ភ្នំពេញ ថ្ងៃទី២៥ ខែកុម្ភៈ ឆ្នាំ២០១៩ ឯកឧត្ដម Norbert Barthle សមាជិកសភា និងជារដ្ឋលេខាធិការក្រសួងសហប្រតិបត្តិការសហព័ន្ធអាល្លឺម៉ង់ បានមានប្រសាសន៍ថា ប្រទេសអាល្លឺម៉ង់នៅតែបន្តសហការ និងជួយដល់កម្ពុជាលើវិស័យផលិតកម្មកសិកម្ម អគ្គិសនីប្រើប្រាស់ដោយផ្ទាំងសូឡា ប្រព័ន្ធស្រោចស្រព និងជំរុញការវិនិយោគនៅកម្ពុជា ព្រមទាំងការជួយដោះស្រាយនូវបញ្ហាកកស្ទះចរាចរណ៍ ជាដើម។
ឯកឧត្ដម អ៊ាង សុផល្លែត ជំនួយការសម្ដេចតេជោ បានថ្លែងដូច្នេះប្រាប់អ្នកយកព័ត៌មាន បន្ទាប់ពី សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញាតឱ្យ ឯកឧត្ដម Norbert Barthle សមាជិកសភា និងជារដ្ឋលេខាធិការក្រសួងសហប្រតិបត្តិការសហព័ន្ធអាល្លឺម៉ង់ និងគណៈប្រតិភូ ចូលជួបសម្ដែងការគួរសមនារសៀលថ្ងៃទី២៥ ខែកុម្ភៈ ឆ្នាំ២០១៩ នៅវិមានសន្តិភាព។
ឯកឧត្ដម Norbert Barthle បានលើកឡើងថា ប្រតិភូរបស់ឯកឧត្ដម ចូលជួបសម្ដែងការគួរសមជាមួយសម្ដេចតេជោនាថ្ងៃនេះ គឺជាប្រតិភូចម្រុះមានសមាជិកសភាផង និងសមាជិករដ្ឋាភិបាលផង ហើយដំណើរទស្សនកិច្ចរបស់គណៈប្រតិភូមកកាន់ព្រះរាជាណាចក្រកម្ពុជានាពេលនេះ គឺដើម្បីឈ្វេងយល់ពីគម្រោងទាំងឡាយ ដែលសហព័ន្ធអាល្លឺម៉ង់បានធ្វើនៅក្នុងព្រះរាជាណាចក្រកម្ពុជា ដើម្បីជាមូលដ្ឋានបន្តកិច្ចសហប្រតិបត្តិការលើគម្រោងនេះថែមទៀត ស្របតាមអ្វី ដែលជាការបានលើកឡើងរបស់ លោកជំទាវអធិការបតីសហព័ន្ធអាល្លឺម៉ង់ អែនជឺឡា មែកគែល កន្លងមកនោះគឺបន្តគាំទ្រដល់រាជដ្ឋាភិបាលកម្ពុជា។ ឯកឧត្ដមក៏បានជម្រាបជូនសម្ដេចតេជោដែរថា ក្នុងដំណើរទស្សនកិច្ចនេះ ឯកឧត្ដមបានកត់សម្គាល់ពីការអភិវឌ្ឍយ៉ាងខ្លាំងរបស់កម្ពុជា ដោយសង្កេតឃើញមានការវិនិយោគជាច្រើន ហើយអ្នកវិនិយោគទាំងនោះ មានជំនឿទុកចិត្តមកលើរាជរដ្ឋាភិបាលកម្ពុជា ដែលក្រោមការដឹកនាំរបស់សម្ដេចកន្លងមក គឺបាននាំមកនូងការអភិវឌ្ឍរីកចម្រើន លើវិស័យសេដ្ឋកិច្ច សន្តិភាព ស្ថិរភាព ដែលនេះគឺជាស្នាដៃដ៏ធំធេងរបស់សម្ដេចតេជោ។
