ភ្នំពេញ ថ្ងៃទី០៨ ខែឧសភា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានជំរុញឱ្យសមត្ថកិច្ច និងអាជ្ញាធរដែនដីដែលពាក់ព័ន្ធត្រូវបន្តយកចិត្តទុកដាក់ផ្សព្វផ្សាយទៅកាន់ប្រជាពលរដ្ឋឱ្យមានការប្រុងប្រយ័ត្នខ្ពស់ ចំពោះបញ្ហាគ្រោះធម្មជាតិ ដូចជាបាតុភូត ខ្យល់កន្ទ្រាក់ ផ្គរ រន្ទះដែលនាំឱ្យប៉ះពាល់ដល់លំនៅឋានទ្រព្យសម្បត្តិ និងអាយុជីវិតមនុស្ស សត្វ ជាដើមនោះ។
ក្នុងពិធីអបអរសាទរខួប ១៥៦ឆ្នាំ នៃទិវាកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៩ ក្រោមប្រធានបទ “ខ្ញុំស្រឡាញ់កាកបាទក្រហមកម្ពុជា I Love Cambodian Red Cross” ត្រូវបានប្រារព្ធធ្វើឡើងនាព្រឹកថ្ងៃពុធ ៥កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី០៨ ខែឧសភា ឆ្នាំ២០១៩នៅទីស្នាក់ការកណ្តាលកាកបាទក្រហមកម្ពុជា ក្នុងរាជធានីភ្នំពេញ សម្ដេចតេជោនាយករដ្ឋមន្ត្រីមានប្រសាសន៍ថា រាជរដ្ឋាភិបាលនៅតែមានក្តីបារម្ភចំពោះមហន្តរាយគ្រោះ ធម្មជាតិនេះដែលទាមទារឱ្យប្រជាពលរដ្ឋបង្កើនការប្រុងប្រយ័ត្នទ្វេដង ដើម្បីធានាសុវត្ថិភាព និងកាត់បន្ថយបញ្ហាគ្រោះថ្នាក់កើតឡើងជាយថាហេតុ។
សម្ដេចតេជោថ្លែងថា «ការប្រែប្រួលអាកាសធាតុបាននាំមកនូវការលំបាកយ៉ាងច្រើន សម្រាប់យើងគ្រាន់តែក្នុងប៉ុន្មានថ្ងៃប៉ុន្មានអាទិត្យនេះ នៅខេត្តបន្ទាយមានជ័យ ផ្ទះរាប់រយខ្នង ត្រូវបានដួលរលំ ខ្យល់កន្ត្រាក់ ផ្គរ រន្ទះ ភ្លៀង បានធ្វើឱ្យដួលរលំផ្ទះ ខូចខាតទ្រព្យសម្បត្តិ អាយុជីវិតមនុស្ស និងសត្វ នោះហើយគឺជាបញ្ហាដែលទាមទារឱ្យយើងដោះស្រាយ ហើយផ្សព្វ ផ្សាយឱ្យប្រជាពលរដ្ឋបានដឹងនិងមានការប្រុងប្រយ័ត្នខ្ពស់ ជាមួយគ្នានោះ យើងក៏ត្រូវតែ មានការប្រុងប្រៀបអន្តរាគមន៍ ដើម្បីឆ្លើយតបជាមួយគ្រោះមហន្តរាយបែបនេះកើតឡើង នៅក្នុងតំបន់ដែលជួបគ្រោះថ្នាក់ រាប់ទាំងអន្តរាគមន៍ កងកម្លាំងប្រដាប់អាវុធ ទាំងកងទ័ព អាវុធហត្ថនិងនគរបាល ដើម្បីជួយធ្វើផ្ទះ ជួសជុលផ្ទះរបស់ប្រជាពលរដ្ឋ ឬទាក់ទងជាមួយនឹង បញ្ហាវិស័យសុខាភិបាល និងផ្នែកដទៃទៀតដែលជាតម្រូវការរបស់យើង»។
សម្ដេចតេជោមានប្រសាសន៍បន្ថែមថា ការព្យាករណ៍លើកមុនរបស់ក្រសួងធនធាន ទឹកបានបង្ហាញថា រដូវវស្សានឹងចូលមកដល់នៅសប្ដាហ៍ទី៣ ខែឧសភា ប៉ុន្ដែឥឡូវនេះអាច នឹងចូលមកដល់លឿនជាងបន្ដិចបន្តួច បើដូច្នេះមែនកម្ពុជានឹងអាចកាត់បន្ថយនូវការលំបាក ទាក់ទងជាមួយបញ្ហាខ្វះខាតទឹក ប៉ុន្ដែបាតុភូតរន្ទះ ខ្យល់កន្ដ្រាក់ នៅតែជាកង្វល់ដែលយើងត្រូវ យកចិត្តទុកដាក់៕
ដោយ ជឹម ណារី
