( ២០ – ធ្នូ – ២០១២ ) សេចក្តី​​ប្រកាស​​របស់​​ឯកឧត្តម​បណ្ឌិត​​សភាចារ្យ សុខ អាន ប្រធាន​​គណៈ​កម្មាធិការ​​បេតិកភណ្ឌ​ពិភព​​លោក និងជា​​ឧបនាយក​រដ្ឋមន្រ្តី​ នៃរាជ​រដ្ឋាភិបាល​កម្ពុជា

79

សេចក្តី​ប្រកាស​របស់​ឯកឧត្តមបណ្ឌិត​សភាចារ្យ សុខ អាន ប្រធាន​គណៈកម្មាធិការ​បេតិកភណ្ឌពិភព​លោក និងជា​ឧបនាយករដ្ឋមន្រ្តី​ នៃរាជ​រដ្ឋាភិបាលកម្ពុជា

(រាជធានីភ្នំពេញ ថ្ងៃទី១៤ ខែធ្នូ​ ឆ្នាំ២០១២)

កាល​ពី២០​ឆ្នាំមុន ពោល​ឲ្យចំគឺនា​ថ្ងៃទី១៤ ខែធ្នូ ឆ្នាំ១៩៩២ នៅទីក្រុង Santa Fè សហរដ្ឋ អាមេរិក គណៈកម្មាធិការ​បេតិកភណ្ឌ​ពិភព​លោក ក្នុង​កិច្ចប្រជុំ​លើក​ទី១៦ បាន​សម្រេច​ចុះរមណីយ​ដ្ឋាន អង្គរ​ក្នុង​បញ្ជី​បេតិក​ភណ្ឌពិភព​លោក ( របស់​អង្គការ​យូណេស្កូ)។

សេចក្តី​សម្រេច​នេះមាន​លក្ខណៈ​ថ្មីពុំធ្លាប់​មានពី​មុនមក និងប្រកប​ដោយភាព​ក្លាហាន​សម្រាប់ សម័យ​នោះ សម្តែង​ឲ្យឃើញ​យ៉ាងច្បាស់​នូវក្តីកង្វល់​របស់​សហគមន៍​អន្តរជាតិ​ចង់ធ្វើ​សហប្រតិបត្តិការ ជាមួយ​ប្រទេស​កម្ពុជា​ដោយ​ប្រសិទ្ធភាព​និងឆាប់​រហ័ស ដើម្បីដោះស្រាយ​បញ្ហា​បន្ទាន់​ក្នុងការ​អភិរក្ស ដែល​កំពុង​តែចោទ​ចំពោះ​ប្រាសាទ​ទាំងឡាយ នៅក្នុង​តំបន់​បុរាណវិទ្យា​ដែលមាន​ផ្ទៃដី ៤០.០០០ ហិកតា លាត​សន្ធឹង​នៅ​ចន្លោះតំបន់​រលួស​នៅខាង​ត្បូង និងតំបន់​បន្ទាយ​ស្រីនៅ​ខាង​ជើង។

តាំងពី​ពេល​នោះ​មក សកម្មភាព​អន្តរជាតិ​ដែល​ធ្វើបន្ត​ជាប់ឥត​ដាច់និង​មានទ្រង់​ទ្រាយ​ធំ បាន ដំណើរការ​ក្រោមកា​រឧបត្ថម្ភ​គាំទ្រ​របស់​អង្គការ​យូណេស្កូ និងដោយ​មានប្រទេស​បារាំង និងជប៉ុន ធ្វើ ជា​សហ​ប្រធាន។ សព្វថ្ងៃ​ប្រទេស​ចំនួន​១៦ មកពីទ្វីប​ទាំង៤ មានក្រុម​ប្រតិ​បត្តិករ ចំនួន​៣៦​ក្រុម កំពុង អនុវត្ត​គម្រោង​ចំនួន​៦៤ ដែលប្រើ​ប្រាស់ថវិកា​២៥០លាន​ដុល្លារ​អាមេរិក។

