សុន្ទរកថា ក្នុងពិធី មីទ្ទិញ​រំឭក​ខួបលើ​កទី ៣៨ នៃទិវា​ជ័យ​ជម្នះ ៧ មករា (៧ មករា ១៩៧៩ – ៧ មករា ២០១៧)

311
  • សូមក្រាបថ្វាយបង្គំ សម្តេចព្រះអគ្គមហាសង្ឃរាជាធិបតី, សម្តេចព្រះសង្ឃរាជ, សម្តេច​ព្រះ​រាជា គណៈ និងព្រះថេរានុថេរៈគ្រប់ព្រះអង្គ ជាទីសក្ការៈ,
  • សម្តេច, ឯកឧត្តម, លោកជំទាវ, លោកស្រី, អស់លោក, ភ្ញៀវកិត្តិយសជាតិ និងអន្តរជាតិ,
  • សមាជិក សមាជិកា នៃអង្គមីទ្ទិញ និងជនរួមជាតិទាំងអស់ជាទីគោរពស្នេហា !

ថ្ងៃ ៧ ខែ មករា ឆ្នាំ ១៩៧៩ គឺជាថ្ងៃជ័យជម្នះជាប្រវត្តិសាស្រ្តរបស់ប្រជាជនកម្ពុជា ដែលបានវាយផ្តួលរំលំ របបប្រល័យពូជសាសន៍ ប៉ុល ពត បញ្ចប់សម័យកាលដ៏ខ្មៅងងឹតបំផុតនៃកម្ពុជា ហើយបើកឡើងនូវទំព័រ​សករាជថ្មីគឺ ឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម។ ថ្ងៃនេះគឺជាទិវាដ៏មហានក្ខត្តឬក្ស ដែលប្រជាជនកម្ពុជានៅទូទំាងប្រទេស ចូលរួមដោយក្តីសោមនស្សរីករាយក្រៃលែង ប្រារព្ធខួបអនុស្សាវរីយ៍ លើកទី ៣៨ នៃទិវាជ័យជម្នះដ៏រុងរឿងនេះ ជាមួយនឹងមោទនភាពដ៏ថ្លៃថ្លាចំពោះសមិទ្ធផលធំៗជាប្រវត្តិសាស្ត្រ​យ៉ាងច្រើនដែលប្រជាជនយើងសម្រេចបានក្នុងរយៈពេល ៣៨ កន្លងមក រួមទាំងសមិទ្ធផលលើគ្រប់ វិស័យនៅក្នុងឆ្នំា ២០១៦ ដែលទើបតែឆ្លងផុតថ្មីៗនេះ។

យើងប្រារព្ធពិធីដ៏ឧឡារិកនេះឡើង ក្នុងស្មារតីចងចាំជានិច្ចនូវគុណូបការៈដ៏ឧត្តុង្គឧត្តម របស់វីរកម្មាភិបាល យុទ្ធជន យុទ្ធនារី នៃរណសិរ្សសាមគ្គីសង្រ្គោះជាតិកម្ពុជា និងវីរកងទ័ពស្ម័គ្រចិត្តវៀតណាម ដែលបាន​​ធ្វើ​ការ​លះបង់យ៉ាងធំធេងក្នុងការប្រយុទ្ធ ដើម្បីផ្តួលរំលំរបបប្រល័យពូជសាសន៍  ប៉ុល ពត និងការពារការរស់ឡើង​វិញរបស់កម្ពុជា។ សូមសម្តែងនូវការដឹងគុណដ៏ជ្រាលជ្រៅចំពោះបណ្តាប្រទេសជាមិត្តជិតឆ្ងាយ និងប្រជា​ជនស្នេហាសន្តិភាព និងយុត្តិធម៌នៅលើពិភព​លោកដែលបានជួយឧបត្ថម្ភគាំទ្រយ៉ាងស្មោះស្ម័គ្រ ចំពោះ​បុព្វ​ហេតុដ៏ឧត្តុង្គឧត្តមនេះ។ ព្រមជាមួយនេះ យើងទាំងអស់គ្នាសូមលំឱនកាយ សង្រួមចិត្តគោរពវិញ្ញាណក្ខ័ន្ធ​ជនរួមជាតិជាង ៣ លាននាក់ ដែលបានបាត់បង់ជីវិតទៅយ៉ាងអាណោចអាធ័ម និងអយុត្តិធម៌បំផុតនៅ​ក្រោមរបបប្រល័យពូជសាសន៍ ហើយឧទ្ទិសបួងសួង សូមឲ្យដួងវិញ្ញាណក្ខ័ន្ធរបស់លោកអ្នកទាំងអស់​នោះ​បានទៅកាន់សុគតិភពជារៀងដរាបទៅ។

នៅក្នុងឱកាសដ៏ថ្លៃថ្លានេះ ទូលព្រះបង្គំយើងខ្ញុំទាំងអស់គ្នាសូមសម្តែងគារវភក្តីភាព និងកតញ្ញូតាធម៌​ដ៏ខ្ពង់​ខ្ពស់បំផុតថ្វាយ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជា​ណាចក្រកម្ពុជា និងសម្តេចព្រះមហាក្សត្រី នរោត្តម មុនីនាថ​សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីសក្ការៈដ៏ខ្ពង់ខ្ពស់បំផុត។ សូមថ្វាយព្រះពរព្រះករុណាជាអម្ចាស់​ជីវិត​តម្កល់​លើត្បូង និងសម្តេចព្រះវររាជមាតាជាតិ សូមមានព្រះរាជសុខភាពបរិបូណ៌ ព្រះកាយពលមាំមួន ព្រះបញ្ញា​ញាណភ្លឺថ្លា និងព្រះជន្មាយុយឺនយូរ ដើម្បីគង់ប្រថាប់ជាម្លប់ដ៏ត្រជាក់ត្រជុំនៃប្រជារាស្ត្រខ្មែរគ្រប់ៗរូប និងបន្ត​ដឹកនាំនាវាកម្ពុជាឆ្ពោះ​ទៅកាន់ត្រើយវឌ្ឍនភាពដ៏រុងរឿងក្នុងឯករាជ្យ សន្តិភាព ឯកភាព អធិបតេយ្យ និង​បូរណភាពទឹកដីដ៏ពេញលេញជានិច្ចនិរន្តន៍។

អង្គមីទ្ទិញ និងជនរួមជាតិជាទីគោរពស្នេហា !

