ប្រមុខរាជរដ្ឋាភិបាលកម្ពុជា លើកទឹកចិត្តឱ្យឯកអគ្គរដ្ឋទូតចិនបន្តស្វែង រកកិច្ចសហប្រតិបត្តិការសម្រាប់ថ្មីៗប្រទេសទាំងពីរ

54

ភ្នំពេញ ថ្ងៃទី២៨ ខែធ្នូ ឆ្នាំ២០១៨ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកទឹកចិត្តឱ្យ ឯកឧត្ដម Wang Wentian ឯកអគ្គរដ្ឋទូតថ្មី នៃសាធារណរដ្ឋប្រជា​មានិ​ត​ចិ​​ន ប្រចាំកម្ពុជា បន្តស្វែងរកនូវកិច្ចសហប្រតិបត្តិការផ្សេងៗទៀតលើគ្រប់វិស័យ ដើម្បីការ​រីក​ច​ម្រើ​ននៃប្រទេសទាំងពីរ។

ឯកឧត្ដម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានថ្លែងដូច្នេះ ប្រាប់​អ្ន​ក​យកព័ត៌មាន បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បា​ន​អនុ​ញ្ញា​តឱ្យឯកឧត្ដម Wang Wentian ឯកអគ្គរដ្ឋទូតថ្មី នៃសាធារណរដ្ឋប្រជា​មានិ​ត​ចិ​​ន ប្រចាំ​ព្រះ​រា​ជាណាចក្រកម្ពុជា ចូលជួបសម្ដែងការគួរសម នាព្រឹកថ្ងៃសុក្រ ៦រោច ខែមិគសិរ ឆ្នាំ​ច សំរឹទ្ធិ​ស័​ក ព.ស២៥៦២ ត្រូវនឹងថ្ងៃទី២៨ ខែធ្នូ ឆ្នាំ២០១៨នេះ នៅវិមានសន្តិភាព។

ក្នុងជំនួបនោះ ឯកឧត្ដម Wang Wentian បានបង្ហាញនូវក្តីមោទន​ភាព និងរីករាយ ដែលរូបឯកឧត្ដម​ត្រូវ​បាន​តែង​តាំងជាឯកអគ្គរដ្ឋទូតចិនប្រចាំកម្ពុជានាពេលនេះ ហើយក៏ ស្របទៅនឹងខួប៦០ឆ្នាំ នៃទំ​នាក់​ទំនងការទូតកម្ពុជា-ចិនផងដែរ។ ក្នុងន័យនេះឯកឧត្ដមក៏បាន បញ្ជាក់ពីការប្តេជ្ញាចិត្តចំ​ពោះ​​​មុខសម្តេចតេជោថា នៅក្នុងការបំពេញបេសកកម្មការទូត នៅកម្ពុជា ឯកឧត្ដម នឹងខិតខំប្រឹង​ប្រែ​ង​ឱ្យអស់ពីសមត្ថភាពធ្វើយ៉ាងណាជំរុញទំនាក់ទំនង រវាងប្រទេសទាំងពីរឱ្យកាន់តែខ្លាំង​ឡើ​ង​ថែមទៀត ដើម្បីផលប្រយោជន៍ជាក់ស្តែង សម្រាប់ប្រជាជននៃប្រទេសទាំងពីរ ជាពិសេ​ស​​កម្ពុជា ដែលជាមិត្តចាស់ មិត្តល្អ និងមិត្តដែកថែបរបស់ចិន។

ជាការឆ្លើយតប សម្តេចតេជោ នាយករដ្ឋមន្ត្រី បានសម្តែងនូវការអបអរសាទរ ជូនចំ​ពោះ​ឯកឧត្ដម Wang Wentian ដែលត្រូវបានរដ្ឋាភិបាលចិន តែងតាំងជាឯកអគ្គរដ្ឋទូត​ប្រ​ចាំ​កម្ពុជា។ សម្តេចក៏បានឯកភាពជាមួយនឹងការលើកឡើង របស់ឯកឧត្ដម Wang Wentian ពាក់​ព័ន្ធ​នឹងទំនាក់ទំនង រវាងកម្ពុជា-ចិន ដោយសម្តេចបានគូសបញ្ជាក់ថា ទំនាក់ទំនងរវាង​ប្រទេ​ស​យើងទាំងពីរ បានវិវឌ្ឍន៍ជាច្រើនដំណាក់មកហើយ រហូតមកដល់ពេលបច្ចុប្បន្ននេះ បាន​ក្លា​យ​ជាដៃគូរយុទ្ធសាស្ត្រគ្រប់ជ្រុងជ្រោយ និងក្លាយជាមិត្តដែកថែបជាមួយគ្នាទៀតផង។

សម្តេច​តេ​ជោនាយករដ្ឋមន្ត្រីក៏​បានលើកទឹកចិត្ត ដល់ឯកឧត្ដម Wang Wentian ក្នុងការ​បំ​ពេ​ញ​បេ​សក​កម្មការទូតរបស់ខ្លួន ធ្វើយ៉ាងណាជំរុញឱ្យទទួលបានជោគជ័យ នូវរាល់គម្រោង ដែ​ល​មេដឹកនាំប្រទេសទាំងពីរ បានចុះហត្ថលេខារួមគ្នារួចមកហើយ។ សម្តេចក៏ស្នើឱ្យ ភាគីចិន បន្ត​ស្វែ​ងរកនូវកិច្ចសហប្រតិបត្តិការផ្សេងៗទៀត លើគ្រប់វិស័យ ដើម្បីការរីកចម្រើននៃប្រទេ​ស​​ទាំ​ង​ពីរ។ សម្តេចក៏បានជូនពរ ឱ្យឯកឧត្ដមឯកអគ្គរដ្ឋទូត ទទួលបានជោគជ័យ ក្នុងការ​បំ​ពេ​ញ​​បេ​សកកម្មការទូតនៅកម្ពុជា៕

ដោយ ជឹម ណារី