នៅល្ងាចថៃទី២៨ មេសា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃ ព្រះរាជាណាចក្រកម្ពុជា ក៏ដូចជាបណ្តាមេដឹកនាំ នៃប្រទេសដៃគូសហប្រតិបត្តិការ ខ្សែក្រវ៉ាត់ និងផ្លូវ បានអញ្ជើញឆ្ពោះទៅកាន់ មជ្ឈមណ្ឌលតាំងពិព័រណ៌សាកវប្បកម្មអន្តរជាតិ២០១៩ ដែលជា មជ្ឈមណ្ឌលតំាងពិព័រណ៌លំដាប់អន្តរជាតិសាងសង់ថ្មី នៅជាយទីក្រុងប៉េកាំង សាធារណរដ្ឋប្រជាមានិតចិន។
សូមបញ្ជាក់ថា នៅក្នុងមជ្ឈមណ្ឌលតាំងពិព័រណ៌អន្តរជាតិនេះ មេដឹកនាំចិនបានផ្តល់ ដី ក្នុងការសាងសង់សួនដែលជានិម្មិតរូប សម្រាប់ប្រទេសនិមួយៗ ដែលជាប្រទេសដៃគូសហប្រតិបត្តិការខ្សែក្រវ៉ាត់ និងផ្លូវ។ ព្រះរាជាណាចក្រកម្ពុជាបានធ្វើការសាងសង់សួនកម្ពុជា ក្រោមប្រធានបទ រស់នៅកាន់តែល្អប្រសើរ រស់នៅជាមួយបរិស្ថានបៃតង។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញកាត់ខ្សែបូរសម្ពោធសួនកម្ពុជា ជាមួយ និងសមិទ្ធផលដទៃទៀត។
សូមបញ្ជាក់ដែរថា គោលបំណង នៃការចូលរួមគឺដើម្បីជំរុញផ្សព្វផ្សាយពីវប្បធម៌ និងកសាងកេរ្តិ៍ឈ្មោះ របស់ព្រះរាជាណាចក្រកម្ពុជា ឲ្យកាន់តែមានភាពល្បីល្បាញ មានការទទួលស្គាល់លើឆាកអន្តរជាតិ ជាទឹកដីពោរពេញទៅដោយវប្បធម៌ប្រពៃណីល្អផូរផង់ ស្របតាមប្រធានបទ រស់នៅកាន់តែល្អប្រសើរ រស់នៅជាមួយបរិស្ថានបៃតង។ ការចូលរួមក្នុងព្រឹត្តិការណ៍នេះ កម្ពុជានិងមានឱកាស បានចែករំលែកបទពិសោធន៍ ទាក់ទាញនិងការរស់នៅប្រចាំថ្ងៃរបស់ប្រជាជន បង្ហាញពីវប្បធម៌ ប្រពៃណីទំនៀមទំលាប់ និងការប្រតិបត្តិរបស់ប្រជាជន ការរៀបចំបរិស្ថាន នៃការរស់នៅ តាមរយៈការរៀបចំសួនដែលមានធម្មជាតិ និងរុក្ខជាតិចម្រុះ តំណាងឲ្យអត្តសញ្ញាណជាតិ និងជាការពេញនិយមរបស់ប្រជាជន ដូចជាដើមត្នោត ដើមស្លា និងផ្កាភ្ញីជាដើម។ ទន្ទឹមនឹងការរៀបចំសួនតាមបែបបុរាណ និងសម័យមានលក្ខណៈស្រស់បំព្រង ដើម្បីទាក់ទាញចំណាប់អារម្មណ៍ពីភ្ញៀវ ទេសចរណ៍អន្តរជាតិ កម្ពុជាក៏នឹងមានឱកាសបង្កើតកិច្ចសហប្រតិបត្តិការល្អជាសកល តាមរយៈ ការតភ្ជាប់ទំនាក់ទំនង និងបង្កើតកិច្ចសហប្រតិបត្តិការលើវិស័យទេសចរណ៍ ការផ្លាស់ប្តូរវប្បធម៌ ប្រពៃណី