សម្ដេចតេជោ ហ៊ុន សែន៖ ការរីកចម្រើរបស់របស់ប្រទេសជាតិ គឺមិនអាចកាត់ផ្តាច់ ពីការចូលរួមរបស់អ្នកសារព័ត៌មានបានឡើយ

ភ្នំពេញ ថ្ងៃទី១០ ខែមករា ឆ្នាំ២០១៩ -ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន មានប្រ​សា​សន៍​ថា ការរីកចម្រើរបស់របស់ប្រទេសជាតិ គឺមិនអាចកាត់ផ្តាច់ពីការចូលរួមរបស់អ្នកសារព័​ត៌មាន​បានឡើយ។

នៅលើបណ្ដាញទំនាក់ទំនងសង្គមហ្វេសប៊ុក នាថ្ងៃទី ១០ ខែមករា ឆ្នាំ២០១៩ សម្ដេច​តេ​ជោ​​នាយករដ្ឋមន្ត្រីបាសរសេរថា នៅល្ងាចថ្ងៃសុក្រស្អែកទី ១១ ខែមករានេះ សម្ដេច​នឹងជួបបងប្អូន និង​ក្មួយៗអ្នកកាសែត នៅក្នុងកម្មវិធីបាយសាមគ្គីមជ្ឈមណ្ឌលនៅកោះពេជ្រ។ សម្ដេចតេជោបានលើកឡើងថា ពិតប្រាកដណាស់ ការរីកចម្រើ​ន​របស់របស់ប្រទេសជាតិ គឺមិនអាចកាត់ផ្តាច់ពីការចូលរួមរបស់បងប្អូន និងក្មួយៗ​អ្នកសារ​ព័ត៌​មាន​បានឡើយ ហើយ យើងបានបាត់បង់ឱកាសកសាងប្រទេសជាច្រើនឆ្នាំមកហើយដោយ​សា​រ​​ស​ង្រ្គាម​។

សម្ដេចតេជោបានបន្ដថា ក្រោយពីប្រទេសជាតិមានសុខសន្តិភាពពេញលេញ គឺយើងត្រូវការទេសចរណ៍ ពា​ណិជ្ជ​ក​រ និងអ្នកវិនិយោគទុនបរទេសជាច្រើនមកវិនិយោគ នៅកម្ពុជា។ ដូច្នេះការចូលរួមផ្សព្វផ្សាយ​ព័​ត៌​មានវិជ្ជមានពិតប្រាក គឺកាន់តែផ្តល់នូវទំនុកចិត្ត ដល់ទេសចរបរទេស និងវិនិយោគគិន​បរ​ទេ​ស។ សម្ដេចតេជោបានបន្ដទៀតថា “ខ្ញុំសូមអរគុណបងប្អូន និងក្មួយៗអ្នកសារព័ត៌មានជាតិ និងអន្តរជាតិទាំងអស់ រួមទាំង​បណ្តា​ញព័ត៌មានអនឡាញ( Online News ) និងអ្នកប្រើប្រាស់បណ្តាញ​សង្គម​​ទាំងអស់ (Soci​a​l Networks) ដែលបានចូលរួមផ្សព្វផ្សាយអំពីកម្ពុជាទៅកាន់ពិភពលោកក្នុងផ្លូវវិជ្ជមាន ដើម្បី​ប្រ​ទេសជាតិយើងកាន់តែរីកចម្រើនលឿនទៅមុខ”។ សម្ដេចតេជោបានបន្ថែមថា នៅក្នុងឆ្នាំ​សកលថ្មី ២០១៩ នេះ សម្ដេច និងសម្ដេចកិត្ដិព្រឹទ្ធបណ្ឌិត សូមជូនពរដល់បងប្អូន និងកូនក្មួយ អ្នកសារព័ត៌មានជាតិ និងអន្តរជាតិ​ទូទាំងប្រទេស​ទទួ​ល​​បានជោគជ័យក្នុងភាកិច្ចការងារ និង មានសុខសុភមង្គលក្នុងក្រុមគ្រួ​សា​រគ្រប់ៗគ្នា។

គួរបញ្ជាក់ដែរថា ក្នុងជួបរវាងសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និង ​អ្នកព័ត៌មាន នាថ្ងៃទី១១ ខែមករា ឆ្នាំ២០១៩ខាងមុខ នឹងមានអ្នកសារព័ត៌មានចំនួនប្រមាណ ៥.០០០​នា​ក់ចូលរួម។ បើយោងតាមស្ថិតិឆ្នាំ២០១៨ កម្ពុជាមានសារព័ត៌មានជាតិ​ចំនួន៣​​៥៣​អង្គភាព ទស្សនាវដ្ដីជាតិមានចំនួន ១២៦អង្គភាព ព្រឹត្តិបត្តិចំនួន ២១អង្គភាព កាសែត​អន្តរ​ជាតិ ៤៤អង្គភាព ទស្សនាវដ្ដីអន្តរជាតិចំនួន ៦១អង្គភាព សមាគមអ្នកសារព័ត៌មានចំនួន ៤០​អង្គភាព ទីភ្នាក់ងារសារព័ត៌មានបរទេសចំនួន ១៨អង្គភាព រោងពុម្ភ និងគ្រឹះស្ថានបោះពុម្ភ  ១២​៤អង្គភាព ស្ថានីយទូរទស្សន៍មានផ្សាយផ្ទាល់នៅរាជធានីភ្នំពេញ ចំនួន២២ស្ថានីយ ផ្សា​យ​បន្តពីរាជធានីភ្នំពេញទៅខេត្តមានចំនួន១៣២ស្ថានីយ។ ទូរទស្សន៍ខ្សែកាបទាំងនៅរាជ​ធា​នី ខេត្ត មានចំនួន ១៣៣ស្ថានីយ។ ស្ថានីយ៍វិទ្យុ FM នៅរាជធានីភ្នំពេញមានចំនួន ៨០ស្ថានីយ នៅ​តាមខេត្តមាន ២៥៤ស្ថានីយ និងស្ថានីយវិទ្យុAM មានចំនួន ១ស្ថានីយ៕

ដោយ ជឹម ណារី

ពត៌មានទាក់ទង

ពត៌មានផ្សេងៗ