កាលពីរសៀលថ្ងៃទី១១ ខែកុម្ភៈ ឆ្នាំ២០២០ នៅទីស្តីការគណៈរដ្ឋមន្ត្រី ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអនុញ្ញាតឱ្យឯកឧត្តម Pablo Chiho Kang ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសអូស្ត្រាលី ប្រចាំព្រះរាជាណាចក្រកម្ពុជា ទទួលជួបសម្តែងការគួរសម និងពិភាក្សាការងារ។
ឯកឧត្តមកិត្តិនីតិកោសលបណ្ឌិត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការ គណៈរដ្ឋមន្ត្រី បានសម្តែងនូវការស្វាគមន៍ចំពោះឯកឧត្តម Pablo Chiho Kang ដែលទទួលបេសកកម្មជាឯកអគ្គរដ្ឋទូតនៃប្រទេសអូស្ត្រាលីប្រចាំព្រះរាជាណាចក្រកម្ពុជា ហើយឯកឧត្តមកិត្តិនីតិកោសលបណ្ឌិត ឧបនាយករដ្ឋមន្ត្រីប្រចាំការ ក៏មានសេចក្តីរីករាយក្នុងការលើកឡើងអំពីបញ្ហានានាពាក់ព័ន្ធនឹងកិច្ចសហប្រតិបត្តិការ ជាទ្វេភាគីរវាងប្រទេសទាំងពីរកម្ពុជា អូស្ត្រាលី ដែលធ្លាប់មាននូវប្រវត្តិនៃទំនាក់ទំនងការទូតរវាងគ្នាដ៏យូរលង់ណាស់មកហើយ ។
ឯកឧត្តម Pablo Chiho Kang បានមានប្រសាសន៍ថា មិត្តភាពទ្វេភាគីរវាងកម្ពុជា និងអូស្ត្រាលី បានកើតមានឡើងតាំងពីអំឡុងឆ្នាំ១៩៥២មក និងក្រោយពីឆ្នាំ១៩៩៣ ក៏ចាប់ផ្តើមបន្តទំនាក់ទំនងគ្នារហូតដល់បច្ចុប្បន្ន។ ចាប់តាំងពីពេលនោះមកកម្ពុជា ក៏បានបញ្ជូននិស្សិតទៅសិក្សានៅប្រទេសអូស្ត្រាលី ហើយក៏មានបណ្តាអង្គការជាដៃគូអភិវឌ្ឍនានារបស់អូស្ត្រាលី បានមកបើកទីស្នាក់ការនៅក្នុងប្រទេស កម្ពុជា។ ឯកឧត្តមបានបន្តថា ប្រទេសអូស្ត្រាលីក៏បានរួមចំណែកក្នុងដំណើរការបោះឆ្នោតលើកដំបូងនៅកម្ពុជាដែលរៀបចំដោយ អ៊ុនតាក់ ផងដែរ។ ឯកឧត្តមឯកអគ្គរដ្ឋទូតបានមានប្រសាសន៍បន្ថែមថា ដោយសារកិច្ចទំនាក់ទំនងល្អនេះហើយ ទើបបច្ចុប្បន្នមាននិស្សិតកម្ពុជាប្រមាណជាង ៣ពាន់នាក់ បាននិងកំពុងបន្តការសិក្សានៅក្នុងប្រទេសអូស្ត្រាលីក្នុងកំរិតសិក្សាថ្នាក់ឧត្តម និងជំនាញវិជ្ជាជីវៈផ្សេងៗ ហើយដោយឡែកនិស្សិតអូស្ត្រាលីចំនួនប្រមាណ៥០០នាក់ ក៏បាននិងកំពុងសិក្សានៅក្នុងប្រទេសកម្ពុជាផងដែរ។ ប្រទេសអូស្ត្រាលី សហការជាមួយប្រទេសកម្ពុជា លើវិស័យសំខាន់ៗមួយចំនួនដូចជាៈ អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការ និងអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក ឬ ECCC) ដែលបានផ្តល់ថវិកាសរុបចំនួន៣២,៥លានដុល្លារអាម៉េរិកដល់ អ.វ.ត.ក ក្នុងនោះថវិកាចំនួន២៨,៨លានដុល្លារអាម៉េរិកសម្រាប់ភាគីអន្តរជាតិនៃអ.វ.ត.ក និងចំនួន៣,៧លានដុល្លារអាម៉េរិកសម្រាប់ភាគីជាតិនៃ អ.វ.ត.ក។
