ប្រមុខរាជរដ្ឋាភិបាលកម្ពុជា អំពាវនាវឱ្យប្រជាពលរដ្ឋខ្មែរ ចូលរួមបណ្តុះគំនិត នៃការ ស្រឡាញ់ដើមឈើ ដាំដុះ ថែរក្សា និងការពារព្រៃឈើ

61

ភ្នំពេញ ថ្ងៃទី០៩ ខែកក្កដា ឆ្នាំ២០១៩ -ប្រមុខរាជរដ្ឋាភិបាលកម្ពុជា សម្ដេចអគ្គមហាសេនា​បតី​តេជោ ហ៊ុន សែន បានអំពាវនាវឱ្យ​ប្រ​ជាពលរដ្ឋខ្មែរទាំងអស់ ចូលរួមបណ្តុះគំនិត នៃការស្រឡាញ់ដើម​ឈើ ចូលរួមដាំដុះ ថែរក្សា​ការ​ពារព្រៃឈើ និងបរិស្ថានធម្មជាតិឱ្យបានគ្រប់ៗគ្នា ដើម្បីជាប្រយោជន៍​ដល់ការរស់នៅ​រប​ស់ ​ខ្លូនយើង សហគមន៍ និងជីវិតសត្វព្រៃគ្រប់ប្រភេទ ព្រមទាំងប្រព័ន្ធជីវចម្រុះផងដែរ។

នៅលើបណ្ដាញទំនាក់ទំនងសង្គមហ្វេសប៊ុក នាថ្ងៃទី០៩ ខែកក្កដា ឆ្នាំ២០១៩ សម្ដេច​តេ​ជោ​​បានសរសេរថា បុណ្យ«រុក្ខទិវា»បានបង្កើតឡើងនៅក្នុងឆ្នាំ១៩៥២ ក្រោមព្រះរាជកិច្ចដឹក​នាំ​របស់​ព្រះ​បរមរតនកោដ្ឋ ព្រះមហាវីរក្សត្រ ព្រះករុណា ព្រះបាទសម្តេចព្រះនរោត្តម សីហនុ ក្នុង​គោលបំណងបំផុសចលនាដាំដើមឈើឡើងវិញនិងការថែរក្សាសម្បត្ដិព្រៃឈើ ជាពិសេ​ស​​ ដើម្បីថែរក្សា ការពារ និងបណ្តុះគំនិតស្រឡាញ់ព្រៃឈើ និងបរិស្ថានធម្មជាតិ។ រុក្ខទិវា ឆ្នាំ ២០១៩នេះ ត្រូវប្រារព្ធធ្វើឡើងនៅក្នុងភូមិ ស្រែត្រែង ឃុំក្បាលដំរី ស្រុកសំបូរ ខេត្តក្រចេះ  ក្រោ​ម ​ព្រះរាជាធិបតីដ៏ខ្ពង់ខ្ពស់ ព្រះករុណាព្រះបាទ សម្តេច ព្រះបរមនាថ នរោត្តម សីហមុនី ព្រះ​ម​ហា​ក្សត្រ នៃព្រះរាជាណាចក្រកម្ពុជា។ សម្ដេចតេជោបានក៏សូមបងប្អូនប្រជាពល​រដ្ឋខ្មែ​រ ទាំង​អ​ស់​ ចូលរួមបណ្តុះគំនិត នៃការស្រឡាញ់ដើមឈើ ចូលរួមដាំដុះ ថែរក្សាការពារព្រៃឈើ និង​បរិ​ស្ថាន​​ធម្មជាតិឱ្យបានគ្រប់ៗគ្នា ដើម្បីជាប្រយោជន៍ ដល់ការរស់នៅរបស់ខ្លួនយើងផង សហគ​មន៍​​យើងផង និងជីវិតសត្វព្រៃគ្រប់ប្រភេទ ព្រមទាំងប្រព័ន្ធជីវចម្រុះផងដែរ។

សម្ដេចតេជោក៏សូមអរគុណដល់ក្រសួង មន្ទី​រ ស្ថាប័នពាក់ព័ន្ធ អាជ្ញាធរ និងសមត្ថកិច្ច គ្រប់លំដាប់ថ្នាក់ ព្រមទាំងសមាគម អង្គការជាតិ និ​ង​អន្តរ​ជាតិ ម្ចាស់ជំនួយ និងដៃគូអភិវឌ្ឍន៍ ព្រមទាំងបងប្អូនប្រជាពលរដ្ឋ ដែលបាន​ចូល​រួម​ថែរ​ក្សាការពារ និងដាំដុះដើមឈើកាន់តែច្រើន​ឡើងនៅទូទាំងប្រទេស៕

ដោយ ជឹម ណារី