បច្ចុប្បន្ន ប្រជាជនកម្ពុជាបានរស់នៅយ៉ាងសុខដុមរមនាក្នុងសន្តិភាព ហើយកំពុងខិតខំបញ្ចេញអស់ពីកម្លាំង​កាយ កម្លាំងចិត្ត និងប្រាជ្ញាស្មារតី ដើម្បីអភិវឌ្ឍមាតុភូមិខ្លួនឲ្យកាន់តែរីកចម្រើនខ្លាំងក្លា និងរួមគ្នាលុបបំបាត់​នូវរាល់ស្លាកស្នាមដ៏ឈឺចាប់ ខ្លោចផ្សាបំផុតដែលសង្រ្គាម និងរបបប្រល័យពូជសាសន៍បានបន្សល់ទុក​។ ពេល​នេះទោះបីជាយើងកំពុងរស់នៅយ៉ាងសុខសាន្តក្តី​ ក៏យើងមិនអាចភ្លេចបានឡើយនូវអតីតកាលដ៏ខ្មៅងងឹត​បំផុតនៃមាតុភូមិ និងប្រជាជាតិយើងដែលត្រូវគ្របដណ្តប់ដោយសង្រ្គាម និងឧក្រិដ្ឋកម្មយ៉ាងសាហាវយង់​​ឃ្នង​ត្រូវក្រាលជោកជាំ​ដោយឈាម និងទឹកភ្នែករបស់ប្រជាជន ហើយត្រូវគេរំលោភបំពានប្រមាថមាក់ងាយសព្វ​បែប​យ៉ាង។ មហន្តរាយ និងសោកនាដកម្មដ៏ធំធេង ដែលបានធ្លាក់សង្កត់មកលើប្រជាជនកម្ពុជានេះ គឺផ្តើម​ឡើង​ដោយរដ្ឋប្រហារថ្ងៃ ១៨ មីនា ឆ្នាំ ១៩៧០ តាមខ្សែញាក់របស់បរទេស ដែលបង្កជាភ្លើងសង្រ្គាម​ឆាបឆេះ​យ៉ាង​សន្ធោសន្ធៅ ដុតបំផ្លាញទឹកដីមាតុភូមិយើង និងបានសម្លាប់អាយុជីវិតប្រជាជនប្រជាជនកម្ពុជា ជាងកន្លះ​លាននាក់។ ក្រោយថ្ងៃរំដោះ ១៧ មេសា ឆ្នាំ ១៩៧៥ ប្រជាជនកម្ពុជាសង្ឈឹមថានឹងបានរស់ក្នុងសន្តិភាព ប៉ុន្តែ ផ្ទុយទៅវិញ បនក្បត់ ប៉ុល ពត បានប្លន់យកទំាងស្រុងនូវសមិទ្ធផលនៃជ័យជម្នះនេះ បង្កើតឡើងរបប​ប្រល័យ​​​​ពូជសាសន៍ សម្លាប់រង្គាលប្រជាជនខ្លួនឯង បំផ្លាញអ្វីៗគ្រប់យ៉ាងដែលជាតម្លៃស្មារតី និងសម្ភារៈ​របស់ជាតិ ធ្វើឲ្យទឹកដីមាតុភូមិ ដែលឆេះខ្លោចដោយភ្លើងសង្រ្គាមទៅហើយនោះ ក្លាយទៅជាវាលពិឃាត​យ៉ាងសាហាវឃោរឃៅបំផុត។ ក្នុងរយៈពេលតែ ៣ ឆ្នាំ ៨ ខែ ២០ ថ្ងៃ ពួក ប៉ុល ពត បានបំផ្លាញរចនា​សម្ព័ន្ធសង្គមជាតិឲ្យរលាយខ្ទេចខ្ទីដល់ឬសគល់ សិទ្ធិសេរីភាពដែលជាតម្លៃសារវ័ន្តរប​ស់​មនុស្ស ត្រូវបាន​លុបបំបាត់ទាំងស្រុង ប្រជាជនជាង ៣ លាននាក់ ត្រូវបានសម្លាប់យ៉ាងអាណោចអាធ័ម។ ច្បាស់ណាស់ថា បើគ្មា​នការជួយសង្គ្រោះឲ្យ​ទាន់ពេលវេលាទេនោះ ប្រជាជនកម្ពុជានឹងត្រូវបន្តកម្ទេចបង់ដោយគ្មានទីបញ្ចប់​ឡើយ។

ស្ថិតក្នុងកាលៈទេសៈដ៏ធ្ងន់ធ្ងរបំផុតនេះ បណ្តាកម្លាំងអ្នកស្នេហាជាតិដ៏បរិសុទ្ធនៃគណបក្ស​ប្រជាជនកម្ពុជា​បានផ្តាច់ខ្លួនចេញពីរបបប្រល័យពូជសាសន៍ ប៉ុល ពត ហើយបានរួមគ្នាបង្កើតរណសិរ្សសាមគ្គីសង្រ្គោះជាតិ​កម្ពុជានៅថ្ងៃ ២ ធ្នូ ឆ្នាំ ១៩៧៨ ដើម្បីប្រមូលកម្លាំងរបស់ប្រជាជាតិទាំងមូលធ្វើការតស៊ូសង្រ្គោះប្រទេសជាតិ និងបានអំពាវនាវរកការជួយឧបត្ថម្ភ ពីប្រជាជននៃបណ្តាប្រទេសជិតឆ្ងាយដល់ដំណើរការតស៊ូនេះ។ ជាមួយនឹងការទទួលបាននូវការជួយឧបត្ថម្ភដ៏ធំធេង និងទាន់ពេលវេលាពីសំណាក់កងទ័ពស្ម័គ្រចិត្តវៀត​ណាម រណសិរ្សសាមគ្គីសង្គ្រោះជាតិកម្ពុជា បានដឹកនាំប្រជាជនវាយរំលំរបបប្រល័យពូជសាសន៍ ទទួល​បានជ័យ​ជម្នះដ៏ត្រចះត្រចង់ នៅថ្ងៃ ៧ ខែ មករា ឆ្នាំ ១៩៧៩។ ជ័យជម្នះ ៧ មករា បានសង្គ្រោះអាយុជីវិត​ប្រជាជន​ដែលនៅសេសសល់បានទាន់ពេលវេលា បានដណ្តើមមកវិញនូវសិទ្ធិសេរីភាពគ្រប់យ៉ាងជូនប្រជាជន បាន​ធ្វើឲ្យរាល់តម្លៃទាំងខាងស្មារតី និង​សម្ភារៈរបស់ប្រជាជាតិខ្មែរដែលត្រូវបាន​កសាងពូនផ្តុំរាប់ពាន់ឆ្នាំមក​ហើយ​នោះ បានរស់ឡើងវិញ និងបាន​រួមវិភាគទានដ៏សកម្មដល់សន្តិភាព និងសន្តិសុខក្នុងតំបន់។ នេះជាសច្ចធម៌​ប្រវត្តិសាស្ត្រដែលគ្មានកម្លាំងណាអាចមកបំភ្លៃ បំផ្លើស បំភ្លេច និងបំផ្លាញបានឡើយ។

