ឯកឧត្តមនាយករដ្ឋមន្រ្តី ថងលូន ស៊ីស៊ូលីត
ឯកឧត្តម លោកជំទាវ អស់លោក លោកស្រី អ្នកសារព័ត៌មាន!
លើកកម្ពស់ភាពជាដៃគូយុទ្ធសាស្រ្តគ្រប់ជ្រុងជ្រោយ ជម្រុញទំនាក់ទំនងមានស្រាប់ ពង្រឹងទំនុកចិត្ត
ថ្ងៃនេះ ជាព្រឹត្តិការណ៍ប្រវត្តិសាស្រ្តក្នុងទំនាក់ទំនងរវាងសាធារណរដ្ឋប្រជាមានិតប្រជាធិបតេយ្យឡាវ ជាមួយនឹងព្រះរាជាណាចក្រកម្ពុជា។ អ្វីដែលយើងបានធ្វើនៅថ្ងៃនេះ ដំបូង ខ្ញុំគួរតែបញ្ជាក់ថា ភាគីទាំងពីរបានចុះហត្ថលេខាអម្បាញ់មិញទៅលើសេចក្តីថ្លែងការណ៍រួម ដែលក្នុងនោះមានការចែងអំពី ការលើកកម្ពស់ភាពជាដៃគូយុទ្ធសាស្រ្តគ្រប់ជ្រុងជ្រោយ រវាងប្រទេសទាំងពីរ ដែលចាត់ទុកថាជាសមិទ្ធផលដ៏សំខាន់ នៃទំនាក់ទំនងរវាងប្រទេសទាំងពីរ។ យើងបានប្រឹងប្រែងធ្វើការច្រើនហើយ ដើម្បីទទួលមរតកប្រវត្តិសាស្រ្ត ដែលដូនតានៃប្រទេសទាំងពីរបានបន្សល់ទុក ក្នុងឋានៈជាប្រទេសជិតខាងភូមិផងរបងជាមួយ និងប្រកបដោយមិត្តភាព។ ការលើកកម្ពស់ភាពជាដៃគូយុទ្ធសាស្រ្តគ្រប់ជ្រុងជ្រោយ អនុញ្ញាតឱ្យយើងជម្រុញបន្ថែមទៀតនូវទំនាក់ទំនងដែលមានស្រាប់ ហើយកាន់តែពង្រឹងនូវជំនឿទុកចិត្តរវាងប្រទេសទាំងពីរ។
រៀបចំសន្ធិសញ្ញាព្រំដែនកម្ពុជា-ឡាវ លើសមិទ្ធផលសម្រេចបាន ៨៦%, ដូរបង្គោលព្រំដែនចាស់/តូច
យើងបានពិភាក្សាគ្នាយ៉ាងច្រើនទៅលើបញ្ហាមួយចំនួន នៅក្នុងនោះ ក៏សូមបញ្ជាក់ជូនអ្នកសារព័ត៌មានឱ្យបានជ្រាប ទាក់ទងជាមួយនឹងបញ្ហាព្រំដែន នាយករដ្ឋមន្រ្តីទាំងពីរបានឯកភាពគ្នា ដើម្បីធ្វើការរៀបចំឱ្យមានសន្ធិសញ្ញាព្រំដែនកម្ពុជា-ឡាវ ពាក់ព័ន្ធទៅនឹងសមិទ្ធផលដែលយើងសម្រេចបាន ៨៦% រួចមកហើយ។ នេះជាកិច្ចការសំខាន់ណាស់ ដែលកាលមុននេះ ព្រំដែននៃប្រទេសទាំងពីរពុំមានភាពច្បាស់លាស់នោះទេ ក៏ប៉ុន្តែពេលនេះ ដោយសារយើងបានធ្វើកិច្ចការច្រើនហើយ យើងព្រមព្រៀងគ្នាឱ្យគណៈកម្មការព្រំដែន នៃប្រទេសទាំងពីរព្រៀងនូវសន្ធិសញ្ញា ដើម្បីទទួលយកនូវលទ្ធផល ៨៦%។ យើងក៏បានព្រមព្រៀងគ្នាផងដែរ អំពីការដូរបង្គោលព្រំដែន ដែលបង្គោលព្រំដែនបច្ចុប្បន្នរបស់យើងគឺនៅតូចណាស់ វាហាក់ដូចជាព្រំដីរវាងប្រជាជន និងប្រជាជន មិនសក្តិសមជាមួយនឹងបង្គោលសីមាព្រំដែនរដ្ឋនោះទេ។
