ឯកឧត្តមកិត្តិនីតិកោសលបណ្ឌិត ប៊ិន ឈិន អញ្ជើញជាអធិបតីក្នុងពីធីសម្ពោធឆ្លង ដាក់ឲ្យប្រើប្រាស់ជាផ្លូវការ សាលាពុទ្ធិកបឋមសិក្សានិងសមិទ្ធិផលនានា ក្នុងវត្តស្វាយសុខោ សង្កាត់ជើងទឹក ក្រុងព្រៃវែង ខេត្តព្រៃវែង

45

សាលាពុទ្ធិកបឋមសិក្សា និងមិទ្ធិផលនានា ក្នុងវត្តទួលព្រេជ (ហៅវត្តស្វាយសុខោ) ដែលទើបបានស្ថាបនាហើយរួចរាល់ជាស្ថាពរ ស្ថិតនៅក្នុងភូមិស្វាយសុខោ សង្កាត់ជើងទឹក ក្រុងព្រៃវែង ខេត្តព្រៃវែង បានសម្ពោធឆ្លងដាក់ឲ្យប្រើប្រាស់ជាផ្លូវការ នៅព្រឹកថ្ងៃអាទិត្យ ២កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែមករា ឆ្នាំ២០២០ ក្រោមអធិបតីភាព ឯកឧត្តមកិត្តិ​នីតិកោសល​បណ្ឌិត ប៊ិន ឈិន ឧបនាយករដ្ឋ​មន្រ្តី​ប្រចាំការ ​រដ្ឋមន្ត្រី​ទទួល​បន្ទុក​ទីស្តី​ការគណៈរដ្ឋមន្ត្រី

តាមរបាយការណ៍របស់អភិបាលនៃគណៈអភិបាលក្រុងព្រៃវែង បានឲ្យដឹងថា  សមិទ្ធិផលដែលព្រះចៅអធិការ អាចារ្យ គណៈកម្មការ សហគមន៍ ពុទ្ធបរិស័ទ សប្បុរសជនគ្រប់ជំនាន់បាន កសាងនិងត្រូវដាក់សម្ពោធនាថ្ងៃនេះ រួមមានៈ សាលាពុទ្ធិកបឋមសិក្សា (៧,៥មx១៣ម) ១ខ្នង, សា​លាសំណាក់ (៦មx៩ម)  ១ខ្នង,  ចាក់សាបក្នុងទីធ្លាវត្តទំហំ ១.៦៧៩ម រូបសំណាក បង្គោល និងអំពូលភ្លើងប្រើពន្លឺព្រះអាទិត្យ ព្រមទាំងសមិទ្ធិផលមួយចំនួនទៀត គិតជាថវិកាចំណាយអស់ជាង ៤៧៦លានរៀល និងប្រាក់ដុល្លាចំនួន៨ពាន់១៨០ដុល្លាអាមេរិក

​នៅក្នុងឱកាសនេះ ឯកឧត្តមកិត្តិ​នីតិកោសលបណ្ឌិត ប៊ិន ឈិន បានមាន​ប្រសាសន៍​ថា ថ្ងៃនេះជាថ្ងៃប្រកប​ដោយ​សេចក្តីសោមនស្សរីករាយ ដោយឯកឧត្តម បានចូលរួមក្នុងពិធី​សម្ពោធ​ដាក់​ឲ្យប្រើប្រាស់​នូវ​សាលាពុទ្ធិកបឋមសិក្សា និងសមិទ្ធិ​ផលនានា នៅវត្តស្វាយសុខោ ក្នុងភូមិស្វាយសុខោ​ សង្កាត់​​ជើងទឹក ក្រុងព្រៃវែង ខេត្តព្រៃវែង ជាមួយ​ព្រះថេរានុត្ថេរៈ ពុទ្ធបរិស័ទចំណុះជើងវត្ត និងពុទ្ធសាសនិក​ជិតឆ្ងាយ ដែលបានអញ្ជើញចូលរួម​ក្នុងពិធី​​សម្ពោធ​ដាក់ឲ្យប្រើប្រាស់សមិទ្ធិផលជាច្រើន​នៅក្នុងវត្ត​ស្វាយសុខោ សម្រាប់​ជា​ប្រយោជន៍រួមដល់ពុទ្ធបរិស័ទ​ជិត​ឆ្ងាយ សិស្សានុសិស្ស និងព្រះសង្ឃ។