ក្រោយថ្ងៃរំដោះ ៧ មករា យើងត្រូវស្តារសេដ្ឋកិច្ចសង្គម និងជីវភាពរស់នៅឡើងវិញពីលេខសូន្យ និងពី​បាត​ដៃទទេ ក្នុងស្ថានភាពប្រទេសមានសន្តិភាពផង និងមានសង្រ្គាមផង ហើយត្រូវ​ទទួលរងនូវការ​ហ៊ុំព័ទ្ធ​ខាង​សេដ្ឋកិច្ច និងឯកោខាងនយោបាយយ៉ាងអយុត្តិធម៌ថែមទៀត ពី​សំណាក់​ប្រទេសមួយចំនួន ដែលមាន​គោល​បំណងនាំយករបបប្រល័យពូជសាសន៍ត្រឡប់មកកម្ពុជាវិញ។ ឧបសគ្គ និងការលំបាកទាំងឡាយដែលរាំង​ស្កាត់មិនឲ្យកម្ពុជាដើរទៅមុខនៅក្នុងដំណាក់កាលនោះ មានទំហំធំធេងណាស់ ដែលអាចទាញកម្ពុជា​ឲ្យវិលត្រឡប់ទៅរកគ្រោះមហន្តរាយជាថ្មីវិញបាន បើមិនអាចពុះពារជម្នះបានទេនោះ។ ប្រឈមនឹងរាល់​ឧបសគ្គដ៏គ្រោះថ្នាក់បំផុតនេះ គណបក្សប្រជាជនកម្ពុជា រណសិរ្ស និង​រដ្ឋអំណាចនៃសាធាររដ្ឋប្រជាមានិ​ត​កម្ពុជា ដែលត្រូវបានបង្កើតឡើងភ្លាមក្រោយថ្ងៃរំដោះ ៧ មករា បានជ្រោងទង់មហាសាមគ្គីការពារ​ការរស់​ឡើងវិញរបស់ប្រជាជាតិ ពុះពារ ស្តារ កសាង និងការពារប្រទេសឲ្យគង់វង្ស ឋិតថេរ និងឈានទៅមុខពីជ័យ​ជម្នះមួយទៅកាន់ជ័យជម្នះមួយទៀតជាបន្តបន្ទាប់។ អាស្រ័យហេតុនេះ ក្នុងរយៈពេលតែ ១០ ឆ្នាំ ក្រោយថ្ងៃ​ជ័យជម្នះ៧មករា កម្ពុជាដែលចេញដំណើរពីលេខសូន្យ បានឈានមកដល់ដំណាក់កាលពង្រឹងពង្រីកខ្លួន ដែលបានបង្កបុព្វបទ និងលក្ខណសម្បត្តិចាំបាច់នានា ឲ្យកម្ពុជាឈានចូលដំណាក់កាលថ្មីមួយទៀត​ជា​ប្រវត្តិសាស្ត្រគឺ សន្តិភាព បង្រួបបង្រួមជាតិ ប្រជាធិបតេយ្យ និងអភិវឌ្ឍន៍ប្រកបដោយមោទនភាព។

ឆ្លងកាត់រយៈពេល ៣៨ ឆ្នាំមកនេះ ផ្តើមពីជ័យជម្នះ ៧ មករា ប្រទេសកម្ពុជាបាន និងកំពុងឈានទៅមុខ​តាមទិសដៅដ៏ត្រឹមត្រូវ ស្របតាមបំណងប្រាថ្នាដ៏ពិសិដ្ឋរបស់ប្រជាជន និងដើរស្របជាមួយនិន្នាការរួម​ក្នុង​តំបន់ក៏ដូចពិភពលោក ទោះបីជាត្រូវជួបនឹងភាពបត់បែនយ៉ាងច្រើនក្តី៖

 កម្ពុជាពីមុន ដែលជាវាលពិឃាត ជាតំបន់អសន្តិសុខ ជាចម្ការមីន ឥឡូវបានក្លាយទៅជាទឹកដីសន្តិភាព និងជាតំបន់ទេសចរណ៍មួយប្រកបដោយប្រជាប្រិយភាពក្នុងតំបន់អាស៊ីអាគ្នេយ៍ ដែលទទួល​បានភ្ញៀវ​ទេសចររាប់លាននាក់ក្នុងមួយឆ្នាំៗ។

 កម្ពុជាពីមុន ដែលតែងតែប្រើអាវុធដើម្បីដណ្តើមអំណាចគ្នា ឥឡូវបានក្លាយទៅជាប្រទេសមួយ ដែលគោរព​យ៉ាងខ្ជាប់ខ្ជួននូវគោលការណ៍នៃលទ្ធិប្រជាធិបតេយ្យសេរី ពហុបក្ស តាមរយៈការរៀបចំយ៉ាងទៀងទាត់ នូវ​ការបោះឆ្នោតដោយសេរី ត្រឹមត្រូវ និងយុត្តិធម៌ ដើម្បីឲ្យប្រជាពលរដ្ឋជ្រើសរើស និងជ្រើសតាំង​តំណាង​ដឹក​នាំ​ប្រទេស ជានីតិរដ្ឋដែលគោរពគោលការណ៍ច្បាប់ដោយឥតងាករេ និងជារដ្ឋអធិបតេយ្យ ដែលមានបូរណ​ភាព​ទឹកដីពេញលេញ ហើយគោរព លើកតម្កើងសិទ្ធិ និងសេចក្តីថ្លៃថ្នូរបស់មនុស្ស។

 កម្ពុជាពីមុន ដែលជាប្រទេសត្រូវទទួលរងការហ៊ុមព័ទ្ធ និងឯកោទាំងខាងសេដ្ឋកិច្ច និងនយោបាយ ឥឡូវ​នេះបានក្លាយទៅជាប្រទេសមួយដែលកំពុងសមាហរណកម្មខ្លួនយ៉ាងសកម្ម ទៅក្នុងរចនាសម្ព័ន្ធ និងនិម្មា​បនកម្មតំបន់ និងពិភពលោក ហើយកំពុងបំពេញតួនាទីយ៉ាងសកម្មដោយស្មើសិទ្ធិ និងស្មើភាព​ក្នុងគ្រប់​កិច្ច​ការតំបន់ និងនៅលើឆាកអន្តរជាតិ។