គណៈកម្មការព្រំដែនប្រទេសទាំងពីរ គូសប្លង់បង្គោល មកឆ្លងថ្នាក់ដឹកនាំទាំងពីរ, ចំណាយពាក់កណ្តាលម្នាក់
នាយករដ្ឋមន្រ្តីទាំងពីរបានប្រគល់ភារកិច្ចដល់គណៈកម្មការព្រំដែន នៃប្រទេសទាំងពីរ ដើម្បីធ្វើការគូសជាប្លង់បង្គោល ដើម្បីមកឆ្លងជាមួយនឹងថ្នាក់ដឹកនាំនៃប្រទេសទាំងពីរ ហើយក៏ព្រមព្រៀងគ្នាដើម្បីចែកនូវការចំណាយពាក់កណ្ដាលម្នាក់ នៃការផលិតបង្គោលដើម្បីជំនួសឱ្យបង្គោលចាស់ ដែលបានបោះ(ពីមុន)។ ក្រៅពីនោះ ដោយសារតែបង្គោលព្រំដែនរបស់យើងវាមានចំនួនតិច យើងក៏បានព្រមព្រៀងគ្នាដើម្បីឱ្យសិក្សាថាយើងអាចបោះបង្គោលបន្ថែមប៉ុន្មានបង្គោលទៀត? ក៏មានការព្រមព្រៀងគ្នាអំពីបញ្ហានេះ ព្រោះកន្លងទៅព្រំដែនរាប់រយគីឡូម៉ែត្រ បោះបានត្រឹមតែ ១២១ បង្គោល តែប៉ុណ្ណោះ ដូច្នេះវាវែងឆ្ងាយណាស់ ត្រូវបោះបង្គោលបន្ថែម។ ប៉ុន្តែ បង្គោលទាំងនោះក៏ត្រូវតែស្របជាមួយនឹងបង្គោលដែលមានរួចមកហើយៗក៏ត្រូវបានឆ្លងកាត់នូវការយល់ព្រមពីថ្នាក់ដឹកនាំ នៃប្រទេសទាំងពីរ។
សម្រាប់បញ្ហាសេសសល់ ១៤% ទៀត នាយករដ្ឋមន្ត្រីទាំងពីរបានប្រគល់ភារកិច្ចឱ្យក្រសួងការបរទេស ក៏ដូចជាស្ថាប័នពាក់ព័ន្ធ ធ្វើការជាមួយគ្នាបន្តការដោះស្រាយ ហើយយើងមានសុទិដ្ឋិនិយមថា នឹងឈានរកការដោះស្រាយក្នុងពេលវេលាមួយសមស្រប ក្នុងស្មារតីមិត្តភាព និងសហប្រតិបត្តិការជិតខាងល្អ។
ចុះហត្ថលេខាទិញអគ្គិសនីពីឡាវ នាំដល់ការពង្រីកទំហំពាណិជ្ជកម្មកម្ពុជា-ឡាវ
