ប្រមុខរាជរដ្ឋាភិបាលកម្ពុជាចែករំលែកអនុសាសន៍៥ចំណុច ក្នុងកិច្ចប្រជុំប្រចាំឆ្នាំលើកទី២៧ នៃវេទិកាអាស៊ី-ប៉ាស៊ីហ្វិក

58

សៀមរាប ថ្ងៃទី១៥ ខែមករា ឆ្នាំ២០១៩ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើការចែករំលែកនូវអនុសាសន៍ចំនួន៥ចំណុច ក្នុងកិច្ចប្រជុំប្រចាំឆ្នាំលើកទី២៧ នៃវេទិកា​អា​ស៊ី-ប៉ាស៊ីហ្វិក នាព្រឹកថ្ងៃទី១៥ ខែមករា ឆ្នាំ ២០១៩ នៅសណ្ឋាគារសុខាខេត្តសៀមរាប ក្នុង​ខណៈ​ដែលកម្ពុជាទទួលធ្វើជាម្ចាស់ផ្ទះជាលើកដំបូងនោះ។

អនុសាសន៍ដែលសម្ដេចតេជោនាយករដ្ឋមន្ត្រីបានចែករំលែកឱ្យអង្គវេទិកាធ្វើការពិចារ​ណា​​​នោះមានរួមមាន៖ ១- ត្រូវរួមគ្នាយកចិត្តទុកដាក់លើតួនាទីរបស់អង្គការសហប្រជាជាតិ តួ​នា​ទី​អាស៊ាន តួនាទីអង្គការមិនមែនរដ្ឋាភិបាល និងវិស័យឯកជន ជាពិសេសគោលដៅ​អភិវឌ្ឍ​ន៍​ប្រកបដោយចីរភាព ការប្រែប្រួលអាកាសធាតុ គ្រោះមហន្តរាយធម្មជាតិ សន្តិសុខស្បៀង និង​ការកាត់បន្ថយភាពក្រីក្រ ដែលបានដាក់ចេញដោយអង្គការសហប្រជាជាតិ។ ២- ត្រូវរួម​គ្នា​លើ​ក​កម្ពស់ការគោរពសិទ្ធិ និងសេចក្ដីថ្លៃថ្នូររបស់មនុស្ស ដូចមានចែងក្នុងធម្មនុញ្ញ និងកតិកា ស​ញ្ញាផ្សេងៗនៃអង្គការសហប្រជាជាតិ ជាពិសេសការមិនជ្រៀតជ្រែកចូលកិច្ចការផ្ទៃក្នុ​ងរប​ស់​​ប្រទេសណាមួយ ឬបង្កើតសកម្មភាពខុសច្បាប់ផ្សេងៗ ដែលបង្កឱ្យមានអស្ថិរភាព ឬភាព​វឹក​វរ​ក្នុ​ង​តំបន់ និងពិភពលោក។ ៣- ត្រូវរួមគ្នាដោះស្រាយជម្លោះដែលកើតឡើង តាមរយៈ​ការចរ​ចា​ដោ​យសន្តិវិធី ឬដោយគោលការណ៍ច្បាប់អន្តរជាតិ ឬតាមរយៈនយោបាយឈ្នះ ឈ្នះ ដែល​ធ្វើឱ្យភាគីជម្លោះទាំងសងខាង ឈ្នះ ឈ្នះ ឬអាចទទួលយកបានទាំងអស់គ្នា​ដោយសុខសន្តិ​ភា​​ព​។ ៤- ត្រូវរួមគ្នាទប់ស្កាត់ និងបង្ក្រាបឱ្យទាន់ពេលវេលា និងមានប្រសិទ្ធភាពនូវ​អំពើ​ភេរ​វក​ម្ម​ និងឧក្រិដ្ឋកម្មឆ្លងដែនគ្រប់ប្រភេទ ការជួញដូរគ្រឿងញៀន ជួញដូរវត្ថុបុរាណ បទល្មើស​ប​ច្ចេ​​កវិទ្យាទូរគមនាគមន៍ ជំងឺឆ្លងគ្រប់ប្រភេទ និងការជួញដូរស្ត្រី និងកុមារ។ ៥- ត្រូវរួមគ្នាលើក​ត​ម្កើងវប្បធម៌ តាមរយៈការផ្លាស់ប្ដូរបទពិសោធន៍រវាងប្រទេសក្នុងតំបន់ ពង្រឹងមិត្តភាព និង​កិ​ច្ច​​សហប្រតិបត្តិការដ៏ជិតស្និទ្ធរវាងបណ្ដាប្រទេសអាស៊ីប៉ាស៊ីហ្វិក ដើម្បីថែរក្សាសុខសន្តិភាព ឱ្យ​បានគង់វង្សនៅក្នុងតំបន់ និងពិភពលោក ឈានឆ្ពោះទៅរកកាអភិវឌ្ឍប្រកបដោយ​ចីរ​ភា​ព​។

