែកដទៃទៀត ឬវិស័យដទៃទៀត ក៏ត្រូវតែយកចិត្តទុកដាក់។ ការបង្កើតអោយមាន វាគឺជារឿងលំបាកទៅហើយ តែបញ្ហានិរន្តរភាពរបស់វាជាបញ្ហាកាន់តែលំបាកទៀត ធ្វើយ៉ាងម៉េចរក្សាអោយបាននូវដំណើរការ ហើយមិនមែនគ្រាន់តែដំណើរការតាមរបៀបបែបចាស់នោះទេ ប៉ុន្តែការធ្វើទំនើបកម្ម និងបង្កើនគុណភាពការបណ្ដុះបណ្ដាលកាន់តែមានសារសំខាន់។
វឌ្ឍនភាពនៃការបញ្ជូននិស្សិតទៅរៀន និងធ្វើការនៅក្រៅប្រទេស
ខ្ញុំឃើញថា សាកលវិទ្យាល័យចេនឡា ពីមួយថ្ងៃទៅមួយថ្ងៃ ក៏មានជំហានរីកចម្រើន ក្នុងនោះតាមរយៈរបាយការណ៍អម្បាញ់មិញ គឺខ្ញុំបានឃើញថា ការបញ្ជូននិស្សិតបរិញ្ញាបត្ររងរបស់យើងទៅទទួលការសិក្សាបន្ថែម និងធ្វើការងារនៅប្រទេសជប៉ុន។ រឿងនេះ ខ្ញុំធ្លាប់បាននិយាយជាមួយនឹងនាយករដ្ឋមន្រ្តី អាបេ (Shinzō Abe) ស្ដីអំពីបញ្ហាទាក់ទងនឹងការទទួលយកជនជាតិកម្ពុជា ទៅសិក្សានៅប្រទេសជប៉ុន។ ពេលនោះ(នាយករដ្ឋមន្រ្តីជប៉ុន) អាបេ (Shinzō Abe) បានឆ្លើយតបជាមួយខ្ញុំកាលពីឆ្នាំ ២០១៥ ឯណោះទេ គាត់បាននិយាយថា ជប៉ុនកំពុងតែខ្វះពលកម្ម ដែលពាក់ព័ន្ធជាមួយនឹងបញ្ហាមនុស្សចាស់ច្រើន។ ដូច្នេះ បើតាមមើលទៅក្នុងទីនេះ ផ្នែកបរិញ្ញាបត្ររងខាងថែទាំសុខភាព គឺប្រហែលជាអាចទៅធ្វើការទាក់ទិនជាមួយនឹងមនុស្សចាស់នៅឯប្រទេសជប៉ុន(បាន)។ មួយផ្នែក គឺយើងទៅទទួលការបណ្ដុះបណ្ដាលបន្ថែម តែមួយផ្នែកទៀត ក៏ជាការដោះស្រាយការងារធ្វើ ជាមួយនឹងការនាំមកនូវបច្ចេកវិទ្យាថ្មីៗផងដែរ។ ខ្ញុំពិតជាមានមោទនភាព ដែលយើងបានរួមគ្នាចេញដំណើរពីស្ថានភាពក៏លំបាកលំបិន មកកាន់ស្ថានភាពមួយដែលល្អប្រសើរពីមួយថ្ងៃ ទៅមួយថ្ងៃ។ ការលូតលាស់សម្រាប់ប្រទេសរបស់យើង ដែលចាប់ផ្ដើមពីប្រជាជនប្រមាណជាង ៥ លាននាក់ មកកាន់ប្រជាជនជាង ១៥ លាននាក់។ ក្នុងដំណើរវែងឆ្ងាយនេះ ដោយលាយឡំរវាងសង្រ្គាមផង សន្ដិភាពផង មកដល់សន្ដិភាពទាំងស្រុង ដែលផ្ដល់ឱកាសអោយយើងបានកសាងប្រទេសពេញដៃពេញជើង។
វិស័យឯកជនចូលរួមបណ្ដុះបណ្ដាលធនធានមនុស្ស
សាកលវិទ្យាធិការ បានលើកឡើងអម្បាញ់មិញ អំពីការលំបាកនានា ដែលយើងបានឆ្លងកាត់ពីដំណាក់កាលមួយមកកាន់ដំណាក់កាលមួយ វាមិនងាយស្រួលទេ ប៉ុន្តែ យើងបានរួមគ្នា ដើម្បីធ្វើអោយប្រទេសនេះមានការលូតលាស់។ គ្មានជោគជ័យណាមួយ ដែលបានកើតឡើងដោយខ្វះការចូលរួមនោះទេ។ នយោបាយផ្ដល់ឱកាសអោយវិស័យឯកជន បានចូលរួមនៅក្នុងការវិនិយោគលើបញ្ហាបណ្ដុះបណ្ដាលធនធានមនុស្ស ត្រូវបានទទួលយកដោយពីវិស័យឯកជន និងទទួលយកពីសំណាក់ប្រជាពលរដ្ឋ។ ក្នុងហ្នឹងអ្នកដែលបានរៀនបង់ថ្លៃទាំងប៉ុន្មាន សុទ្ធតែជាអ្នកដែលបានចូលរួម ដើម្បីនឹងសម្រេចទៅនឹងក្របខណ្ឌគោលនយោបាយស្ដីពីការអនុញ្ញាតផ្ដល់ឱកាសអោយវិស័យឯកជន បានចូលរួមនៅក្នុងដំណើរការបណ្ដុះបណ្ដាលធនធានមនុស្ស។ ប្រសិនបើយើងពឹងផ្អែកតែទៅលើសាកលវិទ្យាល័យ គ្រឹះស្ថានសិក្សារបស់រដ្ឋ គឺពិតជាមិនគ្រប់គ្រាន់ទេ។ ក្នុងនោះ យុវជនដែលមិនអាចទទួលបាននូវការសិក្សានៅសាកលវិទ្យាល័យ នៅគ្រឹះស្ថានសិក្សារបស់រដ្ឋ ហើយបែរជាមិនមាននៅគ្រឹះស្ថានសិក្សារបស់ឯកជនទៀតនោះ តើពួកគេនឹងទៅណា? នេះជាបញ្ហាធំណាស់ សម្រាប់ការដោះស្រាយរបស់យើង។
ចុងក្រោយនេះ ក្រសួងអប់រំ យុវជន និងកីឡា ក៏បានផ្ដល់ការអនុញ្ញាតអោយនិស្សិត ដែលប្រឡងមិនជាប់មធ្យមសិក្សាទុតិយភូមិ អាចមានឱកាសចូលរៀនសម្រាប់យកបរិញ្ញាបត្ររង។ នេះក៏ជាវិធីដោះស្រាយមួយ ដើម្បីកាត់បន្ថយនូវចំនួនសិស្សដែលមិនជាប់បាក់ឌុប។ ជាការកាត់បន្ថយមួយ ដើម្បីអោយពួកគេបានលទ្ធភាពទទួលបាននូវការបណ្ដុះបណ្ដាលជំនាញ។ នៅក្នុងជំនាញនេះ ក៏មានថ្នាក់បរិញ្ញាបត្ររងនៅតាមសាកលវិទ្យាល័យរបស់រដ្ឋ នៅតាមសាកលវិទ្យាល័យ គ្រឹះស្ថានឧត្តមសិក្សារបស់ឯកជន និងនៅតាមសាលាបណ្ដុះបណ្ដាលបច្ចេកទេសនានារបស់ក្រសួងការងារ និងបណ្ដុះបណ្ដាលវិជ្ជាជីវៈ។
