សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញដល់ទីក្រុងប្រ៊ុសែល ប្រទេសប៊ែលហ្សិក ប្រកបដោយសុវត្តិភាពហើយកាលពីវេលាម៉ោង ៧និង៤០នាទី ម៉ោងនៅទីក្រុងប្រ៊ុសែល ប្រទេសប៊ែលហ្សិក ត្រូវនឹងម៉ោង១២និង៤០នាទី ម៉ោងនៅរាជធានីភ្នំពេញ ព្រះរាជាណាចក្រកម្ពុជា ព្រឹកថ្ងៃទី១៧ ខែតុលា ដើម្បីអញ្ជើញចូលរួមកិច្ចប្រជុំកំពូលអាស៊ីអឺរ៉ុប លើកទី១២ ដែល និងចាប់ផ្តើមនៅថ្ងៃទី១៨-១៩ ខែតុលា។
នៅអាកាសយានដ្ឋានអន្តរជាតិអ៊ិចសេគុយជេត (Execujet) ទីក្រុងប្រ៊ុចសែល វត្តមាន នៃការអញ្ជើញដល់របស់សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រូវបានការធ្វើគារវកិច្ចស្វាគមន៍យ៉ាងកក់ក្តៅបំផុត ពីឯកឧត្តម លោកជំទាវ ឥស្សរជនជាន់ ខ្ពស់រដ្ឋាភិបាលប៊ែលហ្សិក និងឥស្សរជនការទូតរបស់ព្រះរាជាណាចក្រកម្ពុជា ប្រចាំប្រទេសប៊ែលហ្សិកជាច្រើនរូប។ តាមកម្មវិធី ដែលបានគ្រោងទុក ក្រៅពីការអញ្ជើញចូលរួមកិច្ចប្រជុំកំពូលអាស៊ី-អឺរ៉ុប លើកទី១២ សម្តេចតេជោ ហ៊ុន សែន នាយករដ្ឋមន្រ្តី មានគម្រោងជួបពិភាក្សាទ្វេភាគី ជាមួយតំណាងក្រុមប្រឹក្សាធុរកិច្ចអាស៊ាន សហភាពអឺរ៉ុប ជួបអនុប្រធានគណៈកម្មការអឺរ៉ុប ទទួលបន្ទុកការបរទេស និងគោលនយោបាយសន្តិសុខ ជួបពិភាក្សាទ្វេភាគីជាមួយនាយករដ្ឋមន្រ្តីចិន រុស្សី ហុងគ្រី ន័រវែស ឆែក អេស្តូនី ប្រធានាធិបតីបារាំង រួមទាំងជួបសំណេះសំណាលជាមួយ សហគមន៍ខ្មែររស់នៅសហភាពអឺរ៉ុប។
សូមបញ្ជាក់ដែរថា នៅសណ្ឋាគាររ៉ាឌីសិន ដែលជាទីកន្លែងស្នាក់អាស្រ័យរបស់សម្តេចតេជោនាយករដ្ឋមន្រ្តី ប្រជាពលរដ្ឋខ្មែររស់នៅទីក្រុងប្រ៊ុយសែល បានអញ្ជើញទទួលនូវការធ្វើគារវកិច្ចវស្វាគមន៍យ៉ាងកក់ក្តៅបំផុត ចំពោះវត្តមានរបស់ សម្តេចតេជោ នាយករដ្ឋមន្រ្តី ក្នុងក្តីស្រឡាញ់នឹករលឹកយ៉ាងជ្រាលជ្រៅបំផុត ពិសេសក្នុងក្តីគោរពស្រឡាញ់ និងដឹងគុណបំផុតចំពោះសម្តេចតេជោ នាយករដ្ឋមន្រ្តី។ ប្រជាពលរដ្ឋបានបង្ហាញនូវភាពស្និទ្ធស្នាលបំផុត តាមរយះការបញ្ចេញកាយវិកា និងពាក្យពេជន៍ ដែលផុសចេញ ពីទឹកចិត្តរបស់ប្រជាពលរដ្ឋផ្ទាល់ ចំពោះសម្តេច៕
