សម្តេចតេជោនាយករដ្ឋមន្រ្តី និងឯកឧត្តម យ៉ាង ឈីឈី ទីប្រឹក្សារដ្ឋ នៃសាធារណរដ្ឋប្រជាមានិតចិន បានធ្វើការពិភាក្សាគ្នាយ៉ាងយកចិត្តទុកដាក់ ទៅលើការងារសំខាន់ៗចំនួន៣ ទី១អំពីទំនាក់ទំនងទ្វេភាគីកម្ពុជា-ចិន ទី២ការងារតំបន់ និងទី៣លើបញ្ហាអន្តរជាតិ ដែលមានការយកចិត្តទុកដាក់ដូចគ្នា។
ក្នុងជំនួបសំដែងការគួរសម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលធ្វើឡើងនៅវិមានសន្តិភាព ទីស្តីការនាយករដ្ឋមន្រ្តី ព្រឹកថ្ងៃទី២៨ មេសា ឯកឧត្តម យ៉ាង ឈីឈី ទីប្រឹក្សារដ្ឋ នៃសាធារណរដ្ឋប្រជាមានិតចិន មានប្រសាសន៍ថា ដំណើរទស្សនកិច្ចរបស់ឯកឧត្តមមកកាន់ប្រទេសកម្ពុជា នៅពេលនេះទី១ គឺដើម្បីពិនិត្យមើល និងដើម្បីជំរុញការអនុវត្តនូវអ្វីដែល ឯកឧត្តម ស៊ី ជិនពីង និងសម្តេចតេជោ នាយករដ្ឋមន្រ្តី បានឯកភាពគ្នាកាលពីឆ្នាំកន្លងទៅ ពិសេសក្នុងដំណើរទស្សនកិច្ចរបស់ ឯកឧត្តមប្រធានាធិបតី មកកាន់ប្រទេសកម្ពុជា ទី២ការត្រៀមលក្ខណះក្នុងការទទួលសម្តេចតេជោ អញ្ជើញទៅកាន់ទីក្រុងប៉េកាំង ប្រទេសចិន នៅពាក់កណ្តាលខែឧសភា ខាងមុខ។
លើបញ្ហាទ្វេភាគី ឯកឧត្តម យ៉ាង ឈីឈី មានប្រសាសន៍រាយការណ៍ជូនសម្តេចតេជោ អំពីលទ្ធផលនៃកិច្ចប្រជុំអន្តរដ្ឋាភិបាលលើកទី៤ នៃប្រទេសទាំងពីរ ដែលមានឯកឧត្តមឧបនាយករដ្ឋមន្រ្តី ហោ ណាំហុង និងឯកឧត្តមជាសហប្រធាន។ ឯកឧត្តមមានប្រសាសន៍បន្តថា កិច្ចប្រជុំលើកទី៤នេះ បានបញ្ចប់ទៅប្រកបដោយលទ្ធផលជាផ្លែផ្កា។ ឯកឧត្តមបន្តថា ប្រទេសចិន និងកម្ពុជានៅតែបន្តក្នុងភាពជាដៃគូ យុទ្ធសាស្រ្តគ្រប់ជ្រុងជ្រោយ និងចាត់ទុកថាទំនាក់ទំនងកិច្ចសហប្រតិបត្តិការរវាងចិននិងកម្ពុជា មានភាពល្អប្រសើរ ពីព្រោះដោយមានការចង្អុលបង្ហាញពីមេដឹកនាំនៃប្រទេសទាំងពីរ។ ឯកឧត្តមបន្តថា អ្វីដែលឯកឧត្តម ស៊ី ជិនពីង និងសម្តេចតេជោ បានដាក់ចេញ គឺជាផែនទីចង្អុលផ្លូវ សម្រាប់កិច្ចសហប្រតិបត្តិការក្នុងពេលបច្ចុប្បន្ននិងទៅអនាគត។
ឯកឧត្តមបន្តថា ឯកឧត្តមប្រធានាធិបតី និងឯកឧត្តមនាយករដ្ឋមន្រ្តីចិន កំពុងរងចាំដំណើរទស្សនកិច្ចរបស់សម្តេចទៅកាន់ប្រទេសចិន និងការអញ្ជើញចូលរួមវរទិកាអន្តរជាតិស្តីពី ផ្លូវមួយ ខ្សែក្រវ៉ាត់មួយ នៅទីក្រុងប៉េកាំង នៅពេលដ៏ខ្លីខាងមុខ។ ឯកឧត្តមបន្តថា ដំណើរទស្សនកិច្ចផ្លូវការទៅកាន់ប្រទេសចិននៅពេលខាងមុខ គឺជាការចូលរួមលើកតម្កើងនូវទំនាក់ទំនង នូវកិច្ចសហប្រតិបត្តិការទិវេភាគី ក៏ដូចជាការបន្តលើកតម្កើង នៃការអនុវត្ត ភាពជាដៃគូយុទ្ធសាស្រ្តគ្រប់ជ្រុងជ្រោយ នៃប្រទេសទាំងពីរចិន-កម្ពុជា នៅក្នុងកម្រិតមួយខ្ពស់ថែមទៀត។ ឯកឧត្តមបន្តថា រដ្ឋាភិបាលចិនមានការសប្បាយរីករាយ ដោយសារាជរដ្ឋាភិបាលកម្ពុជា បានបង្កើតឡើងនូវគណៈកម្មការសម្របសម្រួលមួយ ដើម្បីសហការធ្វើការងារជាមួយភាគីចិន តាមរយៈនេះយើងនឹងបន្តធ្វើផែនការមេ នៃផែនទីចង្អុលផ្លូវស្តីពីផ្លូវមួយ ខ្សែក្រវ៉ាត់មួយ ដែលនោះគឺជាការផ្សារភ្ជាប់ទៅនឹងយុទ្ធសាស្រ្តចតុកោណ របស់រាជរដ្ឋាភិបាលកម្ពុជា។ ឯកឧត្តមមានប្រសាសន៍ជំរាបជូនសម្តេចតេជោដែរថា ចិននឹងបន្តគាំទ្រដល់កម្ពុជា តាមរយៈការជំរុញឲ្យក្រុមហ៊ុនចិន មកបណ្តាក់ទុនវិនិយោគនៅកម្ពុជា ពិសេសពាក់ព័ន្ធទៅនឹងតំបន់សេដ្ឋកិច្ចពិសេសខេត្តព្រះសីហនុ ការវិនិយោគលើផ្លូវល្បឿនលឿនភ្នំពេញ ខេត្តព្រះសីហនុ ការកសាងព្រលានយន្តហោះថ្មីនៅខេត្តសៀមរាប ដែលជាគំរោងដ៏មានសារសំខាន់នេះ បង្ហាញពីអត្តសញ្ញាណ នៃកិច្ចសហប្រតិបត្តិការរបស់ប្រទេសទាំងពីរចិន-កម្ពុជា។
ឯកឧត្តមបញ្ជាក់បន្ថែមថា អ្វីដែលប្រទេសចិនជួយដល់កម្ពុជា គឺប្រជាជនទាំងពីរ នឹងទទួលបាននូវផលប្រយោជន៍ ជាច្រើន ពីការសហការ របស់មេដឹកនាំទាំងពីរ។ ជាមួយគ្នានេះភាគីចិននឹងជំរុញល្បឿន នៃការអនុវត្តបណ្តាគំរោងដែលបានឯកភាពគ្នារួចហើយនោះ ពិសេសការប្រើប្រាស់កញ្ចប់ថវិកា៣ពាន់១០០លានយ៉ន់ ដូចជាគំរោងអណ្តូងទឹកស្អាត សាលារៀន និងផ្លូវនៅតំបន់ជនបទ ការសាងសង់មន្ទីរទេព្យ និងបរិក្ខារពេទ្យរបស់ប្រទេសកម្ពុជា។ ឯកឧត្តមបន្តថា ដោយសារតែប្រទេសកម្ពុជារៀបចំការបោះឆ្នោតក្រុមប្រឹក្សាឃុំ សង្កាត់នៅឆ្នាំ២០១៧ និងការបោះឆ្នោតសកលនៅឆ្នាំ២០១៨ ចិននឹងបន្តជួយដល់ប្រទេសកម្ពុជាជាបន្តទៀត។
សម្តេចតេជោ នាយករដ្ឋមន្រ្តីមានប្រសាសន៍ ថ្លែងនូវអំណរគុណជូនចំពោះ ឯកឧត្តមប្រធានាធិបតី និងឯកឧត្តមនាយករដ្ឋមន្រ្តីចិន ដែលបានផ្ញើរនូវការជូនពរដល់រូបសម្តេច។ តាមរយៈនេះសម្តេចពិតជាមានការរីករាយចំពោះលទ្ធផល នៃកិច្ចប្រជុំអន្តរដ្ឋាភិបាលនៃប្រទេសទាំងពីរ ពិសេសលើការជំរុញកិច្ចសហប្រតិបត្តិការ នៃប្រទេសទាំងពីរ។ សម្តេចតេជោមានប្រសាសន៍ចាត់ទុកថា ការងារកិច្ចសហប្រតិបត្តិការ នៃប្រទេសទាំងពីរមានលក្ខណៈល្អប្រសើរ។ ជាមួយគ្នានេះសម្តេចតេជោនាយករដ្ឋមន្រ្តី បានគូសបញ្ជាក់ពីនយោបាយការបរទេសរបស់កម្ពុជា គឺបន្តឥតងាករ៉េក្នុងការគាំទ្រនយោបាយចិនតែមួយ និងបានស្វាគមន៍នូវរាល់ជំនួយរបស់ប្រទេសចិន ចំពោះប្រទេសកម្ពុជា ដែលនោះគឺជាការរួមវិភាគទានដល់ការអភិវឌ្ឍជាតិ និងពង្រឹងអធិបតេយ្យរបស់កម្ពុជា។ សម្តេចតេជោបន្តថា គំនិតផ្តួចផ្តើមផ្លូវមួយ ខ្សែក្រវ៉ាត់មួយ នឹងផ្តល់ផលប្រយោជន៍ដល់ប្រទេសជាច្រើន ពិសេសចូលរួមបង្កើនល្បឿន នៃការធ្វើសមាហរណកម្មតំបន់ ពិសេសចូលរួមចំណែកដល់ការថែរក្សានូវស្ថេរភាព និងធ្វើឲ្យជីវភាពរបស់ប្រជាពលរដ្ឋក្នុងតំបន់កាន់តែប្រសើរជាងមុន។
ក្នុងជំនួបពិភាក្សាគ្នានោះ សម្តេចតេជោ នាយករដ្ឋមន្រ្តី និងឯកឧត្តម យ៉ាង ឈីឈី បានធ្វើការផ្លាស់ប្តូរទស្សនៈពីគ្នាទៅវិញទៅមក ជុំវិញបញ្ហាទ្វេភាគី បញ្ហាតំបន់ និងអន្តរជាតិ ពិសេសបញ្ហាសមុទ្រចិនខាងត្បូង ដែលមានការយកចិត្តទុកដាក់ដូចគ្នា។