កំណែទម្រង់អប់រំ ប្រតិសកម្មចំពោះឥរិយាបថសិស្ស យុវជន មាតាបិតា និងអាណាព្យាបាល
ខ្ញុំសុំយកឱកាសនេះ ដើម្បីសម្តែងជូននូវការកោតសរសើរ ចំពោះក្រសួងអប់រំ យុវជន និងកីឡា ក៏ដូចជាក្របខណ្ឌអប់រំទាំងអស់នៅទូទាំងប្រទេស ដែលបានអនុវត្តនូវការប្រឡងមធ្យមសិក្សាទុតិយភូមិរយៈពេលកន្លងទៅប្រកបដោយជោគជ័យ។ គ្មានបាតុភាពធំណាមួយកើតឡើងទេ ហើយអ្វីដែលវាសំខាន់នោះ គឺត្រង់ថា ប្រជាពលរដ្ឋបានចូលរួមគាំទ្រចំពោះកំណែទម្រង់នេះ។ អត្រាជាប់របស់សិស្សឆ្នាំនេះ មានរហូតទៅដល់ជាង ៦៣% នៃចំនួនសិស្សដែលប្រឡង។ កំណែទម្រង់មួយនេះវាផ្តល់ឱកាសធំណាស់ សម្រាប់កុមារ សម្រាប់យុវជន សម្រាប់មាតាបិតា និងអាណាព្យាបាល ដើម្បីជម្រុញអោយពួកគេប្រឹងរៀន។ មាតាបិតា អាណាព្យាបាល គឺដាស់តឿនអោយកូនបានប្រឹងរៀន។ ជោគជ័យ នៃកំណែទម្រង់ក្នុងវិស័យអប់រំ បានទទួលផ្លែផ្ការួចមកហើយ។ ក្នុងនោះ ផ្នែកដ៏សំខាន់មួយ គឺទាក់ទងទៅនឹងកំណែទម្រង់ក្នុងការប្រឡងមធ្យមសិក្សាទុតិយភូមិ ដែលកំណែទម្រង់មួយនេះបានជះឥទ្ធិពល និងប្រតិសកម្ម ចំពោះឥរិយាបថរបស់សិស្ស របស់យុវជន កុមារ ក៏ដូចជា មាតាបិតា និងអាណាព្យាបាលរបស់សិស្ស។
ជួបសិស្សនិទ្ទេស A នៅថ្ងៃទី ១៤ តុលា សំណេះសំណាល និងផ្តល់រង្វាន់
ខ្ញុំនឹងត្រូវជួបជាមួយនឹងសិស្ស ដែលជាប់និទ្ទេស “A” ចំនួនជាង ៤០០ នាក់។ តាមពិតទៅ គឺខ្ញុំគួរតែជួបអោយបានមុន។ នេះគម្រោងទៅដល់ថ្ងៃទី ១៤ ឯណោះ។ ប៉ុន្តែ ដោយសារតែសេចក្តីត្រូវការ iPad សម្រាប់អោយសិស្សនោះ វាដល់ទៅជាង ៤០០ គ្រឿង។ ដល់ជាង ៤០០ គ្រឿង នៅក្នុងទីផ្សាររបស់យើងវាអត់គ្រប់ ត្រូវកុម្ម៉ង់ដឹកពីក្រៅប្រទេសមក។ អញ្ចឹងថ្ងៃ ១ ខែ តុលា ទើបមកដល់ ហើយថ្ងៃ ១ ខែ តុលា និងបន្តមក កម្មវិធីខ្ញុំជាប់។ អញ្ចឹងទេ បានជាយកថ្ងៃទី ១៤។ តាមពិតគួរត្រូវជួបមុនហ្នឹង ព្រោះម្នាក់ៗត្រូវទទួលបានជាកាដូពីនាយករដ្ឋមន្រ្តី iPad មួយគ្រឿង។ iPad ស្រុកយើងទៅប្រមូលទិញម្តងជាង ៤០០ គ្រឿង ទិញវាមិនបាន។ អញ្ចឹងយើងត្រូវកុម្ម៉ង់ទិញពីខាងក្រៅ។ អញ្ចឹងទេ នាំទាំងគ្រូ នាំទាំងសិស្ស និងមាតាបិតា មកកាន់ទីក្រុងភ្នំពេញ ដើម្បីទទួលបាននូវការសំណេះសំណាលលើកទឹកចិត្ត សម្រាប់សិស្សទទួលបាននិទ្ទេស “A”។ នេះជាការខិតខំមួយរបស់ក្រសួងអប់រំ យុវជន និងកីឡា ក៏ដូចជា ការខិតខំរបស់សាស្រ្តាចារ្យ លោកគ្រូ អ្នកគ្រូ នៅគ្រប់កម្រិតទាំងអស់ ដែលបានប្រឹងប្រែងរួមគ្នាធ្វើអោយខឿនអប់រំរបស់យើង ក្លាយទៅជាខឿនអប់រំប្រកបដោយគុណភាព ការទទួលខុសត្រូវ។
គុណភាពការបណ្តុះបណ្តាលល្អ មើលលើអត្រានៃការមានការងារធ្វើក្រោយរៀនចប់
ជាមួយនេះ ខ្ញុំសូមយកឱកាសនេះ ដើម្បីថ្លែងនូវការអបអរសាទរ ជាមួយនឹងជ័យលាភីគ្រប់កម្រិត ដែលទទួលនូវសញ្ញាបត្រនៅថ្ងៃនេះ ទាំង ២.៨៣៨ នាក់ ហើយសង្ឃឹមថា ជ័យលាភីរបស់យើងនឹងបន្តដើម្បីបង្កើននូវគុណភាពនៃចំណេះដឹង ចំណេះធ្វើ និងការអនុវត្តជាក់ស្តែង នៅតាមទីកន្លែងធ្វើការ។ យោងទៅលើទិន្នន័យដែលបានសិក្សា បញ្ជាក់ថា កម្រិតបរិញ្ញាបត្ររងមានការងារធ្វើរហូតដល់ទៅ ៩០,៨២% ស្មើនឹង ២.០៣៩ នាក់, កម្រិតបរិញ្ញាបត្រមាន ៩៥,៩៥% ស្មើនឹង ៤៩៨ នាក់, ឯកម្រិតបរិញ្ញាបត្រជាន់ខ្ពស់មាន ៧៤ នាក់ ស្មើនឹង ១០០%។ នេះគឺជាលទ្ធផល គេអាចនឹងមើលឃើញនូវតួលេខនូវគុណភាព នៃការបណ្តុះបណ្តាល តាមរយៈធនធានមនុស្ស សម្រាប់បុគ្គលិកសម្រាប់ធ្វើការ ក៏មានតម្រូវការតាមនោះ។ គ្រាន់តែមានសញ្ញាបត្រ ដោយមិនមានចំណេះដឹងពិតប្រាកដនោះ វាមិនអាចឆ្លើយតបនឹងតម្រូវការ នៃទីផ្សារការងារបានទេ។