ទំនៀមទំលាប់ សេដ្ឋកិច្ច ពាណិជ្ជកម្ម វិនិយោគ និងការការពារបរិស្ថានធម្មជាតិនៅកម្ពុជា។ ព្រះរាជាណាចក្រកម្ពុជា បានយកចិត្តទុកដាក់ខ្ពស់លើការ ការពារបរិស្ថានបៃតង និងមានគោលដៅជាសារវន្ត គឺផ្សារភ្ជាប់បរិស្ថានបៃតង ទៅនិងការរស់នៅរបស់ប្រជាជន និងពិភពលោក ដើម្បីសុខដុមរមនាខាងផ្នែកផ្លូវកាយ ភាពស្រស់ស្រាយក្នុងជីវិត ស្របតាមប្រធានបទរបស់ពិព័រណ៍ គឺការរស់នៅកាន់តែប្រសើរ រស់នៅជាមួយបរិស្ថានបៃតង។ សួនកម្ពុជាត្រូវបានសាងសង់ឡើងតាមរចនាបថខ្មែរ សម័យក្រោយអង្គរ ដោយផ្សារភ្ជាប់គ្នារវាងធម្មជាតិ និងវប្បធម៌ ប្រពៃណី ទំនៀមទំលាប់របស់ខ្មែរ ការរៀបចំតុបតែងភូមិដ្ឋាន និងការបង្ហាញពីឧបករណ៍ សម្ភារៈ ដែលបម្រើ ដល់ជីវភាពរស់នៅប្រចាំថ្ងៃរបស់ប្រជាជន។ ខ្លោងទ្វារចូលត្រូវបានរៀបចំ តាមរចនាបថខ្មែរ យកលំនាំតាមខ្លោងទ្វារសារមន្ទីរជាតិ និងមានរបងព័ន្ធជុំវិញបរិវេណសួន។ រូបសំណាក់ដែលមានព្រះភ័ក្រ្តញញឹមស្រទន់ ជាតំណាងឱ្យទសពិធរាជធម៌ របស់អតីតព្រះមហាក្សត្រខ្មែរ នាសម័យបុរាណ មានចិត្តមេត្តា ករុណា មុទិតា និងឧបេក្ខា គ្រប់ដណ្តប់លើផ្ទៃដីកម្ពុជារដ្ឋ ក្នុងទិសទាំងបួន និងបានផ្តល់សេចក្តីសុខសន្តិភាពដល់មនុស្ស សត្វ និងរុក្ខជាតិ ដែលរស់នៅក្នុង ភាពស្ងប់ស្ងៀមជាមួយនិងធម្មជាតិ ស្របតាមប្រធានបទរងគឺ រស់នៅសុខដុមរមនាជាមួយធម្មជាតិ។ រោងនៅផ្នែកខាងស្តាំ និងខាងឆ្វេង នៃរូបសំណាក់ព្រហ្មមុខបួន មានរោងអដ្ឋកោណមួយ សម្រាប់ជាទីសម្រាកបណ្តោះអាសន្នរយៈពេលខ្លី របស់ភ្ញៀវជាតិ និងអន្តរជាតិ បន្ទាប់ពីបានចូលទស្សនាសួន និងពន្លាជាតិកម្ពុជា។ ក្នុងរោងនេះ អ្នកទស្សនាអាចគយគន់ទស្សនីយភាពរបស់សួនកម្ពុជា ហើយក៏អាចសិក្សាស្វែងយល់ពីឧបករណ៍សម្ភារៈប្រើប្រាស់មួយចំនួន របស់ប្រជាជនខ្មែរ នាសម័យបុរាណ ដែលមានដាក់តាំងលម្អក្បែរនោះ មានដូចជារទេះគោ នង្គ័ល រនាស់ និងឧបករណ៍ផ្សេងៗទៀត ដែលបម្រើឱ្យវិស័យកសិកម្ម។ នៅក្នុងសួននេះដែរ កម្ពុជាបានសាងសង់ពន្លាជាតិ ជា៣ខ្នង តាមរចនាបថខ្មែរនាសម័យចតុមុខ។ នៅអមសងខាងទ្វារចូលពន្លាជាតិ មានដាក់តាំងរូបចម្លាក់តោថ្មចំនួន២ តាមរចនាបថតោថ្មសម័យលង្វែក ដើម្បីបង្ហាញពីឫទ្ធានុភាព នៃអំណាច ក្នុងការ ការពារផែនដី និងធម្មជាតិ។ ផ្នែកខាងក្នុង នៃពន្លាជាតិ ចែកចេញជា២ផ្នែកគឺ ផ្នែកទី១ មានរៀបចំជាឆាកខ្នាតតូច សម្រាប់ក្រុមសិល្បៈករ សិល្បៈការិនីកម្ពុជាសំដែងសិល្បៈ បង្ហាញពី វប្បធម៌ ប្រពៃណី ទំនៀមទំលាប់របស់ជនជាតិខ្មែរ ជូនភ្ញៀវទស្សនា និងផ្នែកទី២មានការៀបចំ តុលម្អដោយវត្ថុសិល្បៈ ផ្ទាំងគំនូរំលេចពីធម្មជាតិ សម្រាស់ផ្កាខ្មែរ ជាទីពេញនិយមរបស់ប្រជាជនកម្ពុជា មានដូចជាផ្កាចំប៉ី ផ្កាចំប៉ា ផ្កាំងងារ ផ្ការំដួល ផ្កាចន្ធូ និងឯកសារផ្សព្វផ្សាយពីសេដ្ឋកិច្ច ពាណិជ្ជកម្ម ការវិនិយោគ ទេសចរណ៍ ទំបាក់តំនងការទូត និងផលិតផលសក្តានុពលកម្ពុជា សម្រាប់ធ្វើពិពិធកម្ម និងជំរុញការនាំចេញ។
សូមបញ្ជាក់ដែរថា ពិព័រណ៌សាកវប្បកម្មពិភពលោក ឆ្នាំ២០១៩ មានផ្ទៃដីរបស់កម្ពុជាមានទំហំ១ពាន់ការ៉េ មានទីតាំងក្នុងមជ្ឈមណ្ឌល នៃពិព័រណ៌ពិភពលោក ក្នុងស្រុកយ៉ាងជីង ចម្ងាយប្រមាណ៧០គីឡូម៉ែត្រ ពីទីក្រុងប៉េកាំង។ នេះគឺជាសមិទ្ធផលថ្មីមួយទៀត កើតចេញពីកិច្ចខិតខំប្រឹងប្រែងពីសំណាក់ថ្នាក់ដឹកនាំសម័យបច្ចុប្បន្ន នៃប្រទេស ទាំងពីរកម្ពុជា-ចិន ដែលតែងតែគាំទ្រ និងជួយគ្នាទៅវិញទៅមក ក្នុងការពង្រឹង និងពង្រីកទំនាក់ទំនង កិច្ចសហប្រតិបត្តិការ នៃប្រទេសទាំងពីរ មានការរីកចម្រើនជាងពេលណាៗទាំងអស់។
បន្ទាប់ពីបានចំណាយពេលអញ្ជើញសម្ពោធដាក់ឲ្យដំណើរការសួនកម្ពុជារួចមក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក៏ដូចជាបណ្តា មេដឹកនាំ នៃប្រទេសជាដៃគូកិច្ចសហប្រតិបត្តិការខ្សែក្រវ៉ាត់ និងផ្លូវ បានអញ្ជើញដាំកូនឈើ និង ទស្សនាការតាំងពិព័រណ៍សាកវប្បកម្មអន្តរជាតិឆ្នាំ២០១៩ និងបានអញ្ជើញទស្សនាការសំដែង សិល្បៈមហាជន ក្នុងន័យចូលរួមអបអរសាទរ ពិធីបើកពិព័រណ៍សាកវប្បកម្មអន្តរជាតិ ឆ្នាំ២០១៩ ក្រោមវត្តមាននៃការអញ្ជើញធ្វើគារវកិច្ចស្វាគមន៍យ៉ាងស្និទ្ធស្នាលរ៉ាក់ទាក់បំផុតជាថ្មីម្តងទៀត ពីឯកឧត្តម ស៊ី ជីនពីង ប្រធានាធិបតី នៃសាធារណរដ្ឋប្រជាមានិតចិន និងលោកជំទាវ។