ថ្ងៃនេះ ដូចដែលអស់លោក លោកស្រី អ្នកសារព័ត៌មានបានជ្រាប យើងក៏បានចុះហត្ថលេខាលើកិច្ចព្រមព្រៀងមួយចំនួន ដែលក្នុងនោះកម្ពុជាក៏បានក្លាយទៅជាទីផ្សារនាំចេញអគ្គិសនីរបស់ឡាវ ហើយឡាវក៏ក្លាយទៅជាទីកន្លែងនៃការផ្គត់ផ្គង់អគ្គិសនីឱ្យកម្ពុជា ដែលជាការបំពេញឱ្យគ្នាទៅវិញទៅមក។ យោងទៅលើអ្វីដែលបានចុះហត្ថលេខាថ្ងៃនេះ រួមជាមួយនឹងការចុះហត្ថលេខា ដែលមានពីមុន និងកំពុងតែផ្គត់ផ្គង់ ប្រភពអគ្គិសនីដែលយើងកំពុងទទួលពីឡាវមានទៅដល់ ៣១០០ មេហ្គាវ៉ាត់ឯណោះ។ ដូច្នេះជាទំហំមួយដ៏ធំ បើប្រៀបធៀបជាមួយនឹងប្រទេសកម្ពុជាកាលមុននេះ ទីក្រុងភ្នំពេញ និងទូទាំងប្រទេស ប្រើត្រឹមតែប្រមាណមិនដល់ ៤០ មេហ្គាវ៉ាត់នោះទេ។ ក៏ប៉ុន្តែ ឥឡូវនេះ កម្ពុជាបានឈានទៅទិញអគ្គិសនីពីឡាវ រហូតទៅដល់ ៣១០០ មេហ្គាវ៉ាត់ ដែលឡាវអាចចាត់ទុកថាជាប្រភេទទំនិញមួយ ដែលនាំចូលមកកាន់កម្ពុជា ដែលធ្វើឱ្យទំហំពាណិជ្ជកម្មរវាងប្រទេសទាំងពីរនឹងមានការកើនឡើងដោយឆាប់រហ័សបន្ទាប់ពីកិច្ចព្រមព្រៀងត្រូវបានអនុវត្តជាជំហានៗ។ ទំហំពាណិជ្ជកម្មដែលកម្ពុជានាំចូលអគ្គិសនីពីឡាវក៏នឹងមានការកើនឡើងផងដែរ។
បញ្ហាទេសចរណ៍ និងហោះហើរត្រង់
យើងក៏បានពិភាក្សាគ្នាលើបញ្ហាមួយចំនួនផ្សេងទៀត ដូចជា បញ្ហាទេសចរណ៍ ការហោះហើរត្រង់របស់ក្រុមហ៊ុនកម្ពុជា Angkor Air ក៏ដូចជាក្រុមហ៊ុនឡាវ ដែលទាក់ទងនឹងការហោះហើរត្រង់ ដើម្បីពង្រីកទំហំទេសចរណ៍រវាងប្រទេសទាំងពីរ។ ខ្ញុំគិតថា ខ្ញុំលើកប៉ុណ្ណេះសិន ហើយទុកឱកាសឱ្យឯកឧត្តមនាយករដ្ឋមន្រ្តី ថងលូន ធ្វើការផ្តល់ព័ត៌មានជូនចំពោះអស់លោក លោកស្រី។
នាយករដ្ឋមន្រ្តីឡាវ៖
… ការអញ្ជើញមកទស្សនកិច្ចជាផ្លូវការលើកនេះ ចាត់ទុកជានិមិត្តរូបល្អ។ យើងបានឯកភាពគ្នានូវការងារច្រើន ជាបញ្ហាយុទ្ធសាស្រ្ត ដល់ទំនាក់ទំនងល្អ និងកិច្ចសហប្រតិបត្តិការជាផ្លែផ្ការបស់ប្រទេសយើងទាំងពីរ ក៏ដូចជាប្រជាជនទាំងពីរ។ ថ្ងៃនេះ ខ្ញុំគាំទ្រចំពោះមតិថ្លែងរបស់សម្តេចតេជោ ខ្ញុំគិតថា ការបំពេញទស្សនកិច្ចគ្នាទៅវិញទៅមកនៅកម្រិតខ្ពស់របស់ប្រទេសយើង ចាត់ទុកថាជាប្រពៃណីល្អ យើងនឹងបន្តជម្រុញទំនាក់ទំនងនេះឱ្យបានល្អថែមទៀត។