សេដ្ឋកិច្ចទីផ្សារ គ្មានធម៌មេត្តា ទាល់តែខំធ្វើការ ទើបបានប្រាក់ខែ
សូមបញ្ជាក់ថា ដែលហៅថា សេដ្ឋកិច្ចផ្សារ គ្មានមេត្តាធម៌ទេ ព្រោះថា ក្រុមហ៊ុននីមួយៗ និងផ្នែកនីមួយៗ សុទ្ធតែមានតម្រូវការទាក់ទិនជាមួយនឹងដំណើរការរបស់ក្រុមហ៊ុន ឬដំណើរការតាមផ្នែក។ លើកលែងតែករណីជនពិការប៉ុណ្ណោះ ដែលរដ្ឋបានដាក់កូតាសម្រាប់ស្ថាប័នរដ្ឋ យកជនពិការចំនួន ២% សម្រាប់ចូលបម្រើការក្នុងក្របខណ្ឌរបស់រដ្ឋ។ ក្នុងវិស័យឯកជន គឺត្រូវយកជនពិការ ១% ដើម្បីធ្វើការនៅក្នុងក្រុមហ៊ុនរបស់ខ្លួន។ ប៉ុន្តែ អ្នកដែលធ្វើការនៅទីនោះ គឺមិនមែនអោយតែជនពិការ គឺជ្រើសរើសទៅទេ គឺជនពិការនោះ ក៏ត្រូវមានចំណេះដឹង និងចំណេះធ្វើផងដែរ។ សម្រាប់វិស័យដទៃទៀត ដូចខ្ញុំបានបញ្ជាក់ ដែលហៅថាសេដ្ឋកិច្ចទីផ្សារ ជាក្របខណ្ឌនៃសកម្មភាពដែលគ្មានមនុស្សធម៌ទេ ព្រោះគេមិនអាចទុកអោយយើងដេក ហើយអោយប្រាក់ខែ (នោះទេ)។ បុគ្គលិកថា ១ ពាន់នាក់ ក្នុង ១ ពាន់នាក់ នាំគ្នាដេកសម្រាកឈឺរហូតទៅដល់ពាក់កណ្តាលទៅហើយនោះ តើក្រុមហ៊ុនហ្នឹងវាទៅជាយ៉ាងម៉េច?
ស្នើសុំអោយកម្មការិនីមានផ្ទៃពោះ បានចេញពីធ្វើការមុន ១៥ នាទី យ៉ាងតិច
ក្នុងរយៈពេលចុងក្រោយនេះ ខ្ញុំក៏បានទៅជួបកម្មកររាប់ម៉ឺននាក់ ហើយយើងក៏បានស្នើសុំ ឥឡូវ ខ្ញុំបានស្នើសុំ ក្នុងនោះទាក់ទងនឹងវិស័យវេជ្ជសាស្រ្តដូចនៅទីនេះដែរ។ ខ្ញុំបាន និងកំពុងស្នើសុំ ហើយសង្ឃឹមថា បណ្តារោងចក្រទាំងអស់នឹងផ្តល់ការអនុគ្រោះ សម្រាប់អ្នកមានផ្ទៃពោះ គឺត្រូវបានចេញមុនក្នុងរយៈពេល ១៥ នាទី ដែលឥឡូវនេះ មិនទាន់បានអនុវត្តដោយស្មើគ្នានោះទេ។ មានកន្លែងខ្លះចេញមុនបានតែ ៥ នាទី កន្លែងខ្លះចេញមុនបានដល់ទៅ ១៥ នាទី មានកន្លែងខ្លះក៏ចេញមុនបានដល់ ៣០ នាទី។ ប៉ុន្តែឥឡូវនេះ ខ្ញុំកំពុងតែស្នើសុំអោយផ្តល់ការយោគយល់ ចំពោះស្ត្រីមានផ្ទៃពោះ អោយបានចេញមុនម៉ោងរយៈពេល ១៥ នាទី ហើយអ្នកដែលបានអោយខ្ពស់រួចទៅហើយ សូមមេត្តារក្សានូវពេលវេលា ដែលបានអនុញ្ញាតរួចមកហើយ។
អនុវត្តគោលនយោបាយជាតិគាំពារសង្គម ចាប់ផ្តើមពីស្រ្តីមានផ្ទៃពោះមុនគេ
ដោយសារនៅទីនេះ ក៏មានអ្នកថែទាំសុខភាព យើងក៏ចាប់ផ្តើមអនុវត្តនូវគោលនយោបាយទាក់ទិនទៅនឹងស្រ្តីមានផ្ទៃពោះ ដែលវាពាក់ព័ន្ធទៅនឹងគោលនយោបាយជាតិគាំពារសង្គម ដែលការអនុវត្តមុនគេ គឺស្រ្តីមានផ្ទៃពោះតែម្តង។ ជាការចាប់ផ្តើមជំហានដំបូង យើងចាប់ផ្តើមពីស្ត្រីដែលជាកម្មការិនី នៅក្នុងក្របខណ្ឌទាំងក្នុងប្រព័ន្ធ និងក្រៅប្រព័ន្ធ។ បើយើងប៉ាន់ស្មានទាំងក្នុង និងក្រៅប្រព័ន្ធ ក្នុងមួយឆ្នាំយើងត្រូវចំណាយប្រហែលជា ១០ លានដុល្លារសហរដ្ឋអាមេរិក (ឬ)មិនដល់ផងទេ ដែលយើងគិតថា ក្នុងចំណោម ៩០ ម៉ឺននាក់ នៃចំនួនកម្មការិនីជាស្រ្តីក្នុងប្រព័ន្ធ គឺគិតទៅដល់ ២,៧% (មានផ្ទៃពោះ)។ បើអញ្ចឹង ចំនួននេះមានត្រឹមតែជាង ២ ម៉ឺននាក់ មិនដល់ ៣ ម៉ឺននាក់ នោះទេ។ ដល់ទៅក្រៅប្រព័ន្ធ ក្នុងចំណោមកម្មករ/រិនីប្រមាណ ៣ លាននាក់ មានកម្មការិនី ២ លាន ៦ សែននាក់ គិត ២,៧% គឺប្រមាណជាជាង ៦ ម៉ឺននាក់(ដែលមានផ្ទៃពោះ)។ ប៉ុន្តែ អត្រាពិតដែលបានកើតក្នុងរយៈពេលកន្លងទៅ មានត្រឹមតែ ១,៦% តែប៉ុណ្ណោះ។