– កម្ពុជាពីមុន ដែលជាប្រទេសអន់ខ្សោយខាងសេដ្ឋកិច្ច និងគ្របដណ្តប់ដោយភាពក្រីក្រ មានអសន្តិសុខ​ស្បៀង ឥឡូវនេះ បានក្លាយទៅជាប្រទេសនាំស្បៀងចេញ ហើយស្ថិតនៅចំណាត់ថ្នាក់ នៃប្រទេសដែល​សម្រេចបានកំណើនសេដ្ឋកិច្ចខ្ពស់ប្រកបដោយចីរភាព ក្នុងអត្រាជាមធ្យម ៧,៧% ក្នុងមួយឆ្នាំ ក្នុងរយៈពេល​ពីរទសវត្សរ៍ចុងក្រោយនេះ ព្រមទាំងសម្រេចបាននូវវឌ្ឍនភាពដ៏ល្អប្រសើរ ក្នុងការកាត់បន្ថយភាពក្រីក្រ ក៏ដូច​ការកែលម្អសូចនាករសង្គមសំខាន់ៗ។

ទាំងអស់នេះគឺជាការផ្លាស់ប្តូរដ៏ធំធេងជាប្រវត្តិសាស្ត្រ ដែលកើតចេញពីការដឹកនាំដ៏ត្រឹមត្រូវខាងនយោបាយ ប្រកបដោយឆន្ទៈប្តូរផ្តាច់, ការចូលរួមដ៏សកម្មរបស់ប្រជាជនគ្រប់ៗរូបក្នុងការអនុវត្តនូវសិទ្ធិ និង​​​កាតព្វកិច្ច​របស់ខ្លួន​ ដែលបង្កើតជាកម្លាំងមហាសាមគ្គី ដើម្បីកសាង និងការពារមាតុភូមិ, ការលះបង់អស់ពី​កម្លាំង​កាយ កម្លាំងចិត្តរបស់មន្ត្រីគ្រប់លំដាប់ថ្នាក់​ និងកងកម្លាំងប្រដាប់អាវុធគ្រប់ប្រភេទក្នុងការបម្រើជាតិ និង  ប្រជាជន, ការធ្វើសហប្រតិបត្តិការរវាងចរន្តនយោបាយនានា និងពីគ្រប់មជ្ឈដ្ឋានផ្សេងៗទៀតក្នុងសង្គម ដោយ​ឈរ​លើឧត្តមប្រយោជន៍ជាតិ និងតាមគោលការណ៍នៃលទ្ធិប្រជាធិបតេយ្យសេរី ពហុបក្ស ព្រមទាំង​ការជួយឧបត្ថម្ភដ៏ស្មោះសរ​ពីសំណាក់បណ្តាប្រទេសជាមិត្តជិតឆ្ងាយ និងសហគមន៍អន្តរជាតិ។ នេះជា​កត្តាធំៗនៃជ័យជម្នះ និងជាមេរៀនពិសោធន៍ជាប្រវត្តិសាស្រ្តដែលយើងទាំងអស់គ្នាគប្បីយល់ដឹងឲ្យច្បាស់ និងចងចាំជារៀងដរាប ដើម្បីកុំឲ្យប្រវត្តិសាស្រ្តដ៏ជូរចត់អាចកើតឡើងជាថ្មីវិញបាននៅលើមាតុភូមិយើង។

អង្គមីទ្ទិញ និងជនរួម​ជាតិជាទីគោរពស្នេហា !

ស្មារតីជ័យជម្នះ ៧ មករា ស្ថិតស្ថេរ និងរស់រវើកជានិច្ចក្នុងដួងចិត្តរបស់ប្រជាជនកម្ពុជាគ្រប់ៗរូប និងគ្រប់​ជំនាន់តទៅមុខទៀត ស្មារតី ៧ មករា ជាពន្លឺបង្ហាញផ្លូវយើងឲ្យឆ្លងកាត់នូវគ្រប់ឧបសគ្គ និងការលំបាក​នានា​ឆ្ពោះទៅរកជ័យជម្នះគ្មានទីបញ្ចប់ ស្មារតី ៧ មករា គឺស្មារតីសន្តិភាព និងការរួបរួមជាតិ ជាស្មារតី​ធ្វើម្ចាស់​ប្រទេសរបស់ប្រជាជនយើង។ ស្មារតី ៧ មករា ជាស្មារតីរបស់ប្រជាជាតិខ្មែរ ដោយពុំមានបែងចែក​និន្នាការ​នយោបាយណាមួយឡើយ ទាំងអ្នកបាន​ឆ្លងកាត់​របបប្រល័យពូជសាសន៍ ទាំងយុវជនជំនាន់​ក្រោយ ដែល​មិនបានឆ្លងកាត់ផ្ទាល់នូវរបប​ដ៏ឃោរឃៅនេះ។ មានតែអ្នកចង់ឲ្យរបបប្រល័យពូជសាសន៍វិលត្រឡប់មកវិញ និងអ្នកដែលចង់ប្រើប្រាស់កម្ពុជា ដើម្បីសម្រេចគោលបំណងអាក្រក់របស់ខ្លួន ដោយពុំគិតដល់អាយុជីវិត​របស់ប្រជាជនកម្ពុជាប៉ុណ្ណោះ ដែលប្រឆាំងនឹងជ័យជម្នះ ៧ មករា។

ពេលនេះប្រជាជនកម្ពុជាកំពុងឈានចូលឆ្នាំ ២០១៧​ ដែលជាឆ្នាំទី ៤ នៃការអនុវត្ត «កម្មវិធីនយោបាយ» ​និង«យុទ្ធសាស្រ្តចតុកោណដំណាក់កាលទី៣»  របស់រាជរដ្ឋាភិបាលសម្រាប់នីតិកាលទី ៥ នៃរដ្ឋសភា ជាមួយ​នឹងក្តី​សោមនស្សរីករាយចំពោះសមិទ្ធផលគ្រប់វិស័យដែលសម្រេចបានក្នុងឆ្នាំ២០១៦ កន្លងទៅ៖