ឯកឧត្ដមបានមានប្រសាសន៍បញ្ជាក់ថា នៅពេលនេះវិនិយោគិនអាល្លឺម៉ង់គឺមានចំណាប់អារម្មណ៍យ៉ាងខ្លាំង និងបានមកដាក់ទុនវិនិយោគនៅក្នុងព្រះរាជាណាចក្រកម្ពុជាជាច្រើនផងដែរ។ ជាការឆ្លើយតប សម្ដេចតេជោនាយករដ្ឋមន្ត្រី បានថ្លែងអំណរគុណចំពោះលោកជំទាវអធិការបតីសហព័ន្ធអាល្លឺម៉ង់ ដែលបានផ្ញើលិតខិតចូលរួមអបអរសាទរចំពោះការឈ្នះឆ្នោត និងការកាន់តំណែងជានាយករដ្ឋមន្ត្រីរបស់សម្ដេចតេជោកន្លងមក។
សម្ដេចតេជោបានមានប្រសាសន៍ថា អ្វីដែលឯកឧត្ដម Norbert Barthle បានលើកឡើងនោះ គឺជាការវាយតម្លៃដ៏ស្មោះត្រង់មួយ ហើយចំពោះគណៈប្រតិភូសហព័ន្ធអាល្លឺម៉ង់មកកាន់កម្ពុជានាពេលនេះ បើមិនធ្លាប់មកកាន់កម្ពុជាទេ នោះគឺមានអារម្មណ៍ហាក់បីដូចជាកម្ពុជាពុំមានអ្វីកើតឡើងឡើយ។ ដោយឡែកកម្ពុជាកាលពីឆ្នាំ១៩៧៩មានមនុស្សតែ៧០នាក់ប៉ុណ្ណោះ ហើយមកដល់ពេលនេះមានមនុស្សជាច្រើនបានមករស់នៅរាជធានីភ្នំពេញ ដែលនាំមកនូវការអភិវឌ្ឍ និងការឈឺក្បាលផងដែរ។ សម្ដេចបានបន្តថា កាអភិវឌ្ឍនេះគឺទទួលបានជាពិសេសរយៈពេល២០ឆ្នាំចុងក្រោយ បន្ទាប់ពីកម្ពុជាទទួលបានសុខសន្តិភាព ហើយការអភិវឌ្ឍនេះក៏មានការចូលរួមចំណែកយ៉ាងសំខាន់ពីគម្រោងនានារបស់សហព័ន្ធអាល្លឺម៉ង់ផងដែរ។
សម្ដេចតេជោ នាយករដ្ឋមន្ត្រីបានគូសបញ្ជាក់ទៀតថា ទោះបីជាកម្ពុជាមានការអភិវឌ្ឍយ៉ាងឆាប់រហ័សយ៉ាងណាក៍ដោយ ក៏កម្ពុជានៅមានបញ្ហាប្រឈមនៅឡើយ នោះគឺកម្ពុជាបានដាក់ចេញនូវអាទិភាពដើម្បីដោះស្រាយបញ្ហាទាំងនេះរួមមាន ការអភិវឌ្ឍធនធានមនុស្ស ប្រព័ន្ធស្រោចស្រព គមនាមនាគមន៍ដឹកជញ្ជូន និងទូរគមនាគមន៍ និងអគ្គិសនីជាដើម។
ឯកឧត្ដម Norbert Barthle បានជម្រាបជូនសម្ដេចតេជោនាយករដ្ឋមន្ត្រីថា ប្រទេសអាល្លឺម៉ង់ នៅជាមួយសម្ដេចតេជោជានិច្ច ជាពិសេសនៅជាមួយសម្ដេចតេជោក្នុងការជួយដល់កម្ពុជា លើវិស័យផលិតកម្មកសិកម្ម អគ្គិសនីប្រើប្រាស់ដោយផ្ទាំងសូឡា ប្រព័ន្ធស្រោចស្រព និងជំរុញការវិនិយោគនៅកម្ពុជា ព្រមទាំងការជួយដោះស្រាយបញ្ហាកកស្ទះចរាចរណ៍ផងដែរ។ ឯកឧត្ដមបានបន្តទៀតថា យើងនៅតែដើរជាមួយគ្នា និងសហការជាមួយគ្នា៕
ដោយ ជឹម ណារី