ដូច្នេះ យើងគិតថា ក្នុងមួយឆ្នាំ ចាប់ពីថ្ងៃ ១ ខែ មករា ឆ្នាំ ២០១៨ ទៅ យើងត្រូវចំណាយប្រមាណជា ១០ លានដុល្លារ ដើម្បីផ្ដល់ជាសាច់ប្រាក់តែម្ដង សម្រាប់កម្មការិនីឆ្លងទន្លេ។ យើងកំពុងតែពិនិត្យអំពីបញ្ហាពាក់ព័ន្ធ តើយើងអនុវត្តនៅក្របខណ្ឌទូទាំងប្រទេសបានហើយឬនៅ សម្រាប់ថវិកាជាតិរបស់យើង ដែលយើងត្រូវផ្ដល់ជាសាច់ប្រាក់ សម្រាប់ជួយទៅដល់ស្រ្ដីដែលឆ្លងទន្លេជាគោលនយោបាយអាទិភាពមួយរបស់យើង សម្រាប់ការកាត់បន្ថយអត្រាមរណៈរបស់ម្ដាយ និងកុមារ? នោះក៏ជាផ្នែកមួយនៃអាហារូបត្ថម្ភ សម្រាប់ស្រ្ដីឆ្លងទន្លេ និងទារក។ ចំណុចទាំងអស់នេះ គឺជាចំណុចដែលយើងបាន និងកំពុងរួមគ្នា ដើម្បីដំណើរការ។
ងើយស្កក ឱនដាក់គ្រាប់
ខ្ញុំសង្ឃឹមថា អ្នកទាំងអស់គ្នាដែលនៅទីនេះ នឹងបង្កើននូវចំណេះដឹងតាមរយៈនៃការខិតខំផ្ទាល់ មិនមែនគ្រាន់តែក្រោមដំបូលសាលា ទើបហៅថាការរៀននោះទេ នៅទីកន្លែងណាក៏អាចរៀនបានទាំងអស់ ហើយសុំក្មួយៗបន្តការខិតខំនេះតទៅទៀត បើទោះបីថាទៅកន្លែងណាក៏ដោយ វាសុទ្ធតែមានទីកន្លែងដែលទទួលបាននូវការសិក្សា។ ជាមួយនោះ ក៏មិនត្រូវមើលស្រាលជាមួយអ្នកដទៃ អ្នកដែលធ្វើការជាមួយយើង អ្នកណាក៏អាចក្លាយទៅជាអ្នកពិគ្រោះយោបល់ អ្នកណាក៏អាចក្លាយទៅជាគ្រូរបស់យើងបានដែរ មិនថាគាត់ជាកសិករ មិនថាគាត់ជាកម្មករ មិនថាគាត់ធ្វើការនៅក្នុងផ្នែកណានោះទេ។ រឿងនេះពាក្យចាស់គាត់ថា “ងើយស្កក ឱនដាក់គ្រាប់” នេះគឺជារឿងពិតមួយនៅក្នុងចំណោមនៃដំណើរការនៃជីវិត។ យើងមានសញ្ញាបត្រថ្នាក់នេះថ្នាក់នោះ ប៉ុន្តែ ពើងទ្រូងជាមួយនឹងអ្នកដទៃមើល ទីចុងបំផុតបានត្រឹមតែឯកោខ្លួនតែប៉ុណ្ណោះ ដោយគ្មានមិត្តភក្តិតែម្ដង។ ប៉ុន្តែ នៅពេលដែលយើងដាក់ខ្លួន អ្នកដទៃអាចផ្ដល់មតិកែតម្រូវនូវសកម្មភាពទាំងឡាយ …។
អាហារូបករណ៍ ២៩៥ កន្លែង ដែលសាកលវិទ្យាល័យបានផ្តល់ជូននាពេលកន្លងមក
ខ្ញុំសុំយកឱកាសនេះ ថ្លែងជូននូវការអរគុណ ចំពោះសាកលវិទ្យាល័យចេនឡា ដែលបានផ្ដល់អាហារូបករណ៍ជាបន្តបន្ទាប់សម្រាប់ខ្ញុំ។ តាមរយៈនៃការផ្ដល់អាហារូបករណ៍នេះ ខ្ញុំក៏បានផ្ដល់ទៅតាមមុខសញ្ញានានា ដែលថ្ងៃនេះក៏បានមកទទួលបានសញ្ញាបត្រផងដែរ ដែលរហូតមកដល់ពេលនេះមានចំនួន ២៩៥ កន្លែង ដែលបានផ្ដល់។ ក្នុងនោះមានមួយឆ្នាំ ៣៥ (កន្លែង)។ ៤០ (កន្លែង)។ ៣០ (កន្លែង)។ ឆ្នាំ ២០១៧-២០១៨ មាន ៣០ កន្លែង ដែលសម្រាប់មកទទួលការសិក្សា។ មួយឆ្នាំៗតាមរយៈនៃការផ្ដល់ពីសាកលវិទ្យាល័យនានាមកសម្រាប់ខ្ញុំមានរាប់ពាន់នាក់។ តាមរយៈនោះ ខ្ញុំក៏ត្រូវមានគណៈកម្មាធិការអាហារូបករណ៍មួយ ហើយក៏ចែកអាហារូបករណ៍នោះ ទៅជូនសិស្សនិស្សិតដែលមានការខ្វះខាត អោយទៅរៀននៅសាកលវិទ្យាល័យនោះវិញ។ អរគុណជាមួយនឹងការផ្ដល់បែបនេះ ដើម្បីខ្ញុំមានឱកាស សម្រាប់ការចែកបន្តជាមួយនឹងនិស្សិតដែលមានការខ្វះខាត។
រួមគ្នាថែរក្សាសន្ដិភាព ដើម្បីសង្គមជាតិមានការអភិវឌ្ឍ
យើងកំពុងធ្វើដំណើរនៅក្នុងស្ថានភាព នៃប្រទេសមួយដែលកំពុងមានការអភិវឌ្ឍ ពីប្រទេសដែលមានប្រាក់ចំណូលតិចតួច មកកាន់ឋានៈជាប្រទេសដែលមានចំណូលមធ្យមកម្រិតទាប ហើយដែលមហិច្ឆតារបស់យើង នឹងឈានឆ្ពោះទៅរកប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០។ ជាមួយនឹងកំណើនសេដ្ឋកិច្ច ៧% ក្នុងមួយឆ្នាំ ខ្ញុំជឿជាក់ថា យើងមានលទ្ធភាពនឹងសម្រេចបាននូវមហិច្ឆតាដ៏ធំនេះ។ ផែនទីចង្អុលផ្លូវសម្រាប់យើង ក៏មានរួចស្រេចមកហើយ ប៉ុន្តែ ទាមទារអោយយើងប្រឹងប្រែងទាំងអស់គ្នា ដើម្បីធានាថាប្រទេសនេះត្រូវតែជាប្រទេសដែលមានសន្ដិភាព ដើម្បីធានាដល់ការអភិវឌ្ឍ។
ការផ្តាច់ខ្លួនរបស់រដ្ឋ Kurds ចេញពីប្រទេសអ៊ីរ៉ាក់
