ភ្នំពេញ ថ្ងៃទី២១ ខែមករា ឆ្នាំ២០១៩ -ប្រភពពីទូរទស្សន៍ជាតិកម្ពុជា (TVK) បានឱ្យដឹងថា ក្នុងឱកាសនៃការស្នាក់នៅបំពេញទស្សនកិច្ចផ្លូវការ នៅទីក្រុងប៉េកាំង សាធារណរដ្ឋប្រជាមានិតចិននោះ នៅ រសៀលថ្ងៃអាទិត្យ ១៥កើត ខែបុស្ស ឆ្នាំចសំរឹទ្ធិស័ក ព.ស២៥៦២ ត្រូវនឹងថ្ងៃទី២០ ខែមករា ឆ្នាំ២០១៩ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជួបសំណេះសំណាលជាមួយនិស្សិតកម្ពុជាចំនួន ៤៦៨នាក់ ដែលកំពុង សិក្សានៅប្រទេសចិន។
តំណាងសមាគមនិស្សិតកម្ពុជា ដែលកំពុងសិក្សានៅប្រទេសចិន មានប្រសាសន៍ថា រហូតមកដល់ពេលនេះមាននិស្សិតកម្ពុជា ដែលកំពុងសិក្សាតាមបណ្តាទីក្រុង ខេត្តទាំង២០ របស់ប្រទេសចិន មានចំនួនជាង ១.៦៤៤នាក់ ហើយចំពោះនិស្សិតទាំងអស់ដែលមានវត្តមាន ក្នុង ពិធីសំណេះសំណាលនេះ គឺពិតជាមានភ័ព្វវាសនាខ្លាំងណាស់ ដោយបានជួបផ្ទាល់ជា មួយ សម្តេចតេជោ បើទោះបីជារូបសម្តេចមានការងារមមាញឹកក្តី។
តំណាងនិស្សិតក៏បានជម្រាបជូនសម្តេចតេជោនាយករដ្ឋមន្រ្តី អំពីសកម្មភាពមួយចំនួន ដែលនិស្សិតកម្ពុជាបាននិងកំពុង សិក្សាក្នុងប្រទេសចិន ក្នុងការចូលរួមចំណែកជាមួយរាជរដ្ឋា ភិបាល ក្នុងការធ្វើកិច្ចសហប្រតិ បត្តិការជាមួយភាគីម្ចាស់ផ្ទះ ពិសេសការរៀបចំប្រារព្ធខួប៦០ ឆ្នាំនៃទំនាក់ទំនងការទូតនៃ ប្រទេសទាំងពីរកម្ពុជា-ចិន និងប្រារព្ធខួប ៤០ឆ្នាំ នៃទិវាមហាជ័យ ជម្នះ ៧ មករា ១៩៧៩-៧ មករា ២០១៩។
នៅចំពោះមុខនិស្សិត សម្តេចតេជោនាយករដ្ឋមន្រ្តី មានប្រសាសន៍វាយតម្លៃខ្ពស់ និងកោតសរសើរចំពោះនិស្សិតទាំងអស់ ដែលមានស្មារតីស្រឡាញ់ សាមគ្គីគ្នា និងចេះជួយគ្នាទៅវិញទៅមក ខណៈដែលក្មួយៗកំពុងសិក្សានៅក្នុងប្រទេសចិន។ សម្តេចមានប្រសាសន៍គាំទ្រចំពោះការលើកឡើង របស់តំណាងនិស្សិតដែរថា នៅផ្ទះម្តាយទីទៃ នៅព្រៃម្តាយតែមួយ គឺពិត ជាមានអត្ថន័យយ៉ាងជ្រាលជ្រៅខ្លាំងណាស់ ចំពោះក្មួយៗទាំងអស់ ដែលបានធ្វើដំណើរចាកចេញពីមាតុភូមិទៅបន្តការសិក្សា ចាកចោលផ្ទះសម្បែងនិងមាតុប្រទេស។ ទន្ទឹមនិងនេះសម្តេចតេជោនាយករដ្ឋមន្រ្តីមានប្រសាសន៍ផងដែរថា ដំណើរទស្សនកិច្ចរបស់សម្តេចមកកាន់ប្រ ទេសចិននៅពេល ដែលចាត់ទុកថាជាដំណើរទស្សនកិច្ចផ្លូវការលើកទី៦នោះ សម្តេចនឹងជួប ចរចាជាមួយភាគីចិនទាំងអស់ ក្នុងការកៀរគរ រកកម្ចីឥណទាន ក្នុងការតបណ្តាញចែកចាយអគ្គិសនីឱ្យបានគ្របដណ្តប់នៅទូទាំងព្រះរាជាណាចក្រកម្ពុជា សំដៅធ្វើយ៉ាងណាឱ្យតម្លៃ អគ្គិសនីកាន់តែចុះថោក នៅបណ្តាឆ្នាំខាងមុខៗ ដើម្បីរួមចំណែកដល់ការបែងចែកផ្លែផ្កា នៃកំណើនសេដ្ឋកិច្ច និងការកាត់បន្ថយភាពក្រីក្រ របស់ប្រជាជនកម្ពុជា។
