ឯកសារចំនួនពីរ នឹងត្រូវចុះហត្ថលេខាក្នុងដំណើទស្សនកិច្ចការងាររបស់​ សម្ដេចតេជោនាយករដ្ឋមន្ត្រីទៅកាន់ប្រទេសជប៉ុន

91

ភ្នំពេញ ថ្ងៃទី២៨ ខែឧសភា ឆ្នាំ២០១៩ -ឯសារចំនួនពីរ  ស្តីពីការផ្តល់ជំនួយឥតសំណងរបស់ជប៉ុន សម្រាប់គម្រោងអភិវឌ្ឍ​ន៍​ប្រ​​ទេស កម្ពុជា ដែលក្នុងនោះមានការអនុវត្តកម្មវិធីអភិវឌ្ឍន៍សេដ្ឋកិច្ច និងសង្គម​ សាងសង់​ស្ថា​នី​​យ​កុងតឺន័រនៅកំពង់ផែ ខេត្តព្រះសីហនុ ដែលមានទឹកប្រាក់២០០លានយ៉េន និង​ការ​អនុ​វត្ត​គម្រោងអាហារូប​ករ​ណ៍​​អភិវឌ្ឍន៍ធនធានមនុស្ស ដែលមាន ទឹកប្រាក់​៣៣៩​លាន​​យ៉េ​ន។​ ​ ឯកសារទាំងនេះ នឹងត្រូវចុះហត្ថលេខា ក្នុងដំណើទស្សនកិច្ចការងារទៅកាន់ប្រទេស​ជប៉ុន របស់អគ្គមហា​សេ​នាបតី តេជោ ហ៊ុន សែ​ន​ នាយករដ្ឋមន្រ្តីនៃព្រះរាជាណាចក្រកម្ពុជា។

នាព្រឹកថ្ងៃទី ២៨ ខែឧសភា ឆ្នាំ២០១៩ ប្រមុខរាជរដ្ឋាភិបាលកម្ពុជា សម្ដេច​អគ្គ​មហា​សេ​នា​បតីតេជោ ហ៊ុន សែន បានដឹកនាំ គណៈប្រតិភូចាកចេញពីកម្ពុជា​ តាមជើងយន្ត​ហោះ​ពិ​សេ​ស  ដើម្បីបំពេញទស្សនកិច្ចការងារនៅប្រទេសជប៉ុន និងចូលរួម សន្និសីទ​អន្តរជាតិលើក​ទី​២​៥​ ​ស្តី​ពីអនាគត របស់អាស៊ី និងព្រឹត្តិការណ៍ជាច្រើនទៀត នៅទីក្រុងតូក្យូ ប្រទេសជប៉ុន ពីថ្ងៃ​ទី២៩ ដល់ថ្ងៃទី​៣១ ​​ខែឧសភាឆ្នាំ ២០១៩។ អញ្ជើញជូនដំណើរគណៈប្រតិភូជាន់ខ្ពស់ នៅ ឯព្រលានយន្តហោះ​អន្ត​រជាតិភ្នំពេញ មានវត្តមាន សម្ដេចក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រី​ក្រសួង​ម​ហាផ្ទៃ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី ក្រសួងការពារជាតិ និង​ឥ​ស្ស​រជនជាន់ខ្ពស់ក្នុងជួររាជរដ្ឋាភិបាលជាច្រើនរូបទៀត។