ខ្ញុំឯកភាពទៅលើសម្តេចតេជោ ហ៊ុន សែន ថា យើងបានពិភាក្សាគ្នាដោះស្រាយបញ្ហាព្រំដែនឱ្យចេញផ្លែផ្កា មានជំហានឈានទៅមុខ។ សំខាន់បំផុតគឺនាយករដ្ឋមន្រ្តីទាំងពីរ ៨៦% ដែលយើងបានកំណត់ខ្សែព្រំដែនជាមួយគ្នានៅពេលកន្លងមកនេះ យើងនឹងធ្វើឱ្យមានបង្គោលសីមាព្រំដែនល្អ បង្គោលណាមិនទាន់បានបោះ ក៏ត្រូវឱ្យមានការគូសជាប្លង់បង្គោលឱ្យធំជាងមុន ដើម្បីជាបង្គោលស្អាត និងល្អជាងនេះ។ ខ្ញុំស្នើឱ្យភាគីកម្ពុជាជាអ្នកគូសប្លង់ ដើម្បីឱ្យនាយករដ្ឋមន្រ្តីទាំងពីរទទួលយកបាន។ ចំណាយគឺយើងបែងចែកគ្នាពាក់កណ្តាល។ នេះជាការសម្រេចចិត្តដ៏មានសារសំខាន់ណាស់ ព្រោះយើងបានធ្វើការជាច្រើនឆ្នាំមកហើយ ចំពោះការដោះស្រាយបញ្ហាព្រំដែន ហើយកំណត់បាន ៨៦% យើងចាត់ទុកថា ជាជ័យជម្នះរបស់យើងក្នុងការសហការគ្នា។ ចំពោះចំណុចដែលនៅសេសសល់ នាយករដ្ឋមន្ត្រីទាំងបានឱ្យគណៈកម្មការចម្រុះព្រំដែនឡាវ-កម្ពុជា ក៏ដូចជាក្រសួងការបរទេសកម្ពុជាសហការដោះស្រាយជាមួយគ្នា។ ខ្ញុំមានជំនឿជឿជាក់ថា នឹងដោះស្រាយបញ្ហាបាន ដោយសារយើងមានមូលដ្ឋាននៃទំនាក់ទំនងល្អជាមួយគ្នា។
អ្វីៗសំខាន់បំផុតគឺ ខ្ញុំឯកភាពចំពោះសម្តេចតេជោ ហ៊ុន សែន ថា លើកនេះយើងបានចុះហត្ថលេខាលើសេចក្តីថ្លែងការណ៍រួម ដើម្បីលើកកម្ពស់ទំនាក់ទំនង ឱ្យទៅជាភាពជាដៃគូយុទ្ធសាស្រ្តគ្រប់ជ្រុងជ្រោយ គង់វង្ស និងយូរអង្វែង ជាដៃគូយុទ្ធសាស្រ្ត មានទំនុកទុកចិត្តជាមួយគ្នា សហការគ្នាអភិវឌ្ឍប្រទេសជាតិ បង្កើតភាពសុខដុមរមនារវាងប្រជាជន និងប្រទេសជាតិយើង។
ក្រៅពីនោះក៏មានការចុះហត្ថលេខាឯកសារផ្សេងៗ។ ការចុះហត្ថលេខាជាមួយគ្នាលើកនេះ គឺជាការផ្តល់នូវទំនុកទុកចិត្តជាមួយគ្នា ហើយតទៅទៀត យើងនឹងមានសហការជាមួយគ្នារវាងរដ្ឋាភិបាល និងប្រជាជនប្រទេសយើងទាំងពីរថែមទៀត។