 ខឿនការពារប្រទេស និងសន្តិសុខជាតិកាន់តែត្រូវបានពង្រឹង ដែលបានលើកកម្ពស់​សមត្ថភាព​នៃកិច្ចការ​ពារជាតិ ការពារអធិបតេយ្យ និងបូរណភាពទឹកដីនៃមាតុភូមិ ធានាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ និងភាពសុខដុមរមនារបស់ប្រជាជន។ តាមរយៈនេះ បានផ្តល់​ភាព​អនុគ្រោះដល់​ការពង្រឹងពង្រីកលទ្ធិប្រជាធិបតេយ្យសេរី ពហុបក្ស ដែលបានដើរទន្ទឹមនឹងការអនុវត្តនីតិរដ្ឋ។ បណ្តាគណ​បក្សនយោបាយ រួមទាំងគណបក្សដែលទើបបង្កើតថ្មី បណ្តាសមាគម និងអង្គការមិនមែនរដ្ឋាភិបាល ព្រមទាំង​ប្រព័ន្ធផ្សព្វផ្សាយព័ត៌មានគ្រប់ប្រភេទ កំពុងធ្វើសកម្មភាពដោយសេរី។ ស្ថាប័ននានារបស់ជាតិ និងរដ្ឋបាល​សាធារណៈនៅគ្រប់ថ្នាក់ កំពុងខិតខំអនុវត្តការងាររបស់ខ្លួន ដែលបានធានាដល់ការអភិវឌ្ឍសេដ្ឋកិច្ច​សង្គម ព្រមទាំងដំណើរការនៃលទ្ធិប្រជាធិបតេយ្យ និងនីតិរដ្ឋ។ ការចុះឈ្មោះបោះឆ្នោតក្រោមការចាត់ចែង​របស់​គណៈកម្មាធិការជាតិរៀបចំការបោះឆ្នោត បានប្រព្រឹត្តទៅយ៉ាងរលូនប្រកបដោយជោគជ័យ ដែលបាន​ទទួល​នូវការសាទរពីសាធារណមតិជាតិ និងអន្តរជាតិ។ ខ្ញុំសូមយកឱកាសនេះ សម្តែងនូវការគោរពដល់​ប្រជាពល​រដ្ឋនៅទូទាំងប្រទេស ដែលបានអនុវត្តសិទ្ធិដ៏ថ្លៃថ្លារបស់ខ្លួន ប្រកបដោយការទទួលខុសត្រូវ ដោយបានអញ្ជើញ​ទៅចុះឈ្មោះបោះឆ្នោតក្នុងភាពជាម្ចាស់វាសនារបស់ប្រទេសជាតិ ហើយសូមអំពាវនាវដល់​ប្រជាពលរដ្ឋគ្រប់​រូប ដែលបានចុះឈ្មោះបោះឆ្នោតរួចហើយ ទៅពិនិត្យបញ្ជីឈ្មោះ ដែលគណៈកម្មាធិការជាតិរៀបចំការបោះ​ឆ្នោតបានបិទផ្សាយឲ្យទាន់ពេលវេលា ដើម្បីធានាសិទ្ធិក្នុងការបោះឆ្នោតរបស់បងប្អូន។

– ការអនុវត្តកម្មវិធីកំណែទម្រង់នានា កំពុងត្រូវបានជំរុញក្នុងឆន្ទៈមុតស្រួចប្រកបដោយផ្លែផ្កា ដែល​បាន​លើក​កម្ពស់អភិបាលកិច្ចល្អ ដើម្បីកំណើនការងារ សមធម៌ និងប្រសិទ្ធភាព។ ជាពិសេសកំណែទម្រង់​នៅរដ្ឋ​បាល​ថ្នាក់ក្រោមជាតិ រួមទាំងថ្នាក់ឃុំ សង្កាត់ បានទទួលការគាំទ្រ និងការចូលរួមយ៉ាងទូលំទូលាយពីប្រជាជន​គ្រប់មជ្ឈដ្ឋាន និងពីសហគមន៍អន្តរជាតិ។ ឆ្លងតាមដំណើរការអនុវត្តកំណែទម្រង់ ធនធានហិរញ្ញ​វត្ថុដែល​ត្រូវ​បានផ្ទេរទៅឲ្យរដ្ឋបាលឃុំ សង្កាត់ មានកំណើន ១២ ដង បើគិតពីឆ្នាំ ២០០២ មកដល់ឆ្នាំ ២០១៦។ គួបផ្សំ​នឹងការកៀរគរធនធានពីដៃគូអភិវឌ្ឍន៍ សង្គមស៊ីវិល សប្បុរសជន និងការចូលរួមពីសហគមន៍មូលដ្ឋាន បាន​ធ្វើឲ្យរដ្ឋបាលឃុំ សង្កាត់ កាន់តែពង្រីកបាននូវលទ្ធភាពក្នុងការផ្តល់សេវាសាធារណៈ និងការអភិវឌ្ឍ​  ហេដ្ឋារចនាសម្ព័ន្ធជនបទរាប់ពាន់គម្រោងក្នុង ១ ឆ្នាំៗ ដូចជា ការសាងសង់ផ្លូវជនបទ, ស្ពាន, អណ្តូងទឹក, ស្រះទឹក, ប្រព័ន្ធធារាសាស្ត្រខ្នាតតូច, សាលារៀន, ប៉ុស្តិ៍សុខភាព និងការផ្តល់សេវាសង្គមផ្សេងៗ។

– ក្នុងដំណើរការអភិវឌ្ឍសេដ្ឋកិច្ច សង្គម ក្នុងឆ្នាំ ២០១៦ កម្ពុជាធានាបាននូវស្ថិរភាពម៉ាក្រូសេដ្ឋកិច្ច និង​ហិរញ្ញ​វត្ថុយ៉ាងល្អប្រសើរ ក្នុងនោះអតិផរណាររក្សាបានក្នុងកម្រិតទាបជាង ៥% និងអាត្រាប្តូរប្រាក់​មាន​ស្ថិរ​ភាព។ កំណើនសេដ្ឋកិច្ចសម្រេចបានក្នុងរង្វង់ ៧% ដូចការព្យាករពីដើមឆ្នាំ ក្នុងនោះវិស័យ​ឧស្សាហកម្ម​មាន​កំណើន ១១,៤%, វិស័យសេវាកម្មមានកំណើន ៦,៧% និងវិស័យកសិកម្មមានកំណើនល្អជាងឆ្នាំមុន។ ផលិតផលសរុបក្នុងស្រុកជាមធ្យមសម្រាប់មនុស្សម្នាក់ៗកើនពី ៧៦០ ដុល្លារអាមេរិក ក្នុងឆ្នាំ ២០០៨ ដល់ ១.២១៥ ដុល្លារ ក្នុងឆ្នាំ ២០១៥ ហើយនៅឆ្នាំ ២០១៦ បានបន្តកើនដល់ជាង ១.៣០០ ដុល្លារ ដែលធ្វើ​ឲ្យ​កម្ពុជាបានឆ្លងផុតពីចំណាត់ថ្នាក់ជាប្រទេសចំណូលទាប ក្លាយជាប្រទេសមានចំណូលមធ្យមកម្រិតទាប ហើយកំពុងខិតខំសម្រេចឲ្យបាននូវទស្សនវិស័យធំៗ នៃការអភិវឌ្ឍរបស់ខ្លួនបន្តទៀត។ សន្ទុះរីកចម្រើន​ដ៏​ខ្លាំងនេះបានបង្ហាញច្បាស់ក្នុងភាពរស់រ​វើក នៃជីវភាពសង្គមលើគ្រប់វិស័យបច្ចុប្បន្ននេះ។ សម្រាប់ឆ្នាំ ២០១៧ តាមការព្យាករ ទោះបីជាមានបញ្ហាប្រឈមមួយចំនួនទាំងកត្តាខាងក្រៅ​ ទាំងកត្តាខាងក្នុងក្តី ក៏​កម្ពុជានឹងនៅតែធានាបាននូវស្ថិរភាពម៉ាក្រូសេដ្ឋកិច្ច និងសម្រេចបានកំណើនក្នុងរង្វង់ ៧% បន្តទៀត។ ស្ថានភាពដ៏ល្អនេះ កំពុងពង្រឹង និងពង្រីកថែមទៀតនូវកាលានុវត្តភាពសម្រាប់ធុរកិច្ច ពាណិជ្ជកម្ម និងការ​វិនិយោគនៅកម្ពុជា។