ឯកឧត្តម Pablo Chiho Kang បានបញ្ជាក់បន្ថែមថា បច្ចុប្បន្នស្ថានទូតអូស្ត្រាលី បាននិងកំពុងធ្វើការងារជាមួយកម្ពុជា ដោយផ្តោតលើវិស័យ ហេដ្ឋារចនាសម្ព័ន្ធ និងពាណិជ្ជកម្ម កសិកម្ម នេសាទ ធនធានទឹក អប់រំ និងសុខាភិបាល ដោយសហការជាមួយអាជ្ញាធរនៅតាមបណ្តាខេត្តមួយចំនួន បង្កើតនូវប្រព័ន្ធធារាសាស្ត្រ ដើម្បីបង្កើនទិន្នផលស្រូវជូនប្រជាកសិករខ្មែរ ក៏ដូចជាបានជួយបង្កើននូវប្រាក់ចំណូលក្នុងគ្រួសារផងដែរ។ ក្រៅពីនេះ អូស្ត្រាលីក៏កំពុងបង្កើតនូវភាពជាដៃគូសហការជាមួយក្រសួងកសិកម្ម ដើម្បីរៀបចំឯកសារបទដ្ឋាន ក្នុងគោលបំណងធានានូវស្តង់ដារជាអន្តរជាតិពាក់ព័ន្ធនឹងគុណភាពស្រូវអង្ករនាំចេញទៅក្រៅប្រទេស។ ឯកឧត្តម Pablo Chiho Kang ក៏បានឱ្យដឹងផងដែរថា នៅក្នុងពេលឆាប់ៗខាងមុខនេះ អូស្ត្រាលី នឹងអនុញ្ញាតឱ្យអ្នកជំនាញនៅតាមក្រសួង ស្ថាប័នពាក់ព័ន្ធមួយចំនួនរបស់រាជរដ្ឋាភិបាលកម្ពុជាប្រមាណ ២០រូប ដើម្បីបានទៅដកបទពិសោធន៍លើវិស័យ សំណង់ ក៏ដូចជាការសិក្សាស្វែងយល់ក្នុងបរិបទអូស្ត្រាលី លើទំនាក់ទំនង និងបញ្ហានានាក្នុងតំបន់ផងដែរ។ បន្ថែមពីលើនេះ ឯកឧត្តមឯកអគ្គរដ្ឋទូតអូស្ត្រាលី Pablo Chiho Kang ក៏បានរំលឹកនូវការពិភាក្សាគ្នាជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីពេលថ្មីៗនេះ លើគោលបំណងចង់ឱ្យមានដំណើរទស្សនកិច្ចសិក្សារវាងអ្នកនយោបាយវ័យក្មេងទៅកាន់ប្រទេសអូស្ត្រាលី ដើម្បីចែករំលែកបទពិសោធន៍ ក៏ដូចជាសិក្សាស្វែងយល់អំពីរបៀបរបបធ្វើការងាររបស់សភាជាន់ទាប និងសភាជាន់ខ្ពស់ និងការងាររបស់អង្គការសង្គមស៊ីវិល ជាមួយរដ្ឋាភិបាលអូស្ត្រាលីផងដែរ ហើយថា គំនិតផ្តួចផ្តើមដ៏មានសារៈសំខាន់នេះ ត្រូវបាន សម្តេចតេជោនាយករដ្ឋមន្ត្រី ស្វាគមន៍ និងគាំទ្រ។
ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអរគុណចំពោះការលើកឡើងរបស់ ឯកឧត្តម Pablo Chiho Kang ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសអូស្ត្រាលីប្រចាំកម្ពុជា និងសង្ឃឹមថា ទំនាក់ទំនងរវាងអូស្ត្រាលី និងកម្ពុជា កាន់តែមានភាពរឹងមាំ និងល្អប្រសើរឡើងថែមទៀត។
ឯកឧត្តមកិត្តិនីតិកោសលបណ្ឌិត ឧបនាយករដ្ឋមន្ត្រីប្រចាំការ បានមានប្រសាសន៍ថា កម្ពុជា និងអូស្ត្រាលីមានទំនាក់ទំនងយ៉ាងល្អប្រសើរទាំងវិស័យសេដ្ឋកិច្ច និងសង្គមកិច្ច ជាពិសេសអូស្ត្រាលីបានផ្តល់ជំនួយអភិវឌ្ឍន៍នានាជាបន្តបន្ទាប់មកដល់កម្ពុជា។ ឯកឧត្តមកិត្តិនីតិកោសលបណ្ឌិត ក៏បានថ្លែងអំណរគុណដល់រដ្ឋាភិបាលប្រទេសអូស្ត្រាលីផងដែរ និងបានបញ្ជាក់ថា ប្រទេសអូស្រ្តាលី គឺជាប្រទេសផ្តល់ជំនួយចំណាត់ថ្នាក់លេខ៣ដល់ អ.វ.ត.ក។
ឯកឧត្តមកិត្តិនីតិកោសលបណ្ឌិត បានមានប្រសាសន៍បន្ថែមថា រហូតមកដល់ពេលនេះ អ.វ.ត.ក សម្រេចបានសមិទ្ធិផលទាំងផ្នែកតុលាការ និងមិនមែនផ្នែកតុលាការយ៉ាងច្រើន ហេតុនេះឯកឧត្តមកិត្តិនីតិកោសលបណ្ឌិត ប៊ិន ឈិន ក៏បានសំនូមពរស្នើសុំរដ្ឋាភិបាលអូស្ត្រាលីសូមបន្តជួយឧបត្ថម្ភគាំទ្រដល់ អ.វ.ត.ក បន្តទៀត ។
ជាចុងបញ្ចប់នៃជំនួបពិភាក្សា ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋ មន្ត្រីប្រចាំការ សង្ឃឹម និងជឿជាក់ថា ទំនាក់ទំនងរវាងកម្ពុជា និងអូស្ត្រាលីកាន់តែមានភាពល្អប្រសើរថែមទៀត និងបានជូនពរដល់ឯកឧត្តមឯកអគ្គរដ្ឋទូត Pablo Chiho Kang សូមបន្តបេសកកម្មការងារការទូតនៅក្នុងប្រទេសកម្ពុជាឱ្យទទួលបានជោគជ័យគ្រប់ភារកិច្ច៕
