ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ និងជារដ្ឋមន្ត្រីទទួលបន្ទុក ទីស្តីការគណៈរដ្ឋមន្ត្រីទទួលជួបជាមួយឯកអគ្គរដ្ឋទូតអូស្ត្រាលីប្រចាំកម្ពុជាដែលនឹងត្រូវចប់អាណត្តិបេសកកម្មការទូត ដើម្បីសម្តែងការគួរសម និងជម្រាបលា

81

នៅ​ព្រឹក​ថ្ងៃទី​២៦ ខែ​វិច្ឆិកា ឆ្នាំ​២០១៩នេះ នៅ​ទី​ស្តីការ​គណៈរដ្ឋមន្ត្រី​ ឯកឧត្តម​​កិត្តិនីតិកោសល​បណ្ឌិត ប៊ិន​ ឈិន ឧបនាយករដ្ឋមន្ត្រី​ប្រចាំ​ការ និង​ជា​រដ្ឋ​មន្ត្រី​ទទួលបន្ទុក​ទី​ស្តី​ការ​គណៈរដ្ឋមន្ត្រី បាន​អនុញ្ញាត​ឱ្យ​លោកជំ​ទាវ​ Angela Corcoran ​​ឯកអគ្គ​រដ្ឋ​ទូត​វិសាមញ្ញ និង​ពេញ​សមត្ថភាព​នៃប្រទេស​អូស្ត្រា​លី​ប្រចាំ​​កម្ពុជាដែល​នឹង​ត្រូវ​ចប់​អាណត្តិ​បេសកកម្ម​ការទូត​ ចូល​ជួប​​សម្តែង​ការ​គួរសម​និង​ជម្រាប​លា​​។

ឯកឧត្តមកិត្តិនីតិ​កោសលបណ្ឌិត​​ឧបនាយករដ្ឋមន្ត្រី​ប្រចាំ​ការ​ ប៊ិន ឈិន បាន​សម្តែង​នូវ​ការ​សោក​ស្តាយ​ដែល​លោកជំ​ទាវ​ឯកអគ្គ​រដ្ឋទូត​ត្រូវ​ចប់​អាណត្តិ​ការងារ​ការទូតនៅ​កម្ពុជា ប៉ុន្តែឯកឧត្តម​ឧបនាយករដ្ឋមន្ត្រី​ប្រចាំ​ការ​ក៏បាន​ថ្លែង​អំ​ណរ​គុណ​ដល់​រដ្ឋាភិបាល​អូស្ត្រា​លី​​ដែលមាននូវ​ទំ​នាក់​ទំ​នង​ការទូត​ និង​​កិច្ច​សហប្រតិបត្តិការ​ដ៏ល្អ​ជា​មួយ​កម្ពុជានាពេល​កន្លង​មក​។ ឯកឧត្តមកិត្តិនីតិកោសល​បណ្ឌិត​​ឧប​នាយ​ករដ្ឋមន្ត្រី​បាន​មានប្រសាសន៍បន្ថែម​ថា រដ្ឋាភិបាល​អូស្ត្រាលី​ ​គឺជា​ប្រទេស​ដែល​ដែល​គាំ​ទ្រ​ឱ្យ​មាន​ អ.វ.ត.ក ឬ​ហៅ​កាត់​ថា សាលាក្តី​ខ្មែរក្រហម​ និង​ជា​ប្រទេស​ផ្តល់​ជំ​នួយ​ចំ​ណាត់​ថ្នាក់​ទី​៣ បន្ទាប់​ពីជប៉ុន​និង​រាជ    ​រដ្ឋាភិបាល​កម្ពុជា​។ ជា​មួយ​គ្នា​នេះ​ ឯកឧត្តម​ឧបនាយករដ្ឋមន្ត្រី​ប្រចាំ​ការ ប៊ិន ឈិន ក៏បាន​យល់​ស្រប​ទៅ​នឹង​ការ​វាយតម្លៃខ្ពស់​របស់​លោកជំ​ទាវ​ ​ Angela Corcoran ឯកអគ្គ​រដ្ឋ​ទូត​អូស្រ្តាលី ដែល​បាន​ចាត់​ទុក​កិច្ច​ខិត​ខំ​ប្រឹង​ប្រែង​របស់​ អ.វ.ត.ក ដែល​សម្រេច​បាន​នូវ​សមិទ្ធផល​ទាំង​ផ្នែក​តុ​លាការ  និង​មិន​មែន​ផ្នែក​តុលាការ​ជាច្រើន​ ថា អ.វ.ត.ក បាន​បន្សល់​ទុកនូវ​កេរដំ​ណែល​ដ៏ល្អ​នៅ​ក្នុង​សង្គម​កម្ពុជា និង​ក៏បាន​ចូលរួមពង្រឹង​នីតិរដ្ឋ​តាម​រយៈការ​បង្កើត​ឱ្យមាន​ឡើង​នូវ​គំ​រូ​នៃ​ការដំ​ណើរការ​ជំ​នុំ​ជម្រះ​ក្តី​ដោយ​យុត្តិធម៌​ និង​បើក​ទូលាយ​ស្រប​តាម​ស្តង់​ដារអន្តរជាតិ​។