ឯកឧត្តមកិត្តិ​នីតិកោសលបណ្ឌិត ឧបនាយក​រដ្ឋ​មន្ត្រី​ប្រចាំការ បានមានប្រសាសន៍បញ្ជាក់ថា រាជ រដ្ឋាភិបាល​ដែល​មានសម្តេចអគ្គមហាសេនាបតីតេជោ ហ៊ុន សែន ជាប្រមុខ​ដឹកនាំដ៏ឈ្លាសវៃប្រកបដោយកិត្តិបណ្ឌិត តែងតែយក​ចិត្តទុកដាក់កសាងសមិទ្ធផលនានាសម្រាប់​បំរើ​ឲ្យវិស័យ​ពុទ្ធចក្រ​យ៉ាងច្រើន​សម្រាប់​ប្រជាពលរដ្ឋប្រារព្វ​ធ្វើបុណ្យទានតាមប្រពៃណីព្រះពុទ្ធសាសនា។ សាលាពុទ្ធិកបឋមសិក្សាត្រូវបានបង្កើតឡើងនៅតាមបណ្តាវត្តអារាម មាន​តួនាទី​យ៉ាងសំខាន់សម្រាប់ ​បណ្តុះបណ្តាលធន​ធានព្រះសង្ឃ តាំង​ពីបុរាណកាលរហូតដល់បច្ចុប្បន្នកាល ព្រោះ​នៅ​ក្នុងបរិវេណនៃវត្តអារាម ​ភាគច្រើននៅ​ទូទាំង​​ប្រទេស យើងសង្កេតឃើញមានសាលារៀន ជាពិសេសសាលាពុទ្ធិកសិក្សាហើយសមិទ្ធិផលថ្មី​ស្រឡាង​នេះ ជាសមិទ្ធិ​ផលមួយបន្ថែមទៀត​ ក្នុងចំណោមសមិទ្ធិផលជាច្រើន ក្នុងក្រុងព្រៃវែង ក៍ដូចសមិទ្ធិផលជាច្រើនដែល​រដ្ឋាភិបាល បាន​កសាងឡើង​នៅទូទាំងខេត្តព្រៃវែង សម្រាប់សម្រាប់វិស័យព្រះពុទ្ធសាសនា។

ផ្តើមចេញពីសន្តិភាពនិងក្រោមម្លប់ដ៏ត្រជាក់នៃព្រះធម៌ ប្រទេសជាតិយើងទាំងមូល បាននឹងកំពុងស្ថិត​ក្នុងស្ថាន​ភាព​មួយផ្តល់ឱកាសយ៉ាង​ទូលំ​ទូលាយដល់កាអភិវឌ្ឍន៍ប្រទេសជាតិលើគ្រប់​វិស័យ រួមទាំងវិស័យ​ព្រះពុទ្ធសាសនាផង លទ្ធផលនេះគឺពិតជាកើតឡើងពីគំនិតដ៏ឈ្លាសវៃរបស់  សម្តេចអគ្គមហាសេនាបតីតេជោ ហ៊ុន សែន ក្រោម​នយោបាយឈ្នះ ឈ្នះ ដែលរហូតមកទល់ពេលនេះប្រទេសជាតិយើងបានទទួលសន្តិភាព២២ឆ្នាំមកហើយ។

ឯកឧត្តមកិត្តិ​នីតិ​កោស​លបណ្ឌិត ប៊ិន ឈិន បានកោតសរសើរ និង​វាយ​តម្លៃខ្ពស់ ចំពោះព្រះចៅអធិការវត្ត លោកអាចារ្យ គណៈកម្មការវត្ត ឯកឧត្តមលោកជំទាវ​ អស់លោក លោកស្រី និងសប្បុរស​ជន​ទាំងអស់ ដែល​បានរួមចំណែកផ្តល់វិភាគទាន​ដល់ការ​កសាង​នូវសមិទ្ធិផល​នានាជា​ច្រើននៅក្នុង​ទីអារាមនេះ ដើម្បីបំពេញតម្រូវការរបស់ព្រះសង្ឃ និងពុទ្ធបរិស័ទតាម​គន្លង​ព្រះពុទ្ធ​សាសនា។                                                                           ​​​​​​​​​​   ​​

នៅក្នុងឱកាសនេះ ឯកឧត្តមកិត្តិ​នីតិកោសលបណ្ឌិត ប៊ិន ឈិន បានអញ្ជើញបំពាក់មេដាយប្រគេនដល់​ចៅអធិការវត្ត មន្ត្រីរាជការ សប្បុរសជននិងពុទ្ធបរិស័ទ ដែលមានស្នាដៃ ក្នុងការចូលរួមចំណែកកសាងនូវសមិទ្ធិផលនានាក្នុង​វត្តស្វាយសុខោ រួមនិងសមិទ្ធិផលសង្គមជាតិជាច្រើនទៀតនាពេលកន្លងមក  និងបានអញ្ជើញជួបសំណេះសំណាលជាមួយព្រះសង្ឃគង់សិក្សារៀនសូត្រនៅក្នុងសាលាពុទ្ធិកបឋមសិក្សា និងទស្សនាសមិទ្ធិផលនានា ក្នុងវត្តស្វាយសុខោ ផងដែរ៕