AKP ភ្នំពេញ ថ្ងៃទី០៧ ខែធ្នូ ឆ្នាំ២០១៨ — សម្ដេចមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានស្នើឱ្យសមាគម វៀតណាម-កម្ពុជា បន្តខិតខំពង្រីកសកម្មភាពរបស់ខ្លួនក្នុងការបន្តគាំទ្រដល់កិច្ចសហប្រតិបត្តិការទ្វេភាគី រវាងប្រទេសទាំងពីរ។
សម្ដេចតេជោ បានស្នើឡើងយ៉ាងដូច្នេះ ក្នុងខណៈដែលសម្ដេចបានអនុញាតឱ្យគណៈប្រតិភូសមាគម វៀតណាម-កម្ពុជា ចូលជួបសំដែងការគួរសម នារសៀលថ្ងៃទី០៧ ខែធ្នូ ឆ្នាំ២០១៨ ក្នុងឱកាស ដែលសម្តេចតេជោបានអញ្ជើញទៅបំពេញទស្សនកិច្ចនៅទីក្រុងហាណូយ ប្រទេសវៀតណាម នេះបើយោងតាមប្រភពពីទូរទស្សន៍ជាតិកម្ពុជា។
នៅក្នុងជំនួបនេះ តំណាងសមាគម វៀតណាម-កម្ពុជា បានគោរពជម្រាបជូនសម្តេចនាយករដ្ឋមន្ត្រីថា សមាគមវៀតណាម-កម្ពុជា គឺមាន សមាជិកជាច្រើនដែលធ្លាប់ធ្វើការនៅកម្ពុជា ឬជាកូន ជាចៅ អតីតកម្មាភិបាលកងទ័ពវៀតណាម ដែលធ្លាប់បានចូលរួមចំណែកជួយរំដោះប្រទេសកម្ពុជា ចេញពីរបបប្រល័យពូជសាសន៍ប៉ុល ពត។ ជាមួយនេះ នៅក្នុងជំនួបសម្ដែងការគួរសមនេះ ក៏មានគោលដៅ ដើម្បីបង្កើនទំនាក់ទំនង រវាងប្រជាជន និងប្រជាជន ជាពិសេសសមាគមធ្លាប់ជួបជាមួយសម្តេចពីមុនហើយដែរ ហើយការជួប ជាមួយសម្តេចតេជោនៅពេលនេះ សម្តេចបានបើកច្រកឱ្យសមាជិកនៃសមាគម បានស្រាវជ្រាវអំពីកូនចៅ អតីតកម្មាភិបាល កងទ័ពវៀតណាម ដែលបានបាត់បង់គ្រួសារ សាច់ញាតិ ទាំងនៅក្នុងប្រទេសកម្ពុជា ក៏ដូចជានៅវៀតណាមផងដែរ។ តំណាងសមាគម ក៏បានរាយការណ៍ជូន សម្តេចតេជោនាយករដ្ឋមន្ត្រីថា សមាគមនេះ បានដើរតួនាទីយ៉ាងច្រើន ទាំងនៅក្នុងប្រទេសវៀតណាម និង កម្ពុជា ជាពិសេសបានរួមចំណែកក្នុងការពង្រឹងទំនាក់ទំនង នៃកិច្ចសហប្របត្តិការទ្វេភាគី រវាងប្រទេសទាំងពីរ ហើយសមាគមនេះ ក៏មានអតីតដែលជាឯកអគ្គរដ្ឋទូតវៀតណាមធ្លាប់ប្រចាំនៅកម្ពុជាផងដែរ។
សម្តេចតេជោ បានសម្តែងការកោតសរសើរពីការរីកចម្រើនរបស់សមាគម និងស្នើឱ្យសមាគម បន្តខិតខំពង្រីកសកម្មភាពរបស់ខ្លួនក្នុងការបន្តគាំទ្រ ដល់កិច្ចសហប្រតិបត្តិការទ្វេភាគី រវាងប្រទេសទាំងពីរ៕
ដោយ ជឹម ណារី
