បន្ទាប់មកនៅរសៀលថ្ងៃទី ២៨ កញ្ញា ដដែលនោះដែរ សម្តេចតេជោនាយករដ្ឋមន្រ្តី បានអញ្ជើញជួបពិភាក្សាទ្វេភាគីជាមួយ ឯកឧត្តម ខាតហ្កា ប្រាសាដសាម៉ាអូលី (Khadga Prasad Shama Oli) នាយករដ្ឋមន្រ្តីនេប៉ាល់។ សម្តេចតេជោមានប្រសាសន៍សំដែងនូវការរីករាយ ដោយបានជួបពិភាក្សាទ្វេភាគីជាមួយ ឯកឧត្តមនាយករដ្ឋមន្រ្តី ក្នុងឱកាស នៃការអញ្ជើញចូលរួម មហាសន្និបាតអង្គការសហប្រជាជាតិ លើកទី៧៣ នៅបុរីញ៉ូវយ៉ក សហរដ្ឋអាមេរិក។
សម្តេចតេជោមានប្រសាសន៍ថ្លែង នូវអំណរគុណជូនចំពោះប្រទេសនេប៉ាល ដែលបានបញ្ជូនអ្នកអង្កេតការណ៍របស់ខ្លួន ទៅពិនិត្យមើលដំណើរការបោះឆ្នោតសកលនីតិកាលទី៦ កាលពីពេលថ្មីៗកន្លងទៅ និងបានវាយតម្លៃថាដំណើរការបោះឆ្នោតប្រព្រឹត្តិទៅដោយសេរី ត្រឹមត្រូវ យុត្តិធម៌ តាមបែបប្រជាធិបតេយ្យ និងលទ្ធផលអាចទទួលយកបាន។ សម្តេចតេជោ នាយករដ្ឋ មន្រ្តីមានប្រសាសន៍បន្តថា សម្តេចបានទទួលសំបុត្រអញ្ជើញពីឯកឧត្តមនាយករដ្ឋមន្រ្តី ក្នុងការអញ្ជើញទៅចូលរួមកិច្ចប្រជុំ គណបក្សនយោបាយនិយមកណ្តាល នៅប្រទេសនេប៉ាល់ ក្នុងពេលខាងមុខ និងក្រៅពីអញ្ជើញ ចូលរួមកិច្ចប្រជុំគ្នានោះដែរ សម្តេចគ្រោងនិងបំពេញទស្សនកិច្ចផ្លូវការនៅប្រទេសនេប៉ាល់ ពិសេសបានអញ្ជើញទៅទស្សនាតំបន់ប្រវត្តិរបស់ព្រះពុទ្ធ ព្រះបរមគ្រូនៃយើងផងដែរ។ ក្នុងជំនួបពិភាក្សាគ្នានោះដែរ ប្រមុខដឹកនាំរដ្ឋាភិបាល នៃប្រទេសទាំងពីរ បានស្នើឲ្យរដ្ឋមន្រ្តីក្រសួង ការបរទេស នៃប្រទេសទាំងពីរ ធ្វើការពិភាក្សាគ្នា ជុំវិញការរៀបចំកម្មវិធីនៃដំណើរទស្សនកិច្ច របស់សម្តេចទៅកាន់ប្រទេសនេប៉ាល់ ដែលគ្រោងធ្វើឡើងនៅចុងខែវិច្ឆិកា និងដើមខែធ្នូខាងមុខ ពិសេសការរៀបចំនូវកិច្ចព្រមព្រៀង និងអនុស្សារណៈនៃការយោគយល់គ្នា ដើម្បីធ្វើការចុះហត្ថលេខាជាមួយគ្នា ដែលក្នុងអាចមានសេចក្តីប្រកាសរួមនៃដំណើរទស្សនកិច្ច កិច្ចព្រមព្រៀងលើកលែងទិដ្ឋការលើលិខិតឆ្លងដែន ការទូតនិងផ្លូវការ កិច្ចព្រមព្រៀងស្តីពីការការពារវិនិយោគ អនុស្សារណៈស្តីពីការពិគ្រោះពិភាក្សាខាងនយោបាយ រវាងក្រសួងការបរទេសទាំងពីរ និងកិច្ចព្រមព្រៀងស្តីពីការពង្រឹងទំនាក់ទំនងសេដ្ឋកិច្ច នយោបាយ វប្បធម៌ នៃប្រទេសទាំងពីរ ។
ឯកឧត្តមនាយក រដ្ឋមន្រ្តីនេប៉ាល់ មានប្រសាសន៍សំដែងនូវការអបអរសាទរ ជូនចំពោះគណបក្សប្រជាជនកម្ពុជា ដែលទទួលបានជ័យជំនះភ្លូកទឹកផ្លូកដីពីការបោះឆ្នោតជ្រើសតាំងតំណាងរាស្រ្ត ដែលនាំមកនូវស្ថេរភាពនយោបាយដ៏ល្អសម្រាប់កម្ពុជា។ ជាមួយគ្នានេះ ឯកឧត្តមនាយករដ្ឋមន្រ្តី បានសន្យាថា នឹងរៀបចំទទួលសម្តេចតេជោ ក្នុងការអញ្ជើញទៅបំពេញទស្សនកិច្ចនៅប្រទេសនេប៉ាល់ នៅពេលខាងមុខឲ្យទទួលបានជោគជ័យបំផុត។