– គួរកត់សម្គាល់ថា ទន្ទឹមនឹងកំណើនផលិតផលស្រូវរបស់កសិករ ស្ថានភាពទីផ្សារអង្ករកាន់តែមានការ​ប្រកួតប្រជែងខ្លាំង ដែលធ្វើឲ្យយើងជួបនឹងបញ្ហាតម្លៃស្រូវ។ កន្លងមកនេះយើងបានខិតខំដោះស្រាយបញ្ហា​តាមមធ្យោបាយជាច្រើន ដើម្បីរក្សាស្ថិរភាពថ្លៃស្រូវ។ ខ្ញុំសូមសម្តែងការកោតសរសើរចំពោះមន្ត្រីរាជការ ពាណិជ្ជករ និងប្រជាពលរដ្ឋ ដែលបានឆ្លើយតបទៅនឹងការអំពាវនាវរបស់រាជរដ្ឋាភិបាលជំរុញចលនាទិញស្រូវ ដើម្បីជួយដោះស្រាយបញ្ហាលំបាករបស់ប្រជាកសិករ។ ក្នុងឱកាសដែលប្រជាកសិករកំពុងតែប្រមូលទុក​ដាក់​​ផលស្រូវនោះ រាជរដ្ឋាភិបាលនឹងបន្តប្រឹងប្រែងពេញទំហឹងដើម្បីការពារផលប្រយោជន៍របស់បងប្អូន។ ចំពោះបងប្អូនអាជីវករលក់ដូរតាមផ្សារដែលស្ថិតលើទីតាំងដីរបស់រដ្ឋ រាជរដ្ឋាភិបាលបានសម្រេចឲ្យបងប្អូន​អាចផ្ទេរសិទ្ធិកាន់កាប់ ប្រើប្រាស់ និងអាស្រ័យផលទៅកូន ឬអ្នកដទៃបាន ដោយមិនមានកំណត់អាណត្តិ​  ឡើយ ហើយនៅពេលថ្មីៗនេះ រាជរដ្ឋាភិបាលក៏បានសម្រេចលុបការបង់ភាស៊ី និងការបង់ថ្លៃផ្សេងៗ​ទៀត​ចំពោះការលក់ដូររបស់ប្រជាពលរដ្ឋតាមកញ្ច្រែង កញ្ជើ ល្អី នៅតាមទីផ្សារទូទាំងប្រទេស។ ជាមួយគ្នានេះ រាជរដ្ឋាភិបាលបានសម្រេចដំឡើងប្រាក់បៀវត្សមូលដ្ឋានដល់មន្ត្រីរាជការ និងកងកម្លាំងប្រដាប់អាវុធ ១២% ក្នុងឆ្នាំ ២០១៧ នេះ និងឈានទៅសម្រេចគោលដៅជាង១លានរៀល នៅឆ្នាំ ២០១៨ ព្រមទាំង​ដំឡើង​របប​ប្រាក់សោធននិវត្តន៍។ ប្រាក់ឈ្នួលអប្បបរមារបស់កម្មករ និយោជិតផ្នែកវាយនភ័ណ្ឌ កាត់ដេរ និងស្បែកជើង ត្រូវបានដំឡើងពី ១៤០ ដុល្លារ ដល់ ១៥៣ ដុល្លារ ក្នុងមួយខែ ដែលចាប់ផ្តើមអនុវត្តពី ខែ មករា ឆ្នាំ ២០១៧ នេះ ដូច្នេះបើរាប់បញ្ចូលប្រាក់អត្ថប្រយោជន៍រួមទាំងប្រាក់បន្ថែមផ្សេងៗទៀត កម្មករ និយោជិតទទួលបានពី ១៧០ ទៅ ១៨១ ដុល្លារអាមេរិកក្នុងមួយខែ។

លទ្ធផលដែលសម្រេចបានទាំងនេះ ឆ្លុះបញ្ចាំងនូវការយកចិត្តទុកដាក់របស់រាជរដ្ឋាភិបាល ក្នុងការកាត់បន្ថយ​ភាពក្រីក្រ និងលើក​ស្ទួយកម្រិតជីវភាពរស់នៅរបស់ប្រជាជន ព្រមទាំងកែលម្អសេវាសាធារណៈ​ផ្តល់ជូន​ប្រជាជនឲ្យមានភាពកាន់តែប្រសើរឡើង។

អង្គមីទ្ទិញ និងជនរួមជាតិជាទីគោរពស្នេហា !

