សៀមរាប ថ្ងៃទី១៦ ខែមករា ឆ្នាំ២០១៩ — ឯកឧត្ដម Takuji Yanagimoto សមាជិកព្រឹទ្ធសភាជប៉ុន បានសម្ដែងនូវការអបអរ សាទរចំពោះជោគជ័យរបស់ព្រះរាជាណាចក្រកម្ពុជា ក្នុងការរៀបចំធ្វើជាម្ចាស់ផ្ទះនៃវេទិកាសភាអាស៊ី-ប៉ាស៊ីហ្វិក លើកទី២៧ (APPF-27) នៅខេត្តសៀមរាប។
ឯកឧត្ដម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានថ្លែងដូច្នេះប្រាប់អ្នកយកព័ត៌មាន បន្ទាប់ពីជំនួបរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្ដម Takuji Yanagimoto សមាជិកព្រឹទ្ធសភាជប៉ុន ចូលជួបសម្ដែងការគួរសម នាព្រឹកថ្ងៃពុធ ១១កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៦ ខែមករា ឆ្នាំ២០១៩ នៅសណ្ឋាគារ Lotus Blanc ខេត្តសៀមរាប។
នៅក្នុងជំនួបនោះដែរ ឯកឧត្ដម Takuji បានគោរពថ្លែងអំណរគុណជូន សម្ដេចតេជោនាយករដ្ឋមន្ត្រី ចំពោះការទទួលស្វាគមន៍យ៉ាងរាក់ទាក់ដល់គណៈប្រតិភូជាន់ខ្ពស់របស់ឯកឧត្ដម មកកាន់ព្រះរាជាណាចក្រកម្ពុជាពេលនេះ។ ឯកឧត្ដមក៏ បានសម្ដែងនូវការអបអរសាទរចំពោះជោគជ័យដែលទទួលបាន ក្នុងការរៀបចំវេទិកាសភាអាស៊ី-ប៉ាស៊ីហ្វិកលើកទី២៧ (APPF-27) នៅទីក្រុងសៀមរាប។
ឯកឧត្ដម Takuji បានជម្រាបជូន សម្ដេចតេជោនាយករដ្ឋមន្ត្រីថា ឯកឧត្ដម បានកត់សម្គាល់ឃើញថា នៅពេលនេះអ្នកវិនិយោគជប៉ុនក៏បានចាប់ផ្ដើមមកវិនិយោគនៅព្រះរាជាណាចក្រកម្ពុជាកាន់តែច្រើន ពិសេសប្រជាពលរដ្ឋ និងប្រជាពលរដ្ឋក៏មានទំនាក់ទំនងកាន់តែល្អផងដែរ។ ជាងនេះទៅទៀត ចំពោះសេដ្ឋកិច្ចកម្ពុជា ក៏កំពុងតែមានសន្ទុះរីកចម្រើនយ៉ាងលឿន ដែលបានឆ្លុះបញ្ចាំងឱ្យឃើញនូវកិច្ចខិតខំប្រឹងប្រែងដ៏ល្អរបស់កម្ពុជា។ ឯកឧត្ដម Takuji ក៏បានគោរពជម្រាបជូនសម្ដេចតេជោនាយករដ្ឋមន្ត្រីបន្តទៀតថា ប្រទេសជប៉ុននឹងបន្តគាំទ្រ និងជួយដល់កម្ពុជាបន្ថែមទៀត។
ជាការឆ្លើយតប សម្តេចតេជោ ហ៊ុន សែន បានថ្លែងអំណរគុណយ៉ាងជ្រាលជ្រៅជូនចំពោះ ឯកឧត្ដម Takuji និងគណៈប្រតិភូទាំងអស់ដែលបានអញ្ជើញមកចូលរួមកិច្ចប្រជុំ វេទិកា APPF-27នេះ។
សម្តេចតេជោនាយករដ្ឋមន្ត្រីក៏បានមានប្រសាសន៍បន្ថែមទៀតថា ប្រទេសជប៉ុនបានដើរតួនាទីសំខាន់ណាស់ក្នុងការស្វែងរកសន្តិភាពឱ្យកម្ពុជា និងបានបញ្ជូនកងកម្លាំងជាលើកដំបូងជួយដល់ប្រទេសកម្ពុជា។ ជាងនេះទៀត បន្ទាប់ពីកម្ពុជាបោះឆ្នោតឆ្នាំ១៩៩៣ ប្រទេសជប៉ុនក៏នៅតែបន្តជួយដល់កម្ពុជា ពិសេសលើផ្នែកហេដ្ឋារចនាសម្ព័ន្ធ និងការអភិវឌ្ឍ៕
ដោយ ជឹម ណារី