គ្មានប្រទេសណាមួយដែលនឹងទទួលបាននូវការអភិវឌ្ឍដោយស្ថិតនៅក្នុងស្ថានភាព នៃសង្គ្រាមនោះទេ។ ដូចដែលយើងបានដឹងពីអតីតកាល ហើយក៏យើងបានឃើញនូវប្រទេស ដែលកំពុងជាប់ជំពាក់ជាមួយនឹងសង្គ្រាម ដែលនៅដោះស្រាយមិនទាន់រួច។ ឥឡូវ នៅប្រទេសអ៊ីរ៉ាក់ មិនគ្រាន់តែវាយជាមួយនឹងពួក ISIS ទេ បន្តិចទៀតប្រហែលជាមានការវាយជាមួយនឹងរដ្ឋ Kurds ដែលបានធ្វើប្រជាមតិ ហើយប្រជាមតិនោះ គឺជាប្រជាមតិផ្ដាច់ខ្លួនចេញពីអ៊ីរ៉ាក់តែម្ដង។ អញ្ចឹង តើរដ្ឋបាលកណ្ដាលនៅទីក្រុងបាដាដយល់ព្រមអោយ Kurds ឯករាជ្យ ឬអត់? អ៊ីរ៉ង់ និងប្រទេសដទៃទៀតយល់ព្រមទេ? ហើយពួកអាមេរិកនៅទីនោះយល់ព្រម ឬអត់ទេ? កន្លងទៅកងទ័ពដែលជួយវាយពួក ISIS ដែលខ្លាំង គឺពួក Kurds ហ្នឹងដែរ។ ឥឡូវ Kurds ធ្វើប្រជាមតិបានឈ្នះទៅហើយ។ តើរដ្ឋាភិបាលរបស់អ៊ីរ៉ាក់វាយ Kurds ឬមិនវាយ? បើមិនវាយ អញឯករាជ្យ ហើយបើវាយ ឯណាវាយជាមួយ ISIS ផង ឯណាវាយជាមួយ Kurds គ្នាឯងទៀត។
អញ្ចឹងទេ វាគ្រាន់តែជាផលចំណេញសម្រាប់ពួក ISIS តែប៉ុណ្ណោះ។ យើងរង់ចាំមើលតទៀត តើវាកើតរបៀបម៉េច? បើឯណោះសម្រេចចិត្តធ្វើប្រជាមតិ ហើយអ្នកដែលធ្វើប្រជាមតិនោះ អ្នកដែលគាំទ្រអោយផ្ដាច់ខ្លួនចេញ និងប្រកាសឯករាជ្យ គឺត្រូវបានឈ្នះហើយ។ អញ្ចឹងសួរថា រដ្ឋបាលនៅទីក្រុងបាដាដរបស់អ៊ីរ៉ាក់យល់ព្រមឬអត់? អ្នកដទៃទៀតរាប់ទាំងទួរគី រាប់ទាំងអ៊ីរ៉ាក់ដែលមានជនជាតិ Kurds នៅទីនោះដែរសុខចិត្តឬអត់? ជាពិសេស គឺអ៊ីរ៉ាក់ហ្នឹងតែម្ដង ហើយនិងមានអាមេរិកនៅទីនោះផងដែរ។ អញ្ចឹងទេ ចំណុចនេះ គឺជាចំណុចលំបាក។ ពិភពលោកស្មុគស្មាញខ្លាំងណាស់។
វិបត្តិនុយក្លេអ៊ែរនៅឧបទ្វីបកូរ៉េ
ឥឡូវនេះ មាត់ជ្រោះនៃសង្រ្គាមនុយក្លេអ៊ែរកំពុងតែម្ដងតឹងម្ដងធូរៗ នៅកូរ៉េខាងជើង។ វាយ៉ាងម៉េច? ប៉ុន្មានថ្ងៃនេះ ពីវ៉ាស៊ីនតោនស្រែកមកព្យុងយ៉ាង ពីព្យុងយ៉ាងស្រែកទៅវ៉ាស៊ីនតោន គម្រាមគ្នាទៅវិញទៅមក។ ឯណេះគម្រាមបាញ់ឯណោះ។ ឯណោះគម្រាមបាញ់ឯណេះ។ ឥឡូវ អានាវាដឹកយន្ដហោះមកកៀកទៀតហើយ។ អញ្ចឹងទេ មកបង្កើនកម្ដៅ។ សុខៗកូរ៉េខាងជើងដាក់ ១ គ្រាប់ទៅ ឆ្លងកាត់ប្រទេសជប៉ុន ហើយទៅធ្លាក់ហួសប្រទេសជប៉ុនទៅ។ កាលពីដើម នៅក្នុងជំនាន់ឆ្នាំ ២០០៦-២០០៧ កាលនោះ សុទ្ធតែមានការអះអាងថា អោយតែកាំជ្រួចមីស៊ីលរបស់កូរ៉េខាងជើងហោះភ្លាម គឺគេនឹងមានមីស៊ីលតាមចាប់។ ឥឡូច ជាក់ស្តែងគ្មានតាមចាប់អីបានទេ។ កាត់ប្រទេសជប៉ុន ៣ ដង ទៅហើយ។ ពីមុន ១ ដង ក្រោយនេះ ២ ដងទៀត។ បាញ់របៀបនេះ កូរ៉េខាងជើងចង់បញ្ជាក់ថា បើចង់បាញ់ប្រទេសជប៉ុន ក៏បាញ់បានដែរ។ គ្មានអីទប់ជាប់ទេ អានេះបើមានកាំជ្រួចឡើងចាប់មែន អានេះគ្រោះថ្នាក់ជាងអីទៀត ព្រោះវាបែកនៅលើអាកាសឯណោះ ហើយបើបែកយ៉ាងណាកុំមកបែកលើស្រុកខ្មែរ។ រឿងរ៉ាវវាលំបាកណាស់។
ទន្ទឹមនឹងគ្នានេះ សមយុទ្ធទាំងនៅជប៉ុន ទាំងនៅកូរ៉េខាងត្បូង បានកើតឡើង។ អញ្ចឹងទេ ស្ថានភាពនេះ ដល់ទៅកូរ៉េខាងជើងឃើញអាមេរិក និងកូរ៉េខាងត្បូងធ្វើសមយុទ្ធ កូរ៉េខាងជើងគិតថា មានការគម្រាមកំហែង ក៏បាញ់មួយទៅ។ សុខៗទៅជប៉ុន ក៏ធ្វើសមយុទ្ធទៅ។ កូរ៉េខាងជើងយល់ថា អាចមានការគម្រាមកហែង ក៏បាញ់ មួយគ្រាប់ទៅ។ ដល់ឯណេះបាញ់ទៅ ឯណោះធ្វើទៀត។ ឯណោះធ្វើទៀត ឯណេះបាញ់ទៀត។ អញ្ចឹងទេ ឥឡូវពិភពលោកកំពុងស្ថិតនៅក្នុងស្ថានភាពមិនច្បាស់លាស់មួយ នៃសង្គ្រាមនុយក្លេអ៊ែរ។ បើសង្គ្រាមនុយក្លេអ៊ែរកើតមែននោះ វាជាមហន្តរាយនៃពិភពលោកហើយ។ ប៉ុន្តែ ខ្ញុំនៅតែមានជំនឿជឿជាក់ថា ដំណោះស្រាយសន្តិវិធីមួយនឹងត្រូវបានរកឃើញ។ មិនមែនជាពេលវេលា ដែលត្រូវវាយគ្នាដោយអាវុធប្រល័យលោកនោះទេ។ ការធ្វើសមយុទ្ធ ការត្រៀមបម្រុងនានានៅកូរ៉េខាងត្បូង ឬក៏នៅជប៉ុន សុទ្ធតែត្រូវបានហ្វឹកហាត់ សម្រាប់ប្រជាពលរដ្ឋរបស់គេ ដើម្បីទប់ទល់ជាមួយនឹងអាវុធនុយក្លេអ៊ែរ ទប់ទល់អាវុធជីវសាស្ត្រគីមី។