ឯកឧត្ដម ស្រ៊ី ថារង្គ រដ្ឋមន្ត្រី​ប្រតិភូ​អម​នាយករដ្ឋមន្ត្រី បានឱ្យដឹងថា គណៈប្រតិភូ ដែល អមដំណើរ   សម្តេ​ចតេជោ​នា​យ​ករដ្ឋមន្រ្តី រួម​មាន​ ឯកឧត្តម ប៉ាន សូរស័ក្តិ រដ្ឋមន្រ្តីក្រសួង ពាណិជ្ជកម្ម មន្រ្តីជាន់ខ្ពស់​នៃ​រាជ​រដ្ឋាភិបាល និង​ថ្នាក់ដឹកនាំ ធុរកិច្ច មួយចំនួននៃ​សភាពាណិជ្ជ​កម្មកម្ពុជា​។ នៅក្នុងសន្និ​សីទ​អន្តរ​ជាតិលើក​ទី​២​៥ សម្តេចតេជោនាយករដ្ឋមន្រ្តី នឹងថ្លែង​សុន្ទរក​ថាគន្លឹះលើមូលបទ​របស់​សន្និ​សីទ «ការ​ស្វែង​រកសណ្តាប់ធ្នាប់ពិភពលោកថ្មី-ការជម្នះ​ភាពវឹកវរ» ព្រមទាំងចែករំលែកទ​ស្សន​​វិស័យ លើ​បរិបទសកលលោកបច្ចុប្បន្ន ចក្ខុវិស័យនា​ពេលអនាគត មាគ៌ាឆ្ពោះទៅមុខ និ​ង​ការប្តេ​ជ្ញា​ចិ​ត្ត នឹងរួមចំណែករបស់ កម្ពុជា ក្នុងការលើក​កម្ពស់​ភាពសុខដុម សន្តិភាព និង​វិបុ​ល​ភាពរួម​នៅ​តំបន់អាស៊ី-ប៉ាស៊ីហ្វិក និងក្នុងពិភពលោក។ បន្ទាប់ពីអញ្ជើញចូលរួម​សន្និសី​ទ​នេះ​ សម្តេច​តេ​ជោនាយករដ្ឋមន្រ្តី នឹងមានជំនួបទ្វេ ភាគីជាមួយ ឯកឧត្តមនាយករដ្ឋមន្រ្តីជប៉ុន អាបេ ស៊ីនហ្សូ ដើ​ម្បីពិភាក្សាអំពីបញ្ហាទ្វេភាគី តំបន់ និងអន្តរជាតិ ដែលជាការយកចិត្តទុកដាក់រួម។ នា​ឱកា​ស​នេះ នាយករដ្ឋមន្រ្តីទាំងពីរ នឹង​អញ្ជើញជាសាក្សីក្នុងការ ចុះហត្ថលេខាលើលិខិត​ផ្លា​ស់​ប្តូរ​សា​រព្រមព្រៀង ស្តីពីការផ្តល់ជំនួយ​ឥតសំណងរបស់ ជប៉ុន សម្រាប់គម្រោង​អភិវឌ្ឍ​ន៍​ប្រ​ទេសកម្ពុជាចំនួន២ ដែលមានដូចជា ការអនុវត្តកម្មវិធីអភិវឌ្ឍន៍សេដ្ឋកិច្ច និងសង្គម​-សា​ង​សង់​ស្ថា​នីយកុងតឺន័រ ដែលមានទឹកប្រាក់ ២០០លានយ៉េនជប៉ុន និងការអនុវត្តគម្រោង អា​ហា​រូប​ករណ៍អភិវឌ្ឍន៍ ធនធានមនុស្ស ដែល​មានទឹកប្រាក់៣៣៩ លានយ៉េនជប៉ុន។ ក្នុងអំឡុង​ពេ​ល​​ស្នាក់នៅទីក្រុងតូក្យូ សម្តេចតេជោ​នាយក​រដ្ឋមន្រ្តី នឹងជួបជា​មួយឥស្សរជនជប៉ុន និង​ទ​ទួ​​លការចូលជួបសម្តែង​ការគួរសម ពី​តំណាងក្រុមហ៊ុនជប៉ុនជាច្រើន។ សម្តេចតេជោ ក៏នឹង​អញ្ជើ​ញថ្លែងសុន្ទរកថាក្នុងសិក្ខាសាលា ស្តីពី ការវិនិយោគនៅកម្ពុជា ដែលសហការរៀបចំដោ​យ​​ក្រុមប្រឹក្សាអភិវឌ្ឍន៍ កម្ពុជា(CDC) អង្គ ការពាណិជ្ជកម្មក្រៅប្រទេសជប៉ុន (JETRO) និងធនា​គារ​មី​ហ្ស៊ូហូ (Mizuho)។

គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា គ្រោងធ្វើមាតុភូមិនិវត្តន៍មកកាន់កម្ពុជាវិ​ញ នារសលថ្ងៃទី ៣១ ខែសភា ឆ្នាំ២០១៩៕

ដោយ ជឹម ណារី