សម្តេចតេជោនាយករដ្ឋមន្រ្តី អញ្ជើញទៅដល់ទីក្រុងប៉េកាំង នៃសាធារណរដ្ឋប្រជាមានិតចិន ប្រកបដោយសុវត្តិភាព

ភ្នំពេញ ថ្ងៃទី២០ ខែមករា ឆ្នាំ២០១៩ — សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណា​ចក្រក​ម្ពុ​ជា​ និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញទៅដល់ទីក្រុងប៉េកាំងហើយ     កា​លពី​វេ​លាម៉ោង១៤ និង២០នាទី ម៉ោងនៅទីក្រុងប៉េកាំង ត្រូវនឹងម៉ោង១៣ និង២០នាទី ម៉ោង​ក្នុង​ប្រ​ទេស​កម្ពុជា នារសៀលថ្ងៃទី២០ ខែ មករា ឆ្នាំ២០១៩ សម្រាប់ដំណើរ​បំពេញ​ទស្សន​កិច្ច​ផ្លូវ​ការ រយៈ​ពេល៣ថ្ងៃ នៅសាធារណរដ្ឋ​ប្រជា​មា​និត​​ចិន។

ប្រភពពីទូរទស្សន៍ជាតិកម្ពុជាបានឱ្យដឹងថា យន្តហោះពិសេសរបស់ព្រះរាជាណាចក្រ​កម្ពុ​ជា បានធ្វើការចុះចតប្រកបដោយ​សុវត្តិ​ភាព នៅអាកាសយានដ្ឋានអន្តរជាតិទីក្រុងប៉េកាំង នៃសាធារណរដ្ឋប្រជាមានិតចិន ក្រោមវត្តមាននៃការធ្វើគារវកិច្ចស្វាគមន៍ យ៉ាង​ស្និទ្ធស្នាល និងរាក់ទាក់បំផុត ពីឯកឧត្តម ខុង សៀ​ន​យ៉ូ អនុរដ្ឋមន្រ្តីក្រសួងការបរទេសចិន ឯក​ឧត្តម វ៉ាង វិនធៀន (Wang Wentian) ឯកអ​គ្គ​រដ្ឋ​ទូតវិសាមញ និងពេញសមត្ថភាព នៃសា​ធារណរដ្ឋ​ប្រជាមានិតចិន ប្រចាំព្រះរាជាណាចក្រ​កម្ពុ​ជា លោកជំទាវ ខែក កែម៉ាលី ស៊ីសូដា ឯកអគ្គ​រាជទូតវិសាមញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋ​ប្រជា​មា​និត​ចិន ព្រមទាំងវត្តមាន ឯកឧត្តម លោកជំទាវ ជាឥស្សរជនជាន់ខ្ពស់រដ្ឋាភិបាលចិន និង​ឥស្សរ​ជនការទូតរបស់ព្រះ​រាជាណា​ចក្រ​កម្ពុជា ប្រចាំសាធារណរដ្ឋប្រជាមានិត​ចិនជាច្រើន​រូប។ ដំណើរបំពេញទស្សនកិច្ចផ្លូវការ រប​ស់សម្តេចតេជោនាយករដ្ឋមន្រ្តី និងគណៈប្រតិភូជាន់ ខ្ពស់ រាជរដ្ឋាភិបាលកម្ពុជា ទៅ​កាន់ទី​ក្រុង​ប៉េកាំង ប្រទេសចិននៅពេលនេះ គឺឆ្លើយតប​តាមការអញ្ជើញពីឯកឧត្តម លី ខឺឈាង នា​យ​ក​រដ្ឋមន្រ្តីចិន ដែលនឹងចាប់ផ្តើមឡើង នៅថ្ងៃ​ទី២១ ​​និង​ថ្ងៃទី២២ ខែមករា ឆ្នាំ២០១៩។ សម្រាប់ដំណើរបំ​ពេ​ញ​​ទស្សនកិច្ចផ្លូវរយៈ​ពេល៣ថ្ងៃ នៅទីក្រុងប៉េកាំង សម្តេចតេជោនាយករដ្ឋមន្រ្តី នឹងជួប​ពិភា​ក្សា​ជាមួយបណ្តាថ្នាក់ដឹក​នាំ​កំពូលៗ របស់ប្រទេសចិន ដូច​ជាឯកឧត្តមប្រធានាធិបតីចិន ស៊ី ជីនពីង ឯកឧត្តម​នាយក​រដ្ឋមន្រ្តី លី ខឺឈាង ឯកឧត្តម​ប្រធានសភា​ប្រឹក្សា​នយោបាយ​ប្រ​ជា​ជន​ចិន​ វ៉ាង យ៉ាង ឯកឧត្តម​ប្រធានគណៈកម្មាធិការអចិ​ន្រៃ្តយ៍ នៃសភាប្រជាជនចិន ឯកឧត្តម សុ​ង​ តាវ រដ្ឋមន្រ្តីក្រសួង​ន​ទំនាក់ទំនងអន្តរជាតិ មជ្ឈឹម​បក្សកុម្មុយនីស្តចិន ព្រមទាំងបណ្តា​ក្រុមហ៊ុន​វិនិយោគ​ចិនជា​ច្រើនទៀត។

គូបញ្ជាក់ដែរថា នេះគឺ​ជាដំណើរបំពេញទស្សនកិច្ចផ្លូវការ ក្រៅប្រទេសលើកទី១ នៅ​ដើម​ឆ្នាំ២០១៩ របស់សម្តេចតេ​ជោនាយករដ្ឋមន្រ្តី។ ឯកសារសំខាន់ៗចំនួន៨ គ្រោងនឹងចុះ​ហត្ថ​​​លេខានៅចំពោះប្រមុខថ្នាក់ដឹកនាំ រដ្ឋាភិបាលនៃប្រទេសទាំងពីរកម្ពុជា-ចិន បន្ទាប់​ពី​​      ប​ញ្ច​ប់​​​ជំនួបពិភាក្សាទ្វេភាគី ដែលធ្វើឡើងនៅថ្ងៃទី២២​ ខែមករាខាងមុខ។ ដំណើរបំពេញ​ទស្សនកិច្ច​ផ្លូ​វ​ការ ទៅកាន់ក្រៅប្រទេសចិននេះទៀតសោត គឺ​ដើម្បី​ពង្រឹង​និងពង្រីក​ទំនាក់​ទំនង កិច្ចសហប្រតិ​បត្តិ​ការលើវិស័យ​នយោ​បាយ សេដ្ឋកិច្ច ពាណិជ្ជ​កម្ម និង​ការទាក់ទាញ​អ្នកវិនិយោគទុន ពីប្រ​ទេ​ស​ចិនមកកាន់ប្រទេសកម្ពុជា ដើម្បីជំរុញកំណើន​នៃការ​អភិវឌ្ឍ​សេដ្ឋកិច្ច និងសង្គម ក្នុងប្រទេ​ស​​កម្ពុជាឱ្យកាន់តែរីកចម្រើនរឹងមាំទ្វេឡើង​ថែម​ទៀត​៕ ដោយ ជឹម ណារី 

ពត៌មានទាក់ទង

ពត៌មានផ្សេងៗ