(ហ្សាកាតា, ឥណ្ឌូនេស៊ី)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងឋានៈជាប្រមុខរាជរដ្ឋាភិបាលប្រទេសជាសមាជិកអាស៊ាន បានលើកឡើងថា អាស៊ាន និងសហគមន៍អន្តរជាតិ ត្រូវរួមគ្នាប្រឆាំងចំពោះការប្រើកម្លាំង ដើម្បីប្រឆាំងនឹងរដ្ឋអធិបតេយ្យណាមួយ។
សម្តេចធិបតី ហ៊ុន ម៉ាណែត បានគូសរំលេចបែបនេះតាមរយៈសុន្ទរកថាគន្លឹះពេលអញ្ជើញចូលរួមក្នុងកិច្ចប្រជុំកំពូលធុរកិច្ច និងវិនិយោគអាស៊ាន នៅទីក្រុងហ្សាកាតា ប្រទេសឥណ្ឌូនេស៊ី នាល្ងាចថ្ងៃទី០៤ ខែកញ្ញា ២០២៣នេះ។ ក្នុងវេទិកាដ៏មានសារៈសំខាន់នោះ សម្តេចនាយករដ្ឋមន្ត្រីកម្ពុជា បានអញ្ជើញថ្លែងសុន្ទរកថាគន្លឹះជាភាសាអង់គ្លេស។
ទន្ទឹមនឹងការកត់សម្គាល់ពាក់ព័ន្ធការធ្វើពាណិជ្ជកម្ម វិនិយោគ និងបញ្ហាសេដ្ឋកិច្ចក្នុងតំបន់ និងលើពិភពលោកហើយនោះ សម្តេចធិបតី ហ៊ុន ម៉ាណែត ក៏បានលើកបង្ហាញបញ្ហាប្រឈម ដ៏គួរឱ្យព្រួយបារម្ភរបស់ពិភពលោកលើការប្រកួតប្រជែងផ្នែកពាណិជ្ជកម្ម និងឥទ្ធិពលរបស់ប្រទេសមហាអំណាច។
សម្តេចប្រមុខរាជរដ្ឋាភិបាលកម្ពុជា បានចាត់ទុកបញ្ហាទាំងនោះ កំពុងជះផលវិបាកលើគ្រប់បណ្តាប្រទេសទាំងអស់ ទោះដោយប្រយោលក៏ដោយ។ ប្រឈមបញ្ហាទាំងអស់នេះ សម្តេចមហាបវរធិបតី ហ៊ុន ម៉ាណែត បានសង្កត់ថា រាល់បញ្ហា ត្រូវតែប្រើកិច្ចសន្ទនាដោយសន្តិវិធី ដើម្បីអាចដោះស្រាយបាន។
សម្តេចបានបញ្ជាក់បែបនេះ «យើងជឿជាក់យ៉ាងមុតមាំថាសង្គ្រាមមិនអាចបញ្ចប់ដោយសង្គ្រាមនោះទេ។ សន្តិភាពពិតប្រាកដ និងភាពរុងរឿង គឺមានប្រភពតែមួយគត់មកពីការបញ្ចប់ជម្លោះដោយសន្តិវិធី តាមរយៈកិច្ចសន្ទនា និងការពិគ្រោះយោបល់ឈរលើមូលដ្ឋានយុទ្ធសាស្ត្រឈ្នះៗ ព្រមទាំងការចូលរួម និងការឯកភាពពីគ្រប់ភាគីពាក់ព័ន្ធ នៅក្នុងស្មារតីយោគយល់គ្នាទៅវិញទៅមក ជាមួយការតម្កល់ទុកសុខមាលភាពប្រជាជនជាអាទិភាពខ្ពស់»។
ក្នុងបរិបទពិភពលោកដែលកំពុងផុយស្រួយដោយការប្រជែងឥទ្ធិពលរបស់ប្រទេសមហាអំណាចនេះ សម្តេចធិបតី ហ៊ុន ម៉ាណែត បានសង្កត់ធ្ងន់ថា អាស៊ាន និងសហគមន៍អន្តរជាតិ ត្រូវតែអនុវត្តភាពជាមេដឹកនាំ ដោយប្រឆាំងការប្រើប្រាស់ ឬការសម្លុតគំរាមប្រើកម្លាំងបាយប្រឆាំងរដ្ឋអធិបតេយ្យមួយ ហើយត្រូវប្រមូលផ្ដុំកិច្ចខិតប្រឹងប្រែងរួមគ្នា គឺជារឿងសំខាន់ក្នុងការដោះស្រាយបញ្ហាដោយមិនអាចខ្វះបាននោះឡើយ។
បន្ថែមពីលើនេះប្រទេសជាសមាជិកអាស៊ានទាំងអស់ និងជាសមាជិកអង្គការសហប្រជាជាតិ ត្រូវតែប្រកាន់ខ្ជាប់ស្មារតីឯករាជ្យភាព អធិបតេយ្យ និងបូរណភាពទឹកដី សមភាព និងមិនជ្រៀតជ្រែកកិច្ចការផ្ទៃក្នុងអ្នកដទៃ ដូចដែលមានចែងក្នុងធម្មនុញ្ញអាស៊ាន និងUN៕
