ភ្នំពេញ ថ្ងៃទី២២ ខែមករា ឆ្នាំ២០១៩ -ក្នុងឱកាសស្នាក់អាស្រ័យ និងបំពេញទស្សនកិច្ចផ្លូវការនៅសាធារណរដ្ឋប្រជាមានិតចិន នារសៀលថ្ងៃចន្ទ ១រោច ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២១ ខែមករា ឆ្នាំ២០១៩ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា បានអនុញ្ញាតឱ្យលោកជំទាវ Gu Xiulian ប្រធានសមាគមមិត្តភាពចិន-កម្ពុជា និង គណៈប្រតិភូចូលជួបសម្ដែងការគួរសម និងពិភាក្សាការងារ។
តាមប្រភពពីទូរទស្សន៍ជាតិកម្ពុជា(TVK) បានឱ្យដឹងថា លោកជំទាវ Gu Xiulian បានមានប្រសាសន៍ថ្លែងអំណរគុណយ៉ាងជ្រាលជ្រៅ ជូនចំពោះសម្តេចតេជោនាយករដ្ឋមន្រ្តី ដែលបានអនុញ្ញាតឱ្យថ្នាក់ដឹកនាំ នៃសមាគមមិត្តភាពចិន-កម្ពុជា បានជួបសម្ដែងការគួរសម និង សំណេះសំណាល នៅទីក្រុងប៉េកាំងប្រទេសចិន ក្នុងឱកាសដែលរូបសម្តេចអញ្ជើញមក បំពេញទស្សនកិច្ចផ្លូវការដ៏មមាញឹកបំផុតនេះ។ លោកជំទាវក៏បានជម្រាបជូនសម្តេចតេជោ នាយករដ្ឋមន្រ្តី ពីភាពរីកចម្រើនធំធាត់ពីមួយថ្ងៃទៅមួយថ្ងៃ បន្ទាប់ពីប្រទេសទាំងពីរចិន-កម្ពុជា បានបង្កើតឡើងនូវសមាគមមិត្តភាពចិន-កម្ពុជា កាលពីពេលកន្លងទៅ។
លោកជំទាវក៏បានជម្រាបជូនសម្តេចតេជោដែរ ថា សមាគមមិត្តភាពចិន-កម្ពុជា មាន សមាជិកចូលរួមគឺជាអតីតមន្រ្តីការទូតរបស់ប្រទេសចិន ប្រចាំកម្ពុជា និងអ្នកមួយចំនួនទៀត ក៏ជាអ្នកធ្លាប់បំពេញការងារមនុស្សធម៌មួយចំនួន ក្នុងប្រទេសកម្ពុជាផងដែរ។ លោកជំទាវក៏ បានសម្ដែងនូវការអបអរសាទរ ជូនចំពោះគណបក្សប្រជាជនកម្ពុជាដែល ទទួលបានជ័យ ជម្នះភ្លូកទឹកភ្លូកដី ក្នុងការបោះឆ្នោតសកលឆ្នាំ២០១៨កន្លងទៅ។
សម្តេចតេជោនាយករដ្ឋមន្រ្តីមានប្រសាសន៍សម្ដែងនូវការវាយតម្លៃខ្ពស់ និងកោតសរសើរចំពោះថ្នាក់ដឹកនាំ នៃសមាគមមិត្តភាពចិន-កម្ពុជាដែលបានរួមចំណែកយ៉ាងសកម្មក្នុងការជួយដល់បុព្វហេតុមនុស្សធម៌ ក្នុងប្រទេសកម្ពុជាកាលពីពេលកន្លងទៅ។ សម្តេចតេជោនាយករដ្ឋមន្រ្តីក៏បានសម្ដែងនូវសេចក្តីសប្បាយរីករាយផងដែរ ដោយបានជួបថ្នាក់ដឹកនាំនៃសមាគមមិត្តភាពចិន-កម្ពុជា ជាថ្មីម្តងទៀត បន្ទាប់ពីបានជួបក្នុងព្រឹត្តិការណ៍ នៃការប្រារព្ធខួប៦០ឆ្នាំ នៃទំនាក់ទំនងការទូតរវាប្រទេសទាំងពីរ នៅរាជធានីភ្នំពេញ៕
ដោយជឹម ណារី 