ថ្លែងទៅកាន់បណ្តាមេដឹកនាំ ដែលមានវត្តមានក្នុង ពិធីបើកពិព័រណ៍សាកវប្បកម្មអន្តរជាតិ ឆ្នាំ២០១៩ បណ្តាមេដឹកនាំ នៃប្រទេសចូលរួម ពិសេសឯកឧត្តមប្រធានាធិបតីចិន ស៊ី ជិនពីង មានប្រសាសន៍សំដែងនូវការវាយតម្លៃខ្ពស់ និងកោតសរសើរ ជូនចមពោះប្រមុខរដ្ឋ ប្រមុខរដ្ឋា ភិបាល នៃប្រទេសជាដគូសហប្រតិបត្តិការខ្សែក្រវ៉ាត់ និងផ្លូវ ដែលបានឆ្លើយតបតាមការអញ្ជើញ ពីថ្នាក់ដឹកនាំចិន អញ្ជើញចូលរួមវេទិកាខ្សែក្រវ៉ាត់ និងផ្លូវ លើកទី២ សម្រាប់សហប្រតិបត្តិការ អន្តរជាតិ ដែលបានបញ្ចប់ទៅប្រកបដោយផ្លែផ្កា ពិសេសបានអញ្ជើញចូលរួមក្នុង ពិធីបើកពិព័រណ៍សាកវប្បកម្មអន្តរជាតិ ឆ្នាំ២០១៩ ដែលប្រទេសជាសមាជិកជាច្រើន បានចូលរួមសាងសង់ និងសម្ពោធដាក់ឲ្យប្រើប្រាស់រួមគ្នានៅថ្ងៃនេះ។ ឯកឧត្តមប្រធានាធិបតីមានប្រសាសន៍បញ្ជាក់បន្ថែមថា នៅទីនេះគឺជាតំណាងឲ្យភាពស្ងប់ស្ងាត់ ហើយរុក្ខជាតិនិងដើមឈើយកមកដាំនៅ ក្នុងសួនពិព័រណ៍សាកវប្បកម្មអន្តជាតិ គឺជារុក្ខជាតិ ដែលត្រូវបាននាំមកដាំ ដោយ សំរិទ្ធសំរាំងបំផុត ក្នុងគោលបំណងបម្រើឲ្យភាពទាក់ទាញ។ ឯកឧត្តមប្រធានាធិបតីក៏បានសំដែងនូវការ វាយតម្លៃខ្ពស់ដល់ក្រុមការពីបណ្តាប្រទេសជាដៃគូ ដែលបានខិតខំប្រឹងប្រែង ធ្វើឲ្យសម្រេចបាននូវមហាសិមទ្ធផលជាប្រវត្តិសាស្រ្ត ដែលយើងប្រារព្វដាក់សម្ពោធឲ្យប្រើប្រាស់នៅថ្ងៃនេះ។ ឯកឧត្តមក៏បានសំដែងនូវសុទិដ្ឋនិយម ដែរថា អ្វីដែលយើងទាំងអស់គ្នាខិតខំសម្រេចបាននៅពេលនេះ គឺជានិម្មិតរូប ដែលបង្ហាញពីភាពជោគជ័យ នៃការចូលរួមអនុវត្តគោលនយោបាយខ្សែក្រវ៉ាត់ និងផ្លូវ ឲ្យកាន់តែបោះជំហានទៅមុខ និងមានភាពរីកចម្រើនសម្រាប់ជាឧត្តមប្រយោជន៍ នៃប្រជាជនទាំងអស់ ដែលរស់នៅលើភពផែនដី នៃពិភពលោកដ៏ធំហ្វឹងល្វើយយើងនេះ។
នៅក្នុងរាត្រីកាលនោះដែរ បន្ទាប់ពីការថ្លែងសុន្ទរកថា ពីសំណាក់មេដឹកនាំនានារួចមក មេដឹកនាំទាំងអស់បានចំណាយពេលប្រមាណ១ម៉ោង ទស្សនាការសំដែងសិល្បៈមហាជនពី តំណាងប្រទេសចិន អឺរ៉ុប និងទ្វីបអាហ្រ្វិក ដែលឆ្លុះបញ្ចាំងសិល្បៈសំបូរ និងភាពប្រទាក់ក្រឡាគ្នា រវាងបណ្តាប្រទេសក្នុងដៃគូសហប្រតិបត្តិការខ្សែក្រវ៉ាត់ និងផ្លូវ៕