សង្គ្រាមនៅឧបទ្វីបកូរ៉េមិនកើតទេ សូមមាតាបិតា អាណាព្យាបាល និងពលករនៅកូរ៉េខាងត្បូងកុំបារម្ភ
ខ្ញុំសុំយកឱកាសនេះ ជម្រាបជូនចំពោះបងប្អូនពលករនៅកូរ៉េខាងត្បូង និងមាតាបិតា អាណាព្យាបាលរបស់ពលករ ដែលកំពុងស្ថិតនៅកូរ៉េខាងត្បូង សុំមេត្តាកុំព្រួយបារម្ភ។ ខ្ញុំជឿថា សង្គ្រាមនេះវាមិនកើតទេ។ ការគម្រាមនេះ វាស្ទើរដល់រយដងទៅហើយ វាមិនមែនរាប់សិបដងទេ។ ប៉ុន្តែ សង្គ្រាមនេះវាមិនកើតទេ ព្រោះសង្គ្រាមនេះ វាមិននាំទៅដល់អ្នកណាមួយឈ្នះទេ វាចាញ់ទាំងអស់គ្នាតែម្តង។ អាមេរិកស្រែកលឺ ព្រោះអាមេរិកនៅឆ្ងាយ ប៉ុន្តែ ជប៉ុន និងកូរ៉េខាងត្បូង ជាពិសេស កូរ៉េខាងត្បូង និងជប៉ុនទេ ដែលជាអ្នករងគ្រោះពិតប្រាកដ ប្រសិនបើសង្គ្រាមផ្ទុះឡើង មិនមែនអាមេរិកជាអ្នកគ្រោះថ្នាក់ទេ។ អញ្ចឹង បានជាអាមេរិកតែងតែស្រែកលឺ ប៉ុន្តែ ជប៉ុន ជាពិសេស កូរ៉េខាងត្បូងតែម្តង គឺចង់អោយមាននូវដំណោះស្រាយសន្តិវិធី កាត់បន្ថយនូវភាពតានតឹង។ ខ្ញុំយល់ថា ដំណើរការចរចា បើទោះបីជាដំណើរការចរចារបៀបណាក៏ដោយចុះ ក៏គួរតែត្រូវមាន ដើម្បីធានាថា សង្គ្រាមប្រល័យលោកនេះ វាមិនត្រូវបានកើតនោះទេ។
វិបត្តិនុយក្លេអ៊ែរនៅអ៊ីរ៉ង់/វិបត្តិជនភៀសខ្លួននៅមជ្ឈឹមបូព៌ា និងអឺរ៉ុប
ឯបញ្ហានុយក្លេអ៊ែរនៅអ៊ីរ៉ង់ ក៏ជាបញ្ហាមួយទៀត ដែលបង្កអោយមានការភ័យខ្លាច បូកបន្ថែមដោយស្ថានភាពនៅទីនោះ មានការបាញ់កាំជ្រួចចុះ កាំជ្រួចឡើង ពីអាមេរិកទៅដែនដីស៊ីរី, ពីរុស្ស៊ីទៅដែនដីស៊ីរី, ពីអ៊ីស្រាអែលទៅក្នុងដែនដីស៊ីរី ដូច្នេះ មិនដឹងអ្វីទេដែលវាកើតនៅលើពិភពលោក។ សម្រាប់នៅអឺរ៉ុប វិបត្តិជនភៀសខ្លួន នៅមជ្ឈឹមបូព៌ា ដែលចេញមកពីលទ្ធផល នៃបដិវត្តពណ៌ និងការផ្តួលរំលំដោយយោធា បាន និងកំពុងញាំញីធ្វើអោយអឺរ៉ុបជួបប្រទះនូវស្ថានការណ៍មិនធម្មតា ដែលត្រូវជាអំរែកដ៏ធ្ងន់ សម្រាប់ទទួលជនភៀសខ្លួនរាប់លាននាក់ទៅពីមជ្ឈឹមបូព៌ា។ នោះហើយជាលទ្ធផលបដិវត្តពណ៌ និងការផ្តួលរំលំដោយយោធា។
នៅអ៊ីរ៉ាក់, នៅលីប៊ី, នៅស៊ីរី គឺសុទ្ធតែមានជនភៀសខ្លួនហូរចូលទៅក្នុងតំបន់អឺរ៉ុប ដែលមកដល់ពេលនេះ មានកន្លែងខ្លះទៅពីទីនេះទៅកន្លែងនោះ គេមិនអោយនៅ។ លោកស្រីអធិការបតីអាឡឺម៉ង់ លោកស្រី អែនជឺឡា ម៉ាកែល (Angela Merkel) គឺបានឈ្នះឆ្នោតទៀតហើយ ប៉ុន្តែ អត្រាសម្លេងឆ្នោតតិចជាងមុន ដោយសារបញ្ហាជនភៀសខ្លួន ដែលពាក់ព័ន្ធនឹងការសន្យាទទួលរហូតទៅដល់ ១ លាននាក់។ ខ្ញុំបានសួរនាយករដ្ឋមន្ត្រីស៊ុយអែដ ពេលវេទិកាសេដ្ឋកិច្ចពិភពលោកនៅដាវ៉ូស ប្រទេសស្វ៊ីស អំពីករណីនេះ។ ស៊ុយអែដបើកទល់ដែន ប៉ុន្តែទីចុងបំផុត គាត់ត្រូវបង្ខំចិត្តត្រូវបិទ ព្រោះថា អាចនឹងពួក ISIS ចូលជ្រៀតទៅតាមហ្នឹងផងដែរ។
សេដ្ឋកិច្ចពិភពលោកមានការងើបឡើងបន្តិច ខណៈសភាពការណ៍នយោបាយមានភាពមិនច្បាស់លាស់
សេដ្ឋកិច្ចពិភពលោកហាត់ដូចជាបានងើបឡើងវិញបន្តិច ប៉ុន្តែ បែរជាសភាពការណ៍នយោបាយពិភពលោកមិនច្បាស់លាស់ទៅវិញ។ នេះហើយជាហានិភ័យមួយ ក្នុងចំណោមហានិភ័យ នៃសណ្តាប់ធ្នាប់ពិភពលោក ដែលសណ្តាប់ធ្នាប់ពិភពលោកបច្ចុប្បន្ននេះវាច្របូកច្របល់ ស្មុគស្មាញ ដែលវានឹងបង្កអោយមានមហន្តរាយ។ សង្ឃឹមថា រឿងរ៉ាវទាំងអស់នេះ វានឹងមិនកើតរាលដាលមកក្នុងតំបន់របស់យើង។ ពិតមែនហើយ តំបន់របស់យើងក៏ត្រូវរងការវាយប្រហាររបស់ពួក ISIS ជាពិសេស នៅហ្វីលីពីន។ ប្រសិនបើគ្មានការខិតខំប្រឹងប្រែងរបស់ ប្រធានាធិបតី ឌុយតឺតេ (Rodrigo Duterte) ដឹកនាំ ដើម្បីវាយដណ្តើមយកក្រុងម៉ាដាវី ផ្នែកមួយនៃកោះ មិនដាណាវ (Mindanao) ពីពួក ISIS មកវិញទេ ប្រហែលជាពួក ISIS នឹងឈរជើងជាកម្លាំងធំមួយ។
ជនភៀសខ្លួនរ៉ូហិនយា