សម្តេចតេជោក៏បានណែនាំដល់និស្សិតទាំងអស់ ត្រូវបន្តតាមដានពីការវិវត្តន៍ នៃ សភាពការណ៍សកលលោក។ សម្តចតេជោថ្លែងថា បើទោះបីមានប្រទេសមួយចំនួន រង គ្រោះដោយវិបត្តិសេដ្ឋកិច្ច ឬសង្រ្គាមពាណិជ្ជកម្មក្តី គឺយើងមិនត្រូវឱ្យកើតមានឡើងនៅក្នុង ប្រទេសកម្ពុជានោះទេ ពោលគឺយើងត្រូវខិតខំថែរក្សានូវសុខសន្តិភាព ស្ថិរភាពនយោបាយ ដើម្បីជំរុញកំណើន និងការអភិវឌ្ឍសេដ្ឋកិច្ចឱ្យកាន់តែរឹងមាំទ្វេឡើងថែមទៀត។ សម្តេច តេជោនាយករដ្ឋមន្រ្តីបានមានប្រសាសន៍នៅចំពោះមុខនិស្សិតដែរថា ការបណ្តុះបណ្តាល ធនធានមនុស្ស នៅតែជាកត្តាយុទ្ធសាស្រ្តយូរអង្វែងរបស់កម្ពុជា ហើយសម្តេចនៅតែចាប់ដៃគូ ជាមួយចិន ក្នុងការបណ្តុះបណ្តាលធនធានមនុស្សជួយដល់ប្រទេសកម្ពុជា ក្នុងន័យនេះ សម្តេចនឹងបន្តចរចាជាមួយភាគីចិន ដើម្បីបន្តជួយបណ្តុះបណ្តាលធនធានមនុស្សដល់កម្ពុជា សម្រាប់រយៈពេលវែងតទៅមុខទៀត។
សម្តេចតេជោនាយករដ្ឋមន្រ្តីមានប្រសាសន៍សង្កត់ធ្ងន់ថា ការជួយរបស់ចិនដល់កម្ពុជា គឺដើម្បីភាពរីកចម្រើនខាងសេដ្ឋកិច្ច ពិសេសគឺដើម្បីពង្រឹងនូវឯករាជ្យភាពរបស់កម្ពុជា ដើម្បី បញ្ចៀសពីការប៉ុនប៉ងផ្តួលរំលំពីសំណាក់បរទេសមួយចំនួន ដែលមានមហិច្ឆតាផ្តួលរំលំលើ គ្រប់រូបភាពទាំងអស់។ សម្តេចតេជោលើកឡើងដែរថា គ្រាន់តែចិនវិនិយោគនៅខេត្តព្រះ សីហនុ ឬកន្លែងដទៃ គេថារាជរដ្ឋាភិបាលកាត់ដីឱ្យចិន ខណៈដែលខ្លួនមិនបានជួយអ្វីសោះ ដល់កម្ពុជា។ សម្តេចតេជោបន្តថា លើសកលលោកកំពុងតែធ្វើការទាក់ទាញភ្ញៀវទេសចរចិន ខ្លាំងណាស់ រាប់ទាំងប្រទេសជិតខាងកម្ពុជា ក៏កំពុងតែមានការទាក់ទាញ់ភ្ញៀវទេសចរ និងអ្នក វិនិយោគទុនចិនផងដែរ។ ជាមួយនឹងការថ្លែងនោះដែរ សម្តេចតេជោនាយករដ្ឋមន្រ្តីមានប្រសា សន៍លើកឡើងដែរថា ការតាក់តែងក្រមប្រតិបត្តិសមុទ្រខាងត្បូង(COC) គ្រោងនឹងបញ្ចប់ក្នុង រយៈពេលប្រមាណ៣ឆ្នាំខាងមុខ ដែលជាការលើកឡើងរបស់នាយករដ្ឋមន្រ្តីចិន នៅចំពោះ មុខមេដឹកនាំអាស៊ាន ក្នុងកិច្ចប្រជុំកំពូលអាស៊ាន នៅសិង្ហបុរីកាលពីពេលកន្លងមក។ សម្តេច តេជោក៏បានអំពាវនាវដល់និស្សិតកម្ពុជាទាំងអស់ដែលសិក្សានៅក្នុងប្រទេសចិន ក្នុងនោះទី១- ត្រូវខិតខំគោរពច្បាប់និងវិន័យរបស់ប្រទេសចិន។ ទី២-ខិតខំជួយយកអាសាគ្នាទៅវិញទៅមក ។ ទី៣-ខិតខំសិក្សា និងក្តោបឱកាសនៃការសិក្សាឱ្យកាន់តែរីកចម្រើនថែមទៀត៕
ដោយ ជឹម ណារី
