(FN)៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាឧត្តមភរិយា និងជាប្រធានកាកបាទក្រហមកម្ពុជានោះ នៅរសៀលថ្ងៃអង្គារ ៥រោច ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី០៦ ខែមីនា ឆ្នាំ២០១៨នេះ បានដឹកដៃគ្នាអញ្ជើញចូលរួមប្រារព្ធពិធីអបអរសាទរទិវាវប្បធម៌ជាតិលើកទី២០ និងពិសាបាយសាមគ្គីជាមួយអ្នកសិល្បៈនៅមជ្ឈមណ្ឌលកោះពេជ្រ។
ទិវាវប្បធម៌ជាតិ ៣ មីនា ឆ្នាំនេះត្រូវបានប្រារព្វធ្វើឡើងក្រោមប្រធានបទ «យុវជនដើម្បីវប្បធម៌ជាតិ»។ ការជ្រើសរើសយកប្រធានបទនេះ គឺក្នុងបំណងជំរុញឲ្យយុវជនចូលរួមអនុវត្តកាន់តែសកម្មក្នុងការលើកកម្ពស់ការអភិរក្ស និងអភិវឌ្ឍវប្បធម៌ជាតិ ក៏ដូចជាវប្បធម៌ចម្រុះនៅកម្ពុជា។
ប្រសាសន៍សំខាន់ៗរបស់សម្តេចតេជោ ហ៊ុន សែន៖
* សម្ដេចតេជោ ហ៊ុន សែន ស្នើឲ្យរដ្ឋមន្ដ្រីក្រសួងវប្បធម៌ បើសិនជាថ្ងៃទី០៣ ខែមីនា ជាន់ថ្ងៃសៅរ៍ ថ្ងៃអាទិត្យ ត្រូវលើកទៅថ្ងៃច័ន្ទ ឬអង្គារវិញ ព្រោះក្រុមសិល្បករ សិល្បការិនីជាប់រវល់សម្ដែងកម្មវិធីនានា ដែលម្ចាស់កម្មវិធីជួលពួកគេទៅសម្ដែង ព្រោះនេះជាការលំបាករបស់ក្រុមសិល្បករ។
* សម្ដេចតេជោ ហ៊ុន សែន បានបន្ដថា នៅឆ្នាំនេះមានការជួបជុំ៤០០០នាក់ ប៉ុន្ដែនៅឆ្នាំក្រោយនឹងច្រើនជាងនេះទៀត។ សម្ដេចតេជោ ហ៊ុន សែន ក៏អំពាវនាវឲ្យក្រុមសិល្បករ សិល្បការិនីឲ្យចូលរួមកាន់តែច្រើនឡើងនៅឆ្នាំបន្ដបន្ទាប់ទៀត។
* នៅចំពោះមុខក្រុមសិល្បករ សិល្បការិនី សម្ដេចតេជោ ហ៊ុន សែន បានប្រកាសថា សម្ដេចនឹងជួបសំណេះសំណាលជាមួយសិល្បករទាំងអស់មិនតិចជាង១០ឆ្នាំទៀតនោះទេ។
* ជាមួយគ្នានេះ សម្ដេចតេជោ ហ៊ុន សែន ក៏បានបញ្ជាក់ពីអវត្តមាននៅថ្ងៃទី០៤ ខែមេសា ជាមួយក្រុមកីឡាករ កីឡាការិនី ដោយសារតែនៅថ្ងៃនោះសម្ដេចជាប់រវល់ ប្រជុំគណៈកម្មការមេគង្គនៅខេត្តសៀមរាប ដូច្នេះត្រូវពន្យាពេល។
* សម្ដេចតេជោ ហ៊ុន សែន បានយកឱកាសនេះ សូមថ្លែងអំណរគុណដល់ក្រុមសិល្បករ សិល្បការិនីគ្រប់ទម្រង់ និងគ្រប់ជំនាន់ នឹងផ្ដល់ឱកាសសម្ដេចបានបន្ដដឹកនាំប្រទេសជិត៤០មកនេះ។
* សម្ដេចតេជោនាយករដ្ឋមន្រ្តី មានជំនឿយ៉ាងមុតមាំថា សិល្បករ សិល្បការិនី នឹងគាំទ្រសម្ដេចធ្វើជានាយករដ្ឋមន្ដ្រី ហើយបោះឆ្នោតគាំទ្រគណបក្សប្រជាជន។
* សម្ដេចតេជោ ហ៊ុន សែន បានថ្លែងថា វត្តមានសម្ដេច និងភរិយា ព្រមទាំងថ្នាក់ដឹកនាំរាជរដ្ឋាភិបាលនៅក្នុងបន្ទប់តែមួយនេះ ជាការបង្កើនភាពស្និតស្នាលកាន់តែខ្លាំងឡើង។
* សម្ដេចតេជោ ហ៊ុន សែន ស្នើឲ្យទេសរដ្ឋមន្ដ្រី ស៊ុន ចាន់ថុល ឡើងច្រៀងចំរៀងដើម្បីធ្វើឲ្យកម្មវិធីកាន់តែសប្បាយរីករាយ។
* សម្ដេចតេជោ ហ៊ុន សែន បានបញ្ចប់ការថ្លែងសន្ទរកថា នៅវេលាម៉ោង០៦៖០៥នាទី៕
