ភ្នំពេញ ថ្ងៃទី២២ ខែមករា ឆ្នាំ២០១៩ — ក្នុងឱកាសស្នាក់អាស្រ័យ និងបំពេញទស្សនិកច្ចផ្លូវការនៅសាធារណរដ្ឋប្រជាមានិតចិន នាព្រឹកថ្ងៃទី២២ ខែមករា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យលោក ឆេន ស៊ីឈីង (Chen Siqing) ប្រធានធនាគារចិន ចូលជួបសម្ដែងការគួរសម និងពិភាក្សាការងារ។
ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានប្រាប់អ្នកយកព័ត៌មានក្រោយជំនួបនោះថា ក្នុងជំនួបនោះ Chen Siqing បានបង្ហាញនូវក្តីរីករាយ ដែលទទួលបានការអនុញ្ញាតពីសម្តេចនាយករដ្ឋមន្ត្រីចូលជួបសម្តែងការគួរសម ជាពិសេសបានអរគុណសម្តេចនាយករដ្ឋមន្ត្រី ដែលបានថ្លែងប្តេជ្ញាជំរុញការវិនិយោគបន្ថែមទៀត។
លោក Chen Siqing បានមានប្រសាសន៍ថា ធនាគាររបស់លោកបានធ្វើការជាច្រើន ឆ្នាំមកហើយនៅក្នុងប្រទេសកម្ពុជា។ លោកបានលើកឡើងថា នៅក្នុងប្រទេសចិន បានចាត់ ទុកសម្តេចតេជោ ហ៊ុន សែន ជាមិត្តភក្តិចាស់របស់ប្រទេសចិន ហើយកន្លងមកនេះភាគីចិន តែងតែចាត់ទុកទំនាក់ទំនងសម្តេចនាយករដ្ឋមន្ត្រី ជាមួយឯកឧត្តមប្រធានាធិបតី ស៊ី ជីនពីង មានលក្ខណៈជិតស្និទ្ធនិងស្និទ្ធស្នាល។
លោកបានអរគុណចំពោះការគាំទ្រកន្លងមករបស់សម្តេចតេជោ ហ៊ុន សែន ក៏ដូចជា រាជរដ្ឋាភិបាល ហើយលោកនឹងប្រឹងប្រែងធ្វើយ៉ាងណាឱ្យគំនិតផ្តួចផ្តើមនយោ បាយខ្សែក្រវាត់ មួយ ផ្លូវមួយ និងយុទ្ធសាស្ត្រចតុកោណរបស់រាជរដ្ឋាភិបាលកម្ពុជា មានការស៊ីសង្វាក់ និង ប្រទាក់ក្រឡាគ្នា។ លោក Chen Siqing បានលើកឡើងដែរថា ក្រោយពេលបាន ស្តាប់ប្រសាសន៍របស់សម្តេចហើយ លោកបានវាយតម្លៃកម្ពស់ចំពោះ ចក្ខុវិស័យដឹកនាំ របស់សម្តេច ពោលសម្តេចដែលមានចក្ខុវិស័យដឹកនាំច្បាស់លាស់ ក្នុងការធ្វើឱ្យប្រទេស កម្ពុជា មានការអភិវឌ្ឍក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០។ លោកបន្តថា ធនាគាររបស់លោក នឹងបន្តវិនិយោគនៅក្នុងប្រទេសកម្ពុជា ជាពិសេស គឺផ្តល់ទុនដល់ក្រុមហ៊ុនវិនិយោគនានា។
សម្តេចតេជោនាយករដ្ឋមន្ត្រី ក៏បានមានប្រសាសន៍ផងដែរ អំពីតម្រូវការនៃទុនជាច្រើន ហើយសព្វថ្ងៃនេះធនាគារចិនមានទុនច្រើន ហើយមានសាខាច្រើននៅលើពិភពលោក ដូច្នេះធនាគារចិនអាចជួយសម្រេចនូវតម្រូវការមួយនេះ។ ឆ្នាំនេះប្រទេសចិននឹងរៀបចំកិច្ចប្រជុំកំពូលនៃខ្សែក្រវាត់មួយ ផ្លូវមួយ នាខែមេសា ខាងមុខនេះ ធនាគារចិន នឹងមានការចុះកិច្ចព្រមព្រៀងមួយចំនួន ដើម្បីផ្តល់ឥណទានដល់ក្រុមហ៊ុននានាដែលស្ថិតនៅក្នុងគម្រោងនយោបាយខ្សែក្រវាត់ និងផ្លូវ។ សម្តេចតេជោ ហ៊ុន សែន ក៏បានអញ្ជើញប្រធានធនាគារចិន ទៅទស្សនកិច្ចនៅកម្ពុជា ដើម្បីពិនិត្យគម្រោងវិនិយោគនានា ដែលគាំទ្រដោយធនាគារចិន។
សម្តេចតេជោនាយករដ្ឋមន្ត្រី ក៏បានមានប្រសាសន៍ដែរថា សម្តេចចង់ឃើញឱ្យមាន ការចុះកិច្ចព្រមព្រៀងនៃគម្រោងទាំងឡាយដែលស្ថិតនៅក្រោមគម្រោងនយោបាយខ្សែក្រវាត់ និងផ្លូវជាពិសេសសម្តេចបានចាត់តាំងឱ្យក្រសួងសេដ្ឋកិច្ច និងហិរញ្ញវត្ថុ ដែលជាស្ថាប័ន របស់រដ្ឋធ្វើការជាមួយធនាគារចិន។ សម្តេចតេជោនាយករដ្ឋមន្ត្រីបានចាប់អារម្មណ៍ ចំពោះការប្រកាសរបស់ឯកឧត្តមប្រធានាធិបតី ស៊ី ជីនពីង ក្នុងការបង្កើតវិថីសូត្រ សតវត្សរ៍ទី២១នេះឡើង ដែលជាចំណុចដ៏សំខាន់សម្រាប់ការអភិវឌ្ឍប្រទេសជាសមាជិក។ សម្រាប់កម្ពុជាសម្តេចតេជោ ហ៊ុន សែន បានមានប្រសាសន៍ថា អាទិភាពរបស់កម្ពុជា ទាំងអស់ទាំងរដ្ឋ និងឯកជន គឺផ្តោតសំខាន់ទៅលើវិស័យធំៗចំនួន៤ គឺការអភិវឌ្ឍធនធាន មនុស្ស ទឹក ផ្លូវ និងភ្លើង ដែលជាវិស័យសំខាន់ៗសម្រាប់រាជរដ្ឋាភិបាល។
សម្តេចតេជោនាយករដ្ឋមន្ត្រី បានបង្ហាញគាំទ្រឱ្យមានការចុះហត្ថលេខារវាងធនាគារចិន ជាមួយស្ថាប័នរបស់កម្ពុជានូវរាល់គម្រោងទាំងឡាយ ដែលស្ថិតក្រោមនយោបាយខ្សែក្រវាត់ និងផ្លូវ ក៏ដូចជាស្ថិតនៅក្នុងគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជា។ បើគម្រោងវិនិយោគស្ថិតនៅក្រោមនយោបាយខ្សែក្រវាត់ និងផ្លូវទទួលបានជោគជ័យ នោះគំនិតផ្តួចផ្តើមខ្សែក្រវាត់ និងផ្លូវ របស់ឯកឧត្តមប្រធានាធិបតីចិន ក៏ជោគជ័យផងដែរ៕
ដោយ ជឹម ណារី
