ភ្នំពេញ ថ្ងៃទី០៨ ខែឧសភា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានប្រកាសចង់ឱ្យ កម្ពុជាក្លាយទៅជាសមាជិកសង្កេតការណ៍នៃអង្គការសហប្រតិបត្ដិការឥស្លាម(OIC) ដែលមាន សមាជិករហូតទៅដល់៥២ប្រទេស ដើម្បីឱ្យប្រទេសជាសមាជិកបានចូលរួមចំណែកជួយទិញ ទំនិញ និងម្ហូបហាឡាល់ពីកម្ពុជាផងដែរ។ នេះបើយោងតាមការចេញផ្សាយតាមគេហទំព័រ ហ្វេសប៊ុកផ្លូវការរបស់សម្ដេចតេជោនាយករដ្ឋមន្រ្ដី។
ថ្លែងក្នុងពិធីស្រាយបួស«ខែរ៉ាម៉ាឌន» ជាមួយសាសនិកខ្មែរ-ឥស្លាម ដែលមកពីបណ្ដារាជធានី ខេត្តចំនួន៤.៧៥០នាក់ កាលពីល្ងាចថ្ងៃទី០៧ ខែឧសភា ឆ្នាំ២០១៩ នៅមជ្ឈមណ្ឌលកោះពេជ្រ សម្ដេចតេជោ ហ៊ុន សែន បានមានប្រសាសន៍ថា កម្ពុជាចង់មានទំនាក់ទំនងល្អ ជាមួយបណ្តាប្រទេសជាសមាជិកនៃអង្គការ OIC នេះ ដែលនឹងអាចចូលរួមចំណែកអភិវឌ្ឍន៍ សង្គមជាមួយប្រទេសកម្ពុជា ពិសេសការចូលរួមជួយដល់ការបណ្តុះបណ្តាលធនធានមនុស្ស តាមរយៈការផ្តល់អាហារូបករណ៍ ការបណ្តុះបណ្តាលនិស្សិតសាសនិកឥស្លាម និងដល់បង ប្អូនកម្ពុជាផងដែរ។ សម្តេចតេជោនាយករដ្ឋមន្ត្រីបានស្នើដល់ លោកជំទាវអគ្គរដ្ឋទូតតំណាង អគ្គលេខាធិការអង្គការសហប្រតិបត្តិការឥស្លាម(OIC) ជួយជម្រាបជូនអគ្គលេខាធិការ និង បណ្តាប្រទេសដែលជាសមាជិកនៃអង្គការ OIC សូមជួយដល់កម្ពុជា ដើម្បីរួមចំណែកទិញ ទំនិញពីកម្ពុជា រាប់ទាំងម្ហូបហាឡាល់ (Halal food) ដែលជាតម្រូវការរបស់បងប្អូនសានិកឥស្លាមនៅទីនោះផងដែរ។ ជាមួយគ្នានេះ ប្រទេសជាមាជិកក៏ចូលរួមជួយទិញម្ហូបអាហារ អង្ករ ដើម្បីឱ្យទីផ្សារកម្ពុជាកាន់តែទូលាយ និងរីកចម្រើន ដែលជាផ្នែកមួយនៃការបង្កើនការងារធ្វើនៅកម្ពុជាថែមទៀតផង។ សម្តេចតេជោក៏បានប្រកាសតែងតាំង ឯកឧត្ដម ទេសរដ្ឋមន្ត្រី អូស្មាន ហាស្សាន់ ជាបេសកជនពិសេស នៃព្រះរាជាណាកច្រកម្ពុជា ដើម្បីរៀបចំខ្លួនចូលជាសមាជិកសង្កេតការណ៍នៅក្នុងអង្គការ OIC នេះ។
សម្តេចតេជោនាយករដ្ឋមន្ត្រី ក៏បានអំពាវនាវដល់ថ្នាក់ដឹកនាំប្រទេសអារ៉ាប៊ីសាអូឌីត ផងដែរ ក្នុងការសម្រួលឱ្យបងប្អួនខ្មែរ-ឥស្លាមទៅធ្វើបុណ្យនៅទីនោះ ដែលក្នុងនោះមានបងប្អូនខ្មែរយើងប្រមានជាង១.២០០នាក់ទៅធ្វើបុណ្យនៅទៅនោះ ហើយសម្តេចសង្ឃឹមថាអ្នកទៅធ្វើបុណ្យនៅទីនោះ នឹងនាំត្រឡប់មកវិញនូវអំពើល្អគ្រប់រូបភាព ពីព្រោះសាសនាណាក៏ដោយមិនដែលអប់រំមនុស្សឱ្យសាងអំពើអាក្រក់នោះទេ៕
ដោយ អ៊ុន រិទ្ធី 