ខ្ញុំ និងគណៈប្រតិភូឡាវ មានសេចក្តីរីករាយ ដែលសម្តេចតេជោ ហ៊ុន សែន និងរដ្ឋាភិបាលកម្ពុជាបានសម្រេចចិត្តទិញអគ្គិសនីពីប្រទេសឡាវ ចំនួនជាង ៣០០០ មេហ្គាវ៉ាត់ ចាប់ពីឥឡូវដល់ឆ្នាំ ២០៣០។ នេះគឺជាការបំពេញបន្ថែមគ្នាទៅវិញទៅមក។ ដូចសម្តេចតេជោ បានលើកឡើង កម្ពុជានឹងមានអគ្គិសនីយកមកប្រើប្រាស់ក្នុងការអភិវឌ្ឍ ហើយខាងឡាវ យើងក៏មានចំណូលពីការលក់អគ្គិសនីមកកម្ពុជា ដើម្បីយកមកអភិវឌ្ឍប្រទេសជាតិ ក៏ដូចជាជីវភាពរស់នៅរបស់ប្រទេសយើង។ ខ្ញុំគិតថា នៅក្នុងពេលបច្ចុប្បន្ននេះ យើងមានការធ្វើពាណិជ្ជកម្មជាមួយគ្នាជាង ១៦ លានដុល្លារសហរដ្ឋអាមេរិកតែប៉ុណ្ណោះ។ ក៏ប៉ុន្តែក្រោយសម្តេចតេជោ បានទទួលទិញអគ្គិសនីនៅឡាវ ខ្ញុំគិតថា ខាងការងារសហការខាងពាណិជ្ជកម្មយើងនឹងមានថ្លៃខ្ពស់ថែមទៀត។ ចំនួនពាណិជ្ជកម្មគឺយើងនឹងមានទឹកប្រាក់កាន់តែច្រើនថែមទៀត ហើយសង្ឃឹមថា យើងនឹងសហការអភិវឌ្ឍតាមស្មារតីដែលយើងទាំងពីរបានឯកភាពគ្នា។
ក្រៅពីពីនោះ យើងក៏បានពិភាក្សាជម្រុញឱ្យប្រជាជនទៅមករកគ្នា ហើយជម្រុញទេសចរណ៍ ខាងការងារពលកម្ម ការងារខាងផ្លាស់ប្តូរវប្បធម៌ និងជម្រុញការងារទេសចរណ៍ ក៏ដូចជាថ្នាក់មូលដ្ឋានឱ្យមានការជួបគ្នា។ មូលដ្ឋានមានបញ្ហាអ្វីកើតឡើង ឱ្យពិភាក្សាគ្នា និងជួយគ្នាទៅវិញទៅមក ដោះស្រាយបញ្ហានេះកម្រិតថ្នាក់មូលដ្ឋាន។ ចំណុចណាដែលតំបន់ដោះស្រាយមិនបាន ក៏ស្នើឱ្យថ្នាក់ជាតិដោះស្រាយ។ តទៅទៀតនេះ ខ្ញុំសង្ឃឹមថា ថ្នាក់មូលដ្ឋានក៏អាចដោះស្រាយបញ្ហាជាមួយគ្នាបាន ដោយសាររដ្ឋាភិបាលយើងទាំងពីរបានឯកភាពគ្នាថា នឹងចាប់ដៃគ្នា សាមគ្គីគ្នា និងមានចិត្តជាធ្លុងមួយ ដើម្បីអភិវឌ្ឍប្រទេសជាតិយើង ក៏ដូចជាប្រជាជនយើងទាំងពីរមានជីវភាពរស់នៅល្អ ហើយយើងក៏មានទំនៀមទម្លាប់ ប្រពៃណីល្អ។ អញ្ចឹងជាការល្អដើម្បីឱ្យកូនចៅយើងបន្តវេននូវទំនាក់ទំនងល្អរវាងប្រទេសយើងទាំងពីរ។
ក្នុងឱកាសនេះ ក៏សូមថ្លែងអំណរគុណសម្តេចតេជោ ហ៊ុន សែន ដែលបានឯកភាព និងការសម្រេចចិត្តជាមួយ នៅក្នុងដំណើរទស្សនកិច្ចលើកនេះ។
សូមលោកបណ្ឌិតទៅរៀនពីគោលការណ៍មិនជ្រៀតជ្រែកកិច្ចការផ្ទៃក្នុងគ្នារបស់អាស៊ានឱ្យបានច្រើន