សម្ដេចតេជោបានមានប្រសាសន៍ផងដែរថា រាជរដ្ឋាភិបាល និងប្រជាជនកម្ពុជា ពិតជា​មាន​​​កិ​ត្តិយសដ៏​ឧត្ដុងឧត្ដមក្នុងការធ្វើជាម្ចាស់ផ្ទះជាលើកដំបូង សម្រាប់ការរៀបចំកិច្ចប្រជុំ​ប្រចាំ​ឆ្នាំ​លើកទី២៧ នៃវេទិកាអាស៊ីប៉ាស៊ីហ្វិក ដើម្បីរួមគ្នាពិភាក្សាអំពីស្ថានភាពនយោបាយ សង្គម​សេ​ដ្ឋ​កិច្ច បញ្ហាប្រឈមសកល សំដៅធ្វើឱ្យកាន់តែប្រសើរឡើងនូវទំនាក់ទំនងអន្តរជាតិ និងការ​ទូត​សភា ជាពិសេសកិច្ចប្រត្តិបត្តិការ សេដ្ឋកិច្ច វប្បធម៌ ក្នុងតំបន់ដើម្បីសម្រេចបាន​សុខសន្តិ​ភា​ព និងការអភិវឌ្ឍប្រកបដោយចីរភាព។ ពេលនេះនៅក្នុងតំបន់អាស៊ី-ប៉ាស៊ីហ្វិក រួមទាំង​ពិ​ភព​លោកផង កំពុងប្រឈមនិងបញ្ហាសកល ដូចជាសង្គ្រាមណាពិជ្ជកម្ម សង្គ្រាមសព្វាវុធ អំ​ពើ​ភេរវកម្ម ការជួញដូរឆ្លងដែនខុសច្បាប់គ្រប់ប្រភេទ ការប្រែប្រួលអាកាស ធាតុ គ្រោះមហន្ត​រាយ​ធម្មជាតិ អសន្តិសុខស្បៀង និងភាពក្រីក្រ ដែលកំពុងគំរាម កំហែងដល់សន្តិសុខសកល និង​ការអភិវឌ្ឍប្រកបដោយចីរភាពរបស់ពិភពលោក។ ដូច្នេះកិច្ចប្រជុំប្រចាំឆ្នាំលើកទី២៧ នៃ​វេ​ទិ​កាសភាអាស៊ីប៉ាស៊ីហ្វិកនា ពេលនេះ ពិតជាមានសារៈសំខាន់សម្រាប់ប្រទេសនៅក្នុងតំបន់ រួម​ទាំងកម្ពុជាផង ដើម្បីពង្រឹងភាពជា ដៃគូសភាអាស៊ី-ប៉ាស៊ីហ្វិក ឈានទៅសម្រេចបាននូវ​សន្តិ​ភា​ព សន្តិសុខ និងការអភិវឌ្ឍ ប្រកបដោយចីរភាព។

គួរបញ្ជាក់ដែរថា កិច្ចប្រជុំប្រចាំឆ្នាំលើកទី២៧នៃវេទិកាសភាអាស៊ី-ប៉ាស៊ីហ្វិក ដែ​ល​ព្រះ​រា​ជាណាចក្រកម្ពុជាធ្វើជាម្ចាស់ផ្ទះនេះ ក៏មានការអញ្ជើញចូលរួមពីសមាជិកសភា​​មកពី​ប្រទេ​ស​​​​​​ក្នុងតំបន់អាស៊ី-ប៉ាស៊ីហ្វិកចំនួន២១ ដែលប្រព្រឹត្តទៅ  ចាប់ពីថ្ងៃទី១៤ ដល់ថ្ងៃទី១៧ ខែមករា ឆ្នាំ​​២​​​​០​​១៩ ក្រោមប្រធានបទ «ពង្រឹងភាពជាដៃគូសភាដើម្បីសន្តិភាព សន្តិសុខ និងកាអភិវឌ្ឍ​ប្រ​​ក​​ប​ដោយចីរភាព»៕

ដោយ ជឹម ណារី