សាធារណ​មតិជាតិ​និងអន្តរជាតិ​មូលមតិ​គ្នាវាយ​តម្លៃថា សមិទ្ធផល​ដែលបាន​កសាង​កន្លងមក គឺវិសេស​វិសាល​ណាស់។​ មុនឆ្នាំ​១៩៩៣ ដែល​ប្រារព្ធ​សន្និសីទ​អន្តរជាតិ​ស្តីពី​អង្គរ នាទី​ក្រុង​តូក្យូនិង ការ​បង្កើត​គណៈកម្មាធិការ​សម្រប​សម្រួល​កិច្ចគាំពារ និង​អភិវឌ្ឍន៍​តំបន់​ប្រវត្តិសាស្រ្ត​អង្គរ (C.I.C.) រមណីយដ្ឋាន​អង្គរ​ប្រកប​ទៅដោយ​​គ្រាប់មីន​ ហើយប្រាង្គ​ប្រាសាទ​ស្ថិត​ក្នុង​ស្ថានភាព​ប្រឈម​នឹងគ្រោះ ថ្នាក់។ ការជួញដូរ​ខុសច្បាប់​និងការលួច​សម្បតិ្តវប្បធម៌​ប្រព្រឹត្ត ទៅហាក់​ដូចជា​មិនញ​ញើតស​មត្ថកិច្ច បន្តិច​ឡើយ។ ប្រជាពល​រដ្ឋតាម​ភូមិឃុំ​នានាក្នុង​រមណីយដ្ឋាន​អង្គរភាគ​ច្រើនមាន​ជីវភាព​ក្រីក្រ។

តាំងពី​ឆ្នាំ១៩៩​៣មក រមណីយដ្ឋាន​អង្គរចាប់​ផ្តើមរស់​ឡើងវិញ​យ៉ាងពេញ​ទំហឹង។ បន្ទាប់ពី សន្និសីទ​អន្តរជាតិ​ក្រុង Paris ឆ្នាំ២០០៣ សកម្មភាព​អភិរក្ស​ត្រូវបាន​បំពេញ​បន្ថែម ដោយ​គម្រោង​លើក តម្លៃ​វប្បធម៌ អភិវឌ្ឍន៍​សេដ្ឋកិច្ច និងការ​ប្រយុទ្ធ​ប្រឆាំង​ភាព​ក្រីក្រ។

ដើម្បីជា​សក្ខីភាព​នៃការវាយ​តម្លៃខ្ពស់​ចំពោះ​សកម្មភាព​របស់រាជ​រដ្ឋាភិបាល​កម្ពុជា​ដែលមាន​សហគមន៍​អន្តរជាតិ​ជាដៃគូ​ផ្នែក​វិទ្យាសាស្រ្ត បច្ចេក​ទេស និងហិរញ្ញវត្ថុ  គណៈ​កម្មាធិការ​បេតិកភណ្ឌ ពិភព​លោកបាន​សម្រេច​ចិត្តនឹង​ប្រារព្ធកិច្ច​ប្រជុំលើក​ទី៣៧ របស់ខ្លួន​នាខែ​មិថុនា ឆ្នាំ២០១៣ នៅ រាជធានី​ភ្នំពេញ និងរមណីយ​ដ្ឋានអង្គរ។

នេះជាគំរូ​មួយ​បញ្ជាក់​ឲ្យឃើញ​យ៉ាងច្បាស់​នូវជោគ​ជ័យនៃ​អនុសញ្ញា​ស្តីពីកិច្ច​ការពារ​បេតិកភណ្ឌ ពិភពលោក​ផ្នែក​វប្បធម៌ និង​ធម្មជាតិ ក្នុងរយៈ​ពេល៤០​ឆ្នាំនៃអាយុរ​បស់ខ្លួន (១៩៧២-២០១២)។

Download (PDF, 69KB)