លោកជំ​ទាវ​​ Angela Corcoran ឯកអគ្គ​រដ្ឋ​ទូត​អូស្រ្តាលីប្រចាំ​កម្ពុជា​បានថ្លែង​ថា រវាង​កម្ពុជា​ និង​អូស្ត្រាលី​​​ទំ​នាក់​​ទំ​នង​យ៉ាង​ជិត​ស្និទ្ធ​លើ​វិស័យ​ជា​ច្រើន​ ដូចជា​កិច្ច​សហប្រតិបត្តិការ អភិវឌ្ឍ​ន៍ ការ​ប្រយុទ្ធប្រឆាំង​នឹង​បទ​ល្មើសនានាពាក់​ព័ន្ធ​នឹង​សន្តិសុខ​ក្នុង​តំ​បន់ ផ្នែក​ការពារជាតិ​ ក៏ដូច​ជាពាណិជ្ជកម្ម និង​ថែម​ទាំង​បាន​សម្រួល​ដល់​ការ​ផ្តល់​អាហាររូប​ករណ៍ដល់​និស្សិត​កម្ពុជា​ជាច្រើន ក្នុង​ការ​បន្តការ​សិក្សារៀនសូត្រ​នៅក្នុង​ប្រទេស​អូស្ត្រាលីផង​ដែរ​​។ លោកជំ​ទាវ​បានបន្ថែម​ថា ចាប់​តាំង​ពី​ឆ្នាំ​១៩៩៤មកដល់​បច្ចុប្បន្ន​ ប្រទេស​អូស្ត្រាលី​បាន​ផ្តល់​ជំ​នួយ​អភិវឌ្ឍ​ន៍មក​កម្ពុជា​ក្នុង​ទឹក​ប្រាក់​ចំ​នួន​១,៣ពាន់​លាន​ដុល្លារអូស្ត្រាលី​ ហើយគិត​ពី​ឆ្នាំ​២០០៣ មក​ដល់​ពេល​នេះ​ប្រទេស​អូស្រ្តាលីបាន​ផ្តល់ថវិកាគាំ​ទ្រ​​ដល់​សាលាក្តី​ខ្មែរក្រហមសរុប​ចំ​នួន​៣២,៥លាន​ដុល្លារអាម៉េរិក​ ក្នុង​នោះ​ថវិកាចំ​នួន២៨,៨លាន​ដុល្លារ​សម្រាប់​ភាគី​អន្តរជាតិ​នៃ​ អ.វ.ត.ក និង​ចំ​នួន​៣,៧លាន​ដុល្លារអាម៉េរិក​សម្រាប់​ភាគី​ជាតិ​នៃ​អ.វ.ត.ក។​ លោកជំ​ទាវ​បាន​មានប្រសាសន៍ថា អ.វ.ត.ក បាន​និងកំ​ពុង​ចូល​រួម​ក្នុង​ការ​ផ្សះ​ផ្សាជាតិ​ ការ​ចងចាំ​ ហើយក៏ក្លាយជាយន្តការបង្ការក្នុងការ​ទប់​ស្កាត់​ការវិល​ត្រឡប់​មក​វិញ​នៃ​របបឧក្រិដ្ឋកម្ម​ដ៏ឃោរឃៅ​ខ្មែរក្រហម​នេះ​កុំ​ឱ្យ​កើត​មាន​ឡើង​សាជា​ថ្មី​នៅ​លើ​ទឹក​ដីកម្ពុជា​។

