ភ្នំពេញ ថ្ងៃទី១១ ខែមីនា ឆ្នាំ២០១៩ -ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីប្រគល់សញ្ញាបត្រដល់និស្សិតជ័យលាភីនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ចំនួនជាង ៣.០០០នាក់ នាព្រឹកថ្ងៃទី១១ ខែមីនា ឆ្នាំ២០១៩ នៅមជ្ឈមណ្ឌលសន្និបាត និងពិព័រណ៍កោះពេជ្រ ក្រោយពីនិស្សិតទាំងនោះបានបញ្ចប់ការសិក្សានាពេលកន្លងមក។
តាមរបាយការណ៍របស់ក្រសួងអប់រំយុវជននិងកីឡា បានឱ្យដឹងថា និស្សិតដែលទទួលសញ្ញាបត្រនាពេលនេះមានចំនួន ៣.០៤៣នាក់ (នារី ១.៤១២នាក់) ក្នុងនោះមាននិស្សិតថ្នាក់បរិញ្ញាបត្រចំនួន២៥០១នាក់ និងថ្នាក់បរិញ្ញាបត្រជាន់ខ្ពស់ចំនួន៥៤២នាក់។ និស្សិតជ័យលាភីជាជនជាតិបរទេសមានចំនួន១៦នាក់ ក្នុងនោះមាននិស្សិតជាជនជាតិបារាំងចំនួន៨នាក់ ឡាវ ៦នាក់ អង់គ្លេស១នាក់ និងហ្គាបុង១នាក់។ ក្នុងរបាយការណ៍បានឱ្យដឹងទៀតថា សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានដើរតួនាទីយ៉ាងសំខាន់ ក្នុងការបណ្ដុះបណ្ដាលធនធានមនុស្សផ្នែកច្បាប់ សេដ្ឋកិច្ច និងផ្នែកផ្សេងៗទៀត ដើម្បីបម្រើឱ្យការអភិវឌ្ឍសេដ្ឋកិច្ច និងសង្គមនៅកម្ពុជា។
គិតចាប់តាំងពីឆ្នាំ១៩៨២ មកដល់បច្ចុប្បន្ន សិក្ខាកាម និងនិស្សិតដែលបញ្ចប់ការ សិក្សាជាស្ថាបពរសរុបចំនួន៥២.០៩៩នាក់ ក្នុងនោះមាននិស្សិតបរទេសចំនួន១២៨នាក់។ បច្ចុប្បន្នសាកលវិទ្យាល័យមាននិស្សិតកំពុងសិក្សាសរុប១៤.៧០០នាក់ ក្នុងនោះមាន និស្សិតបរទេសចំនួន៦៧នាក់ និងមានក្រុមប្រឹក្សាភិបាល គណៈគ្រប់គ្រង មន្ត្រី បុគ្គលិក សាស្ត្រាចារ្យក្របខ័ណ្ឌ និងសាស្ត្រាចារ្យជាប់កិច្ចសន្យាជាតិ-អន្តរជាតិ សរុប៥៧៦នាក់ ក្នុងនោះមានស្រី ១៥៣នាក់៕
ដោយ ជឹម ណារី