៣៨ ឆ្នាំ កន្លងមកនេះ គឺ ៣៨ ឆ្នាំ នៃសាមគ្គីភាព វីរភាព និងជ័យជម្នះ។ ដោយប្រកាន់ខ្ជាប់នូវស្មារតី       ៧ មករា និងផ្អែកលើបណ្តាសមិទ្ធផលដ៏វិសេសវិសាល ដែលយើងសម្រេចបានកន្លងមក យើងទាំងអស់គ្នា​នឹង​បន្តធ្វើដំណើរទៅមុខទៀតប្រកបដោយក្តីសង្ឈឹម និងភាពជឿជាក់ចំពោះអនាគតដ៏រុងរឿងរបស់មាតុភូមិ និងប្រជាជាតិយើង។ យើងបានពុះពារឆ្លងកាត់រួចមកហើយនូវឧបសគ្គធំៗគ្រប់បែបយ៉ាង គ្មានឧបសគ្គ​ណា​ដែលធំលើសពីនេះទៀតទេ ហើយយើងក៏បានឃើញនូវកម្លាំងដ៏ធំធេងរបស់ប្រជាជាតិយើង ដើម្បីធ្វើ​ម្ចាស់លើជោគវាសនារបស់ខ្លួនផងដែរ។ ទៅមុខទៀត គ្មានឧបសគ្គណាអាចមករារាំងមិនឲ្យសម្រេចបំណង​ប្រាថ្នារបស់យើងបានឡើយ ឲ្យតែប្រជាជាតិយើងមានការរួបរួមគ្នា ហើយបន្តធ្វើដំណើរលើផ្លូវ​ដ៏ត្រឹមត្រូវដូច​បច្ចុប្បន្ន។ ក្នុងស្មារតីនេះ យើងទាំងអស់គ្នាប្រឆាំងដាច់ខាតនូវរាល់សកម្មភាពប្រទូសរ៉ាយ ទោះបីចេញពី​ប្រភពណាក៏ដោយដែលអាចធ្វើឲ្យខ្មែរបែកបាក់គ្នាជាថ្មីទៀត ដោយប្រកាន់ខ្ជាប់នូវស្មារតីបង្រួបបង្រួមជាតិ, គោលការណ៍នៃលទ្ធិប្រជាធិបតេយ្យ និងការគោរពសិទ្ធិមនុស្ស ខិតខំសម្របសម្រួល​ដោះស្រាយ​នូវទស្សនៈ​ខុសៗគ្នាក្នុងសង្គមដោយភាពអត់ធ្មត់ យោគយល់អធ្យាស្រ័យគ្នា និងអហិង្សា និងឈរលើមូលដ្ឋាន​គោរព​អនុវត្តច្បាប់យ៉ាងម៉ឺងម៉ាត់។

គណបក្សប្រជាជនកម្ពុជាការពារដាច់ខាតឯករាជ្យ អធិបតេយ្យ និងបូរណភាពទឹកដី នៃព្រះរាជាណាចក្រ​កម្ពុជា ការពាររដ្ឋធម្មនុញ្ញ របបរាជានិយម និងរាល់សមិទ្ធផលរបស់សង្គមជាតិ ជាពិសេសថែរក្សាសន្តិភាព, ស្ថិរ​ភាពនយោបាយ, សន្តិសុខ និងសណ្តាប់ធ្នាប់សាធារណៈឲ្យបានរឹងមាំឥតរង្គោះរង្គើរ ដែលជាកត្តាសារវ័ន្ត ដើម្បីធានាដល់ដំណើរការរីកចម្រើននៃលទ្ធិប្រជាធិបតេយ្យ និងសិទ្ធិមនុស្ស, ធានាការអភិវឌ្ឍប្រកបដោយ   ចីរភាព និងសមធម៌ និងធានានូវជីវភាពរស់នៅដ៏សុខសាន្តរបស់ប្រជាជន។  

យើងប្រឆាំងនឹងសកម្មភាពណាមួយពីខាងក្រៅ ដែលព្យាយាមដាក់ការកៀបសង្កត់មកលើរាជរដ្ឋាភិបាល​កម្ពុជា ឲ្យធ្វើតា​មឆន្ទៈរបស់ខ្លួននៅក្រោមហេតុផលប្រជាធិបតេយ្យ និងសិទ្ធិមនុស្សដែលជាការជ្រៀត​​ជ្រែក​មកលើដែនសមត្ថកិច្ចរបស់រដ្ឋអធិបតេយ្យមួយ បំពានលើគោលការណ៍ជាសកល។ កម្ពុជាមិនអាចទទួលយក​ការកៀបសង្កត់ ឬការជ្រៀតជ្រែកណាមួយបានឡើយ ជាពិសេសការប៉ុនប៉ងពីខាងក្រៅ ដើម្បីធ្វើឲ្យ​មាន​ការ​ផ្លាស់ប្តូរតាមរយៈបដិវត្តន៍ពណ៌ ផ្ទុយពីគោលការណ៍នៃលទ្ធិប្រជាធិបតេយ្យ និងនីតិរដ្ឋ ដែលការប៉ុន​ប៉ង​បែប​នេះបាន និងកំពុងបង្កនូវជម្លោះផ្ទៃក្នុង អស្ថិរភាព អសន្តិសុខ  សង្គ្រាម ទុក្ខវេទនា ការរត់ភៀសខ្លួន និងការ​បាត់បង់ជីវិតប្រជាជនស្លូតត្រង់រាប់សែនលាននាក់ យ៉ាងអយុត្តិធម៌បំផុតនៅក្នុងប្រទេសមួយចំនួន ដែល​រកទី​បញ្ចប់មិនឃើញ។

គណបក្សប្រជាជនកម្ពុជាជំរុញការអនុវត្តនូវយុទ្ធនាការ ដើម្បីប្រយុទ្ធ និងបង្ក្រាបចោរកម្ម, ឃាតកម្ម, ការប្លន់​ប្រដាប់អាវុធ, គ្រឿនញៀន, ការកាប់ឈើខុសច្បាប់, ការទន្ទ្រានយកដីធ្លីខុសច្បាប់, បទល្មើសនេសាទ​ខុស​ច្បាប់, អាជីវកម្មរ៉ែខុសច្បាប់, អាជីវកម្មខ្សាច់ខុសច្បាប់ និងការដាក់កុងត្រូលយកលុយ​ខុស​ច្បាប់។ ជនដែល​ប្រព្រឹត្តល្មើសត្រូវតែទទួលទោសតាមច្បាប់។ ​

យើងបន្តជំរុញការអនុវត្តកំណែទម្រង់រដ្ឋដ៏ស៊ីជម្រៅលើគ្រប់វិស័យ និងការប្រឆាំងអំពើពុករលួយ ដោយ​ឆន្ទៈមោះមុត ក្នុងនោះរួមទាំងកំណែទម្រង់វិមជ្ឈការ និងវិសហមជ្ឈការ សំដៅបង្កើនការផ្ទេរមុខងារ និងធន​ធានទៅឲ្យរដ្ឋបាលថ្នាក់ក្រោមជាតិ ពិសេសនៅថ្នាក់ឃុំ សង្កាត់ និងក្រុង ស្រុក ខណ្ឌ ដើម្បីបង្ខិតការផ្តល់​សេវាសាធារណៈ និងការអភិវឌ្ឍមូលដ្ឋានឲ្យកាន់តែកៀកនឹងប្រជាជន និងកាន់តែឆ្លើយតប​តម្រូវការរបស់​ប្រជាជន។