ឯកឧត្តម​កិត្តិនីតិកោសលបណ្ឌិត ប៊ិន ឈិន ​ឧបនាយករដ្ឋមន្ត្រីប្រចាំ​ការ​ និង​ជា​រដ្ឋ​មន្ត្រី​ទទួល​បន្ទុក       ​ទីស្តីការ​គណៈរដ្ឋមន្ត្រី​ ក៏បាន​ស្នើ​សុំ​ទៅ​លោកជំ​ទាវ​ឯកអគ្គ​រដ្ឋទូត​អូស្ត្រាលី​ដែលនឹង​បញ្ចប់​បេសកកម្ម​ការទូត​ ឱ្យ​ជម្រាប​ជូន​រដ្ឋាភិបាល​អូស្ត្រាលី ហើយ​នឹង​ឯកអគ្គ​រដ្ឋទូត​ថ្មី​ដែល​នឹង​មក​បំ​ពេញ​​បេសកកម្ម​នៅកម្ពុជា​ សូម​​បន្ត​ផ្តល់​ជំ​នួយគាំទ្រដល់​រាជ​រដ្ឋាភិបាល​កម្ពុជា​ទាំង​ផ្នែក​សេដ្ឋកិច្ច​ សន្តិសុខ ជា​ពិសេស​ដល់​អ.វ.ត.ក ឱ្យបញ្ចប់​ដំ​ណើរការ​របស់​ខ្លួន​ទៅ​ដោយ​រលូន​ និង​ប្រកប​ដោយ​ជោគ​ជ័យ​ និង​ក៏សំ​ណូម​ពរសូម​ឱ្យរដ្ឋាភិបាល​អូស្ត្រាលី​អាច​គិត​គូជួយ​ដល់​គម្រោង​មួយ​ចំ​នួន​ដល់​មជ្ឈមណ្ឌល​តម្កល់​ឯកសារ​ច្បាប់​នៃសាលាក្តី​ខ្មែរក្រហម​ LDC លើ​គម្រោង​ចំ​ណាយ​សម្រាប់​បំ​ពាក់​សម្ភារៈនានា ពាក់​ព័ន្ធ​នឹង​កេរដំ​ណែលរបស់​សាលាក្តី​ ក្នុងការ​គ្រប់​គ្រង និងថែរក្សា​ឯកសារ​ និង​គម្រោង​ជួយ​ដល់​ជន​រង​គ្រោះ​ផង​ដែរ។

ជា​ចុង​បញ្ចប់​នៃ​ជំ​នួប​ពិភាក្សា​ ឯកឧត្តម​កិត្តិនីតិកោសលបណ្ឌិត​ឧបនាយករដ្ឋមន្ត្រី​ ក៏បាន​ជូន​ពរដល់​លោកជំ​ទាវ Angela Corcoran សូម​បាន​ទទួល​ជោគ​ជ័យ​ការងារ​ថ្មី​បន្ថែម​ទៀត និង​ជួប​នូវ​សេចក្តី​សុខ​គ្រប់​ប្រការ​៕