ខ្ញុំកំពុងតែបារម្ភថា នៅពេលប្រជុំអាស៊ាននៅឯម៉ានីឡា នៅក្នុងខែ វិច្ឆិកា ខាងមុខនេះ តើវាអាចមានបញ្ហាអ្វីកើតឡើង? ចំពោះបញ្ហាទាក់ទងជាមួយនឹងជនភៀសខ្លួនរ៉ូហិនយា ឬហៅថាបង់កាលី ព្រោះការប្រជុំ AIPA កន្លងទៅនេះ វាមានការប៉ះទង្គិចក្នុងក្របខណ្ឌគ្នាឯងរួចស្រេចទៅហើយ រវាងម្ខាងឥណ្ឌូនេស៊ី និងម៉ាឡេស៊ី និងម្ខាងទៀត គឺមីយ៉ាន់ម៉ា។ ជនជាតិរ៉ូហិនយា ដែលនៅមីយ៉ានម៉ា (ឬ)នៅភូមា ប្រមាណជា ១ លាននាក់ មិនត្រូវបានទទួលស្គាល់ថា ជាជនជាតិភាគតិចរបស់មីយ៉ាន់ម៉ាទេ ហើយមីយ៉ាន់ម៉ាហៅអ្នកទាំងនេះថា ជាជនជាតិបង់កាលី។ ដល់ពេលទៅបង់ក្លាដេស បង់ក្លាដេសថា មិនមែនជាជនជាតិរបស់ខ្លួនទៀត មានមួយចំនួនរត់ធ្លាក់ទៅដល់ស្រីលង្ការ។ ខាងស្រីលង្ការនោះក៏បណ្តេញចេញទៅទៀត។ អញ្ចឹង អោយពួកគាត់ទៅណា? សង្ឃឹមថា បញ្ហាទាំងអស់នេះនឹងមិនក្លាយទៅជាភាពតានតឹង សម្រាប់ការប្រជុំអាស៊ាននាពេលខាងមុខនោះទេ។ យើងពិតជាមានការលំបាក ជាមួយនឹងបញ្ហាដែលបានកើតឡើងនៅក្នុងស្ថានការណ៍បែបនេះ។
ប្រើថវិកាពិសេសដោះស្រាយបញ្ហាគ្រាប់បែកគីមីនៅខេត្តស្វាយរៀង
វិលមកយើងវិញ។ ម្រិលមិញខ្ញុំបានធ្វើការស្រាវជ្រាវថា តម្រូវការដើម្បីយកគ្រាប់មីន គ្រាប់បែកគីមីរហូតទៅ ដល់ពីរឯណោះ ហើយត្រូវជម្លៀសប្រជាជនប៉ុន្មានពាន់គ្រួសារ។ ម្សិលមិញមានការសួរមតិរបស់ខ្ញុំ តើប្រើថវិកាខ្ទង់ណា? ខ្ញុំបានចង្អុលបង្ហាញអោយប្រើថវិកាពិសេសរបស់រាជរដ្ឋាភិបាលតែម្តងទៅ ព្រោះយើងមានគណៈកម្មាធិការអាវុធគីមី។ ឥឡូវហ្នឹង គ្រាប់អាវុធគីមី ២ គ្រាប់ គ្រាប់បែកគីមីតែម្តង ដែលជាអាវុធប្រល័យលោក ដ៏គ្រោះថ្នាក់ ហើយអាវុធគីមីនេះហើយ ដែលត្រូវអាមេរិកជាអ្នកចោទ សាដាម ហ៊ូសេន ហើយនាំកងទ័ពទៅផ្តួលរំលំ ដោយចោទថាមានអាវុធប្រល័យលោក គឺអាវុធគីមីនេះ។ ប៉ុន្តែ ទៅរកមិនឃើញ។ ឥឡូវ អាគ្រាប់បែកគីមីនេះ វានៅនឹងខេត្តស្វាយរៀងរបស់យើង។ អញ្ចឹង ដើម្បីយកវាចេញ ត្រូវជម្លៀសប្រជាជនប៉ុន្មានពាន់នាក់ ឬប៉ុន្មានពាន់គ្រួសារឯណោះ។ យើងត្រូវធ្វើ បើទោះបីជាយ៉ាងម៉េចក៏ដោយ នេះជាបញ្ហារបស់យើង។
ខ្ញុំបាននិយាយថា សូមអោយអាមេរិកមកយក។ ប៉ុន្តែ ចាំទៅ។ ដេកទាល់តែថ្ងៃងាប់ទៀត ក៏មិនទាន់អាមេរិកមកយកទេគ្រាប់ហ្នឹងនោះ។ អញ្ចឹងទេ សុវត្ថិភាពខ្លួនឯង យើងត្រូវដោះស្រាយបញ្ហានេះ តាមរយៈគណៈកម្មាធិការជាតិអាវុធគីមី។ យើងត្រូវដោះស្រាយបញ្ហានេះ ហើយត្រូវជម្លៀសប្រជាជន។ អ្នកឯកទេសអាវុធគីមីរបស់យើងក៏បានអោយយោបល់ថា បើចង់ធ្វើ ត្រូវធ្វើមុនក្មេងចូលកង ព្រោះទីតាំងហ្នឹងទីតាំងក្បែរសាលារៀន ហើយនិងក្បែរវត្ត។ ប៉ុន្តែ បើទោះក្មេងចូលកង ក៏ត្រូវជម្លៀសក្មេងចេញសិន។ នេះជាលទ្ធផលសង្រ្គាមពីអតីតកាល ដែលបន្សល់ទុកអោយយើង ដែលយើងត្រូវដោះស្រាយ។
តាមបណ្តាខេត្ត អាចទទួលរងផលប៉ះពាល់ពីជំនន់ទឹកភ្លៀង សូមអោយមានការប្រុងប្រយ័ត្ន
ឯប៉ុន្មានថ្ងៃខាងមុខនេះ ក៏សុំអំពាវនាវចំពោះប្រជាពលរដ្ឋនៅតាមបណ្តាខេត្ត ដែលអាចនឹងទទួលរងនូវផល ប៉ះពាល់ពីជំនន់ទឹកភ្លៀង ក្រសួងធនធានទឹក និងឧតុនិយម បានធ្វើការព្យាករ ហើយក៏បានប្រកាសអោយប្រជាពលរដ្ឋមានការប្រុងប្រយ័ត្នចំពោះជំនន់ទឹកភ្លៀង ដែលអាចនឹងមកដល់នៅក្នុងប៉ុន្មានថ្ងៃនេះ។ អាចមានកន្លែងខ្លះច្រើន កន្លែងខ្លះតិច ការប្រុងប្រយ័ត្ន គឺជារឿងចាំបាច់។ យើងត្រូវប្រុងប្រយ័ត្ន សម្រាប់ទីក្រុងភ្នំពេញ និងខេត្តកណ្តាល។ កំពង់ស្ពឺត្រូវប្រយ័ត្នខ្លាំងជាងគេ គឺជំនន់ព្រែកត្នោតតែម្តង។ បើសិនមានជំនន់ព្រែកត្នោតប្រឹប ក្រសួងធនធានទឹក និងឧតុនិយម និងអាជ្ញាធរក្រុងភ្នំពេញ ត្រូវដោះស្រាយវារបៀបម៉េច ដើម្បីជម្លៀសកុំអោយចូលពីទិសខាងលិច។ ដែលឥឡូវនេះ ទិសខាងលិចទាំងឡាយ សុទ្ធតែជាតំបន់រោងចក្រទាំងអស់។
