សម្ដេចតេជោនៅតែបន្តលើកទឹកចិត្តឱ្យគ្រប់ស្ថាប័នទាំងអស់ផ្ដល់តួនាទីសម្រាប់ស្ត្រី

ភ្នំពេញ ថ្ងៃទី០៥ ខែមីនា ឆ្នាំ២០១៩ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ​កម្ពុជា​នូវ​តែបន្តការលើកទឹកចិត្តឱ្យគ្រប់ស្ថាប័នទាំងអស់ផ្ដល់តួនាទីសម្រាប់ស្ត្រី ដោយសម្ដេច​បានប​ញ្ជា​ក់​ថា ការងារនេះមិនត្រូវនិយាយឱ្យគ្រាន់តែពិរោះស្ដាប់នោះទេ គឺត្រូវធ្វើសកម្មភាព​ជាក់​ស្ដែ​ង​​។

ក្នុងខណៈអញ្ជើញជាអធិបតីភាពដ៏ខ្ពង់ខ្ពស់ជាមួយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុ​ន​​សែន ក្នុងមិទ្ទីងអបអរសាទរខួបទី ១០៨ ទិវាអន្តរជាតិនារី៨មីនា ឆ្នាំ២០១៩ ក្រោមប្រធាន​ប​ទ​« លើកកម្ពស់សមភាពយេនឌ័រ និងការគាំពារសង្គមដើម្បីអភិវឌ្ឍន៍ធនធានមនុស្ស» ដែលមាន​អ្ន​ក​ចូលរួម​ប្រមាណជាង ៣០០០នាក់ នាព្រឹកថ្ងៃអង្គារ ១៤រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៥ ខែមីនា ឆ្នាំ២០១៩ នៅសាលមហោស្រពកោះពេជ្រ នោះ សម្ដេចតេ​ជោ​​​​ថ្លែ​ងថា ខ្ញុំនៅតែបន្តអំពាវនាវឱ្យពង្រីកការចូលរួម ជាពិសេសការតែង​តាំងស្ត្រីនូវ​ក្នុង​មុខ​ងា​រ​​ តួនាទី ដែលពួកគាត់គប្បីត្រូវបានបង្កើតអត្រានេះឡើង។ ខ្ញុំសូមស្នើឱ្យគ្រប់​ក្រសួង​ទាំង​អ​ស់ គាំទ្រឱ្យមានសម្រាប់មុខតំណែងនូវតាមស្ថាប័នរបស់ខ្លួន។

សម្ដេចតេជោថ្លែងថា កន្លងមក ខ្ញុំ​បាន​​ធ្វើរួចមកហើយសម្រាប់តាមស្ថាប័នថ្នាក់ជាតិ ដែលមានស្ត្រីជារដ្ឋលេខាធិការ អនុរដ្ឋ​លេ​ខា​​ធិការ ក្រៅពីនោះយើងក៏មានរៀបចំជា ក្របខ័ណ្ឌជា គណៈអភិបាលខេត្ត គណៈអភិបាល​ស្រុ​ក គឺមានស្ត្រីរួចមកហើយដែរ ប៉ុន្តែខ្ញុំមិនទាន់ច្បាស់ទេថា តើឥឡូវនៅតាម​បណ្ដាអគ្គនា​យ​ក​​ដ្ឋាន នៅតាមនាយកដ្ឋាន តើមានស្ត្រីក្នុងមុខតំណែងជាអគ្គនាយក ជាពិសេសគឺ​អគ្គ​នា​យ​ក​រង​ តើមានគ្រប់គ្រាន់ ហើយឬនៅ។ បើមិនទាន់មានទេ សុំស្នើឱ្យគ្រប់ក្រសួងស្ថាប័ន គប្បីពិនិ​ត្យ​​ទទួល​យកស្ត្រីឱ្យមានគ្រប់នៅក្នុងរចនាសម្ព័ន្ធនៃកិច្ចការរបស់យើង។ ខ្ញុំយល់ថាបច្ចុប្បន្ន​ស្ត្រី​របស់​យើងបានកសាងសមត្ថភាពគ្រាន់បើហើយ ដូច្នេះការចាត់បញ្ចូលឱ្យគាត់ទទួលបន្ទុ​ក​ជា​ប្រ​ធាន ហើយបើបានគាត់ធ្វើជាអគ្គនាយកតែម្ដងវាជាការល្អ ក៏ប៉ុន្តែបុរសក៏ត្រូវការកាន់​កាប់​នៅ​កន្លែងនោះដែរ ប៉ុន្តែកន្លែងដែលជាអគ្គនាយករង ហោចណាស់ថាចំនួន៤នាក់ ឬ៥នាក់ គប្បី​មានស្ត្រីម្នាក់ ឬពីរនាក់ នៅក្នុងនោះដែរ។ ថ្នាក់នាយកដ្ឋាន បើគាត់មិនបាន​ធ្វើជាប្រធាន​នា​យ​កដ្ឋានទេ ក៏គប្បីមានអនុប្រធាននាយកដ្ឋានម្នាក់ផងដែរ បើរៀបចំបានបែបនេះវាជា​ការ​ល្អ​។

សម្ដេចតេជោនាយករដ្ឋមន្ត្រីថ្លែងបញ្ជាក់បន្ថែមថា បើតែងតាំងហើយត្រូវផ្ដល់​ការងារឱ្យ​ពួក​គាត់ធ្វើផង មិនគ្រាន់តែតែងតាំងដើម្បីបង្គ្រប់កិច្ច ហើយថាអង្គភាពរបស់ខ្ញុំ ឬស្ថាប័នរបស់​ខ្ញុំមាន​សមភាពយេនឌ័រល្អណាស់ ព្រោះស្ត្រីមានប៉ុណ្ណេះ ឬប៉ុណ្ណោះភាគរយ ក៏ប៉ុន្តែទីចុងបំផុត​ស្ត្រី​អត់​បានចូលរួមក្នុងការធ្វើសេចក្ដីសម្រេចចិត្ត ស្ត្រីអត់បានចូលរួមបំពេញមុខងារក្នុងឋានៈ​ជា​អ្នកទទួលខុសត្រូវស្ថាប័នជំនាញនោះ។ អីចឹងទេ ខ្ញុំនូវតែបន្តការលើកទឹកចិត្តឱ្យគ្រប់ស្ថាប័ន​ទាំង​អស់ផ្ដល់តួនាទីស្ត្រី។

សម្ដេចថ្លែងថា ឥឡូវនេះបើចង់ពង្រីកតួនាទីរបស់ស្ត្រី ក្រសួង​មុខ​ងា​រ​​សាធារណៈគួរ ត្រូវបានលើកទឹកចិត្តផ្ដល់ទិដ្ឋាការ សម្រាប់ឱ្យរដ្ឋមន្ត្រីចុះហត្ថលេខា​តែងតាំងស្ត្រី​កា​ន់​មុខតំណែងចាប់ពីអនុប្រធាននាយកដ្ឋានចុះក្រោម ហើយយើងមិនត្រូវនិយាយឱ្យ​គ្រាន់​តែ​​​ពិរោះស្ដាប់នោះទេ យើងត្រូវធ្វើសកម្មភាពជាក់ស្ដែង។ បណ្ដារដ្ឋមន្ត្រីតាមស្ថាប័នគួរតែធ្វើ​ការ​​ឱ្យបានញឹកញាប់បន្តិច ជាមួយនឹងក្របខ័ណ្ឌជាស្ត្រី ដោយប្រើប្រាស់ក្នុងមួយឆ្នាំពីរ ឬបី​ពេ​ល ដើម្បីជួបស្ត្រីនៅក្នុងការស្ដាប់មតិរបស់ពួកគាត់ ដើម្បីកែលម្អស្ថានភាពរបស់ស្ត្រី​នៅតាម​ស្ថា​​ប័ន។ បើសិនជាស្ថាប័ន និងទីកន្លែងមួយៗនៅតាមខេត្ត តាមស្រុកធ្វើកិច្ចការនេះ​បាន​ប្រ​សើរ​ ស្ថានភាពស្ត្រីរបស់យើងវានឹងបានរួមចំណែកកាន់តែធំ ទាំងនៅថ្នាក់ជាតិ ថ្នាក់ក្រោមជា​តិ​ និងបណ្ដាស្ថាប័នទាំងអស់៕

ដោយ ជឹម ណារី

ពត៌មានទាក់ទង

ពត៌មានផ្សេងៗ