សម្តេច​តេជោ ហ៊ុន សែន អញ្ជើញ​បញ្ចុះ​ខ័ណ្ឌ​សីមា​ព្រះវិហារ វត្តសិរី​សាគរ ខេត្ត​ព្រៃវែង

នៅ​ព្រឹកថ្ងៃទី ១០ ខែមីនា ឆ្នាំ ២០១៧នេះ សម្តេច​អគ្គមហា​សេនាបតីតេជោ ហ៊ុន សែន នាយករដ្ឋមន្រ្តី នៃ​ព្រះ​រាជា​ណាចក្រកម្ពុជា បានអញ្ជើញជាអធិបតី​ដ៏ខ្ពង់ខ្ពស់​ក្នុងពិធីបញ្ចុះ​ខ័ណ្ឌសីមាព្រះវិហារ និង​ឆ្លង​សមិទ្ធផល​ផ្សេងៗ​ មួយ​ចំនួន​ក្នុង​វត្ត​សិរីសាគរ ហៅវត្ត​កំពង់​ត្របែក ស្ថិតនៅក្នុង ឃុំកំពង់ត្របែក ស្រុក​កំពង់​ត្របែក​ ខេត្ត ព្រៃវែង។

សម្តេចតេជោ​នាយក​រដ្ឋមន្រ្តី រីករាយណាស់ដែល​បានអញ្ជើញ​មកបញ្ចុះ​ខ័ណ្ឌសីមា​នៅទីនេះ ហើយ​ថ្ងៃនេះ​គឺត្រូវ​នឹង​ខួបលើកទី១៩ឆ្នាំ នៃថ្ងៃមរណៈភាពអ្នកម្តាយជា​ទីគោរព​ស្រឡាញ់​ដ៏ជ្រាល​ជ្រៅ​បំផុត​របស់ សម្តេច​តេជោ ដែលបាន​ទទួល​មរណៈភា​ពកាល​ពីថ្ងៃ ១០ មីនា ១៩៩៨។ សម្តេច​តេជោ មាន​សេចក្តី​នឹក​រលឹក​យ៉ាង​ខ្លាំង​ដល់​អ្នក​មាន​គុណ និងសូមជូន​កុសល​ផល​បុណ្យ​ថ្ងៃនេះ​ដល់​ពល​រដ្ឋ​ទាំង​អសគ្នា។

សម្តេច​តេជោ បានរំលឹកឡើង​វិញផង​ដែរអំពីការ​រស់រាន នៃព្រះពុទ្ធសាសនា​ដែលជា​សាសនា​របស់រដ្ឋ ហើយ​ត្រូវបាន​បាត់​បង់​ស្ទើតែ​ទាំង​ស្រុង​នៅក្នុង​របប​ប្រល័យ​ពូជ​សាសន៍​ប៉ុល​ពត​ក្នុងឆ្នាំ ១៩៧៥។ ក្រោយ​ថ្ងៃ​រំដោះ​ឆ្នាំ ១៩៧៩ មក គឺបានធ្វើអោយវិស័យពុទ្ធ​ចក្រមានកា​រីក​ចម្រើន​ជាបន្តបន្ទាប់ រហូត​មក​ដល់​បច្ចុប្បន្ន​មាន​វត្តអារាម​ទូទាំង​ប្រទេស​ប្រមាណ​ជាង ៤ពាន់វត្ត និង ព្រះសង្ឃជាង ៥ម៉ឺនអង្គ ដែល​មាន​ប្រជាពុ​ទ្ធ​បរិស័ទ​ គោរពប្រតិ​បត្តិយ៉ាង​ច្រើន​កុះករ​ផងដែរ។ សម្តេចតេជោ ហ៊ុន សែន បានបញ្ជាក់ទៀត​ថាវិស័យ​អាណាចក្រ និង ពុទ្ធចក្រ​គឺត្រូវ​ដើរ​ទៅ​ទន្ទឹមគ្នា។ បើ​អា​ណា​ចក្រមិនរីក​ចម្រើន​នោះ​វិស័យ​ពុទ្ធ​ចក្រ​ក៏មិន​រីក​ចម្រើន​ដែរ។ កត្តាសន្តិភាព​ពិត​ជា​មាន​​សារៈ​សំខាន់​ខ្លាំង​ណាស់​សម្រាប់កា​រអ​ភិវឌ្ឍន៍​ប្រទេស​អោយ​រីក​ចម្រើន បើគ្មានសន្តិភាព​ទេនោះ ក៏គ្មានការ​អភិវឌ្ឍឡើយ។

សម្តេចតេជោ ហ៊ុន សែន បានកោតសរសើរ និងថ្លែងអំណរគុណ ចំពោះគំនិតផ្តួចផ្តើម និងការខិត​ខំប្រឹង​ប្រែង​របស់​ព្រះចៅ​អធិការ​គ្រប់​ជំនាន់ ព្រះថេរានុត្ថេរៈ​គ្រប់ព្រះអង្គ សប្បុរស​ជន ពុទ្ធ​បរិស័ទ​ទាំង​ក្នុង​នឹង​ក្រៅ​ប្រទេស​ដែល​បានផ្តល់នូវ​ជំនឿជឿ​ជាក់​រួបរួម​សាមគ្គី ក្នុងការកសាងសមិទ្ធ​ផលនានា​ក្នុងវត្ត សម្រាប់​ទុក​ជាទី ​សេនាស​នៈដ៏គាប់​ប្រសើរ​ក្នុងវិស័​ព្រះពុទ្ធ​សាសនា ។

សម្តេចតេជោ ហ៊ុន សែន បានអញ្ជើញ​កាត់​ឬស​សីម៉ា និង​សម្ពោធ​សមិទ្ឋិផល​នៅក្នុង​ព្រះវិហារ​នេះ​ដាក់​អោយ​ប្រជាព​លរដ្ឋ ឧបាសក ឧបាសិកា និង ព្រះសង្ឃ​ប្រើប្រាស់​ចាប់​ពីពេល​នេះ​តទៅ ប្រកប​ដោយ​បរិយាកាស​រីករាយ និងស្និទ្ឋស្នាលបំផុត៕

ពត៌មានទាក់ទង

ពត៌មានផ្សេងៗ