សូមអរគុណឯកឧត្តមនាយករដ្ឋមន្រ្តី ថងលូន។ ខ្ញុំគួរតែយកឱកាសនេះ ដើម្បីបញ្ជាក់បន្តិច ខ្ញុំមិនមានបំណងណាមួយដើម្បីយកបញ្ហាផ្ទៃក្នុងរបស់កម្ពុជាមកនិយាយនឹងភ្ញៀវបរទេសនោះទេ។ ក៏ប៉ុន្តែ ដោយសារតែរយៈពេលកន្លងទៅ មានបណ្ឌិតអ្នកវិភាគម្នាក់បានលើកឡើងថា ទស្សនកិច្ចរបស់ទេសរដ្ឋមន្រ្តី និងរដ្ឋមន្រ្តីការបរទេស ប្រាក់ សុខុន ទៅកាន់សាធារណរដ្ឋប្រជាមានិតប្រជាធិបតេយ្យឡាវ គឺច្បាស់ជាស្វះស្វែងដើម្បីឱ្យឡាវធានាថា កុំឱ្យពួករត់ចោលគុក ហើយដែលកំពុងនៅទីក្រុងប៉ារីស ត្រៀមចូលមកក្នុងប្រទេសវិញតាមច្រកឡាវ ដែលឡាវចាត់ទុកថា ជាផ្នែកដ៏សំខាន់មួយដែលចាប់កម្ពុជាធ្វើជាចំណាប់ខ្មាំង បើសិនជាកម្ពុជាមិនព្រមទេ គឺឡាវនឹងផ្តល់ឱកាសឱ្យអ្នករត់ចោលគុក ហើយត្រៀមចូលស្រុកដើម្បីប្រើប្រាស់ដីឡាវ។ ខ្ញុំសូមផ្តាំទៅលោកបណ្ឌិតឱ្យបានជ្រាប សារព័ត៌មានដែលបានសម្ភាសន៍ជាមួយលោកបណ្ឌិត ត្រូវបានបញ្ជូនមកខ្ញុំ ត្រង់សារព័ត៌មាននោះបានចុះផ្សាយ ឬមិនចុះផ្សាយ គឺជារឿងសារព័ត៌មានទេ ប៉ុន្តែ ខ្ញុំមិនចង់ឱ្យលោកបណ្ឌិតមានការខុសឆ្គងតទៅទៀត ជាមួយឥរិយាបទរបស់ឡាវ ឬជាមួយឥរិយាបទរបស់ថៃ ឬឥរិយាបទរបស់វៀតណាម ឬឥរិយាបទនៅក្នុងចំណោមប្រទេសអាស៊ាននោះទេ។ សុំទោសចំពោះលោកបណ្ឌិត លោកបណ្ឌិតគួរទៅរៀនឱ្យបានច្រើនបន្តិច អំពីទំនាក់ទំនងរវាងប្រទេស និងប្រទេស ហើយលោកបណ្ឌិត គួរទៅរៀនឱ្យបានច្រើនបន្តិចអំពីគោលការណ៍អាស៊ាន ស្តីពីការមិនជ្រៀតជ្រែកចូលកិច្ចការផ្ទៃក្នុងផងគ្នា។
ទាំងអាស៊ាន ទាំងឡាវ មិនអនុញ្ញាតឱ្យប្រើដីរបស់ខ្លួនប្រឆាំងនឹងកម្ពុជា ឬប្រទេសជិតខាងដទៃទៀតដាច់ខាត
កម្ពុជា និងឡាវ មានទំនាក់ទំនងគ្នាល្អណាស់ ហើយខ្ញុំចង់ឱ្យឯកឧត្តម ថងលូន ស៊ីស៊ូលីត បញ្ជាក់បន្តិចចំពោះអ្នកសារព័ត៌មានរបស់យើង និងទៅកាន់បណ្ឌិតកម្ពុជាម្នាក់ ព្រោះគេនឹងចាត់ទុកថា ក្រុមនោះនឹងអាចប្រើប្រាស់ដីឡាវ ដើម្បីចូលមកកម្ពុជា។ ខ្ញុំចង់ឱ្យឯកឧត្តមនាយករដ្ឋមន្រ្តីបញ្ជាក់ទៅពួកគេអំពីគោលការណ៍អាស៊ាន និងគោលការណ៍របស់ឡាវ ដែលមិនអនុញ្ញាតឱ្យប្រើប្រាស់ទឹកដីរបស់ខ្លួនប្រឆាំងនឹងប្រទេសកម្ពុជា ឬប្រឆាំងនឹងប្រទេសជិតខាង។ ខ្ញុំក៏សូមបញ្ជាក់ជូនដែរថា មិនមែនគ្រាន់តែឡាវទេ ទាំងថៃ រដ្ឋាភិបាលថៃបានទទួលរួចមកហើយ នូវសាលដីកាតុលាការដើម្បីចាប់ខ្លួនជនណាដែលមានសាលដីកាតុលាការ។ យើងក៏នឹងបញ្ជូននូវសាលដីកាតុលាការនោះទៅកាន់ប្រទេសទាំងអស់នៅក្នុងក្របខណ្ឌអាស៊ានរបស់យើង។ បើអញ្ចឹងសូមអញ្ជើញធ្វើតាមចំណង់របស់ខ្លួនទៅចុះ ប៉ុន្តែ អ្វីដែលខ្ញុំសោកស្ដាយគឺនៅត្រង់ថា បណ្ឌិតម្នាក់ប្រើប្រាស់ការវិភាគមួយទៅជាឡាវចាប់កម្ពុជាធ្វើចំណាប់ខ្មាំង បើសិនមិនព្រមធ្វើតាមឡាវទេ គឺនឹងប្រគល់ដីឱ្យក្រុមប្រឆាំងធ្វើសកម្មភាពចេញពីឡាវចូលមកកម្ពុជា។ ឥឡូវសូមឯកឧត្តមនាយករដ្ឋមន្រ្តីឆ្លើយប្រាប់គេបន្តិចអំពីគោលការណ៍នេះ។
នាយករដ្ឋមន្រ្តីឡាវ៖
… មានរឿងបែបនេះកើតឡើង មានចេញព័ត៌មានដូចនោះ ខ្ញុំបានបញ្ជាក់ថា បើសិនជាបុគ្គលណាដែលមានទោសមកឆ្លងប្រទេសឡាវ សញ្ជាតិណាក៏ដោយ (មកយក)ប្រទេសឡាវឆ្លងកាត់ ដើម្បីទៅបំផ្លាញប្រទេសផ្សេងនោះ យើងនឹងដំណើរការយ៉ាងហ្មត់ចត់ មិនឱ្យកើតបញ្ហានេះឡើង។ ដោយឡែក ចំពោះកម្ពុជាដែលជាមិត្តភក្តិ។ ហើយជនទាំងនោះ អានេះគឺមិនមានការបញ្ជាក់ដូចគេនិយាយទេ។ … នាយករដ្ឋមន្រ្តី ឧបនាយករដ្ឋមន្រ្តីឡាវ គឺបានពិភាក្សាដើម្បីរៀបចំនូវទស្សនកិច្ចរបស់ខ្ញុំ មុននឹងខ្ញុំមកទស្សនកិច្ចនៅកម្ពុជាលើកនេះ ចាត់ទុកថា ជាព័ត៌មានមិនល្អ បង្កើតភាពបំបែកដល់ប្រទេសកម្ពុជា និងឡាវ។ ខ្ញុំសូមផ្ញើទៅដល់បណ្ឌិតដែលសម្តេចតេជោ បានលើកឡើងអម្បាញ់មិញនេះ កុំយកបញ្ហានេះមកធ្វើឱ្យទំនាក់ទំនងឡាវ និងកម្ពុជា មានការបាក់បែកគ្នា។ ព័ត៌មាននោះចេញមកបានយ៉ាងម៉េចដែរ? ខ្ញុំគិតថា នេះគឺជាការបំផ្លាញឈ្មោះរបស់បណ្ឌិតនោះតែម្នាក់មុននឹងគាត់ចេញព័ត៌មាននោះ ហើយជាការបង្កើតភាពបំបែកបំបាក់រវាងប្រជាជនឡាវ និងកម្ពុជា រវាងរដ្ឋាភិបាលឡាវ និងកម្ពុជាថែមទៀត។ ខ្ញុំសូមបញ្ជាក់ជូនសម្តេចតេជោប៉ុណ្ណេះ … សូមអរគុណ៕