គណបក្សប្រជាជនកម្ពុជា បន្តអនុវត្តយ៉ាងស្មោះសរនូវវប្បធម៌សន្ទនាជាមួយគណបក្ស ដែលមានអាសនៈ​ក្នុងរដ្ឋសភា និងព្រឹទ្ធសភា តាមគោលការណ៍នៃលទ្ធិប្រជាធិបតេយ្យសេរី ពហុបក្ស និងនីតិរដ្ឋ។ ការមិន​ស្មោះត្រង់ ការប្រើពាក្យសម្តីអសុរសវាយប្រហារគ្នា និងការញុះញង់បង្ក បញ្ឆេះឲ្យមានការ​គុំកួនចងកំហឹង​នឹង​គ្នា គឺមិនអាចរក្សាអាយុជីវិតនៃវប្បធម៌សន្ទនាបានឡើយ មិនតែប៉ុណ្ណោះវានឹងបំផ្លាញនូវ​ឯកភាពជាតិ​របស់​យើង។ ព្រមជាមួយនេះ គណបក្សយកចិត្តទុកដាក់បង្កើនកិច្ចសហប្រតិបត្តិការជាមួយបណ្តាគណបក្ស​នយោបាយ សមាគម អង្គការមិនមែនរដ្ឋាភិបាល និងមជ្ឈដ្ឋានផ្សេងៗទៀតក្នុងសង្គម ដើម្បីថែរក្សា និង​ពង្រីករាល់សម្ធិផលនៃសង្គមជាតិ រួមគ្នាដោះស្រាយសេចក្តីត្រូវការរបស់ប្រជាជន ពង្រឹងបរិយាកាស​សុខ​ក្សេមក្សាន្តក្នុងសង្គម រួមទាំងបរិយាកាសនយោបាយសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ នាពេលខាងមុខនេះឲ្យបានល្អ ដែលជាកត្តាសំខាន់ចាំបាច់ ដើម្បីធានាឲ្យការបោះឆ្នោតនេះ បានប្រព្រឹត្ត​ទៅ​ដោយសេរី និងយុត្តិធម៌ ដោយគោរពអនុវត្តយ៉ាងម៉ឺងម៉ាត់តាមច្បាប់ បទបញ្ជា និងក្រមសីលធម៌​សម្រាប់​ការបោះឆ្នោត។

ក្នុងឱកាសដ៏ឧឡារិកនេះ ក្នុងនាមសម្តេចអគ្គមហាពញាចក្រី ហេង សំរិន ថ្នាក់ដឹកនាំនៃគណបក្ស​ប្រជា​ជន​កម្ពុជា និងរូបខ្ញុំផ្ទាល់ សូមសម្តែងការគោរព និងដឹងគុណដ៏ជ្រាលជ្រៅបំផុត ចំពោះជនរួមជាតិទាំង​នៅ​ក្នុង​ប្រទេស ទាំងនៅក្រៅប្រទេស ដែលបានផ្តល់ការគាំទ្រយ៉ាងរឹងមាំ ចំពោះការដឹកនាំ​របស់គណបក្សប្រជាជន​កម្ពុជា ក្នុងរយៈពេល ៣៨ ឆ្នាំកន្លងមកនេះ ធ្វើឲ្យគណបក្សអាចបំពេញបេសកកម្ម​បានដោយជោគ​ជ័យ​ក្នុង​ការបម្រើប្រទេសជាតិ។ គណបក្សនឹងបន្តប្រឹងប្រែងអនុវត្តកម្មវិធីនយោបាយរបស់ខ្លួន ឲ្យ​សម្រេច​បាន​សមិទ្ធផលថ្មីៗទៀតលើគ្រប់វិស័យ ព្រមទាំងជំរុញអនុវត្តនូវវិធានការគោលនយោបាយនានា សំដៅកែលម្អ លើកស្ទួយជីវភាពរស់នៅផ្ទាល់របស់ប្រជាជនឲ្យបានកាន់តែប្រសើរឡើងថែមទៀត ។ ខ្ញុំមានជំនឿដ៏មុតមាំថា បងប្អូនជនរួមជាតិនៅគ្រប់ទិសទី នៅតែបន្តគាំទ្រចំពោះការដឹកនាំរបស់គណបក្សប្រជាជនកម្ពុជា ដើម្បី​សម្រេចទាំងស្រុងនូវបំណងប្រាថ្នារបស់ជនរួមជាតិគឺ កសាងប្រទេសកម្ពុជាមួយឯករាជ្យ សន្តិភាព សេរី​ភាព ប្រជាធិបតេយ្យ អព្យាក្រឹត និងវឌ្ឍនភាពសង្គម។

នៅក្នុងឱកាសនេះដែរ ខ្ញុំសូមថ្លែងអំណរគុណជាអនេកប្បការចំពោះបណ្តាប្រទេសជាមិត្តជិតឆ្ងាយ ដៃគូ​អភិ​វឌ្ឍន៍ និងអង្គការអន្តរជាតិនានាដែល​តែងតែជួយឧបត្ថម្ភគាំទ្រដល់បុព្វហេតុដ៏យុត្តិធម៌របស់ប្រជាជន​កម្ពុជា ហើយកំពុងតែបន្តពង្រឹង និងពង្រីកថែមទៀតនូវទំនាក់ទំនង និងកិច្ចសហប្រតិបត្តិការប្រកប​ដោយផ្លែផ្កា​ជាមួយព្រះរាជាណាចក្រកម្ពុជា។

ជាទីបញ្ចប់ ទូលព្រះបង្គំ ខ្ញុំព្រះករុណាខ្ញុំ សូមថ្វាយព្រះពរ ប្រគេនពរ សម្តេចអគ្គមហាសង្ឃរាជាធិបតី សម្តេច​ព្រះសង្ឃរាជ ព្រះថេរានុថេរៈគ្រប់ព្រះអង្គជាទីសក្ការៈ និងសូមប្រសិទ្ធពរជូន សម្តេច, ឯកឧត្តម, លោកជំទាវ, ភ្ញៀវកិត្តិយសជាតិ និងអន្តរជាតិ, សមាជិក សមាជិកានៃអង្គមីទ្ទិញ និងជនរួមជាតិទាំងអស់ សូមបាន​ប្រកបពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕

សូមអរព្រះគុណសូមអរគុណ!