កាលពីឆ្នាំ ២០០០ ហើយក្រោយមកទៀតក៏កើតមាន អំពីជំនន់ពីទិសខាងលិច គឺហៅថា ជំនន់ព្រែកត្នោតនោះ វាបានបុកទម្លាយចូលមកនៅតំបន់សាក់សំពៅ តំបន់មួយចំនួនពីទិសខាងលិចមក។ កាលហ្នឹងយើងត្រូវកាត់ផ្លូវជាតិលេខ ២ នៅម្តុំព្រៃអាទាំង ដើម្បីបង្ហូរបញ្ចៀសចេញ។ ឥឡូវ សំណង់មានកាន់តែច្រើន នៅពេលដែលវាបុកផ្តាច់ចូលមក វានឹងបង្កើតនូវការលំបាក។ អគ្គិសនីក៏ត្រូវមានការប្រុងប្រយ័ត្ននៅពេលដែលទឹកឡើងភ្លាម ត្រូវដោះស្រាយវាយ៉ាងម៉េច។ នេះក៏សូមអោយមានការប្រុងប្រយ័ត្ន។ ហើយប្រជាពលរដ្ឋរបស់យើងឥឡូវនេះ ការទទួលព័ត៌មាន គឺវាងាយណាស់ សូម្បីតែផ្លូវសម្រាប់ធ្វើដំណើរក្នុងទីក្រុង យើងក៏អាចបើកមើលទូរស័ព្ទ របស់យើងបាន ទទួលព័ត៌មានពីធាតុអាកាស។ នៅក្នុងការធ្វើដំណើរទៅតាមណាអីតាមណា ត្រូវមានការប្រុងប្រយ័ត្ន។
កសិកម្មឆ្នាំនេះ ធ្វើលើសផែនការកំណត់
ក្នុងវិស័យកសិកម្មឆ្នាំនេះ អាចចាត់ទុកថាល្អ មកដល់ពេលនេះ បានធ្វើលើសពីផែនការកំណត់រួចស្រេចទៅហើយ ប៉ុន្តែ តាមទម្លាប់របស់ប្រជាពលរដ្ឋរបស់យើង នៅពេលក្រោយភ្ជុំតែងតែគាត់ធ្វើស្រូវប្រដេញទឹក ប៉ុន្តែឥឡូវនេះ ការធ្វើស្រូវប្រដេញទឹកហាក់ដូចជាមិនមានបញ្ហាចំណោទទេ ទោះបីជាមានចំនួនទឹកភ្លៀងដោយកន្លែង ក៏ប៉ុន្តែ ទឹកទន្លេមេគង្គចាប់ស្រក ហើយសង្ឃឹមថា ការស្រកនៃទន្លេមេគង្គនេះ វានឹងនាំទៅដល់ទឹកល្អក់នៅក្នុងពេលបុណ្យអុំទូក ដែលធ្វើនៅដើមខែ វិច្ឆិកា ខាងមុខនេះ។ ឆ្នាំទៅយើងអុំទូកទឹកទាបបន្តិច តែឆ្នាំនេះយើងអុំទូកនឹងទឹកអាចល្អក់ ហើយកម្រិតខ្ពស់ ល្មមសមនឹងពេលវេលានៃការអុំទូកតែម្តង។
ខ្ញុំមិនបន្តទេ ដោយសារនិយាយច្រើនហើយ។ អាទិត្យនេះ សង្កថាដូចជាច្រើនពេក។ នៅសេសាន សម្រាប់បញ្ហាអគ្គិសនី។ ម្សិលមិញ គឺជាមួយកម្មករ។ ថ្ងៃនេះ ជាមួយនឹងបញ្ហាអប់រំ។ ស្អែកជាមួយនឹងបញ្ហាវប្បធម៌ដែលលោកតា គង់ ណៃ គាត់ទទួលពានរង្វាន់មួយ ដែលរាជរដ្ឋាភិបាលក៏អបអរសាទរ ចំពោះវត្តមានរបស់គាត់។ ដល់ទៅថ្ងៃអាទិត្យ គឺត្រូវមានជំនួបនៅទីនេះដែរ ជាមួយនឹងប្រធានរដ្ឋបាល ជំនួយការ ប្រធានផ្នែក ប្រធានក្រុម នៃបណ្តារោងចក្រប្រមាណជាង ៤.០០០ នាក់ តទៅទៀត។ ដូច្នេះខ្ញុំគិតថា ខ្ញុំនិយាយច្រើនពេកហើយ។
ពាំនាំ
ថ្ងៃនេះ ក៏បាននាំមកសម្រាប់ជ័យលាភី ដែលទទួលសញ្ញាបត្រ ចំនួន ២.៨៣៨ នាក់ ក្នុងម្នាក់ៗ ជូនថវិកាចំនួន ៥ ម៉ឺនរៀល។ ជូនសាស្ត្រាចារ្យ និងបុគ្គលិក ចំនួន ៣៣៧ នាក់ ក្នុងម្នាក់ៗ (ថវិកា)ចំនួន ១០ ម៉ឺនរៀល។ ជូនសាកលវិទ្យាល័យចេនឡា ថវិកា ៥ លានរៀល។ ដោយសេដ្ឋកិច្ចមានកំណើន ដូច្នេះ ការចាយវាយរបស់យើងក៏កាន់តែមានទំហំធំ។ កាលពីដើមនិស្សិតរបស់យើងមកចំនួនមានត្រឹមតែ ៣ ម៉ឺនរៀលទេ ឥឡូវឡើងដល់ ៥ ម៉ឺន(រៀល)។ ឯគ្រូបង្រៀនកាលពីដើមត្រឹមតែ ៤ ម៉ឺនរៀលទេ ឥឡូវឡើងដល់ ១០ ម៉ឺន(រៀល) ព្រោះគេថាសេដ្ឋកិច្ចឡើង ៧% ក្នុងមួយឆ្នាំ ម៉េចមិនឃើញឡើងប្រាក់?
អរគុណចំពោះការចូលរួមនានា សូមកោតសរសើរជាមួយនឹងជ័យលាភីទាំងអស់នៅទីនេះ កោតសរសើរចំពោះសាស្ត្រាចារ្យ អ្នកគ្រប់គ្រង ក៏ដូចជា ឯកឧត្តម សាកលវិទ្យាធិការ ហើយសូមអោយការខិតខំនេះបន្តទៅទៀត។ នឹងជាមួយនោះ ក៏សូមអបអរសាទរ ចំពោះក្រុមគ្រួសារ អាណាព្យាបាល មាតាបិតា និងក្រុមគ្រួសាររបស់ជ័យលាភី ដែលមកអបអរសាទរចំពោះកូនចៅរបស់ខ្លួននៅថ្ងៃនេះ។ ហើយសូមជូនពរ ឯកឧត្តម លោកជំទាវ អស់លោក លោកស្រី អ្នកនាងកញ្ញា សូមប្រកបដោយពុទ្ធពរទាំងប្រាំប្រការ៖ អាយុ វណ្ណៈ សុខៈ ពលៈ និងបដិភានៈ កុំបីឃ្លៀងឃ្លាតឡើយ៕
