ប្រមុខរាជរដ្ឋាភិបាលកម្ពុជាអញ្ជើញទៅចូមរួមសន្និបាតប្រចាំឆ្នាំលើកទី៧៥ របស់UN-ESCAP នៅប្រទេសថៃ

ភ្នំពេញ ថ្ងៃទី២៧ ខែឧសភា ឆ្នាំ២០១៩ -សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណា​ចក្រកម្ពុ​ជា​ បាន ដឹកនាំគណៈប្រតិភូជាន់ខ្ពស់ចាកចេញពីកម្ពុជាតាមជើងយន្តហោះពិសេស ឆ្ពោះទៅកាន់​ទី​​ក្រុងបាងកក ព្រះរាជាណាចក្រថៃ នាព្រឹកថ្ងៃទី ២៧ ខែឧសភា ឆ្នាំ២០១៩ ដើម្បីចូលរួម​ស​ន្និ​បាត​​ប្រចាំឆ្នាំលើកទី៧៥ របស់គណៈកម្មការសេដ្ឋកិច្ច និងសង្គមអង្គការសហប្រជាជាតិ​សម្រា​​ប់​តំបន់អាស៊ី-ប៉ាស៊ីហ្វិក (UN-ESCAP) ក្រោមមូលបទ «ការផ្តល់សិទ្ធិ អំណាចជូនប្រជាជ​ន​ និ​​ង ​​ការ​ធានានូវបរិយាប័ន្នភាព និងសមភាព»​ ដែលជាការតបតាមការអញ្ជើញ​​របស់ លោក​ជំ​ទាវ​ អាមីដា សា​ល​ស៊ីអាហ៍​ អាលីសចាបាណា (Armida Salsiah Alisjahbana) អគ្គលេខា​ធិកា​រ​រងអង្គការសហប្រជាជាតិ និងជាលេខាធិការប្រតិបត្តិរបស់ UN-ESCAP។

អញ្ជើញជូនដំណើរសម្ដេចតេជោនាយករដ្ឋមន្ត្រី នៅព្រលានយន្តហោះអន្តរជាតិភ្នំពេញ មានវត្តមាន ឯកអគ្គរាជទូតថៃប្រចាំកម្ពុជា ព្រមទាំងឥស្សរជន​ជា​ន់​ខ្ពស់​​ជាច្រើនរូមទៀត។

ឯក​ឧត្ដ​ម ស្រ៊ី ថាមរង្គ រដ្ឋមន្ត្រីប្រតិភូអមនាយករដ្ឋមន្ត្រី បានប្រាប់អ្នក​យក​ព័ត៌​មាននៅ​ព្រលាន​យ​ន្ត​ហោះអន្តរជាតិភ្នំពេញថា  ការអញ្ជើញចូលរួមសន្និបាតប្រចាំឆ្នាំនេះ ក៏​​​​មាន​​ថ្នា​ក់​ដឹកនាំជាន់ខ្ពស់​មួ​យចំនួនអញ្ជើញអមដំណើរ សម្តេចតេជោនាយករដ្ឋមន្រ្តី រួមមាន​ ឯក​​ឧត្ត​ម​ទេសរដ្ឋមន្រ្តី លី ធុជ ប្រធានគណៈកម្មាធិការជាតិនៃគណៈកម្មការសេដ្ឋកិច្ច​និង​ស​ង្គ​ម​​​​​ស​ម្រា​ប់​​តំបន់អាស៊ី-ប៉ាស៊ី​ហ្វិ​ក លោកជំទាវ អ៊ឹង កន្ថាផាវី រដ្ឋមន្រ្តីក្រសួងកិច្ចការនារី ព្រម​ទាំ​ង​​ឥស្ស​រ​ជន​​ជាន់ខ្ពស់ រាជរដ្ឋាភិបាលមួយចំនួនទៀត។ ​ជាមួយគ្នានេះ ដោយទទួលស្គាល់​នូ​វស​មិ​ទ្ធ​ផល​​ដ៏ធំធេងដែល​កម្ពុ​ជាសម្រេចបាន ក្នុងការអភិវឌ្ឍសេដ្ឋកិច្ច និងសង្គម  UN-ESC​A​P​ បា​ន​គោរ​ព​​អញ្ជើញ សម្តេ​ចតេជោនាយករដ្ឋមន្រ្តី ថ្លែងសុន្ទរកថាគន្លឹះនៅក្នុងពិធី​បើកសន្និ​បា​ត​ ដោ​យ​ផ្តោ​ត​ជាសំ​ខាន់​ទៅលើការចែករំលែកនូវបទពិសោធន៍របស់កម្ពុជា ក្នុងការអភិវឌ្ឍ​សេ​ដ្ឋ​កិ​ច្ច​ និង​សង្គម ដែ​ល​បា​ន​​លើកកម្ពស់កម្រិតជីវភាពរបស់ប្រជាជនកម្ពុជាគ្រប់រូប។  ឯកឧត្តមបន្ដថា នេះ​​ក៏​ជា​ការទទួលលស្គា​ល់​ និងប្រសិទ្ធភាពនៃការដឹកនាំរបស់សម្ដេចតេជោនាយករដ្ឋមន្ត្រី ក្នុងការ​ដឹកនាំ​ប្រទេសចេញ​ពី​ផះ​ផង់នៃសង្គ្រាម កសាងបាននូវសេដ្ឋកិច្ច និងប្រជាជនមាន​ជីវភា​ព​កា​ន់​​​តែមានភាពល្អ​ប្រ​សើរ​។

គួបញ្ជក់ដែរថា គណៈកម្មការសេដ្ឋកិច្ចនិងសង្គមអង្គការសហប្រជាជាតិ​សម្រា​​ប់​តំបន់​អា​​​​ស៊ី​-ប៉ាស៊ីហ្វិក (UN-ESCAP ) មានបណ្ដាប្រទេសជាសមាជិកចំនួន ៥៣ប្រទេស ​ប្រទេស​អ្ន​ក​ស​ង្កេ​តការណ៍ចំនួន៩ រួមជាមួយដៃគូអភិវឌ្ឍន៍ជាច្រើនទៀត។ ​ស​ន្និ​បាត​​ប្រចាំឆ្នាំលើកទី៧៥ រប​ស់គណៈកម្មការសេដ្ឋកិច្ច និងសង្គមអង្គការសហប្រជាជាតិ​សម្រា​​ប់​តំបន់អាស៊ី-ប៉ាស៊ីហ្វិក (UN-ESCAP) ក្រោមមូលបទ    «ការផ្តល់សិទ្ធិ អំណាចជូនប្រជាជ​ន​ និ​​ង​​ការ​ធានានូវបរិយា​ប័ន្ន​ភា​ព និងសមភាព»​ ដែលនឹងប្រព្រឹត្តទៅរហូតដល់ថ្ងៃទី ៣១ ខែឧសភា ឆ្នាំ២០១៩៕

ដោយ ជឹម ណារី

ពត៌មានទាក់ទង

ពត៌មានផ្សេងៗ